Chasham e Nam by Ayat Noor NovelR50721 Chasham e Nam by Ayat Noor Episode 30,31

کہاں جا رہی ہو ابیہا…؟؟” اسد شیرازی نے سرسری سا انداز اپنایا… دل میں کھوج سی تھی… “یونیورسٹی…” ذرا سا رخ موڑ کر ابیہا نے اپنے چہرے کے تاثرات ان سے چھپانے چاہے…

“ارے…کل ہی اتنے بڑے حادثے سے گزری ہو… آرام کرو چند دن بیٹا… میں بات کر لوں گا پرنسپل سے… ” اسد شیرازی نے لہجے میں اس کے لیے فکر سموتے ہوۓ کہا تھا… ابیہا لب کاٹ کر رہ گئ… غصہ آ رہا تھا اسے اسد شیرازی کی اس اداکاری پر… بہت مشکل سے اس نے اپنے غصے پر قابو پایا…

“نہیں ڈیڈ…پہلے ہی کافی لیکچرز مس کر دئیے میں نے… ایگزامز بھی قریب ہی ہیں… مجھے اب سنجیدگی سے لینا چاہیے سٹڈی کو… ” اس نے ہر ممکن کوشش کی تھی کہ اس کے لہجے میں غصے کی جھلک نہ دکھائ دے…

“لیکن بیٹا…دشمن سکون سے تو نہیں بیٹھے گا… وہ اپنی شکست پر تڑپ رہا ہو گا… اگر پھر کوئ نقصان پہنچانے کی کوشش کی اس نے تو…؟؟” اسد شیرازی یہی چاہتے تھے کہ وہ گھر میں رہے تاکہ اس سے بات کر کے ایک دو دن میں نکاح کا معاملہ بھی نمٹ جاۓ…

“آپ فکر مت کریں…راجا کو ساتھ لے جا رہی ہوں… احساس ہو گیا ہے مجھے کہ جب تک راجا میرے ساتھ ہے تب تک کوئ میری پرچھائ تک کو بھی نہیں چھو سکتا… “راجا کا نام لیتے ہی اس کے لہجے میں فخر سا در آیا تھا جس نے اسد شیرازی کو چونکایا… چند دن پہلے تو وہ راجا کا نام تک نہیں سننا چاہ رہی تھی…. اور اب… ایک دم اتنی تبدیلیوں کی کوئ معمولی وجہ تو ہرگز نہیں ہو سکتی…

“میں چلتی ہوں ڈیڈ… دیر ہو رہی ہے یونی سے…” دھیمی آواز میں کہہ کر وہ تیز قدموں سے باہر کی جانب بڑھی…

پورچ میں پہنچی تو راجا جو لان میں اسی کا انتظار کر رہا تھا اسے دیکھ کر قریب چلا آیا… پہلے حیرت بھری نگاہ اس کے سراپے ڈالی تھی… لیکن اگلے ہی پل اس کی نگاہوں میں ستائش ابھری تھی ابیہا کے لیے… اس کے قریب آتے ہی وہ مسکرایا… “اچھی لگ رہی ہیں… “سادہ سے لہجے میں اس کی تعریف کرتا وہ ڈرائیونگ سیٹ پر بیٹھا… ابیہا جو اندر اسد شیرازی کو دیکھ کر اپ سیٹ سی ہو گئ تھی راجا کے ایک مختصر سے جملے نے اس کے موڈ پر خوشگوار تاثر چھوڑا تھا…ہلکی سی مسکان نے اس کے لبوں کو چھوا… اس کے بیٹھتے ہی راجا گاڑی آگے بڑھا چکا تھا….

