Chasham e Nam by Ayat Noor NovelR50721 Chasham e Nam by Ayat Noor Episode 16,17

مرزا جمال آفندی… یہ ہے راجا… میری بیٹی ابیہا کا گارڈ اور یوں سمجھ لو…اب سے یہ میرا دایاں ہاتھ بھی ہے… میری طاقت… اور راجا… یہ ہے مرزا جمال آفندی… میرا دوست….اور ابیہا کا ہونے والا سسر…” اسد شیرازی نے فخر سے راجا کا تعارف اپنے دوست سے کروایا… اور مرزا جمال آفندی کو بھی راجا سے متعارف کروایا…

“ہیلو… ” مرزا جمال آفندی نے سر ہلاتے ہوۓ راجا کو مخاطب کیا… جبکہ اس کا نام سن کر پرسوچ نظریں راجا پر ہی جمی تھیں… نہ جانے کیوں اس نام سے انہیں بہت کچھ یاد آیا تھا…

” نائس ٹو میٹ یو سر… ” راجا خود کو سنبھالنے میں کافی حد تک کامیاب ہو چکا تھا… تبھی دھیمی آواز میں کہہ کر سر ہلایا…سامنے کھڑا شخص اس کے چہرے سے دل میں جلتی آگ کا اندازہ نہ لگا پایا تھا…راجا نے چبھتی ہوئ سی ایک نگاہ مرزا جمال آفندی اور ساتھ کھڑے فراز آفندی پر ڈالی تھی… ” اسے دیکھ کر مجھے ایک پل کو اپنے بیٹے کا گمان ہوا…. میرے بیٹے کا نام بھی راجا تھا… لیکن اس کی آنکھیں گہری نیلی تھیں… ” مرزا جمال آفندی کا لہجہ حسرت زدہ سا ہوا تھا… فراز آفندی نے بھی عجیب سے انداز میں راجا کو دیکھا… مرزا جمال کی بات پر اسد شیرازی کچھ کہنے ہی والا تھا جب راجا کی سرد سی آواز ابھری…

” میرے ایک دوست کی شکل اوبامہ سے ملتی ہے… لیکن اس کا یہ مطلب تو نہیں کہ وہ اوبامہ ہے… یا اوبامہ کا بھائ… پھر میرا تو فقط نام ملتا ہے آپ کے بیٹے سے… ” اس کے لہجے میں موجود چبھن نے مرزا جمال کو چونکایا تھا…

“ایکسکیوزمی سر….مجھے سیکیورٹی کو دیکھنا ہے… ہیو فن… ” وہ اسد شیرازی سے کہہ کر فورأ اسٹیج سے اتر آیا تھا… تیز قدموں سے چلتے ہوۓ وہ بیرونی دروازے کی طرف جا رہا تھا کہ اس کے سینے میں جو طوفان برپا تھا اگر مزید کچھ دیر وہ مرزا جمال آفندی کے سامنے رہتا تو شاید اس کے دماغ کی کوئ نس ہی پھٹ جاتی…

________

مرزا جمال آفندی کو اسد شیرازی کی پارٹی میں اس کے دوست کی حیثیت سے دیکھ کر راجا کو دھچکا لگا تھا… دوسری بات جس سے وہ شاکڈ ہوا وہ تھا فراز آفندی کا مرزا جمال آفندی کے ہمراہ اس کے بیٹے کی حیثیت سے ہونا… وہ جگہ جو راجا کی تھی, وہ حق جو راجا کا تھا مرزا جمال آفندی کیسے کسی کو اتنی آسانی سے وہ حق دے سکتے تھے… فراز آفندی تو اس کے چچا کا بیٹا تھا نا… مرزا جمال آفندی کا بھتیجا…پھر وہ مرزا جمال آفندی کے بیٹے کی حیثیت سے ان کے ساتھ کیسے… ؟؟ راجا الجھ کر رہ گیا… اتنے عرصے بعد اپنے باپ کو سامنے دیکھ کر ایک پل کو اس کا بھی دل چاہا تھا کہ وہ اپنے باپ کے سینے سے جا لگے… کسی چھوٹے بچے کی طرح روتے ہوۓ انہیں خود پر بیتا ہر ظلم بتاۓ… زندگی نے اس کے ساتھ کیسا سلوک روا رکھا وہ سب کچھ بیان کرے ان سے… عرصے بعد کوئ اپنا سامنے آیا تھا اور اس کا دل چاہا تھا کہ ان کے کندھے پر سر رکھ کر اپنے سینے کے اندر موجزن درد کے دریا کو آنسوؤں کے رستے باہر نکال پھینکے… نہ جانے کتنا عرصہ ہوا تھا اسے روۓ ہوۓ…دل کا بوجھ ہلکا کیے ہوۓ…

