Chasham e Nam by Ayat Noor NovelR50721 Chasham e Nam by Ayat Noor Episode 06,07

وہ بلیو جینز پر ریڈ شارٹ شرٹ پہنے ٹک ٹک کرتی سیڑھیاں اتر رہی تھی… گلاسز شرٹ کے گلے میں اٹکا رکھے تھے… ہونٹوں پر ڈارک ریڈ لپ اسٹک لگاۓ کمر سے نیچے آتے کھلے بالوں میں اس کا حسن مزید دو آتشہ ہو گیا تھا…اس کے پیچھے ملازمہ اس کا بیگ اٹھاۓ چلی آ رہی تھی…جس سے ظاہر ہو رہا تھا کہ وہ یونیورسٹی کے لیے نکل رہی ہے… لاؤنج سے نکل کر وہ پورچ میں آئ…”یہ سب کہاں چلے گۓ… ” اپنے گارڈز کو وہاں نہ پا کر وہ بڑبڑائ… کہ اس سے پہلے ہی اس کے گارڈز کی گاڑی تیار ہوتی تھی… “جہاں بھی گۓ… اچھا ہوا… جان چھوٹی…” خود ہی اپنے سوال کا جواب دیتی وہ مسرور سی گاڑی کا دروازہ کھولنے لگی…”ابیہا… ” وہ گاڑی میں بیٹھنے ہی لگی تھی جب ڈیڈ کی آواز پر رک گئ… اسد شیرازی لان میں چلتے ہوۓ اس کی جانب آ رہے تھے… ان کے ساتھ کوئ اور بھی تھا… ابیہا نے آنکھیں سیکڑ کر دیکھا… “اوہ…” لبوں سے برآمد ہوا… “یہ تو وہی ہے جس نے اس دن میری جان بچائ… لیکن یہ یہاں کیسے…. ؟؟” خود کلامی کے سے انداز میں وہ ان دونوں کو اپنے نزدیک آتے دیکھتی رہی… “گڈ مارننگ ڈیڈ…” اسد شیرازی کے آتے ہی وہ ان کے قریب ہوئ… “مارننگ… کیسا ہے ہمارا بیٹا…” اسد شیرازی نے اسے بازو کے حصار میں لیتے ہوۓ اس کے ریشمی بالوں پر بوسہ لیا… جبکہ راجا باپ بیٹی کے پیار سے بے نیاز پینٹ کی جیبوں میں ہاتھ گھساۓ بے نیاز سا نظریں جھکاۓ کھڑا تھا… دایاں پیر مسلسل ہل رہا تھا…”فائن ڈیڈ… آپ اس وقت یہاں… آپ تو آفس میں ہوتے ہیں اس ٹائم…” ابیہا نے ایک نظر اس بے نیاز سے انسان پر ڈالی جیسے اس کی یہاں موجودگی کا سبب جاننا چاہ رہی ہو…. “ہاں بیٹا… کچھ بات کرنی تھی تم سے… اس سے ملو… یہ راجا ہے…” اسد شیرازی راجا کی جانب متوجہ ہوۓ… ان کی بات پر راجہ نے صرف ایک پل کو نظر اٹھا کر ابیہا کو دیکھا اور پھر نظریں گھما کر ارد گرد دیکھنے لگا… جیسے اسے اس ماحول سے اور اس بات چیت سے کوئ سروکار نہ ہو… “یس ڈیڈ…. میں پہلے اس سے مل چکی ہوں… لیکن یوں تعارف کروانے کا مطلب…؟؟” ابیہا کو کچھ کھٹکنے لگا تھا اسد شیرازی کے انداز سے… “مطلب یہ ہے بیٹا کہ اسے میں نے اپائنٹ کر لیا ہے آپ کے باڈی گارڈ کے طور پر…. اور امید ہے اس کے ہوتے ہوۓ کوئ تمہیں چھو بھی نہیں سکتا… ” اسد شیرازی کی بات پر ابیہا کے منہ کے زاویے بگڑے…. “اف ڈیڈ… پھر سے وہی گارڈز… وہ چار پہلوان کم تھے کیا… جو ایک اور… ” غصے بھری نگاہ راجا پر ڈالی جو ابھی تک ویسا ہی بے نیاز سا کھڑا تھا… ” ابیہا… بری بات ہے… آپ کو ان چاروں سے شکایت تھی… اب وہ آپ کے ساتھ نہیں ہوں گے… راجا کے ہوتے