Chasham e Nam by Ayat Noor NovelR50721 Chasham e Nam by Ayat Noor Episode 24,25

بخت کے تخت سے یک لخت اتارا ہوا شخص…

تو نے دیکھا ہے کبھی جیت کے ہارا ہوا شخص…”

وہ بہت دیر سے اس باکسنگ کلب میں موجود تھا… جب سے اسے ابیہا کی زبان سے یہ معلوم ہوا تھا کہ اس فرائیڈے یعنی فقط دو دن بعد اس کا نکاح ہے…وہ بھی فراز آفندی کے ساتھ…تب سے اس کا دل اضطرابی کیفیت کا شکار تھا… بے چینی حد سے سوا تھی… وہ لڑکی اس کی نفرت میں خود اپنی زندگی برباد کرنے جا رہی تھی… اس بات سے بے خبر تھی کہ کیسا عذاب بھرا رستہ چن رہی ہے وہ… اور راجا… وہ اس وقت خود کو شدید بے بس محسوس کر رہا تھا… سمجھ میں نہیں آ رہا تھا کہ اسے کیسے روکے یہ سب کرنے سے… سختی وہ اس پر کرنا نہیں چاہتا تھا…اور نرمی سے وہ پاگل لڑکی کوئ بات سننے کو تیار نہ تھی… اس کا دل جل رہا تھا… اپنے اندر کی آگ کو کم کرنے کے لیے ہی وہ باکسنگ کلب آیا تھا… پنچنگ بیگ پر پے در پے مکے برساتے ہوۓ وہ جیسے پاگل ہو رہا تھا… چہرہ پسینے سے تر تھا… ہاتھوں کی انگلیوں سے اب خون رسنے لگا تھا…لیکن اسے تو جیسے کوئ ہوش ہی نہ تھا… ذہن میں ابیہا کا کہا ایک ہی فقرہ بار بار گونج رہا تھا جس میں اس نے اپنے نکاح کی اطلاع دی تھی… اور یہ فقرہ مسلسل اس کے اشتعال میں اضافہ کر رہا تھا… رات کے دو بج رہے تھے… کلب سے سب لوگ جا چکے تھے… جب باکسنگ کلب کا مالک اس کے پاس چلا آیا…. “ارے بس کر دو بھائ… ایسا بھی کیا غصہ کہ اپنی ہی تکلیف کا احساس نہیں تمہیں… حالت دیکھو ذرا اپنی…” اس کی بات پر راجا چونکا… ایک نظر اسے دیکھ کر اپنے ہاتھوں کی جانب نگاہ دوڑائ… پسینے سے شرابور ہوتے ہوۓ وہ گہرے سانس بھرنے لگا… چند لمحوں بعد اردگرد دیکھا تو کلب خالی ہونے کا احساس ہوا… سامنے کھڑے شخص کی آنکھوں کو اور ہاتھ میں موجود چابیوں کو دیکھ کر راجا سمجھ گیا تھا کہ وہ اب کلب بند کرنا چاہ رہا ہے… تبھی پاس پڑی بوتل اٹھا کر ایک جانب بیٹھا اور پانی کے گھونٹ بھرنے لگا… پانی پی کر وہ اٹھا… شرٹ پہنی… اور کلب سے نکل آیا… رات کے اس وقت تمام سڑکیں سنسان تھیں… وہ تھکے تھکے انداز میں ڈھیلے قدموں سے فٹ پاتھ پر چلنے لگا… نہ جانے کیوں آج گھر جانے