Chasham e Nam by Ayat Noor NovelR50721 Chasham e Nam by Ayat Noor Episode 11,12

حیران ہوتے ہوۓ وہ بڑبڑایا… پھر تیزی سے دروازے کی جانب بڑھا… اس کے کلب سے نکلنے تک ابیہا نہ جانے کہاں غائب ہو چکی تھی… “ڈیم اٹ… سلی گرل…” اپنے ہاتھ پر مکا رسید کرتے ہوۓ اس نے اشتعال کم کرنا چاہا…تیزی سے پارکنگ کی جانب بڑھا کہ شاید وہ گاڑی میں بیٹھ گئ ہو… لیکن پارکنگ بھی سنسان تھی… ابیہا کو وہاں نہ پا کر وہ شدید پریشان ہو گیا… دوبارہ کلب کی طرف آیا اور کلب کے سامنے جاتی سڑک پر بڑھا… یہ مین روڈ تھی جہاں رات کے اس وقت ٹریفک نہ ہونے کے برابر تھی… کبھی کبھار کوئ گاڑی اردگرد پھیلے سناٹے کو چیرتی ہوئ گزرتی اور پھر ویسی ہی خاموشی چھا جاتی… جس سمت انہیں جانا تھا وہاں دور دور تک ابیہا دکھائ نہیں دے رہی تھی… آج کل تو ویسے ہی ہر جگہ انسان کم بھیڑیوں کا ہی سامنا ہوتا تھا… اتنی رات گۓ وہ اکیلی لڑکی اگر غلط لوگوں کے ہاتھ لگ گئ تو… یہ سوچ کر وہ مزید پریشان ہوا… شہادت کی انگلی اور انگوٹھے سے پیشانی مسلی… اگر ابیہا کو کچھ ہوا تو اسد شیرازی مجھے نہیں چھوڑے گا… اور جو اتنی محنت سے پلان بنایا وہ سب پلان بھی خراب ہو جاۓ گا… نہیں مجھے ابیہا کو ڈھونڈنا ہے ہر حال میں… جس کھیل کا میں کھلاڑی بن چکا ہوں اس کھیل کو بگاڑنے کا رسک کسی صورت نہیں لے سکتا میں… وہ دل ہی دل میں خود سے کہتا ہوا تیزی سے مخالف سمت میں بڑھ گیا… سنسان سڑک پر اس کے بھاگتے قدموں کی چاپ واضح سنائ دے رہی تھی… “ابیہا…” پہلی بار اس نے ابیہا کو اس کے نام سے پکارا تھا… اس کی آواز گونج کر رہ گئ لیکن جواب نہیں ملا تھا… وہ تیز قدموں سے چلتا اردگرد دیکھتا آگے بڑھ رہا تھا جب اس سے کافی فاصلے پر ایک لڑکی جاتی دکھائ دی… اس کی ڈریسنگ سے وہ سمجھ گیا تھا کہ وہ ابیہا ہے… “ابیہا…لسن…” وہ بھاگتا ہوا اس کے پیچھے لپکا… اس کی آواز اپنے عقب میں سن کر ابیہا نے اپنی رفتار تیز کر لی تھی… “ابیہا… پلیز رکیں تو سہی…ہوا کیا ہے…؟؟” راجا کا لہجہ خلاف توقع نرم تھا… جانتا تھا وہ غصے میں ہے اور اس وقت ترش لہجے میں بات کرنے سے معاملہ مزید بگڑ سکتا ہے… “ابیہا… اسٹاپ…” اس نے ایک بار پھر اسے پکارا تھا… تبھی وہ ایک جھٹکے سے مڑی… “جسٹ گو ٹو ہیل… ڈونٹ فالو می… آئ ول کل یو… ” وہ پہلی بار اتنی بری طرح بی ہیو کر رہی تھی… اس کی آواز میں آنسوؤں کی آمیزش تھی… یقیناً سر جھکا کر چلتے ہوۓ وہ رو رہی تھی… چلا کر اسے جواب دیتے ہوۓ وہ پھر سے آگے بڑھنے لگی… راجا نے لب بھینچے… پھر اپنی رفتار مزید تیز کرتے ہوۓ وہ چند لمحوں میں اس کے سر پر پہنچ چکا تھا… اسے بازو سے تھام کر اپنی جانب کھینچا…. ابیہا کو غالباً اس سے اس حرکت کی امید