ہوۓ ان کی ضرورت ہی نہیں… ” اسد شیرازی کی بات پر جہاں اس کا دل تھوڑا مطمئین ہوا کہ اب ان چار عدد موٹے موٹے پہلوانوں سے جان چھوٹے گی وہیں اس نئ مصیبت یعنی راجا کی وجہ سے اس کا منہ بن گیا… آخر ایسا بھی کیا تھا اس شخص میں کہ ڈیڈ یوں اندھا بھروسہ کر رہے اس پر… عجیب و غریب منہ بناتی وہ سوچ رہی تھی… ‘چلو خیر…. ان چاروں کو میں چکما دے جاتی تھی… یہ تو پھر ایک ہے… دیکھنا ایسا مزہ چکاؤں گی کہ خود ہی یہ جاب چھوڑ کر بھاگ جاۓ گا… ناک میں دم کر دوں گی اس کے…. ‘ اپنی سوچوں میں گم وہ خطرناک پلان بنا رہی تھی جب اسد شیرازی کی آواز پر چونکی… “آج سے اور ابھی سے یہ آپ کا گارڈ ہے… اور اس کے ساتھ کوئ مس بی ہیو مت کرنا…. انڈر سٹینڈ…” نرم لہجے میں وہ وارن کر رہے تھے… “شیور ڈیڈ… ” بظاہر مسکراتے ہوۓ وہ دانت پیس کر رہ گئ… “آپ دوسری جانب جا کر بیٹھیے… ڈرائیو میں کروں گا…” وہ اپنی کار کی ڈرائیونگ سیٹ پر بیٹھنے ہی والی تھی جب خشک سی آواز سنائ دی… ابیہا حیرت زدہ رہ گئ… ایک جھٹکے سے مڑی…”کیا کہا…؟؟” اسے لگا اسے شاید سننے میں غلطی ہوئ ہے… “ڈرائیو میں کروں گا…” مختصر الفاظ میں راجا نے اپنی بات دہرائ… “ایکسکیوزمی… یہ میری گاڑی ہے… تم دوسری گاڑی میں مجھے فالو کرو گے… سمجھے…” ترش لہجے میں کہتے ہوۓ اس نے راجا کو اس کی اوقات یاد دلانا چاہی… “راجا کسی کو فالو نہیں کرتا… آپ کے ڈیڈ سے پہلے ہی بات ہو چکی ہے میری اس بارے میں…” سپاٹ انداز میں کہتا وہ ابیہا کا خون جلا گیا… “ڈیڈ…” ابیہا احتجاجاً اسد شیرازی کی جانب گھومی… “ابیہا…. اسے ڈرائیو کرنے دو… تمہاری سیفٹی کے لیے ضروری ہے…” اسد شیرازی نے قطعی لہجے میں کہا تھا… راجا نے اس کام کے لیے واحد شرط یہی رکھی تھی کہ وہ ابیہا کی گاڑی میں ہی سفر کرے گا اور ڈرائیو بھی خود کرے گا… اس فیصلے کے خلاف ہونے کے باوجود اسد شیرازی کو اس کی شرط ماننا ہی پڑی تھی… “بٹ ڈیڈ…” ابیہا ناراض سی کہہ رہی تھی… جب اسد شیرازی گویا ہوۓ… “ابیہا… آئ تھنک اب آپ لوگوں کو جانا چاہئیے… یونیورسٹی سے دیر ہو رہی ہے… ” کہہ کر اسد شیرازی اندر کی جانب بڑھ گۓ… “اف…. آج کا تو دن ہی خراب ہے…” وہ غصے سے جلتی, کلستی, بڑبڑاتی ہوئ راجا کے برابر والی سیٹ پر آ بیٹھی…. اس کے بیٹھتے ہی راجا نے گاڑی اسٹارٹ کر دی… اور بغیر اس کی جانب دیکھے آگے بڑھا۔۔

_________

بہت سی جگہوں پر دھکے کھاتے ہوۓ وہ دونوں اب نڈھال سے ایک گاؤں سے باہر نکلتی کچی سڑک پر سر جھکاۓ بیٹھے تھے…