کا دل نہیں چاہ رہا تھا… وہ سخت جان تھا… لوگ اسے پتھر دل اور بے حس جیسے القابات سے نوازتے تھے… یہاں تک کہ اس کے ساتھ کام کرنے والے لوگ بھی اسے سنگدل کہہ کر مخاطب کرتے… جس نے کبھی کسے لڑکی کی طرف نگاہ نہیں کی تھی… اپنی طرف بڑھنے والی ہر لڑکی کی حوصلہ شکنی کی تھی… بلکہ ڈپٹ کر رکھ دیتا تھا… ہاں وہ تھا بے حس… لیکن نہ جانے کیوں ابیہا کے معاملے میں وہ بے حس نہیں ہو پا رہا تھا… وہ واحد لڑکی تھی جو اس کی کمزوری بن گئ تھی…اور راجا چاہ کر بھی اپنے دل کو اس کے خلاف نہ کر پاتا… اس کی بے اعتنائ, اس کی سردمہری, اس کی نفرت سب کچھ سہہ رہا تھا وہ چپ چاپ… اندر ہی اندر اس کی تلخ باتیں اور تنفر بھرا رویہ اسے توڑتا ضرور تھا… زخمی زخمی کر دیتا تھا مگر وہ بغیر کوئ آہ کیے برداشت کر رہا تھا…. لیکن اب اس کی شادی کی خبر سن کر نہ جانے کیوں وہ ٹوٹنے لگا تھا… دل کو سمجھانے کی بہت کوشش کی تھی لیکن دل کچھ سننے کو تیار ہی نہ تھا… اگر وہ کسی ایسے انسان کو اس پر فوقیت دیتی جو راجا کے مقابل آ سکتا… اور جس کے ساتھ ابیہا خوش رہ سکتی تو شاید دل کو سمجھانا کچھ آسان ہو بھی جاتا… وہ دل پہ پتھر رکھ کر اس کی خوشی کی خاطر اس سے جدا ہو جاتا…لیکن یہاں یہی بات تو سب سے زیادہ تکلیف دہ تھی کہ اس نے راجا کے مقابلے میں کسی کو چنا بھی تو کسے… راجا کے کزن کو… وہ جس کی فطرت میں ہی لوگوں کو دھوکہ دینا ہے… جو صرف ہوس کا مارا ایک انسان تھا… جس کے نزدیک عورت کی کوئ عزت نہ تھی… جو عورت کو فقط ایک کھلونا سمجھتا تھا… دل بہلایا اور پھینک دیا… اگر ابیہا کی اس سے شادی ہو گئ تو ابیہا کن تکلیفوں سے گزرے گی یہ سوچ ہی راجا کو سخت اذیت میں مبتلا کر رہی تھی… بے بس سا بالوں میں ہاتھ پھیرتا وہ چلتا جا رہا تھا جب وہاں خالی سڑک پر ایک گاڑی آن رکی… راجا نے سر اٹھا کر دیکھا… وہ سب بھی راجا کی طرف ہی متوجہ تھے… اور گاڑی رکتے ہی ہتھیار لیے اب راجا کی طرف بڑھ رہے تھے… راجا نے آنکھیں سیکڑ کر انہیں دیکھا… وہ ان میں سے کسی کو بھی نہیں پہچانتا تھا… نہ ان میں سے کسی کی اس سے دشمنی تھی… پھر بھلا وہ ہاکیاں اور لاٹھیاں پکڑے اس کی طرف کیوں بڑھ رہے تھے… حیران سا وہ انہیں دیکھے گیا…