فراز آفندی صبح ہی صبح اسد شیرازی سے ابیہا کے متعلق پوچھ چکا تھا… اور یہ معلوم ہونے پر کہ راجا رات میں ہی اسے دشمنوں کے چنگل سے بچا کر بحفاظت گھر لے آیا ہے اس نے ابیہا کے گھر آنے کا پلان بنایا…یہ سوچ کر کہ اسوقت وہ خاصی جذباتی ہو گی اسی لیے وہ اسے جا کر حوصلہ دے گا… تسلی کے دو بول بول کر اس کا بھروسہ جیتے گا… اس کے سامنے اپنا اچھا امیج بناۓ گا کہ ابیہا کی سب سے زیادہ فکر اسے ہی تو ہے…

صبح کے گیارہ بجے وہ اسد شیرازی کے بنگلے میں موجود تھا… اسد شیرازی خلاف معمول آج آفس کی بجاۓ گھر میں ہی تھے… فراز نے ان سے ابیہا کے متعلق استفسار کیا… اور جو جواب اسے سننے کو ملا اس نے اس کا بنا بنایا موڈ خراب کر دیا تھا… “کیا کہہ رہے ہیں آپ انکل… آئ مین… ابھی کل اس کے ساتھ اتنا کچھ ہوا… وہ بے وقوف سی لڑکی اتنی جلدی خود کو سنبھال بھی گئ…اور آج وہ یونیورسٹی بھی پہنچ گئ… کمال ہے… میں تو یہ سوچ کر آیا تھا کہ اس سے ہمدردی جتاؤں گا… پیار بھری چند باتیں کروں گا جس سے وہ میری طرف مائل ہو جاۓ… اور وہ… یونی پہنچ چکی ہے… ڈسگسٹنگ…” پیشانی مسلتا ادھر سے ادھر چکر لگاتا وہ اپنے غصے کا اظہار کر رہا تھا… اسد شیرازی نے ایک سلگتی سی نگاہ اس پر ڈالی… “بیٹھ جاؤ برخوردار… ورنہ دماغ کے ساتھ ساتھ یہ ٹانگیں بھی ناکارہ ہو جائیں گی… ” اسد شیرازی کے لہجے میں بھی بیزاری تھی… ایک تو وہ صبح سے ابیہا کے عجیب سے رویے کے باعث پریشان تھے… اس پر سے اب یہ فراز آفندی کا درد سر… ان کی جھلاہٹ میں اضافہ ہونے لگا…

فراز آفندی ان سے کچھ فاصلے پر موجود دوسرے صوفے پر بیٹھ گیا… “آپ کو کیا ہوا…؟؟ آپ کچھ پریشان سے لگ رہے ہیں… ” اسے اب جا کر اسد شیرازی کا پریشان چہرہ دکھائ دیا تھا…

“کچھ نہیں یار… بس ابیہا کے رویے نے کچھ خدشات میں مبتلا کر دیا ہے… “اسد شیرازی نے گہری سانس بھرتے ہوۓ صوفے کی پشت سے کمر ٹکائ اور ٹانگ پر ٹانگ رکھی…

“ابیہا کے رویے نے…؟؟ کیا مطلب… ؟؟” فراز آفندی نے آنکھیں سیکڑ کر الجھن بھرے انداز میں دریافت کی…

“جب سے وہ واپس آئ ہے اس کا رویہ بہت سرد سا ہے… پہلے بہت خوش ہو کر ملتی تھی مجھ سے… صبح سامنے آتے ہی خود گڈ مارننگ کا نعرہ لگاتی ہوئ مجھ سے لپٹ جاتی تھی…لیکن آج اس نے نہ تو میرے گڈ مارننگ کا جواب دیا اور نہ ہی گلے لگ کر خوشی کا اظہار کیا…. رات میں بھی اس کا رویہ سرد سا تھا… اور تو اور…وہ راجا جس سے نفرت کا ببانگِ دہل اظہار کرتی تھی آج اسی کے لیے اس کی آواز میں کچھ خاص جذبات محسوس کیے میں نے… اور اسی بات نے مجھے ٹھٹھکنے پر مجبور کر دیا ہے…”اسد شیرازی نے دائیں ہاتھ کی دو انگلیوں سے کنپٹی کو دبایا…