بھوکے پیاسے, روٹی کے ایک نوالے کو بھی ترستے ہوۓ… انہیں تو یہ بھی معلوم نہ تھا کہ وہ کس جگہ اور کس گاؤں میں ہیں… “بھیا… تم گھر سے کیوں بھاگے…؟؟” گڈی روتے ہوۓ ہچکیوں کے درمیان شکایت بھرے انداز میں اس سے پوچھ رہی تھی… راجا نے بے بسی بھری نگاہ اس پر ڈالی اور ہاتھ میں پکڑے تنکے کی مدد سے پھر زمین پر آڑھی ترچھی لکیریں کھینچنے لگا… اس کا نچلا ہونٹ سوجھا ہوا تھا اور بائیں آنکھ سے ذرا نیچے رخسار پر نیل نظر آ رہا تھا جو صبح کی لڑائ کا نتیجہ تھا… اس کی طرف سے کوئ جواب نہ پا کر گڈی گھٹنوں میں سر دے کر بیٹھ گئ… اس کے الجھے بکھرے بھورے بال اب گردن سے چپک رہے تھے… اردگرد اندھیرا گہرا ہونے لگا تھا… راجا ڈھلتے ہوۓ نارنجی سورج کو دیکھنے لگا… یہ سورج ان کی زندگی میں کبھی روشنی لے کر طلوع نہیں ہوا تھا… ان کی زندگیوں میں بھی فقط اندھیرے ہی اندھیرے تھے… کاش کوئ جگنو کی مانند ان کی راہوں کی روشنی بن جاۓ… کاش کوئ معجزہ ہو اور پلک جھپکتے میں ان کی زندگیاں بدل جائیں…. جہاں وہ دونوں بھی باقی بچوں کی طرح اپنا بچپن بھرپور طریقے سے گزار سکیں… وہ آنکھوں میں ویرانی لیے سوچتا چلا جا رہا تھا… جب کچھ آوازوں پر چونکا… جھٹکے سے گردن موڑی… ان کے پیچھے کھیتوں کے درمیان تین نوجوان لڑکے کچھ کہتے ہوۓ, قہقہے لگاتے اور ایک دوسرے کے ہاتھ پر ہاتھ مارتے ان کی جانب بڑھ رہے تھے… راجا کے وجود میں سرد سی لہر دوڑ گئ… اس نے عجیب سے احساسات لیے گڈی کی جانب دیکھا جو کبھی راجا کو اور کبھی ان لڑکوں کو دیکھتی… “چل… جا کر دیکھتے ہیں… کہاں سے آۓ ہیں یہ… ارے… یہ تو لڑکے کے ساتھ لڑکی بھی ہے… اور ہے بھی بڑی پیاری… معصوم سی…” جملے تو عام سے تھے لیکن نہ جانے کیوں راجا کو ان کے ارادے ٹھیک نہیں لگ رہے تھے… “چل گڈی…” عجلت بھرے انداز میں کہتے ہوۓ اس نے گڈی کو بازو سے گھسیٹا اور تیز تیز سڑک پر چلنے لگا… گہرے گہرے سانس لیتا وہ بار بار مڑ کر دیکھ رہا تھا… “ابے رک… کدھر جا رہا ہے سالے… ” وہ تینوں گھٹیا انداز میں کہتے ان کے پیچھے ہی آ رہے تھے… ویران سنسان سی سڑک تھی… راجا کو ایک دم بے تحاشا خوف نے گھیر لیا… وہ دونوں چھوٹے تھے اور اس ویران جگہ سے انجان اور اکیلے… وہ تینوں یہاں ان کے ساتھ کچھ بھی کرتے تو کسی کو خبر تک نہ ہوتی… اور سب سے بڑھ کر اس کے ساتھ اس کی بہن تھی… وہ اگر اس کی بہن کو لے جاتے تو وہ اکیلا ان کا کیا بگاڑ لیتا…. اسی سوچ نے اسے ٹھٹھرا کر رکھ دیا… وقت اور حالات نے اسے اس کی عمر سے کہیں بڑا بنا دیا تھا…وہ ان نزاکتوں کو بھی سمجھنے کے قابل ہو چکا تھا جو اس کی عمر کے بچے نہیں سمجھ سکتے… تیز تیز قدموں سے چلتے ہوۓ اس نے گردن موڑی… وہ تینوں مغلظات بکتے اب ان کے قریب پہنچ چکے تھے… “کہاں تک بھاگے گا… یہ ہمارا علاقہ ہے… ایسے بچ کے تو نہیں جانے دیں گے تم دونوں کو…” ان میں سے