________

وہ لوگ جو بھی تھے اب اس کے قریب آ چکے تھے…

“کون ہو تم لوگ… ؟؟” راجا نے ان بپھرے ہوۓ سات افراد کی جانب دیکھا… اگر وہ اس پر حملہ کرتے تو راجا کو ان سب کو پچھاڑنے میں پانچ منٹ بھی نہیں لگنے تھے… لیکن وہ اس وقت لڑائ کے موڈ میں نہیں تھا… ویسے بھی جب وہ جانتا ہی نہ تھا کہ وہ ہیں کون تو بلاوجہ کیوں مارتا انہیں… اس کی بات پر سب سے آگے کھڑے بن مانس کی طرح دکھتے خاصے صحت مند حبشی نما شخص نے قہقہہ لگایا… اپنے انداز سے وہ ان سب کا سردار لگتا تھا…

“تم یہ جان کر کیا کرو گے کہ ہم کون ہیں… ؟؟ بس اتنا جان لو کہ آج تمہاری موت بن کر آۓ ہیں ہم… ” وہ اپنی موٹی بھدی آواز میں غرایا… راجا نے ابرو اٹھا کر اسے دیکھا…جیسے پوچھ رہا ہو… “سیرئیسلی…” کہتے ہوۓ اس نے شرٹ کے بازو کہنیوں تک فولڈ کیے… غصہ اسے پہلے ہی بہت تھا… اب یہ لوگ آگۓ تھے جلتی آگ میں ہاتھ ڈالنے… تو جھلسنا تو تھا ہی انہیں… بھڑوں کے چھتے میں ہاتھ ڈال کر کوئ بھلا کیسے بچ سکتا ہے نشانہ بننے سے…

اس حبشی نے پیچھے اپنے ساتھیوں کو دیکھا… “مارو سالے کو… ” بلند آواز میں حکم دیا… اس کے کہنے کی دیر تھی وہ سب ایک ساتھ راجا کی طرف بڑھے… راجا جو پہلے ہی چوکنا سا کھڑا تھا اس نے اپنے مارشل آرٹس میں سیکھے داؤ پیچ ان پر آزماتے ہوۓ اگلے چار منٹ میں ان کی اچھی خاصی دھلائ کی… کافی دور موجود ایک گاڑی میں بیٹھا فراز آفندی جو اپنے دانست میں خاصے طاقتور غنڈے لایا تھا راجا کے ہاتھ پاؤں تڑوانے کے لیے تاکہ اس سے اپنی بے عزتی کا بدلہ لے سکے…وہ بھی دنگ سا اسے لڑتے ہوۓ دیکھ رہا تھا… اسے یہ اندازہ تو ہو گیا تھا کہ وہ غنڈے راجا کا کچھ بگاڑ نہیں سکتے… تبھی حاضر دماغی کا مظاہرہ کرتے ہوۓ اس نے جلدی سے اپنا موبائل نکالا اور راجا کی فائیٹنگ کی ویڈیو بنانے لگا…

ٹھیک چار منٹ بعد وہ سب جو راجا کے ہاتھ پاؤں توڑنے آۓ تھے وہ اب خود اپنی ہڈیاں تڑواۓ کراہتے ہوۓ وہاں سے بھاگ نکلے… وہ حبشی شخص جو پہلے بڑی بڑھکیں مار رہا تھا وہ تو اپنے ساتھیوں کو پٹتا دیکھ کر خود لڑے بغیر ہی سب سے پہلے بھاگ گیا تھا…

راجا نے نفرت بھری نگاہوں سے انہیں اوجھل ہونے تک دیکھا… منہ ہی منہ میں انہیں چند القابات سے نوازا… بالوں میں ہاتھ پھیر کر غصے کو قابو کرنے کی کوشش کی… ان کے اوجھل ہوتے ہی وہ بھی آگے بڑھ گیا…جبکہ فراز آفندی کی پرسوچ نظریں اس پر جمی تھیں… “کچھ تو ہے جس کی پردہ داری ہے… میں یقین سے کہہ سکتا ہوں کہ تم جو دکھتے ہو, وہ تم ہو نہیں…اور جو تم ہو, وہ ظاہر نہیں کرتے…یقیناً تم کوئ عام آدمی نہیں ہو…کیونکہ اتنی پرفیکٹ فائیٹنگ تو کوئ پروفیشنل فائیٹر ہی کر سکتا ہے… پتا لگانا ہی پڑے گا کہ آخر چکر کیا ہے… ” وہ کچھ سوچتے ہوۓ بڑبڑا رہا تھا…اس کا پلان تو ناکام ہو گیا تھا…لیکن راجا سے انتقام لینے کا ایک اور راستہ دکھائ دینے لگا تھا… وہ آنکھیں سکوڑے دور جاتے راجا کو تک رہا تھا…

وقت پر لگا کر اڑتا گیا… تین سال مزید گزر گۓ… ان تین سالوں میں راجا نے (SSG) کمانڈو کے طور پر مختلف مشن سر انجام دئیے… ساتھ ہی ساتھ مختلف ٹریننگز بھی لیتا رہا…اور اپنے حوصلے,ہمت اور ارادے کی پختگی کی بدولت جلد ہی بڑے افسران کی نگاہوں میں آ گیا… ٹریننگز کے دوران اس کی چوکسی اور پھرتی کی بدولت کئ افسران بھی دانتوں میں انگلیا دبا کر رہ گۓ… یقیناً وہ کمانذوز میں ایک قابل قدر اضافہ ثابت ہوا تھا… اب تک اس نے اپنے کسی مشن کو بھی ناکام نہیں ہونے دیا تھا… مشکل سے مشکل مراحل کو بھی حوصلہ مندی سے طے کیا… (SSG) کمانڈوز کی ٹریننگز اتنی مشکل ہوتی تھیں کہ اس کے کئ ساتھی درمیان میں ہی چھوڑ کر بھاگ گۓ… جب انہوں نے ٹریننگ شروع کی تب ایک ہزار افراد تھے جو چنے گۓ تھے… لیکن ٹریننگز کے دوران کچھ خود سختیاں نہ جھیل پانے کے باعث چھوڑ گۓ اور باقی افراد کو افسران نے کسی نہ کسی کوتاہی پر نکال باہر کیا… وہ صرف پندرہ افراد بچے تھے جنہیں سب سے آخری اور سب سے مشکل مرحلہ طے کرنا تھا…

سامنے کھلا اور کافی بڑا گراؤنڈ تھا جہاں دو ہیلی کاپٹر کھڑے تھے… وہ پندرہ افراد اپنا ضروری سامان لیے اس گراؤنڈ میں ہیلی کاپٹرز سے کچھ فاصلے پر دو قطاروں کی صورت کھڑے تھے… سامنے ان کے چیف کھڑے تھے چند ہدایات دے رہے تھے…

“لسن ٹو می ویری کئیر فلی آل جینٹل مین… یہ آخری مرحلہ ہے… اور سب سے زیادہ مشکل بھی… بہت سے افراد اس مرحلے پر آ کر خوفزدہ ہوتے ہیں اور بھاگ جاتے ہیں… آپ سب سے ایک بار پھر کہا جا رہا ہے… اگر کسی کو واپس جانا ہے تو جا سکتا ہے… ہمیں نہیں معلوم کہ پندرہ دن بعد آپ میں سے کون زندہ واپس لوٹے گا اور کون نہیں… آپ کو تمام گُر سکھا دئیے گۓ ہیں… جنگل میں آپ کسی قسم کا کوئ ہتھیار لے کر نہیں جائیں گے… آپ کو اپنی بقا کے لیے خود لڑنا ہو گا… وہاں موجود خطرناک جنگلی جانوروں سے… ہمیں نہیں معلوم کہ آپ جنگل کے کس حصے میں جائیں گے… آپ سب کو جو نقشے دئیے گۓ ہیں اس جنگل کے… وہاں ایک جگہ کو مارک کیا گیا ہے… نقشہ دیکھ کر آپ کو پندرہ دن میں اس جگہ تک پہنچنا ہے… چند منٹ میں ہم روانہ ہو رہے ہیں… اب آپ سے مارک کی گئ جگہ پر ہی ملاقات ہو گی ٹھیک پندرہ دن بعد… اور میں آپ سب جوانوں کو وہاں دیکھنا چاہوں گا…اس مرحلے کو طے کرنے کے لیے سب سے زیادہ ضروری ہے آپ کی ہمت… دل مضبوط رکھیں گے تو کوئ رکاوٹ آپ کے راستے میں مخل نہیں ہو گی… ورنہ سنا تو ہو گا ہی آپ نے بھی کہ جو ڈر گیا وہ مر گیا… ایک بار پھر اپنے بیگز چیک کریں… میپ اور پانی کی بوتل کے علاوہ کچھ نہیں ہونا چاہیے آپ کے پاس…ہری اپ…” چیف نے کہا تو وہ سب پھر سے اپنے کندھوں کے ساتھ لٹکے چھوٹے بیگز چیک کرنے لگے… کچھ ہی منٹس بعد وہ سب ہیلی کاپٹرز کی طرف جا رہے تھے… اس بات سے انجان کہ نہ جانے وہاں کون لقمۂ اجل بنے گا,اور کس کی قسمت میں واپسی ہو گی…