نہیں تھی تبھی کچی ڈور کی مانند اس کی طرف کھینچی چلی آئ… “میری بات سنیں…” راجا نے اپنے لہجے کو حتی الامکان نارمل رکھنا چاہا… ابیہا نے اشتعال سے اس کی طرف دیکھا اور پھر اپنے بازو کو گرفت میں لیے ہوۓ اس کے ہاتھ کی طرف… راجا اس کی نظروں کا مفہوم سمجھ گیا تھا تبھی اس کا بازو چھوڑا… “آئم سوری آئ… ” وہ شرمندہ سا کچھ کہنے جا رہا تھا جب ابیہا پھر مڑ گئ… راجا نے اس بار شدید غصے سے اسے بازو سے کھینچتے ہوۓ اس کا رخ اپنی جانب کیا… “بس… بہت ہو گیا تماشا… عزت راس نہیں آپ کو… اب یہاں سے ہلیں گی بھی نہیں آپ… سمجھیں…” وہ آتش فشاں کی طرح پھٹا تھا… “کیوں… تم کون ہوتے ہو مجھے روکنے والے… کس حق سے روک رہے ہو مجھے… جہاں میرا دل چاہے گا جاؤں گی… ” وہ بھی چلائ تھی… چہرے پر آنسوؤں کے نشانات تھے… “جسٹ شٹ اپ… اوکے… جسٹ شٹ اپ… ” انگلی اٹھا کر ہر لفظ چبا چبا کر کہتے ہوۓ وہ اسے وارن کر رہا تھا… ابیہا لب کچلتی سر جھکا گئ… آنسو ابھی بھی بہہ رہے تھے… راجا کو اپنے لہجے کی سختی کا اندازہ ہو گیا تھا تبھی وہ خاموش ہو گیا… گہرا سانس بھر کے غصے پر قابو پانا چاہا… پھر اس کی طرف متوجہ ہوا… “آئم سوری فار مائ روڈنیس… بٹ ٹیل می… ہوا کیا ہے…؟ آپ اچھی بھلی کلب آئ تھیں پھر یوں اس طرح وہاں سے آنے کا اور اس سب کا مطلب…؟؟” اس کا اشارہ ابیہا کے آنسوؤں کی جانب تھا… ابیہا نے بے دردی سے اپنے آنسوؤں کو صاف کیا… “تمہیں اس سے کیا… ؟؟” ہچکیوں کے درمیان بول کر وہ وہاں سے جانے لگی تھی… جب ایک بار پھر اس کا بازو راجا کی گرفت میں آیا تھا… اس کے قدم زنجیر ہوۓ… “بتاۓ بغیر آپ نہیں جا سکتیں… ” راجا کے لہجے میں بھی ضد تھی… ابیہا سلگ اٹھی تھی اس کی بات پر… “کیوں بتاؤں میں تمہیں… تمہاری پابند نہیں ہوں… اور ویسے بھی تمہیں کیا فرق پڑتا ہے اس سب سے… تمہاری وجہ سے…. صرف تمہاری وجہ سے مجھے رشنا کی اتنی باتیں سننا پڑیں… اتنی انسلٹ ہوئ میری سب فرینڈز کے سامنے… ” وہ روتے ہوۓ کہہ رہی تھی… راجا حیران ہوا… “میری وجہ سے…؟؟” سوالیہ انداز میں کہتے ہوۓ انگلی سے اپنی جانب اشارہ کیا… “ہاں تمہاری وجہ سے… اگر تم اس دن اپنی ضد اور انا کو چھوڑ کر مجھ سے وہ سب… وہ تین ورڈز کہہ دیتے تو کوئ یوں میرا مذاق نہ بناتا… کسی کو مجھے اپنی تضحیک بھری باتوں کا نشانہ بنانے کا موقع نہ ملتا… کسی کو میری انسلٹ…” کہتے ہوۓ اس کی آواز بھرا گئ تھی… مزید بولا نہ گیا تو وہ خاموش ہو گئ… آنسو پونچھتے ہوۓ وہ بے بسی سے ادھر ادھر دیکھنے لگی… ہچکیاں لیتے ہوۓ وہ خود پر قابو پانے کی کوشش کر رہی تھی… آنکھیں رونے کے باعث سرخ ہو رہی تھیں… راجا بغور اس کا چہرہ دیکھے گیا… اس کا لہجہ اس بات کی چغلی کھا رہا تھا کہ وہ جھوٹ بول رہی ہے… جو وہ بتا رہی ہے اس بات پر نہیں رویا جا رہا… “کیا یہی بات ہے جس پر اتنے آنسو بہاۓ جا رہے ہیں…؟؟” اس کی نظریں کھوجتی ہوئ سی تھیں… ابیہا نے آنسو بھری نگاہیں اٹھا کر اسے دیکھا… اگلے ہی پل نگاہیں جھکا گئ کہ کہیں وہ نظروں سے اس کے دل کا حال نہ سمجھ جاۓ… “ہاں بس… یہی…” وہ نظریں چراتی ادھر ادھر دیکھنے لگی… راجا چند پل اسے دیکھتا رہا… اسے کسی گڑبڑ کا احساس ہوا تھا… “سو… اب کیا ارادہ ہے… رات یہیں بتانی ہے…؟؟” ایک دم اس کا لہجہ سرد ہوا تھا… ابیہا کا دل خون ہونے لگا اس کے انداز پر… کیسے بتاتی اسے کہ وہ محبت کرنے لگی ہے اس سے… کیسے, کب, کیوں…؟؟ یہ نہیں جانتی تھی لیکن وہ اسے اس کی تمام تر سردمہری, سختی, اور بے حسی کے باوجود اچھا لگنے لگا تھا… یہ اس کے دل کی بھی خواہش تھی کہ وہ اس کے منہ سے فقط ایک بار ہی سہی لیکن آئ لو یو سنے… لیکن اس کا دل کئ ٹکڑوں میں تقسیم ہوا تھا تب راجا کا جواب سن کر… غصہ اسے اس بات کا نہیں تھا کہ اس کے فرینڈز کے سامنے انسلٹ ہوئ غصہ یہ تھا کہ اپنی انا کو اس کے سامنے جھکانے کے باوجود وہ نامراد رہی تھی… غصہ یہ تھا کہ وہ شخص جسے وہ کسی خاطر میں نہ لاتی تھی اسی کی محبت آج اس کی جان لینے تک آ گئ تھی… پچھلے دنوں اس نے ہر ممکن کوشش کی تھی کہ کسی طرح اس کا خیال اپنے ذہن سے جھٹک سکے… لیکن یہ انکشاف تکلیف دہ تھا کہ وہ اس کے دل کے نہاں خانوں میں ایسی جگہ چھپ کر بیٹھا تھا جہاں سے اسے نکالنا مشکل ہی نہیں ناممکن تھا… وہ خود سے لڑنے میں, اپنے اندر کی جنگ میں ہار رہی تھی تبھی یوں بنا سوچے سمجھے آج کلب سے بھی نکل آئ… اس کا ذہن شل ہو رہا تھا لیکن وہ کسی طور پر اپنے اندر کا اضطراب اور بے چینی راجا کے سامنے ظاہر نہیں کرنا چاہتی تھی… جب اس نے صرف ایک شرط کی خاطر اس سے محبت کا اظہار نہیں کیا تھا تو وہ اصل میں کیسے اس سے محبت کر سکتا تھا… اس کی محبت کا جواب محبت سے کیسے دے سکتا تھا… اس کے چار الفاظ “آئ ڈونٹ لو یو…” تیر کی طرح ابیہا کا دل چھلنی کر گۓ تھے… وہ مزید خود کو اس کے سامنے نہیں گرانا چاہتی تھی… “تم جاؤ… میں آ جاؤں گی خود ہی…” اس کے انداز سے ہٹ دھرمی ظاہر تھی… ” اٹس انف…آپ ابھی میرے ساتھ چل رہی ہیں… ” راجا نے اس کا ہاتھ تھاما تھا… “کہا نا مجھے ابھی نہیں جانا… خدا کا واسطہ ہے اکیلا چھوڑ دو مجھے… لیو می الون…پلیز…” تلخ لہجے میں کہتے ہوۓ وہ اس کے سامنے ہاتھ جوڑتے ہوۓ بولی تھی… اور پھر جھٹکے سے ہاتھ کھینچا… “آپ…”راجا ابھی کچھ کہنے جا رہا تھا جب کوئ گاڑی موڑ مڑ کر ایک دم سامنے آئ…ہیڈلائٹس نے ان کی آنکھوں کو چندھیا دیا تھا… راجا کو لمحے کے ہزارویں حصے میں کسی خطرے کا احساس ہوا تھا… وہ اور ابیہا لڑتے جھگڑتے نہ جانے کب سڑک کے درمیان میں آ کھڑے ہوۓ تھے… گاڑی تیزی سے ان کی جانب بڑھتی جا رہی تھی… راجا نے ایک دم ابیہا کو دھکا دیا… وہ لڑکھڑاتی ہوئ سڑک کے کنارے جا گری… جب تک وہ سنبھلی گاڑی راجا کو ہٹ کرتی ہوئ آگے جا چکی تھی… راجا ہوا میں اچھلا تھا اور گاڑی کے اوپر سے ہوتا ہوا پیچھے آن گرا… گاڑی والے نے جان بوجھ کر ٹکر ماری تھی شاید… راجا نے بے ساختہ سر پر ہاتھ رکھا…”آہ…” منہ سے کراہیں نکلنے لگی تھیں… “راجا…” ابیہا تڑپ کر چینختی ہوئ اس کی طرف بڑھی… اس کے لہجے میں اذیت بھری تھی…… راجا نے اٹھنے کی کوشش کرتے ہوۓ اسے اپنی طرف بڑھتے دیکھا… گاڑی کچھ آگے جا کر رکی تھی… ” سالی… ایک بار پھر بچ گئ…” کوئ نفرت سے کہتا ہوا گاڑی سے اترا اور ابیہا کی جانب بڑھا… راجا نے چکراتے سر اور دھندلی ہوتی نگاہیں اس آدمی کو دیکھا…اس کے ہاتھ میں کچھ تھا… شاید لوہے کی ایک لمبی نال…

__________

“راجا… تت…تم ٹھیک ہو… چچ…چوٹ تو نہیں لگی تمہیں… او مائ گاڈ… کتنی بلیڈنگ ہو رہی ہے… مم… میں کیا کروں… میں…” وہ حواس باختہ سے راجا کے قریب پہنچی تھی… یہ جانے بغیر کہ پیچھے کوئ اس کی جان لینے اس کے سر پر پہنچ چکا ہے… ابیہا جو کچھ دیر پہلے خود سے, راجا سے, ساری دنیا سے خفا تھی… ایک دم ساری خفگی بھول گئ تھی… کچھ یاد تھا تو فقط اتنا کہ راجا کی کنپٹی سے خون بہہ رہا ہے… وہ گھٹنا تھامے بمشکل کھڑا ہوا ہے… چہرے کی دائیں جانب بہت سی خراشیں ہیں… لرزتی کانپتی ہوئ وہ دائیں بائیں دیکھ رہی تھی کہ کسی کو مدد کے لیے بلا سکے… اس کی حالت دیکھ کر راجا کے بدترین خدشات درست ہونے لگے تھے… وہ پاگل سی مغرور لڑکی نہ جانے کب اس کی محبت میں سر تا پا ڈوب چکی تھی… “ابیہا… آئم فائن…آئ ول…” وہ جسم سے اٹھتی ٹیسوں کو نظرانداز کرتا ابیہا کو تسلی دینے جا رہا تھا جب نظر ابیہا کے پیچھے آتے اس شخص پر پڑی… اس کے ہاتھوں میں لوہے کی راڈ تھی…. “راجا… تت… تمہارا خون بہہ رہا ہے…” ابیہا اردگرد سے بے گانہ روتے ہوۓ اس کی کنپٹی سے گال تک آتے خون پر ہاتھ لگا کر بولی تھی…اس کے ہاتھ کی انگلیاں خون سے سرخ ہوئیں… لیکن راجا اس کی جانب متوجہ ہی کب تھا… اس کی نظریں تو اس کی پشت کی جانب تھیں… ایک نظر ابیہا کے رنگ اڑے چہرے پر ڈالی… پھر اس کا ہاتھ اٹھا تھا… ابیہا کے دائیں کندھے پر بازو جما کر اس نے اس شخص کا وار روکا تھا جو راڈ ابیہا کے سر پر مارنے جا رہا تھا… راڈ کو سرے سے تھام کر اس کا وار خطا کر کے راجا نے دوسرے ہاتھ سے اس شخص کی گردن دبوچی تھی… یوں کہ ابیہا اس کے دونوں بازوؤں کے حصار میں تھی اور ابیہا کے پیچھے وہ آدمی… جو اب اپنی گردن چھڑانے کی تگ ودو میں تھا… راجا نے اس کے