Ramaad Al Hubb by Sara Shah readelle50009 Episode 29

” ذوالنون اسامہ ولد ابراہیم جبیل کیا آپ کو زرنین ریحان ولد ریحان مرزا سے پچاس لاکھ سکہ رائج الوقت نکاح قبول ہے۔۔۔۔۔”

اسے لگا جیسے مولوی صاحب کے الفاظوں نے نئی روح پھونکی ہو اسکے وجود میں۔۔۔۔۔۔ کچھ ایسا ہی سکون اترا تھا اسکے وجود میں جس نے اسے پور پور پرسکون کر دیا۔۔۔۔۔دل جیسے نئے سرے سے دھڑک اٹھا تھا۔۔۔۔۔۔

” قبول ہے۔۔۔۔”

مسکراتی نظریں اسکے جھکے سر پر جمائے یہ لفظ گویا وجود کے ہر عضو کی بازگشت بن کر نکلے تھے۔۔۔۔۔۔۔ایسا لگا جیسا صدیوں کی مسافت تمام ہوئی ہو۔۔۔۔برسوں سے جاری آبلہ پائی کا سفر تمام ہوا تھا۔۔۔جس نے اسکے دل سمیت پورے وجود کو تھکا دیا تھا۔۔۔۔۔۔

” تم تمام عمر میری محبت کے حصار سے نکل نہیں پائو گی۔۔۔۔۔جس طرف بھاگو گی مجھے ہی پائو گی۔۔۔۔۔کیونکہ زرنین ریحان کے لیے ذوالنون جبیل ایک ایسا سمندر ہے۔۔۔جسکا کوئی ساحل نہیں۔۔۔۔۔تمام عمر تم اسکی لہروں کے سنگ بہتی رہو گی۔۔۔۔”

تینوں بار اقرار کرتے اسکے لب مسکراہٹ میں ڈھلے تھے۔۔۔۔۔کتنے ہی عہد تھے جو اسنے اپنے دل میں دہرائے تھے۔۔۔۔۔دل گویا محبت سے لبریز اسے نئے احساس سے آشنا کر رہا تھا۔۔۔۔۔

سیاہ آنکھوں میں برسوں بعد زندگی کی رمک جاگی تھی۔۔۔جس نے انھیں جگمگا دیا تھا۔۔۔۔۔۔۔

دیوار پر نظریں جمائے وہ اپنی قسمت کو رو رہی تھی۔۔۔جس نے اسے اتنا بے بس کر دیا تھا کہ ایسا لگ رہا تھا جیسے اسے ہاتھ پائوں سمیت باندھ کر سمندر میں پھینک دیا گیا ہو۔۔۔اور وہ کھلی آنکھوں سے خود کو لمحہ بہ لمحہ موت کے قریب ہوتا دیکھ رہی تھی۔۔۔۔۔۔

اتنی بے بسی کیوں؟؟۔۔۔۔۔۔دل تھا کہ درد سے پھٹنے کو تیار تھا۔۔۔لیکن اس اذیت کا کوئی مداواہ بھی تو نہیں تھا۔۔۔۔۔ذوالنون اسامہ اسکے لیے ایسے ناسور کی مانند تھا جسے اگر وہ خقد سے کاٹنے کی کوشش بھی کرتی تو تکلیف اسے خود ہوتی۔۔۔۔۔۔۔

اور اسی لیے تو وہ تڑپ رہی تھی۔۔۔نا وہ اسے خود سے الگ کر سکتی تھی اور نا ہی اسے پاس رکھ سکتی تھی۔۔۔۔درد تھا تو انتہا کا تھا اور بے بسی تھی تو بے پناہ تھی۔۔۔۔ایسے میں سوائے رونے کے وہ اور کر بھی کیا سکتی تھی۔۔۔۔۔وہ رو رو کر تھک گئی تھی مگر آنکھیں تھیں سوکھنے کا نام نہیں لے رہیں تھیں۔۔۔۔۔