راجا کے ذکر پر فراز سلگ کر رہ گیا… راجا کے لیے اس کے دل میں بھی آگ بھری پڑی تھی…

“انکل…مجھے نہ جانے کیوں آپ کا یہ بندہ تھوڑا مشکوک سا لگتا ہے… آپ کچھ زیادہ ہی بھروسہ کر بیٹھے ہیں… اس کی اصلیت,اس کی حقیقت کچھ اور ہی لگتی ہے مجھے…” وہ لفظوں میں زہر لیے کہہ رہا تھا… اسد شیرازی اس کی بات پر چونکے…

“کیا مطلب…کیا کہنا چاہتے ہو تم…؟؟” ان کی الجھن بھری نگاہیں فراز آفندی کے چہرے پر تھیں…

“مطلب بعد میں سمجھاؤں گا آپ کو…پہلے آپ کو ایک ویڈیو دکھانا چاہتا ہوں… ” فراز نے اپنے سیل کی اسکرین آن کی… اور ایک ویڈیو پلے کر کے سیل اسد شیرازی کے سامنے کر دیا… جس میں راجا کچھ غنڈوں کی پٹائ کر رہا تھا… اسد شیرازی آنکھیں سیکڑے ویڈیو دیکھتے رہے… فراز آفندی کے چہرے پر انوکھی سے چمک تھی…

“یہ ویڈیو دکھانے کا مقصد…؟؟” اسد شیرازی کچھ حد تک اس کی بات سمجھ چکے تھے لیکن پھر بھی اس سے پوچھ لیا…

“مطلب یہ ہے انکل…کہ اس ویڈیو میں جس عمدہ طریقے سے آپ کا یہ بندہ اور ابیہا کا گارڈ راجا ان لوگوں کی دھلائ کر رہا ہے اس سے صاف ظاہر ہے کہ یہ کوئ عام بندہ نہیں ہے… ایسی فائٹنگ کوئ عام آدمی کر ہی نہیں سکتا… اس کے مارنے کے انداز سے صاف ظاہر ہے کہ یہ کوئ ٹرینڈ بندہ ہے… جس نے ان کاموں میں باقاعدہ مہارت حاصل کر رکھی ہے… اور اس طرح کے کاموں میں کن لوگوں کو ٹریننگ دی جاتی ہے یہ آپ بھی اچھی طرح جانتے ہیں… ہو سکتا ہے یہ آپ کے قریب رہ کر آپ کو دھوکہ دے رہا ہو… اب تک آپ کا جتنا نقصان ہوا شاید اس کی وجہ بھی یہی ہو… ایک بار اس بارے میں بھی ضرور سوچیے گا… ” وہ شک کی آگ لگا کر اب مسرور سا وہاں سے جا چکا تھا… جبکہ اسد شیرازی پرسوچ نظروں سے فرش کو دیکھتے کسی خیال میں کھوۓ تھے… اب تک ان کا دھیان راجا کی طرف نہیں گیا تھا…لیکن اس ویڈیو نے انہیں بہت کچھ سوچنے پر مجبور کر دیا تھا…

________

“سنو… کل مجھے وکیل انکل کے پاس جانا ہے… تم بھی میرے ساتھ چلو گے… ڈیڈ کی ساری پراپرٹی کا حساب کتاب وہی دیکھتے ہیں…کچھ ضروری باتیں ہیں جو جاننی ہیں مجھے…” وہ دونوں یونیورسٹی سے واپس آ رہے تھے جب ابیہا نے اسے مخاطب کیا… راجا نے قدرے چونک کر اسے دیکھا… “اوکے… لیکن کس سلسلے میں جانا ہے وہاں…؟؟” راجا کے پوچھنے پر ابیہا نے عبدالواحد کے ساتھ ہونے والی تمام گفتگو اس کے گوشِ گزار کر دی تھی… راجا لب بھینچے سنتا رہا… ان میں سے کچھ باتیں وہ پہلے ہی جانتا تھا جبکہ کچھ باتوں کا انکشاف ابھی ہو رہا تھا… “اوکے… صبح دس بجے چلیں گے… اسد شیرازی سے کہہ دیجیے گا آپ کو اپنی کسی فرینڈ کے ہاں جانا ہے… ” راجا کی بات پر وہ اثبات میں سر ہلا گئ…