لیکن یہ کیفیت فقط ایک لمحے کی تھی… اگلے ہی پل وہ خود پر وہی بے حسی کا خول چڑھا چکا تھا… انہیں ایک پل کے لیے بھی شک نہیں ہونے دیا کہ سامنے کھڑا وہ لڑکا جس کا نام سن کر انہیں اپنے بیٹے کا گمان گزرا تھا وہ واقعی ان کا ہی بیٹا تھا… شاید انہوں نے بھی راجا کی طرح یوں اس طرح اپنے بیٹے سے سامنا ہونے کا کبھی سوچا بھی نہ ہو گا… یا شاید…ان کے نزدیک راجا بھی دنیا کی ان گلیوں میں در در ٹھوکریں کھاتا موت کی آغوش میں جا چکا تھا… خیر جو بھی تھا… راجا نے طے کر لیا تھا کہ وہ آئندہ کبھی ان کے سامنے نہیں جاۓ گا…

دل کے ہاتھوں مجبور ہو کر راجا نے اپنے ایک دوست کے ذریعے ان کے بارے میں معلومات حاصل کیں… اور جو کچھ معلوم ہوا وہ حیرت انگیز تھا… سب کچھ جان کر راجا کئ لمحوں تک کچھ بول ہی نہ پایا… دوست کی دی رپورٹ کے مطابق مرزا جمال آفندی بھی مافیا میں اور غیر قانونی دھندوں میں ایک جانا پہچانا نام تھا… اور ایک جیسے دھندے ہونے کے باعث ہی اسد شیرازی سے ان کی دوستی ہوئ تھی… راجا پر مزید انکشافات یہ ہوۓ کہ راجا کی ماں کے مرنے کے بعد اسد شیرازی نے مزید تین شادیاں کیں… لیکن تینوں بیویوں میں سے کسی ایک سے بھی انہیں اولاد عطا نہیں کی گئ… شاید قدرت نے ان سے انتقام لیا تھا پہلی دو اولادوں کی قدر نہ کرنے کا…

ان کے چچاؤں نے مرزا جمال آفندی سے فقط اتنا ہی کہا تھا کہ راجا حد سے زیادہ بدتمیز ہو چکا تھا اور ان کے لاڈ پیار کے باوجود ان سے جھگڑتا… اور یونہی ایک دن وہ اپنی بہن کو لے کر گھر سے بھاگ گیا… انہیں ڈھونڈنے کی بہت کوشش کی گئ لیکن وہ کہیں نہ ملے… مرزا جمال آفندی کو تاؤ تو آیا ان کی اس لاپرواہی پر… گھر والوں سے ان کا جھگڑا بھی ہوا اس بات پر… کہ وہ اولاد تھی ان کی… خود اپنے طور پر بھی راجا اور گڈی کو ڈھونڈنے کی کوشش کی لیکن ان کے نہ ملنے پر وہ مایوس سے واپس دبئ لوٹ گۓ… ان کے سر پر زیادہ سے زیادہ پیسہ جمع کرنے کا جنون سوار تھا…وہیں غیر قانونی دھندوں میں پڑ کر وہ آگے سے آگے بڑھتے گۓ… حلال اور حرام کی تمیز بھول گئ… بینک اکاؤنٹس بھرنے لگے… لیکن اللّہ نے ان سے باپ بننے کا اعزاز چھین لیا… بہت علاج کروانے کے بعد بھی جب وہ باپ نہ بن سکے تو پاکستان بات کر کے اپنے بھتیجے کو بھی وہیں بلا لیا جو ان کے کاروبار میں مدد کر سکے… ان کی وجہ سے ہی پاکستان میں باقی خاندان کے حالات بھی سدھر گۓ تھے… سب عیش کر رہے تھے ان کی دولت کے بل بوتے پر اسی لیے چھوٹے بھائ نے بلا چوں چراں فراز انہیں سونپ دیا… مرزا جمال نے فراز کو سب کے سامنے اپنے بیٹے کی حیثیت سے متعارف کروایا… اور فراز جو پہلے ہی غنڈہ گردی اور مار پیٹ میں پاکستان کئ بار جیل جا چکا تھا اس کے لیے مافیا میں رہ کر پیسہ کمانا اور ناجائز طور پر لوگوں کا خون بہانا قطعأ مشکل کام ثابت نہ ہوا… دبئ میں سخت سیکیورٹی ہونے کے باوجود وہ اپنے غیر قانونی کام سر انجام دے رہے تھے… مرزا جمال نے فراز کو اس کام کے مزید داؤ پیچ بھی سکھا دئیے اور یوں ان کا کام ترقی کرنے لگا… حرام مال آخر کتنے عرصے تک انہیں خوش رکھتا… فراز آفندی کی شادی مرزا جمال آفندی نے دبئ میں ہی اپنے ایک جاننے والے کی بیٹی سے طے کر دی… اسی سلسلے میں پاکستان سے بھی سب کو بلایا گیا… مرزا جمال آفندی نے ان کے ٹکٹس وغیرہ کا انتظام بھی خود کیا… اور فراز آفندی کی شادی سے دو دن قبل جب وہ سب پاکستان سے دبئ جا رہے تھے پلین کریش ہونے کے باعث سب کے سب جاں بحق ہو گۓ… اللہ کا عذاب اترا تھا شاید ان پر کہ اپنے کیے کی سزا دنیا میں ہی مل چکی تھی…

ان سب نے راجا اور گڈی کے ساتھ بہت برا سلوک روا رکھا تھا لیکن اس کے باوجود ان کی موت کی خبر سن کر راجا کا دل سخت اذیت سے دو چار ہوا تھا… ان دونوں کے ساتھ تو جو ہوا سو ہوا لیکن راجا نے آج تک انہیں کبھی بد دعا نہ دی تھی… اس کے باوجود اللّہ نے انصاف کیا تھا ان کے ساتھ… بے شک وہ ہر چیز کا پورا پورا بدلہ دینے والا ہے… اب راجا کو آنے والے دنوں کے لیے اپنی حکمت عملی طے کرنی تھی…

“اینجل… میں تمہارے لیے کچھ لے کر آیا ہوں… ” وہ معمول کی طرح اسکول سے چھٹی کے بعد اس چھوٹی سی دیوار پر بیٹھے تھے…. آج پہلی بار راجا کے پاس اتنے پیسے آۓ تھے کہ وہ کچھ خرید سکتا اپنی محنت کی کمائ سے… اور اس نے ان پیسوں سے اینجل کے لیے گفٹ خریدا تھا…