ہاتھ سے راڈ چھین کر دور پھینکی… ایک ہاتھ سے اس کی گردن کو گرفت میں لیے دوسرے ہاتھ سے ابیہا کو کھینچ کر اپنے پیچھے کیا… وہ مکمل طور پر راجا کی اوٹ میں تھی… راجا کی آنکھوں میں سرخی سی چھانے لگی… اس شخص کا گلہ دباتے ہوۓ راجا نے اس کی کلائ تھامی اور اپنا گھٹنا اٹھا کر اس کی کہنی پر مارا…ایک جھٹکا سا لگا تھا اسے… بازو کی ہڈی کہنی سے ٹوٹ چکی تھی… وہ آدمی بری طرح چلانے لگا… راجا نے اپنا سر زور سے اس کے سر پر مارا تھا… وہ شاید کوئ مقامی غنڈہ تھا جو اس بات سے بے خبر تھا کہ ابیہا کا محافظ کوئ عام آدمی نہیں… وہ تو اکیلا پندرہ بیس بندوں پر بھاری ہوتا… یہاں تو صرف ایک آدمی تھا اس کے مقابل…اور راجا بپھرا ہوا زخمی شیر…بھلا کیسے ٹک پاتا وہ راجا کے سامنے… چند منٹ بعد ہی وہ چاروں شانے چت ہو چکا تھا… راجا نے مڑ کر ابیہا کی جانب دیکھا… جو خوفزدہ سی کبھی راجا کو دیکھتی… اور کبھی سامنے گرے کراہتے ہوۓ اس شخص کی جانب… “اگر میرے آنے سے پہلے آپ اس شخص کے ہتھے چڑھ جاتیں تو ابھی یہاں اس کی جگہ آپ موجود ہوتیں… اس لیے بچکانہ حرکتیں چھوڑ دیجیے… اسی میں بھلائ ہے آپ کی… ” راجا نے اپنی تکلیف پر قابو پاتے ہوۓ ابیہا سے کہا تھا…ابیہا خاموش رہی… “اب چلنا ہے… یا اپنی جان کے کسی اور دشمن کا انتظار کرنا ہے یہاں رک کر…” نہ جانے کیوں اس کے انداز میں تلخی سی در آئ تھی… “لیکن… تمہیں چوٹیں…” ابیہا اس کے لہجے کی تلخی کو نظر انداز کرتی بمشکل چند الفاظ بول پائ تھی… ” میں چل سکتا ہوں… ” راجا نے لہجے کو مضبوط بنا کر سرد سی آواز میں کہتے ہوۓ اسے چلنے کا اشارہ کیا… ابیہا بغیر کچھ کہے سر جھکاۓ اس سے آگے چلنے لگی…

اگلی صبح راجا پھر اسکول کے گیٹ پر موجود تھا… اینجل گاڑی سے اتر کر مسکراتی ہوئ اس کے قریب آئ… “یہ لو… پراٹھا ہے… آج ماما کے پاس ٹائم نہیں تھا تو شیف انکل سے بنوایا تمہارے لیے….. تم کھا لینا.. اور یہیں میرا انتظار کرنا… میں چھٹی کے بعد آؤں گی تب خوب باتیں کریں گے… باۓ..” اس کے نزدیک آ کر کہا ایک لنچ باکس اسے تھمایا اور اسکول کی جانب بڑھ گئ… راجا نے مسکرا کر سر اثبات میں ہلایا… اور اسے گیٹ کی جانب بڑھتے ہوۓ دیکھتا رہا… یہاں تک کہ وہ گیٹ کے پیچھے غائب ہو گئ… بہت دیر تک راجا اس کے دئیے ہوۓ لنچ باکس کو دیکھتے ہوۓ اس پر انگلی پھیرتا رہا… پھر ایک اینٹ کے ساتھ غباروں کا دھاگا باندھا کہ وہ اڑ نہ جائیں… ہاتھ میں پکڑی تصویر دیوار پر ایک جانب رکھی… اور رغبت سے پراٹھا کھانے لگا… کل تک وہ پریشان تھا کہ غبارے نہ بکے تو وہ کھاۓ گا کہاں سے… لیکن اب اسے یقین آ گیا تھا کہ اوپر بھی ایک ایسی ہستی موجود ہے جسے ان سے زیادہ معلوم ہے ان کے پریشانیوں اور تکلیفوں کے بارے میں… سارا دن وہیں بیٹھا وہ اس کا انتظار کرتا رہا… نہ جانے کیوں اسے اینجل کا انتظار کرنا اچھا لگا تھا… اس کا اخلاق, اس کا بات کرنے کا انداز… وہ کافی متاثر ہوا تھا اس سے…