ایک بولا… اور جھپٹ کر گڈی کو پکڑنا چاہا… “بھاگ گڈی…” راجا نے اپنی پوری ہمت مجتمع کی اور دوڑ لگا دی… گڈی سہمی ہوئ سی اس کے ساتھ گھسٹتی ہوئ جا رہی تھی…”اوۓ سلیم… پکڑ ان دونوں کو…” ایک لڑکا بولا اور ساتھ ہی پیچھے سے بھی بھاگتے قدموں کی آوازیں آنے لگیں… گڈی کے رونے کی اوازیں بلند ہونے لگیں… وہ ننھے قدموں سے بھاگتے ہوۓ اونچی آواز میں رو رہی تھی… اس کے رونے کی آواز اندھیرے میں کافی دور تک سنائ دے رہی تھی… کچھ ہی فاصلہ طے ہوا تھا جب گڈی ٹھوکر کھا کر گری… راجا کے ہاتھ سے اس کا ہاتھ چھوٹ گیا…”آہ… بھیا… ” روتے ہوۓ گڈی کے منہ سے کراہیں بلند ہوئیں… راجا تیزی سے اس کے پاس آیا… لیکن تب تک پیچھے آتے ہوۓ بھیڑیے ان کے سر پر پہنچ چکے تھے… گڈی کے ہاتھ کی انگلی سے پھر خون نکلنے لگا تھا… راجا نے بے بسی سے گڈی کی جانب دیکھا اور پھر اپنے پیچھے موجود ان شیطانوں کو جو لبوں پر خباثت بھری مسکراہٹ لیے انہیں ہی تک رہے تھے… “اب کہاں جاۓ گا بھاگ کر… بڑی ہمت ہے تجھ میں… اچھااااااا بہن کی فکر ہو رہی تھی… ہمیں بھی بڑی فکر ہے تمہاری بہن کی… ارے ارے ارے… کیا ہوا بے بی کو… کیوں رو رہی ہو… ؟؟ ” ان میں سے ایک لڑکا سلیم گھٹنوں کے بل ان دونوں کے قریب بیٹھا اور اپنے ہاتھ سے گڈی کے رخسار کو چھونا چاہا جب راجا نے اس کا ہاتھ گڈی کے چہرے تک جانے سے پہلے ہی جھٹک دیا… “ہاتھ مت لگانا میری بہن کو…” نفرت بھرے لہجے میں کہتے ہوۓ وہ اس کی آنکھوں میں دیکھ رہا تھا… وہ لڑکا حیران سا اسے دیکھنے لگا… جب دوسرا لڑکا آگے بڑھا…”ابے…. چھٹانک بھر کا ہے تو… بہن کی عزت کا بڑا پتا ہے…ایک تھپڑ کھاۓ گا تو سات دن ہوش نہیں آنا تجھے… یہ لے لگایا ہاتھ تیری بہن کو… کیا کر لے گا… ” اس نے گڈی کو ہاتھ سے پکڑ کر اپنی جانب گھسیٹنا چاہا جس پر گڈی چینخ اٹھی تھی… راجا نے پوری قوت سے اس لڑکے کے بازو پر دانتوں سے کاٹا جس سے وہ بلبلاتا ہوا گڈی کا ہاتھ چھوڑ کر پیچھے ہٹا… راجا نے گڈی کو کھینچ کر کھڑا کیا… گڈی ڈرتی ہوئ اس کے پیچھے چھپ گئ… وہ لڑکا ابھی تک اپنا بازو سہلا رہا تھا… “لے بیٹا پہلے تیرا کام تمام کرتے ہیں… اس کے بعد نمٹیں کے تیری بہن سے… “دوسرے دونوں طیش میں آتے ان کی جانب بڑھے… ان کے درمیان دو قدم کا فاصلہ تھا جب راجا نے اپنی کمر کے پیچھے چھپایا ہاتھ سامنے کیا اور اس میں پکڑا تھوڑا بڑے سائز کا پتھر پوری قوت سے اس لڑکے سلیم کی آنکھ پر دے مارا… پتھر نشانے پر لگا تھا… وہ لڑکا آنکھ پکڑے دہرا ہوتا چلا گیا… جبکہ اس کے ساتھی بھی بوکھلا کر اس کی جانب متوجہ ہوۓ… راجا نے موقع غنیمت جانا اور گڈی کا ہاتھ تھامے ایک بار پھر بھاگ اٹھا… اس بار گڈی نے بھی