“کیا کیا… جلدی بتاؤ… ” اینجل توقع کے عین مطابق پر جوش سی ہوئ… تبھی اشتیاق سے پوچھنے لگی… “پہلے آنکھیں بند کرو… ” راجا نے اپنے نۓ سوٹ کی سائیڈ کی جیب پر ہاتھ رکھ کر کسی چیز کی موجودگی محسوس کی… اینجل کا دیا سوٹ وہ آج پہن کر آیا تھا… اس نے سوٹ لیتے ہوۓ ہی یہ طے کیا تھا کہ اسے اس دن پہنے گا جب وہ اینجل کے لیے کچھ خرید سکے… اس کے کہنے پر اینجل جھٹ سے آنکھیں بند کر گئ… راجا نے جیب سے کچھ برآمد کیا… کاغذ میں کچھ لپٹا تھا… راجا نے کاغذ کھولا… ” اینجل… آنکھیں کھولو…” ہتھیلی اینجل کے سامنے پھیلاتے ہوۓ کہا… اینجل نے آنکھیں کھولیں… سامنے راجا کی پھیلی ہتھیلی پر ایک کاغذ پڑا تھا اور اس کاغذ میں اینجل کے ہاتھ کے سائز کی سرخ کانچ کی چوڑیاں…. “واؤ…” اینجل کی آنکھوں میں ستائش ابھری… راجا جو پہلے کنفیوز سا تھا یہ سوچ کر کہ اینجل کو کبھی چوڑیاں پہنے ہوۓ نہیں دیکھا تھا…نہ جانے اسے یہ تحفہ پسند بھی آۓ گا یا نہیں… اس کے منہ سے ستائشی جملہ سن کر خوش ہو گیا… اینجل نے جلدی سے وہ چوڑیاں پکڑیں… اور انہیں پہننے لگی… ” لاؤ میں پہنا دوں… ” اسے ایک ہاتھ سے زور آزمائ کرتے دیکھ کر راجا نے چوڑیاں تھامیں اور اسے پہنا دیں… “بہت پیاری ہیں… تھینک یو…” اینجل چوڑیوں پر ہاتھ پھیر رہی تھی… اس کے لہجے میں خوشی محسوس کر کے راجا کی آنکھیں چمک اٹھیں… ” میں نا…گھر جا کے یہ چوڑیاں اتار دوں گی… ” اینجل نے سر اٹھا کر اسے دیکھتے ہوۓ کہا… “کیوں…؟؟”راجا جو خوشی سے اسے دیکھ رہا تھا اس کی آنکھوں کی روشنی ماند پڑنے لگی… کہ شاید اینجل کو چوڑیاں پسند نہیں آئیں…. “مجھے جو چیزیں اچھی لگتی ہیں انہیں میں بہت سنبھال کر رکھتی ہوں… اور یہ چوڑیاں بھی مجھے بہت پسند آئیں… میرے بیسٹ فرینڈ نے دی ہیں نا اس لیے… اگر میں نے پہنے رکھیں تو یہ ٹوٹ جائیں گی نا… اس لیے میں انہیں اتار کر سنبھال کے رکھ لوں گی… تا کہ جب بھی انہیں دیکھوں مجھے تمہاری یاد آۓ… ” وہ معصومیت سے بھرپور لہجے میں کہہ رہی تھی… راجا کو حیرت ہوئ اس کی عجیب منطق پر… “لیکن چیزیں استعمال کرنے کے لیے ہوتی ہیں… میں یہ تمہارے پہننے کے لیے لایا ہوں… ” دھیمے لہجے میں کہا تھا… ” چیزیں کسی کی یاد بھی تو ہوتی ہیں نا… میں اپنی مما اور ڈیڈ کے دئیے گفٹس بھی سنبھال کر رکھتی ہوں… ” وہ مزے سے پونیاں جھلاتی بولی تھی… “جب میں “اتنی” بڑی ہو جاؤں گی نا… تب میں تمہیں یہ چوڑیاں دکھاؤں گی… اور بتاؤں گی کہ میں نے تمہیں اب تک یاد رکھا ہوا ہے… ” لفظ اتنی پر زور دیتے ہوۓ وہ کہہ رہی تھی… راجا اس کے انداز پر مسکرا دیا… “لیکن… ” وہ ایک دم تھوڑی پریشان ہوئ… راجا اس کی طرف متوجہ ہوا… “کیا ہوا…؟؟” اس کے چہرے پر پریشانی دیکھ کر راجا الجھا… “تمہارے پاس تو میری کوئ بھی چیز نہیں جسے تم سنبھال کر رکھو… بیسٹ فرینڈز کے پاس ایک دوسرے کی کوئ نشانی تو ہونی چاہیے… ” وہ تھوڑی تلے شہادت کی انگلی رکھے کچھ سوچ رہی تھی… پھر ایک دم اس کی آنکھوں میں چمک ابھری… جلدی سے دیوار سے نیچے اتری… اپنے پیروں میں جھکی… ایک پاؤں کی جراب نیچے کی… راجا حیران سا اس کی کاروائ ملاحظہ کر رہا تھا… جو اب اپنے ٹخنے پر بندھی پائل کھول رہی تھی…چاندی کی پائل… وہ چند لمحوں بعد سیدھی ہوئ… چہرہ تمتما رہا تھا… ” یہ لو… یہ میری پائل… مجھے بہت پسند ہے… لیکن اپنا بیسٹ فرینڈ اس پائل سے بھی عزیز ہے… “پائل راجا کے ہاتھ پر رکھ کر وہ اس کے برابر آ بیٹھی… “لیکن… میں اس پائل کا کیا کروں گا… ؟؟” راجا ابھی تک اس کا مقصد نہیں سمجھ پایا تھا… ” تم نا… اسے سنبھال کر رکھنا… جیسے میں یہ چوڑیاں سنبھال کر رکھوں گی… پھر جب ہم دونوں بڑے ہو جائیں گے نا… تب ایک دوسرے کو یہ دونوں چیزیں دکھائیں گے… کہ ہم نے ایک دوسرے کو یاد رکھا… اور اس سے یہ ثابت ہو گا کہ ہم پکے والے دوست ہیں… گمانا مت اسے اچھا… ” وہ آنکھیں پٹپٹاتی اسے کہہ رہی تھی… راجا نے ہاتھ میں پکڑی اس پائل کو دیکھا… “ہماری دوستی کی نشانی… ” بے ساختہ لبوں سے برآمد ہوا تھا…