“اسد شیرازی کو کسی قسم کا شک تو نہیں ہوا صبح آپ پہ…؟؟” راجا نے موضوع بدلنے کی کوشش کی…

“پتا نہیں…. اپنی طرف سے تو کوشش کی تھی میں نے کہ نہ ہی پتا چلے انہیں کچھ…لیکن مجھ سے یہ اداکاری نہیں ہوتی… اپنے دل کی بات چھپانی نہیں آتی… وہ میرے سامنے آتے ہیں تو میرا دل چاہتا ہے ان کا گریبان پکڑ کر ان سے سوال کروں کہ کیا مل گیا میرے پیرنٹس کو مار کر… ان سے پوچھوں کہ انہیں ذرا سا بھی ڈر نہیں ہے اس اعلٰی و ارفع ذات کا جو اوپر بیٹھی ہے… یوں لوگوں کا خون بہاتے,ان کی جان لیتے ہوۓ ایک پل کو بھی ان کے ہاتھ نہیں کپکپاتے کیا…؟؟ کیسے کوئ اتنا بے حس ہو سکتا ہے… ” بات کرتے کرتے آخر میں اس کی آواز بھرائ تھی… آنکھوں میں آئ نمی کو چھپانے کی کوشش میں وہ سر جھکا گئ… راجا اس کی بات پر خاموش سا ہو گیا…

“اس سنڈے فراز آفندی لوگوں کی واپسی ہے… کل تو نکاح کینسل ہو گیا… اب اسد شیرازی نہ جانے کیا قدم اٹھاۓ گا آگے…آپ کو انتہائ محتاط رہنا ہو گا اب… حالات نہ جانے کب کونسا رخ اختیار کر لیں… ” راجا نے اسے حالات کی نزاکت سے آگاہ کیا تھا… وہ چاہتا تھا کہ ابیہا آنے والے ہر مشکل یا آسان وقت کے لیے پہلے سے ہی خود کو تیار کر لے…

“میں کسی صورت بھی فراز آفندی سے نکاح نہیں کروں گی…اگر انکل نے مجھ سے اس سلسلے میں کوئ بات کی بھی تو میں صاف انکار کر دوں گی انہیں…کیونکہ مجھے اب…” وہ اپنی بات کہتی ہوئ راجا کی جانب دیکھ رہی تھی جب بات ادھوری چھوڑ کر قدرے چونک سی گئ… اس کی نگاہیں راجا کے چہرے پر ہی جمی تھیں…

“کیا ہوا…؟؟” بات ادھوری رہ جانے کے باعث راجا نے اس کی طرف دیکھا… جو راجا کے چہرے کو ہی تکے جا رہی تھی… نگاہوں میں الجھن سی تھی…

“تم… تم ابتہاج ہی ہو نا… ؟؟” وہ بڑبڑانے کے سے انداز میں بولی… راجا نے حیرت سے اس کی بات سنی…

“جی بالکل… کیوں کیا ہوا…؟؟” وہ ابھی تک ابیہا کی الجھن کی وجہ نہیں جان پایا تھا…

“ابتہاج کی آنکھیں تو… اگر تم ہی ابتہاج ہو تو پھر تمہاری آنکھوں کا رنگ گہرا سیاہ کیوں ہے… ؟؟” وہ عجیب سے انداز میں بولی…لہجے میں کئ خدشات موجود تھے… راجا اس کی بات سن کر بے ساختہ مسکرایا…

“لینز کا کمال… ” مختصر سا جواب دے کر اس نے مہارت سے ڈرائیو کرتے ہوۓ اسٹیرنگ گھما کر ایک موڑ کاٹا…

“لینز…؟؟کیوں… کہیں تم بھی مجھے دھوکہ تو نہیں دے رہے… ؟؟” وہ شکی انداز میں آنکھیں سیکڑ کر اسے دیکھ رہی تھی…