یہ سوچ کر ہی سانس سینے میں اٹک رہی تھی کہ اسے اب تمام عمر ایک ایسے شخص کی پناہوں میں رہنا پڑے گا جس سے وہ برسوں سے بھاگ رہی تھی۔۔۔۔۔قسمت کی بے رحم لہروں نے ایک بار پھر اسے واپس اسی در پر لا پھینکا تھا جہاں وہ فرار چاہتی تھی۔۔۔۔۔لیکن ہمیشہ ویسا ہو نہیں سکتا جیسا انسان چاہتا ہے۔۔۔۔۔۔

کھٹکے کی آواز پر اسنے سر اٹھانے کی کوشش نہیں کی تھی جانتی تھی کہ کون ہو گا۔۔۔۔۔۔۔اور اب سر اٹھانے کی ہمت بچی بھی کہاں تھی۔۔۔۔۔

سامنے بیڈ پر اسے بےحال سا دیکھتے اسامہ کا دل دہلا۔۔۔۔۔بکھرے بال اور گھٹنوں میں چھپا وہ چاند سا چہرہ جس کا وہ برسوں سے اسیر تھا۔۔۔۔۔اس وقت اسکا پورا وجود ہچکولے کھا رہا تھا۔۔۔۔۔بدن کی لرزاہٹ اسکی اذیت بخوبی بیان کر رہی تھی۔۔۔۔۔۔۔

اور ایک یہی برچھی تھی جو پوری قوت سے ذوالنون اسامہ کے سینے میں پیوست تھی۔۔۔۔۔جس نے اسکی سانسیں روک رکھی تھیں۔۔۔۔۔۔۔سیاہ آنکھوں میں اذیت کا طوفان تھا جو اسکے پورے وجود کو نگلنے کے لیے تیار تھا۔۔۔۔۔۔۔۔

” نیناں۔۔۔۔۔”

بے قراری سے بولتے وہ بیڈ کر طرف بڑھا۔۔۔۔۔۔اسکی پکار پر زری نے سختی سے آنکھیں میچ لیں۔۔۔۔۔۔دل تو چاہ رہا تھا منظر سے غائب ہو جائے مگر ایسا ممکن کہاں تھا۔۔۔۔۔۔۔

” کیا تم میری طرف دیکھنا بھی نہیں چاہتی؟؟۔۔۔۔۔اور ایک میں ہوں جو پچھلے 6 سالوں سے تمہارے چہرے کو دیکھنے کے لیے ترس رہا ہوں۔۔۔۔۔”

اسے یونہی بےحس بنا دیکھ وہ دکھ سے بولا۔۔۔لہجہ ان دیکھے جذبوں کی حدت سے دہک رہا تھا۔۔۔۔۔۔سیاہ آنکھیں پل میں سرخیاں سمیٹ لائیں۔۔۔۔اسکی بات پر زری نے بپھر کر سر اٹھایا۔۔۔۔۔۔

” تم شکل دیکھنے کی بات کرتے ہو؟؟۔۔۔مجھے تمہاری موجودگی سے بھی نفرت ہو رہی ہے۔۔۔۔۔۔”

نفرت سے پھنکارتی وہ اسے سن کر گئی۔۔۔۔۔۔چہرہ پل میں سپید ہوا تھا۔۔۔اور دل۔۔۔وہ تو گویا دھڑکنا بھول گیا تھا۔۔۔۔۔۔۔۔

” اور 6 سالوں سے تڑپ رہے ہو تو یہ تمہارا اپنا بویا تھا جسے کاٹا ہے تم نے۔۔۔اور ان شاءاللہ کاٹتے رہو گے۔۔سنا تم نے۔۔۔۔تمہاری یہ محتاجی کوئی آزمائش نہیں ہے ذوالنون اسامہ۔۔۔بلکہ تمہارے اپنے کیے گئے گناہوں کی سزا ہے۔۔۔۔۔”

بیڈ سے اٹھ کر کھڑے ہوتے وہ پوری قوت سے چیختی اسکی سماعتوں میں گویا پگھلا سیسہ انڈھیل گئی تھی۔۔۔۔۔۔ساکت نظروں سے اسے دیکھتے وہ گویا نمک کا مجسمہ بن گیا تھا۔۔۔۔۔۔جسے ہاتھ لگانے کی دیر ہوتی اور وہ ڈھے جاتا۔۔۔۔۔