وہ جب حال میں واپس آیا تو رات کے دوسرے پہر ایک کافی شاپ میں ٹیبل پر تنہا بیٹھا تھا… ہاتھ میں وہی چاندی کی پائل پکڑے نہ جانے کب سے وہ ماضی کے خیالوں میں بھٹک رہا تھا…

آج عرصے بعد ابیہا نے الماری کے اندرونی مقفل دراز کو کھولا تھا… اور اس کی نظر کانچ کی ان سرخ چوڑیوں پر پڑی تھی… عجیب سے احساسات سے دو چار ہوتے ہوۓ اس نے وہ چوڑیاں ہاتھ میں اٹھائیں… کچھ چوڑیاں ٹوٹی ہوئ تھیں لیکن ان کے ٹکڑے بھی اس نے اب تک سنبھال کر رکھے تھے… اس شخص سے شدید نفرت ہونے کے باوجود وہ آج تک اس کی اور اپنی دوستی کی اس نشانی کو پھینک نہ سکی تھی… اس نے اپنی طرف سے اس سے اپنا ہر رشتہ ختم کر دیا تھا لیکن دل کا رشتہ ختم نہ کر پائ تھی… دل کی گہرائیوں سے اس سے دوستی کی تھی… اور یوں کہہ دینے سے تو دوستی ختم نہیں ہو جاتی نا… اس کے پاس ان چوڑیوں کی موجودگی اس بات کا ثبوت تھی کہ آج بھی وہ اپنے اس بیسٹ فرینڈ کو یاد کرتی تھی… زندگی میں پہلی بار کسی سے دوستی کی تھی… بھروسہ کیا تھا کسی پر… اور اس دوست نے ہی ایسا زخم دیا تھا کہ وہ اپنی آنے والی زندگی میں کبھی کسی کو اپنا بہترین دوست نہ بنا سکی… اس کے بھروسے, اس کے اعتماد کی دھجیاں اڑا دی گئ تھیں کہ وہ چاہ کر بھی کبھی کسی اور پر بھروسہ نہ کر سکی… آنکھوں میں آتی نمی نے اس کی بصارت کو دھندلا دیا تھا…پرانی یادوں میں کھوۓ ہوۓ وہ سختی سے مٹھی بند کر گئ…. کانچ کی دو چوڑیاں چھن سے ٹوٹی تھیں… شاید چوڑی کا ایک حصہ اس کی ہتھیلی میں لگا تھا… “آہ…” کراہتے ہوۓ اس نے مٹھی کھولی… ہتھیلی کے درمیان میں گہرا کٹ لگا تھا… جس سے اب خون بہہ رہا تھا…اس نے غصے سے ان چوڑیوں کو واپس دراز میں پٹخا اور تیزی سے الماری بند کرتی اس سے کمر ٹکا کر آنکھیں بند کر گئ… چہرے پر تکلیف کے آثار تھے… نہ جانے یہ تکلیف حالیہ زخم کی تھی یا پرانی یادوں کی… “کیوں کیا تم نے ایسا… کیوں مارا میری مما اور ڈیڈ کو… کیا بگاڑا تھا ہم نے تمہارا… ؟” روتے ہوۓ وہ تصور میں کسی سے مخاطب تھی… لیکن وہاں جواب دینے والا کوئ نہ تھا…