“اوہ کم آن اینجل… اب ایسی بھی بات نہیں…مانا کہ آپ کا زندگی میں دھوکہ دینے والے بہت سے افراد سے پالا پڑا ہے…لیکن اب ہر فرد کو ایک ہی نظریے سے تو مت دیکھیں…کچھ اچھے لوگ بھی ہوتے ہیں… اور اگر میں ابتہاج نہ ہوتا تو مجھے آپکا بچپن کا نِک نیم کیسے معلوم ہوتا…اور وہ پائل جو آپ نے مجھے ہی دی تھی دوستی کی نشانی کے طور پر… کیا وہی کافی نہیں ہے میری شناخت کے لیے…اب بھی آپ کو شک ہے مجھ پر…؟؟” راجا کے لہجے میں ہلکی سی خفگی کا عنصر تھا… ابیہا کے دل کو تھوڑی تسلی ہوئ اس کی بات سن کر…

“لیکن اتنی پیاری آنکھیں ہیں تمہاری…پھر بھلا لینز کیوں لگاتے ہو…؟؟” اس کی سوئ ابھی تک وہیں اٹکی تھی…

راجا چند پل کے لیے خاموش ہوا…

“بتا دوں گا یہ بھی… مناسب وقت آنے پر… اور اپنی نیلی آنکھیں دکھا بھی دوں گا…لیکن ابھی نہیں…اور پلیز…اصرار مت کیجیے گا… میں آپ کی کوئ بات ٹال نہیں سکتا… لیکن اس بارے میں فی الحال کچھ بتا بھی نہیں سکتا.. ” دھیمے لہجے میں کہہ کر اس نے بات ختم کرنی چاہی… وہ ابیہا کو اپنے مشن کے حوالے سے کسی قسم کی کوئ خبر نہیں دینا چاہتا تھا… کہ اس کا جو مشن تھا اس میں اس نے اپنا حلیہ, اپنی لُک کو مکمل طور پر چینج کیا تھا تبھی اسد شیرازی کی زندگی میں آیا تھا… ابیہا لاکھ دل کو عزیز سہی…لیکن وطنِ پاک اس فہرست میں اوّل نمبر پر تھا… اور وطن کی خاطر ملے اس مشن کے لیے وہ کسی قسم کا کوئ رسک نہیں لینا چاہتا تھا…

ابیہا اثبات میں سر ہلا کر خاموش ہو گئ… وہ اسے زیادہ کریدنا نہیں چاہتی تھی…

شام کا وقت تھا… اسد شیرازی ریمورٹ ہاتھ میں پکڑے بے مقصد سے چینل سرچنگ میں مصروف تھے..

ذہن میں دوپہر کے وقت فراز آفندی کے ساتھ ہونے والی باتیں گردش کر رہی تھیں…. وہ مسلسل الجھ رہے تھے… راجا کی طرف اب تک ان کا دھیان نہیں گیا تھا…کہ وہ راجا کو سیدھا سادھا انسان سمجھتے تھے…جو حالات کی ٹھوکروں میں پلا بڑھا تھا… اور ان کے نزدیک راجا کے پاس اتنا دماغ نہیں تھا کہ وہ اسد شیرازی کے خلاف کچھ کرنے کا سوچ بھی سکتا… خاص کر اسد شیرازی کے خاص ٹھکانوں کو تباہ کرنا… بالکل بھی نہیں…یہ راجا کے بس کی بات نہیں تھی… جس طرح دشمن سامنے آۓ بغیر ان پر وار پہ وار کر رہا تھا اس سے ظاہر ہوتا تھا کہ وہ انتہائ شاطر اور چالاک ہے…جبکہ راجا…وہ تو معصوم سا تھا… جسے ہاتھ چلانا ہی آتے تھے… دماغ چلانا نہیں…

وہ اب تک فراز آفندی کی باتوں کو اس کی کوئ غلط فہمی ہی سمجھے بیٹھے تھے… انہی سوچوں میں گم انہوں نے ریمورٹ کا بٹن دبایا…

اگلا چینل آ چکا تھا… اسد شیرازی پھر سے بٹن دبانے ہی والے تھے کہ ایک دم رکے… آنکھیں سیکڑ کر اسکرین کی طرف دیکھا…سامنے نیوز چل رہی تھی…