پوری ہمت دکھائ تھی کہ اگر اب وہ پکڑے جاتے تو انہیں کل کا سورج دیکھنا نصیب نہ ہوتا شاید… وہ لڑکے اب اپنے ساتھی کو زخمی حالت میں چھوڑ کر ان کے پیچھے تو جا نہیں سکتے تھے اسی لیے ہاتھ مسل کر رہ گۓ… کچھ دور جا کر گڈی اور راجا کو مختلف گھروں سے نکلتی روشنیاں دکھائ دیں تو جان میں جان آئ… وہ لوگ غالباً اگلے گاؤں کے قریب پہنچ گۓ تھے… اور کم از کم یہاں تنہائ اور ویرانی کا فائدہ اٹھا کر کوئ انہیں اپنی درندگی کا شکار تو نہیں بناتا… یہی سوچ کر راجا اس گاؤں میں داخل ہو گیا… اور ایک جانب کھنڈر نما گھر کی دیوار سے ٹیک لگا کر بیٹھ گیا… گڈی اس کے بازو سے چپکی ابھی تک لرز رہی تھی… راجا نے اسے اپنے بازو کے حصار میں لیا… “سو جا گڈی… میں ہوں نا… کچھ نہیں ہو گا تجھے… ” اس کا سر تھپکتا وہ نڈھال سا اپنا سر بھی دیوار سے ٹکا گیا… خوف کی حالت میں بھوک پیاس سب احساس کہیں دور جا سوۓ تھے… چند لمحوں بعد گڈی اس کے کندھے پر سر رکھے نیند کی آغوش میں جا چکی تھی جبکہ راجا ساری رات ایک پل کے لیے سو نہ سکا…

یونیورسٹی کی پارکنگ میں جا کر راجا نے گاڑی روکی… اور ابیہا کے اترنے کا انتظار کرنے لگا… ابیہا گاڑی سے اتری تو راجا بھی ڈرائیونگ سیٹ کا دروازہ کھول کر باہر نکلا… بلیک جینز پر مسلز کو نمایاں کرتی سفید ہاف سلیوز ٹی شرٹ پہنے وہ کئ لڑکیوں کی نگاہوں کا مرکز بنا تھا… گلاسز اتار کر اس نے ڈیش بورڈ پر رکھے اور ابیہا کی طرف آیا… “ایسے منہ اٹھاۓ کیا کھڑے ہو… میرا بیگ اور بکس اٹھاؤ اور کلاس میں چھوڑ کر اٹھاؤ… ” نخوت سے کہتی وہ آگے بڑھ گئ… ابھی دو قدم ہی اٹھاۓ تھے جب اسے رکنا پڑا… “میں آپ کا باڈی گارڈ ہوں… باڈی مین نہیں… آپ کے اپنے ہاتھ سلامت ہیں… یہ کام آپ خود کر سکتی ہیں…” پینٹ کی جیبوں میں ہاتھ گھساۓ وہ تھوڑا سا جھک کر عادتأ اپنے جوتے کی نوک سے زمین کھرچ رہا تھا… ابیہا ایک جھٹکے سے مڑی… “پہلے بھی یہ کام میرے گارڈز ہی کرتے تھے… سمجھے تم…” تیز لہجے میں کہتے ہوۓ وہ اپنا رعب جمانے کی کوشش کر رہی تھی… “کرتے ہوں گے… لیکن میں نہیں کروں گا…یہ گارڈ کی ڈیوٹی میں شامل نہیں…آج سے یہ سب کام آپ کو خود ہی کرنے ہوں گے…” کان کی لو کو مسلتا وہ بے نیاز سا اردگرد نظریں گھمانے لگا جہاں بہت سی رنگ برنگی تتلیاں دلچسپی سے اسے ہی تک رہی تھیں…

“یو….” وہ غصے سے کچھ کہتے کہتے رکی تھی… “اوہ… آپ نے مجھ سے کچھ کہا…؟؟” ابرو اچکاۓ راجا نے ایک نظر اس کے جھلاہٹ سے سرخ پڑتے چہرے کو دیکھا… ابیہا نے جواب دئیے بغیر جھپٹ کر گاڑی سے اپنا بیگ اٹھایا بکس ہاتھ میں پکڑیں اور ٹک ٹک کرتی آگے بڑھ گئ… چند قدم ہی آگے جا پائ تھی جب ایک بار پھر اسے رکنا پڑا…وہ طیش سے مڑی…