سنو ___ ہم بیٹھ کر تنہا کسی ویران گوشے میں ..

ہوا کو دکھ سنائیں گے تجھے ہم بھول جائیں گے…!!

“آپ کے ہاتھ پر کیا ہوا… ؟؟” گاڑی ڈرائیو کرتے ہوۓ راجا نے اس کے ہاتھ کو دیکھا تو بے ساختہ پوچھ بیٹھا… اس کی بات پر ابیہا کی نگاہ بھی اپنے ہاتھ تک گئ… جس پر بینڈیج کی گئ تھی…”کچھ نہیں… ” مختصر کہہ کر وہ رخ موڑ گئ تھی… “تو پھر یہ زخم کیسا…؟؟” راجا نے تفصیلی نگاہ اس پر ڈالی… روئ روئ سی آنکھیں تھیں اس کی… اور ستا ہوا چہرہ… ” تمہیں میرے یا میرے زخموں کے بارے میں فکر مند ہونے کی کوئ ضرورت نہیں ہے… یہ تو ویسے بھی ایک چھوٹا سا زخم ہے… اس سے کہیں زیادہ بڑے زخم میری روح پر لگے ہیں…جن کی اذیت ہر پل تڑپاتی ہے… لیکن مجھے اپنے ان زخموں اور تکلیفوں پر کسی کی ہمدردی نہیں چاہیے… ” سخت لہجے میں کہتے ہوۓ وہ اپنے اندر پھیلے انتشار کو راجا پر واضح کر گئ تھی… راجا بھی لب بھینچ کر خاموش ہو گیا… “مجھے مارکیٹ جانا ہے… ” چند لمحوں بعد ابیہا خود ہی اس سے مخاطب ہوئ… سر ہلاتے ہوۓ راجا نے گاڑی کا رخ مارکیٹ کی جانب کیا…