“کل شام آٹھ بجے کے قریب رائل ہوٹل سے سب انسپکٹر بلاول رضا کو ایک آدمی گھسیٹتا ہوا اپنے ساتھ لے گیا… اور کسی ذاتی عناد کے باعث جوہر ٹاؤن میں ایک زیرِ تعمیر عمارت کی آٹھویں منزل سے دھکا دے دیا… مزید تحقیقات سے معلوم ہوا ہے کہ آٹھویں منزل سے پھینکنے سے پہلے سب انسپکٹر بلاول رضا پر تشدد بھی کیا گیا اور ان کی ٹانگ پر ایک فائر بھی کیا گیا… قاتل کا چہرہ سی سی ٹی وی فوٹیج میں نظر نہیں آیا…. کیونکہ اس نے ہڈ سر پر گرا کر اپنے چہرے کو چھپا رکھا تھا اور کیمرے کی جانب اس کی پشت ہی تھی……اسی وجہ سے ابھی تک اس کا کوئ سراغ نہیں ملا ہے…” نیوز کاسٹر تیز تیز خبریں پڑھتی اپنی ڈیوٹی سر انجام دے رہی تھی… جبکہ اسد شیرازی دنگ سے اسکرین کے ایک جانب نظر آتی فوٹیج دیکھ رہے تھے جس میں ہوٹل کی لابی کا منظر تھا… سب انسپکٹر بلاول رضا کو کوئ گریبان سے پکڑے گھسیٹتا ہوا لے جا رہا تھا… اسے کیمروں کی پوزیشنز کا شاید اچھی طرح اندازہ تھا… تبھی اس نے سر پر ہڈ گرا کر پوری کوشش کی تھی کہ اس کا چہرہ نظر نہ آۓ…اور وہ اپنی اس کوشش میں کامیاب بھی رہا تھا… لیکن اسد شیرازی ایک لمحے سے پہلے اسے پہچان گۓ تھے…کیونکہ کل جب راجا ابیہا کے اغواء کی خبر سن کر گھر سے تیزی سے نکلا اس وقت اس کی ڈریسنگ یہی تھی جو سی سی ٹی وی فوٹیج میں نظر آ رہی تھی… قد کاٹھ سے بھی واضح نظر آ رہا تھا کہ یہ راجا ہی ہے… اسد شیرازی بے یقین سے اسکرین کو دیکھے گۓ… اس کا مطلب…فراز آفندی کا شک صحیح تھا… یقیناً یہ انسان اپنا اصلی روپ ان سے چھپاۓ ہوا تھا… جس میں اتنی ہمت تھی کہ ایک پبلک پلیس سے سب کے سامنے سب انسپکٹر کو بے خوف و خطر گھسیٹ کر لے جاۓ وہ بھی کسی کی نظروں میں آۓ بغیر…تو وہ اسد شیرازی کو بھی تو دھوکہ دے سکتا تھا… چند لمحوں بعد وہ کسی سے فون پر محوِ گفتگو تھے… “ایک تصویر ای میل کر رہا ہوں… اس کے بارے میں جتنی انفارمیشن حاصل کر سکتے ہو کر کے مجھے دو… اور کل سے اپنے چند بندوں کو اس کے پیچھے لگاؤ… تا کہ وہ اس کی ہر ہر حرکت پر نگاہ رکھیں… وہ کہاں جاتا ہے, کیا کرتا ہے سب کچھ… ہر بات مجھے معلوم ہونی چاہیے… ” سرد لہجے میں کہہ کر انہوں نے فون رکھا… چہرے کے تاثرات میں سختی بڑھتی جا رہی تھی…

وہ اس وقت اپنے روم میں کاؤچ پر بیٹھا تھا… گود میں لیب ٹاپ تھا جبکہ کانوں میں ہینڈز فری… سامنے اسکائپ پر میجر حبیب آن لائن تھے…

“کیپٹن ابتہاج…تم اتنی بڑی بے وقوفی کیسے کر سکتے ہو…؟؟” ان کے چہرے پر دبا دبا سا غصہ تھا… ابتہاج نے ناسمجھی سے ان کی جانب دیکھا…