اسکول کی آخری گھنٹی سنائ دی اور پھر بچے اسکول سے نکلنے لگے… راجا کی متلاشی نگاہیں گیٹ پر ہی ٹکی تھیں… تبھی اس کی نگاہ گیٹ سے نکلتی اینجل پر پڑی… راجا کو وہیں بیٹھے دیکھ کر اس کی آنکھوں میں چمک ابھری تھی… آج وہ اکیلی نہیں تھی… اسی کی عمر کی چار پانچ بچیاں اور بھی تھیں اس کے ساتھ…راجا کی جانب اشارہ کرتی وہ ان سے کچھ کہہ رہی تھی… چند لمحوں بعد وہ راجا کے قریب پہنچ چکی تھیں… اینجل نے اپنی ہتھیلی آگے بڑھائ… “ہیلو پرنس… یہ کل کے بیلونز کے پیسے…” مسکرا کر کہتے ہوۓ وہ اسے ایک نیا خطاب دے چکی تھی… راجا نے حیرت سے اس کی جانب دیکھا… اپنے اس نۓ نام پر مسکرا دیا… ہتھیلی آگے بڑھائ… اینجل نے مسکراتے ہوۓ اس کی ہتھیلی پر اپنی ہتھیلی خالی کی… “آہ…” راجا ایک دم بوکھلایا… زور سے اپنا ہاتھ جھٹکا… اینجل اور اس کی فرینڈز منہ پر ہاتھ رکھے ہنس رہی تھیں… راجا نے اڑے رنگ سے دائیں جانب زمین پر دیکھا جہاں ربڑ کی چھپکلی گری تھی… وہ ان کی شرارت سمجھ گیا تھا…تبھی جھینپ سا گیا… “سوری…پرنس… یہ صرف ایک جوک تھا… ” بے تحاشہ ہنسنے کے باعث اینجل کے پھولے پھولے گال سرخ ہو رہے تھے… آنکھوں میں شرارت ناچ رہی تھی…راجا خفیف سا ہو کر سر جھکا گیا… “یہ لو کل کے پیسے… اور آج بھی دو بیلونز دے دو… ” اس بار اینجل نے دوسرا ہاتھ آگے کیا… راجا تذبذب کا شکار اسے دیکھے گیا… وہ ایک بار پھر ہنسنے لگی تھی… “لے لو پرنس… اس بار پیسے ہی ہیں…” کہتے ہوۓ مٹھی بھی کھول کر دکھائ… راجا نے گہرا سانس بھرتے ہوۓ ہاتھ آگے بڑھا کر پیسے لے لیے… اینٹ سے غباروں کا دھاگا کھولا… اور اس میں سے دو غبارے اینجل کو تھما دئیے… اینجل غبارے لیے اس کے قریب جا بیٹھی… “آ جاؤ… ایک ایک کر کے آؤ اور بیلونز لیتے جاؤ…” راجا کے ہاتھ سے سارے بیلونز لے کر اب وہ اپنی فرینڈز سے کہہ رہی تھی… شاید وہ اسی لیے انہیں ساتھ لے کر آئ تھی کہ راجا کے بیلونز انہیں بیچ سکے… ان چاروں سے پیسے لے کر انہیں بیلونز دینے کے بعد باقی بیلونز اس نے راجا کی طرف بڑھاۓ… اور دوسرے ہاتھ میں موجود پیسے بھی… جو ان بیلونز سے ملے تھے… راجا نے مسکراتے ہوۓ دونوں چیزیں تھام لیں… “پراٹھا کھا لیا تھا… ؟؟” لنچ باکس کی طرف اشارہ کر کے سوالیہ نظروں سے راجا کو دیکھا… راجا نے اثبات میں سر ہلایا… “اچھا سنو… کیا تم روز یہاں آیا کرو گے…؟؟” آس بھری نظروں سے اس کی جانب دیکھا… “کیوں…؟؟” راجا نے سامنے دیکھتے ہوۓ سوال کیا تھا… “مجھے روز تم سے بیلونز خریدنے