“جس سے آپ شادی کرنے جا رہی ہیں وہ اچھا آدمی نہیں ہے… ” ابیہا اپنے لیے چند ڈریسز دیکھ رہی تھی جب راجا دوبارہ مخاطب ہوا… ابیہا نے نظر گھما کر اسے دیکھا… پینٹ کی جیبوں میں ہاتھ ڈالے وہ اسے ہی دیکھ رہا تھا…”تو…؟؟” ابیہا رخ موڑ کر پھر اپنے کام میں مصروف ہو گئ… “تو یہ کہ وہ آپ کے قابل نہیں ہے… وہ پہلے ہی دو شادیاں کر چکا ہے اور ان دونوں بیویوں کا قاتل بھی وہ خود ہے… اس سے شادی کر کے آپ کی زندگی تباہ… ” راجا سنجیدہ لہجے میں کچھ کہہ رہا تھا جب ابیہا ہاتھ میں پکڑا ڈریس ایک جانب پٹخ کر طیش کے عالم میں اس کی طرف مڑی… “میری زندگی تباہ ہوتی ہے یا آباد اس سے تمہیں کوئ فرق نہیں پڑنا چاہیے… کون کس کے قابل ہے کس کے قابل نہیں اس کا فیصلہ کرنے والے تم کون ہو… ؟؟ تم نے کہا میں تمہارے قابل نہیں… میں نے مان لیا… دوبارہ تم سے اس بات کا ذکر کیا…؟؟ نہیں نا… اب میں کس سے شادی کر رہی ہوں… کسے اپنا ہمسفر بنانے جا رہی ہوں یہ میرا پرسنل میٹر ہے… تمہیں کس نے اجازت دی کہ تم میرے ذاتی معاملات میں مداخلت کرو… جیسے تم اپنے ذاتی مسائل کسی سے ڈسکس نہیں کر سکتے ویسے ہی یہ میرے بھی ذاتی مسئلے ہیں… بہتر ہے تم میری ذاتی زندگی سے دور رہو… یہ مت بھولو کہ تم میرے گارڈ ہو… صرف ایک گارڈ… ” انگلی اٹھا کر اسے وارن کرتی وہ چبا چبا کر کہہ رہی تھی… اردگرد کے لوگ ان کی طرف متوجہ ہو رہے تھے… راجا کا چہرہ سرخ پڑنے لگا… وہ اپنی بات کہہ کر مڑی… اور تیزی سے گلاس ڈور دھکیلتی باہر نکل گئ… اس کی حالت منتشر ہو رہی تھی… آنکھوں سے آنسو بہتے گال بھگونے لگے… لوگوں کی اس بھیڑکو چیرتی وہ ہاتھ باندھ کر سر جھکاۓ روتی ہوۓ چلتی جا رہی تھی… کہاں… اس بات سے خود بھی بے خبر تھی… اس وقت وہ کہیں دور جانا چاہتی تھی جہاں وہ اکیلی ہو… تنہا… جہاں وہ کھل کر رو سکے… اپنے دل کا غبار نکال سکے…

“تم سے محبت تو بے تحاشہ کی تھی…

مگر کیا کریں کہ اب معاملہ انا کا ہے… “

“واؤ… آج ڈیڈ مجھے لینے آۓ ہیں… ” اینجل سامنے آ کر رکتی گاڑی کو دیکھ کر چھلانگ مار کر دیوار سے اتری… پھر چمکتی آنکھوں سے راجا کو دیکھا… “تم ملو گے میرے ڈیڈ سے… ؟؟” راجا حیران سا کبھی اسے دیکھتا اور کبھی سامنے گاڑی سے اترتے تھری پیس سوٹ میں ملبوس آدمی کو… نہ جانے کیوں اس کا دل اداس سا ہوا… یہ ڈر دل میں اپنے پنجے گاڑ گیا کہ باقی سب لوگوں کی طرح شاید اینجل کے ڈیڈ بھی اس سے نفرت کریں گے… اسے دھتکاریں گے… نفرت سے اسے اپنی بیٹی سے الگ کریں گے اور پھر آئندہ کبھی اینجل سے ملنے نہیں دیں گے… اس کے چہرے پر پھیلا خوف واضح تھا… اینجل کے ڈیڈ اب ان کے قریب آ چکے تھے… “ڈیڈ… ” اینجل ان کی طرف بڑی… مراد بخاری نے اسے گود میں اٹھایا… “کیسی ہے میری لٹل پرنسس…؟؟” انہوں نے اینجل کی پیشانی چومی تھی… راجا حسرت زدہ نگاہوں سے انہیں دیکھے گیا… آج تک کبھی اس کے باپ نے اسے یا اس کی بہن گڈی کو یوں گود میں اٹھا کر پیار نہ کیا تھا… کتنی خوش نصیب تھی نہ اینجل اس معاملے میں… اس کی آنکھوں میں نمی پھیلنے لگی… تبھی نگاہیں جھکا گیا… مراد بخاری نے ایک نظر سامنے بیٹھے لڑکے پر ڈالی… اس کی آنکھوں میں نمی وہ دیکھ چکے تھے… تبھی اینجل کو گود سے اتارا…