“سوری سر… مطلب نہیں سمجھ پایا آپ کی بات کا…” اس نے ادب بھرے لہجے میں اپنی الجھن بیان کی…

“کیا کیا ہے تم نے کل…؟؟ دن دہاڑے سب کے سامنے سب انسپکٹر کو اس ہوٹل سے گھسیٹتے ہوۓ لے گۓ… اور تو اور… اسے جان سے مار دیا… یہ سب تمہارے مشن کا حصہ تو ہرگز نہیں تھا… تم جانتے بھی ہو کہ تمہاری یہ حرکت تمہارے لیے کتنی پریشانیاں کھڑی کر سکتی ہے… ؟؟” میجر حبیب کو پہلی بار ابتہاج پر اس قدر شدید غصہ آیا تھا… ابتہاج نے گہری سانس خارج کی… تو بالآخر ان تک بھی پہنچ ہی گئ تھی یہ بات… چند لمحوں بعد وہ ان کی طرف متوجہ ہوا…

“سر…ہمارے اس پاک وطن میں سے ہر کرمنل, اور غدار کو ختم کرنا ہی ہمارا مشن ہے… مجرم تو مجرم ہی ہوتا ہے نا… ہھر چاہے وہ سب انسپکٹر ہو یا کوئ عام شہری… دونوں کے لیے ایک ہی قانون ہونا چاہیے… اور آپ جانتے ہیں کہ میں مجرم کو فوری سزا دینے پر یقین رکھتا ہوں… ” اس نے دھیمے لہجے میں ہی اپنے اس عمل کی وضاحت کی تھی…

میجر حیب نے پیشانی مسلی…

“وہ بات تو ٹھیک ہے لیکن اس بار تم نے قانون کو اپنے ہاتھ میں لینے کی کوشش کی ہے… میڈیا اس بات کو اچھال رہا ہے… اگر تمہارے بارے میں کوئ بھی بات نکلی تو تم جس مشن پر ہو نہ صرف اس مشن پر ایکسپوز ہو جاؤ گے بلکہ پولیس ڈیپارٹمنٹ بھی اس بات پر سخت ردعمل ظاہر کرے گا… ہر کام اتنے پرفیکٹ طریقے سے کرتے ہو… یہ غلطی کرتے وقت تم نے ایک بار بھی نہیں سوچا…؟؟”میجر حبیب اسے اپنے بیٹے کی مانند سمجھتے تھے… تبھی اسے کبھی کبھار ڈانٹ بھی لیتے تھے… جانتے تھے کہ وہ ان کی اس ڈانٹ کو بھی مثبت انداز میں لیتا ہے…

“جب کرمنلز کرائم کرنے سے پہلے ایک بار بھی نہیں سوچتے سر… تو پھر ہم ان کرمنلز کو سزا دینے کے لیے کیوں سوچیں… وہ شخص ویسے بھی غدار ہی تھا… حرام کا پیسہ کھا کر غریبوں اور بے گناہوں کو ان کاؤنٹر میں مارتا تھا…اس جیسے بے حس اور خود غرض انسان کو زندہ رہنے کا کوئ حق نہیں تھا… اس کی ساری ڈیٹیلز جاننے کے بعد ہی میں نے یہ قدم اٹھایا….باقی رہ گئ بات میرے ایکسپوز ہونے کی… تو آپ فکر مت کریں سر… میرے بارے میں کسی کو بھی کچھ بھی معلوم نہیں ہو گا… میں سب سنبھالنا جانتا ہوں…”

راجا کی بات پر میجر حبیب قدرے پر سکون سے ہوۓ… اتنا تو انہیں بھی بھروسہ تھا کہ کیپٹن ابتہاج سب سنبھال سکتا ہے…

“اوکے… لیکن آئندہ خیال رکھنا… اس طرح کی غلطی دوبارہ نہیں ہونی چاہیے… ” وارننگ کے سے انداز میں کہ کر ویڈیو کال ڈسکنکٹ کر دی گئ تھی… راجا نے بھی لیب شٹ ڈاؤن کرتے ہوۓ اسکرین فولڈ کر دی…

Episode 31