ہیں نا اس لیے…” وہ معصوم سے لہجے میں کہہ رہی تھی… “اچھا… روز بیلونز لے کر کیا کرو گی تم…؟؟” راجا نے دلچسپ نظروں سے اس کی جانب دیکھا… اس کی بات پر اینجل کے چہرے پر ڈھیر سارا جوش نظر آنے لگا… “تمہیں پتا ہے… مجھے نا بیلونز بہت پسند ہیں… اور مجھے اتنااااااا اچھا لگتا ہے جب یہ بیلونز لے کر میں اپنے گھر کی چھت پر جاتی ہوں اور وہاں جا کر انہیں ہوا میں چھوڑ دیتی ہوں… اڑتے اڑتے یہ دور آسمان پر چلا جاتا ہے نا… اور میں اوجھل ہونے تک انہیں دیکھتی ہوں…کاش میں بھی بیلون ہوتی اور ایسے ہی اوپر آسمان پر جا سکتی…” خوشی سے بھرپور لہجے میں کہتے ہوۓ آخر میں وہ اداس ہوئ… راجا اسے دیکھے گیا… “ٹھیک ہے آؤں گا روز…” نہ جانے کیا سوچ کر وہ کہہ گیا… اور اس کے اتنا کہنے پر اینجل کے چہرے سے ایک بار پھر خوشی پھوٹنے لگی… “پکا پرامس…؟؟” وہ اس سے یقین دہانی چاہ رہی تھی… راجا نے پھر سر ہلانے پر اکتفا کیا… “اچھا پرنس… تم رہتے کہاں ہو… تمہاری ماما اور ڈیڈ کہاں ہیں…؟؟” اینجل پاپا کی بجاۓ اپنے فادر کو ڈیڈ کہتی تھی… راجا کی آنکھوں میں کچھ چبھنے لگا… “اللّہ کے پاس…”بھیگے لہجے میں کہہ کر وہ ایک دم چپ ہو گیا… اینجل نے افسوس سے اس کے چہرے کی جانب دیکھا… چند لمحے خاموشی چھائ رہی… “پتا ہے… مجھے تم سے باتیں کرنا بہت اچھا لگتا ہے… کیا تم میرے بیسٹ فرینڈ بنو گے…؟؟” اس نے راجا کا دھیان ہٹانا چاہا… تبھی ہاتھ آگے بڑھا کر بولی تھی… راجا نے دھیمی مسکان لیے اس کے بڑھے ہاتھ کی جانب دیکھا… پھر اپنا ہاتھ بھی آگے بڑھا دیا… اینجل بیسٹ فرینڈ پا کر پھولے نہیں سما رہی تھی… جلدی سے اپنا بیگ کھولا… “یہ دیکھو… میں اپنے بیسٹ فرینڈ کے لیے چاکلیٹ بھی لائ ہوں… ” وہ بیگ سے دو چاکلیٹس نکال کر ایک راجا کو دیتے ہوۓ بولی… دوسری چاکلیٹ کا ریپر اتار کر خود کھانے لگی… اس کی ٹانگیں اور دونوں پونیاں مسلسل ہل رہی تھیں… راجا نے اس کی دی چاکلیٹ کھائ نہیں… بس اسے دیکھتا رہا… “تمہاری گاڑی آج بھی نہیں آئ…؟؟ ” سر جھکاۓ وہ اپنے پیر کے انگوٹھے کو دیکھنے لگا… “نہیں… میں نے خود کریم بابا سے کہا تھا کہ لیٹ آئیں… مجھے اپنے فرینڈ سے ڈھیر ساری باتیں کرنی ہیں…. ” وہ پیر جھلاتے ہوۓ مزے سے بولی… راجا اسے دیکھ کر رہ گیا… اس کے دماغ میں بس ایک ہی بات گردش کر رہی تھی کہ بھلا اینجل کو اس میں ایسا کیا نظر آیا جو یوں دو ہی دنوں میں اس سے دوستی کر بیٹھی… جیسا اس کا حلیہ تھا کوئ اس کی جانب دیکھنا بھی گوارہ نہ کرتا… اس کے پاس بیٹھنا اور دوستی کرنا تو دور کی بات… نہیں جانتا تھا کہ ابھی اس کی زندگی میں بہت سی آزمائیشیں باقی ہیں… جن میں سے سب سے بڑی آزمائش اینجل کے ذریعے ہی آۓ گی…

جاری ہے

Episode 12