نکاح کا دن آن پہنچا تھا… مرزا جمال آفندی کے کہنے پر سادگی سے نکاح کیا جا رہا تھا…. صرف اسد شیرازی کے چند قریبی جاننے والے مدعو تھے… اسد شیرازی ملازموں کو ہدایات دیتے ادھر سے ادھر تمام انتظامات دیکھ رہے تھے… خوشی سے چہرہ دمک رہا تھا… بالآخر اتنے سالوں کا انتظار ختم ہونے کو تھا… بے شک ابھی صرف نکاح تھا لیکن ایک مرحلہ تو طے ہو رہا تھا نا… نکاح ہو جانے کے بعد رخصتی کا ایسا کوئ خاص مسئلہ بھی نہیں رہ جاتا… اگر ابیہا کو ان کی سچائ معلوم ہو بھی جاۓ نکاح کے بعد…تو بھی وہ کچھ کر نہیں سکے گی… رخصتی تو زبردستی بھی کروائ جا سکتی ہے… یہی سوچ انہیں خوش رکھے ہوۓ تھی…

ابیہا آج صبح سے ہی بے کل تھی… رہ رہ کر نہ جانے کیوں دل میں ہول اٹھ رہے تھے… شام چھے بجے کا وقت رکھا گیا تھا نکاح کا… اور جیسے جیسے وات گزر رہا تھا وہ بدحواس سی ہوتی جا رہی تھی… کبھی دل دہائیاں دینے لگتا… اسے احساس دلانے لگتا کہ وہ جو کچھ کر رہی ہے وہ سراسر غلط ہے… تو کبھی دماغ اسے مشورہ دیتا کہ جو ہو رہا ہے بالکل درست ہو رہا ہے… وہ اگر اپنے پیرنٹس کے قاتل کو معاف کر کے اس سے شادی کرے تو روزِ محشر پیرنٹس کو کیا منہ دکھاۓ گی… یہی سوچ کر وہ خود پر قابو پاۓ ہوۓ تھی… سلگتے تڑپتے دل کی آہ و بکا کو نظرانداز کر دیا تھا… جب دل راجا کی طرفداری کرنے لگتا وہ اپنے پیرنٹس کی تصویر کو دیکھتی رہتی… ان کی موت کا منظر اس کی نگاہوں میں گھوم جاتا… خنجر پکڑے نظر آتا راجا اس کی تلخیوں کو مزید توانائ بخشتا… دو بجے کے قریب زینی آئ تھی اس کے کمرے میں… اپنے فرینڈز میں سے اس نے صرف زینی کو مدعو کیا تھا کہ اس کی موجودگی میں دل کو سہارا رہتا… باقی کسی دوست کو خبر نہ تھی اس کے نکاح کی… “چلو بیا… پارلر کے لیے لیٹ ہو رہے ہیں… جلدی کرو… ” زینی خوشی سے بھرپور چہکتی آواز میں اس کے پاس آتی اس کا ہاتھ تھام کر اسے اٹھانے لگی… ابیہا کی بے کلی میں اضافہ ہونے لگا… اپنی تمام سوچوں کو جھٹکتی وہ اٹھی… روم سے نکل کر وہ دونوں لاؤنج سے گزر رہی تھیں جب ابیہا کی نگاہ ایک جانب اسٹیج ڈیکوریٹ کرواتے راجا پر پڑی… راجا بھی اسی کی جانب دیکھ رہا تھا…

“میری وضاحت سنے بغیر تم موردِ الزام ٹھہرا کر گۓ ہو…

تمہیں خبر بھی ہے جانِ جاناں, نادانی میں یہ کیا کر گۓ ہو…؟؟”