“او ہیلو… اب یوں منہ اٹھاۓ کدھر جا رہے ہو…؟؟” ابیہا اسے اپنے پیچھے قدم بڑھاتے دیکھ کر غرائ… “آپ کے ساتھ… یونیورسٹی میں…” راجا بھی رک گیا تھا…”تم گارڈ ہو میرے… تو کیا مطلب ہے کہ اب ہر جگہ تم میرا دم چھلا بن کر گھومو گے…؟؟” ابیہا کے لہجے میں تحقیر تھی… “ظاہر ہے… یہی میری ڈیوٹی ہے…” راجا نے اثر لیے بنا کندھے اچکاۓ جیسے اسے ابیہا کے لہجے سے کوئ فرق نہ پڑا ہو… “ڈیوٹی مائ فٹ… یونیورسٹی کے اندر تم نہیں جا سکتے… یہیں گیٹ کے پاس گیٹ کیپر کے ساتھ بیٹھو گے تم… اور میرے یونی سے فری ہونے کا انتظار کرو گے… ” چبا چبا کر کہتی وہ زہر لگ رہی تھی…راجا کا دل تو چاہا ایک گھما کر دے اسے بائیں ہاتھ کی… لیکن ضبط کر گیا… “آپ کے ڈیڈ سے میری بات ہو چکی ہے… میں آپ کی پروٹیکشن کے لیے ہر جگہ آپ کے ساتھ رہوں گا… سواۓ آپ کے روم اور واشروم کے…” نظر جھکاۓ وہ پر اعتماد لہجے میں کہہ گیا تھا… ابیہا نے غصے سے دیکھا…”تم ایسا کیوں نہیں کرتے… میرے روم اور واشروم میں بھی میرے ساتھ ہی آ جانا… کیا معلوم وہاں بھی کوئ غنڈہ چیونٹی کا روپ دھارے میری جان کا دشمن بنا بیٹھا ہو…” وہ طنزیہ لہجے میں کہہ رہی تھی…”جیسا آپ کا حکم…” راجا نے سنجیدگی سے سر خم کیا… ابیہا سلگ ہی تو اٹھی تھی اس کے اس انداز پر… “آہ…میں پاگل ہو جاؤں گی…” ابیہا نے بے بسی سے بالوں کو جکڑا… “پہلے سے ہی ہیں…” راجا بڑبڑایا تھا لیکن ابیہا سن چکی تھی… “واٹ؟؟ کیا کہا تم نے؟؟” وہ دھاڑی… “بات دہرانا پسند نہیں…” راجا بے نیازی سے اردگرد دیکھنے لگا… “ایک نمبر کے ڈھیٹ ہو تم…” ابیہا کہتے ہوۓ مڑی اور تیز قدموں سے ایک جانب بڑھ گئ… “تعریف کے لیے شکریہ…” راجا نے بھی کندھے اچکاتے ہوۓ اس کی تقلید میں قدم بڑھاۓ… اس بار ابیہا نے کوئ جواب دینے سے گریز ہی برتا…

میٹنگ روم میں اسپیشل سروسز گروپ آف کمانڈوز کے چند اہم نوجوان بیٹھے تھے… وہی میٹنگ رومز کا مخصوص ماحول تھا… اندھیرے کمرے میں فقط سامنے آن کی گئ ایل ای ڈی اسکرین کی دودھیا روشنی پھیلی تھی… جس کے سامنے سر حبیب کھڑے سب کو اسکرین پر کچھ دکھا رہے تھے…

چند لمحوں بعد وہ ان چار نوجوانوں کی جانب مڑے…

“یہ تو تھیں تصویریں ان لوگوں کی جو پاکستان کے بڑے بڑے اسمگلرز, کرمنلز اور لڑکیوں کے بیوپاریوں کے طور پر جانے جاتے ہیں اور جن کے متعلق ابھی تک ہمیں ایسا کوئ ٹھوس ثبوت نہیں مل سکا کہ ہم انہیں گرفتار کر سکیں… پچھلے دنوں ہم نے جس دہشت گرد رام کو پکڑا اس سے جہاں ہمیں بہت سی اہم خبریں ملیں وہیں یہ اطلاع بھی ملی کہ ان سب اسمگلرز کا بھی ایک باس ہے جس کے انڈر یہ سب کام کرتے ہیں… وہ شخص خود سامنے نہیں آتا بس ان سب