(حیا انور)

راجا کی آنکھوں میں اذیت اور بے بسی بھرا احساس دیکھ کر ابیہا نے جھٹ رخ موڑا اور تیزی سے وہاں سے نکل آئ…

کچھ ہی دیر بعد وہ اور زینی گاڑی میں بیٹھ رہی تھیں… گاڑی کی ڈرائیونگ سیٹ پر ڈرائیور موجود تھا… راجا اسد شیرازی کے ساتھ دوسرے کاموں میں مصروف تھا… ویسے بھی ابیہا نے صاف لفظوں میں کہہ دیا تھا کہ وہ ڈرائیور کے ساتھ جاۓ گی پارلر…

ان کی گاڑی نکلتے ہی پیچھے ایک اور گاڑی نکلی جس میں تین گارڈز موجود تھے…

تمام انتظامات مکمل ہو چکے تھے… فراز آفندی بھی مرزا جمال آفندی کے ساتھ وہاں آ چکا تھا… راجا سر جھکاۓ سنجیدہ چہرہ لیے ادھر ادھر مختلف کام نمٹا رہا تھا… کبھی کبھار گھڑی پر بھی نگاہ ڈال لیتا… ساڑھے پانچ ہو رہے تھے… ابیہا اور زینی ابھی تک نہیں آئیں تھیں… اس وقت تک تو انہیں آ جانا چاہیے تھا… اسد شیرازی بھی پریشانی سے گھڑی کی جانب دیکھتے ان کے منتظر تھے… تبھی ان کا سیل بجنے لگا… ابیہا کی کال تھی… اسد شیرازی نے کچھ مطمئین ہوتے ہوۓ کال ریسیو کی… دوسری جانب سے نہ جانے کیا کہا گیا تھا کہ ان کے چہرے کا رنگ بدلنے لگا… “کک…کون تھے وہ…؟؟” لرزتی آواز میں پوچھا تھا… سارے کیے کراۓ پر پانی پھرنے جا رہا تھا… کال کٹنے کے بعد وہ بس سے وہیں صوفے پر گر سے گۓ..

راجا جو ان کی جانب ہی متوجہ تھا ان کی یہ حالت دیکھ کر پریشان سا ان کی جانب لپکا…

ہیلی کاپٹرز جنگل کے اوپر چکرا رہے تھے… ان سب نے پیراشوٹ اپنی کمر کے ساتھ باندھے… چیف نے سب کو گڈ لک کہا اور باری باری وہ سب ہیلی کاپٹرز سے چھلانگ لگانے لگے… یہ ان کا آخری امتحان تھا… جس میں یا تو جیت ان کا مقدر ہوتی…یا موت… اور موت سے ڈرنے والے تو وہ تھے نہیں… نڈر ہو کر وہ سب موت کی اس وادی میں اتر رہے تھے…

ابتہاج نے بھی اپنا پیرا شوٹ کھولا اور ہوا کے دم پر اڑتا ہوا اس گھنے جنگل کے درختوں سے ٹکراتا ہوا ایک جگہ چند درختوں پر اس کا پیرا شوٹ پھنس گیا..اس نے پیرا شوٹ بیلٹ کمر سے کھولا… اور نیچے جنگل میں جا گرا… نیچے خاردار جھاڑیاں تھیں جن سے اس کی ہتھیلیوں پر چند خراشیں آئیں… ایک درخت کے تنے سے ٹکرانے کی وجہ سے کمر میں بھی خراشیں آئیں تھیں لیکن یہ چھوٹی موٹی تکلیفیں اب اس پر اثر انداز نہیں ہوتی تھیں…

اس نے کلائ پر بندھی کمپس نیڈل والی گھڑی کھولی… اسے ہاتھ میں پکڑے دوسرے ہاتھ سے بیگ سے میپ نکالا… وہ سمت کا اندازہ لگانا چاہ رہا تھا کہ اس وقت وہ کہاں موجود ہے… اور مطلوبہ جگہ پر پہنچنے کے لیے اسے کس سمت کو اپنا سفر شروع کرنا ہے…

ابیہا تیار ہو چکی تھی… مہرون لانگ ٹیل فراک میں ملبوس بالوں کا اونچا جوڑا بناۓ میک اپ میں وہ آسمان سے اتری پری ہی لگ رہی تھی… اس پر چہرے کی معصومیت اور حزن حسن کو مزید نکھار بخش رہا تھا…

بیوٹیشن لاسٹ ٹچ دے رہی تھی میک اپ کو… اور زینی پاس کھڑی پیار بھری نظروں سے ابیہا کو تک رہی تھی… “بہت پیاری لگ رہی ہو… اللّہ نظرِ بد سے بچاۓ… ” بیوٹیشن نے مسکراتے ہوۓ زینی کی بات سنی… پھر خود بھی ابیہا کی تعریف کرنے لگی… ابیہا نے سرسری سے نگاہ آئینے میں نظر آتے اپنے عکس پر ڈالی…. لیلن فورأ ہی نظریں واپس موڑ گئ… اسے کوئ شوق نہیں تھا خود کو دیکھنے کا… بھلا جب دل میں کوئ جذبات ہی موجزن نہیں تو خوبصورت لگنے سے کیا ہوتا ہے… “چلیں بیا… پانچ بج کے پندرہ منٹ ہو رہے ہیں مہمان آ چکے ہوں گے… ” زینی نے کہا تو وہ لب کاٹتی ہوئ اٹھی… تبھی کوئ پارلر میں داخل ہوا… دونوں نے سر اٹھا کر دیکھا… وہ تین لوگ تھے جن کے ہاتھوں میں رائفلز تھیں جبکہ چہروں پر ماسک… بیٹیشن بھی جب مڑی تو انہیں دیکھ کر فورأ آگے آئ… “او…ہیلو…کون ہو تم لوگ… اندر کیسے آۓ بنا اجازت… ؟؟” بیوٹیشن نے سخت لہجے میں کہا تھا… جب ان میں سے ایک شخص نے زینی کو بیوٹیشن کی طرف دھکیلا اور ان پر گن تان لی… “اگر ذرا سی بھی حرکت کی تو ابھی کے ابھی تم دونوں کو اوپر پہنچا دوں گا… ” وہ جذبات سے عاری لہجے میں بولا تھا… ابیہا پھٹی پھٹی نگاہوں سے انہیں دیکھنے لگی… دماغ کہیں کچھ غلط ہونے کا اشارہ دے رہا تھا… ابیہا ڈر کے مارے پیچھے ہونے والی تھی جب ان میں سے ایک شخص نے آگے بڑھ کر کلوروفام میں بھیگا رومال اس کے منہ پر رکھا… زینی چینختی رہ گئ لیکن وہ سجی سنوری ابیہا کے گرد چادر لپیٹ کر اسے لے جا چکے تھے… اس پارلر میں پارکنگ کے لیے جگہ نہ تھی اسی لیے ابیہا کے گارڈز کی گاڑی مین گیٹ سے کافی فاصلے پر تھی… ان لوگوں نے مین گیٹ کی بجاۓ پیچھے کا راستہ اختیار کیا… تبھی گارڈز کی نظروں سے بچ کر نکل گۓ… زینی روتے ہوۓ بار بار ابیہا کو پکار رہی تھی… پیچھے بھاگنے کی کوشش بھی کی لیکن تب تک وہ نظروں سے اوجھل ہو چکے تھے… تبھی زینی کی نگاہ وہیں پارلر میں پڑے ابیہا کے سیل پر پڑی… اس کا سیل پکڑ کر اسد شیرازی کو کال ملاتے ہوۓ وہ انہیں سب کچھ بتا چکی تھی… دماغ کام ہی نہیں کر رہا تھا کہ اور کرے بھی تو کیا… نہ جانے وہ کون لوگ تھے جو ابیہا کو لے جا چکے تھے… اور خدا جانے اب وہ ابیہا کے ساتھ کیا سلوک کرتے…