کو اپنی انگلیوں پر نچاتا ہے… انڈر ورلڈ مافیا میں وہ “مالک” کے نام سے جانا جاتا ہے…جس کی حیثیت ایک ڈان کی سی ہے… نہ آج تک کسی نے اسے دیکھا نہ ہی کوئ اس کے بارے میں کچھ جانتا ہے… یوں سمجھ لیں کہ پاکستان میں اس وقت جتنے بھی جرائم پیشہ لوگ ہیں ان سب کا سرپرست وہ ہے… اور چھپ کر وہ ہر کام کی نگرانی کرتا ہے… بڑے سے بڑا اسمگلر بھی اس کے نام سے کانپتا ہے… یہ جو رام ہے اس کا بھی اس سے تعلق تھا… پاکستان میں حملے اور بم بلاسٹ کرنے کے لیے بارود اور اسلحہ اسے مالک کی طرف سے ہی فراہم کیا گیا… انسانی جانوں سے کھیلنا اور اس پوری دنیا میں اپنا ڈر,اپنا خوف بٹھانا ہی مالک کا شوق ہے… ” میجر حبیب سانس لینے کو رکے… سب منجمند سے ان کی باتیں سن رہے تھے… ” مالک اور اس جیسے بہت سے اور لوگ ہیں جو ہمارے وطن کی جڑوں کو کھوکھلا کر رہے ہیں… دھماکے کروا کر جہاں یہ بہت سے لوگوں کی جان لے لیتے ہیں وہیں پاکستان کی ہر گلی, ہر چوراہے میں خوف کی فضا قائم کر دیتے ہیں کہ لوگ اپنے گھروں سے نکلتے ہوۓ ڈرتے ہیں… آج ہمارے اس پیارے ملک کے حالات اس نہج پر پہنچ چکے ہیں کہ ایک شخص گھر سے نکلتا ہے تو اسے یہ امید ہی نہیں ہوتی کہ وہ شام کو گھر واپس زندہ لوٹ سکے گا یا نہیں… پاک وطن کے حالات کو سدھارنے کے لیے مالک جیسے انسانی جان کے دشمنوں کا خاتمہ ضروری ہے… ” میجر حبیب نے گہرا سانس بھرا… ” ہم نے اپنے طور پر انتہائ خفیہ ذرائع سے مالک کے بارے میں کچھ معلومات اکٹھی کی ہیں… اس سے پہلے میں آپ لوگوں سے یہ کہنا چاہوں گا کہ ہماری آج کی اس میٹنگ کے بارے میں باہر کسی کو کچھ خبر نہ ہو… یہ معاملہ انتہائ نازک ہے… اور ہمیں جو بھی کرنا ہے نہایت سوچ سمجھ کر اور خفیہ طریقے سے کرنا ہے… ” میجر حبیب کہتے ہوۓ اسکرین کی جانب متوجہ ہوۓ… جہاں اب ایک تصویر ابھری تھی… “یہ ہیں اسد شیرازی… دنیا انہیں ایک نامور بزنس مین کے طور پر جانتی ہے… صاف شفاف ریکارڈ… کبھی ان کے خلاف کوئ کیس نہیں بنا… کبھی کوئ افئیر اخبارات کی زینت نہیں بنا… اور یہ تو آپ لوگ بھی اچھی طرح جانتے ہیں کہ اس دنیا میں کوئ بھی دودھ کا دھلا نہیں… بات اگر کسی بڑے بزنس مین کی ہو تو ایسا ہونا امپاسیبل ہے… یہ آدمی اوپر سے دکھنے میں جتنا سیدھا سادھا اور شریف نظر آتا ہے اندر سے اتنا ہی غلیظ اور دوغلا ہے… دنیا کے سامنے اس کا فقط ایک چہرہ ہے… اسد شیرازی کا چہرہ… لیکن یہی شخص انڈر ورلڈ میں ایک اور نام سے جانا جاتا ہے… مالک کے نام سے… ” میجر حبیب نے گویا دھماکہ کیا تھا… وہاں موجود تین نوجوان ایک دوسرے کی جانب دیکھ رہے تھے… فقط ایک فرد ایسا تھا جس کی نظریں اس تصویر پر ٹکی تھیں….

Episode 7