جبڑے کس کر سرعت سے خود پر قابو پایا۔۔۔انگارے برساتی نظروں سے اسے دیکھتے اسنے سختی سے لب بھینچے۔۔۔۔۔۔

” یہ مت سمجھو میری یہ محتاجی اب مزید تمہیں مجھ سے دور رکھ سکتی ہے۔۔۔ذوالنون جبیل ان پہیوں کا محتاج نہیں ہے مسز۔۔۔۔۔۔”

اسکی کلائی کو جھٹکا دے کر اسے اپنے مقابل جھکاتا وہ اسکی آنکھوں میں جھانکتے سختی سے بولا۔۔۔۔لہجہ جذبات کے آلائو سے دہک رہا تھا جس نے پل میں زری کا چہرہ کان کی لوئوں تک سرخ کر دیا۔۔۔۔۔اسکی آنکھوں میں تیرتے جنون کو نا سہتے ہوئے اسکی پلکیں لرز کر رخساروں پر جھک آئیں۔۔۔۔۔۔۔ چہرے پر پڑتی ذوالنون کی سلگتی سانسوں نے اسکی دھڑکنیں تیز کر دیں تھیں۔۔۔۔۔۔

اسکی دہکتی قربت آج بھی ویسی جانلیوا تھی جیسی 6 سال پہلے تھی۔۔۔۔۔ویسی ہی ناقابل برداشت۔۔۔۔۔۔تبھی تو دھڑکنیں اپنی لے بدلتی سینے میں ادھم مچانے لگیں۔۔۔۔۔پیشانی پل میں عرق آلود ہوگئی۔۔۔۔۔۔۔

اسکی غیر ہوتی حالت نے اسامہ کے تنے اعصاب ڈھیلے کیے۔۔۔۔۔سیاہ آنکھوں کی تپش نرمی میں بدلی۔۔۔۔۔

” میری موجودگی تمہارے لیے نفرت کا باعث نہیں ہے نیناں۔۔۔ میری موجودگی تمہاری دھڑکنوں میں طلاطم کا باعث بنتی ہے تو یہ نفرت کیسے ہو سکتی ہے؟؟۔۔۔ہمم؟؟؟۔۔۔۔۔۔یہ نفرت نہیں محبت ہے۔۔۔۔ مان لو اسے۔۔۔۔۔۔”

اسکی عرق آلود پیشانی کو اپنے دہکتے لبوں سے چھوتے گھمبیر لہجے میں بولتے وہ اسے ساکت کر گیا۔۔۔۔۔۔اسکا سلگتا لمس اسے عجیب سے احساس سے دوچار کر گیا تھا۔۔۔۔۔۔۔تبھی تو بھورے کانچ اس پر جمائے وہ جہاں تھی وہیں رہ گئی۔۔۔۔۔۔

اور وہ برسوں بعد ان بھورے نینوں میں اپنا عکس دیکھتا بے خود ہوا تھا۔۔۔۔بے اختیار اسکی آنکھوں پر جھکتے وہ انھیں چوم گیا۔۔۔۔اسکے نرم گرم لمس نے زری کو موم کر دیا۔۔۔۔آنکھیں میچتے اسکے گال پل میں سرخ ہوئے تھے۔۔۔۔۔انکی سرخی دیکھتے وہ جاندار سا مسکراتا وہاں اپنا لمس چھوڑ گیا۔۔۔۔۔۔

اسکے سرخ مرطوب کپکپاتے لبوں کو دیکھتے اسے اپنے گلے میں کانٹے چھبتے محسوس ہوئے۔۔۔۔۔اسکی بند پلکوں کو دیکھتے ہلکے سے اسکے چہرے پر پھونک مارتے وہ اسے لرزنے پر مجبور کر گیا۔۔۔۔۔۔

اپنے چہرے پر پڑتی اسکی سلگتی سانسوں کو محسوس کرتے اسنے دھیرے پلکیں وا کیں۔۔ سیاہ نگینوں کو خود پر موکوز دیکھتے وہ اپنی پلکیں جھکا نا سکی۔۔۔۔۔۔یک ٹک اسکی انکھوں میں دیکھتے وہ کہیں اور پہنچ چکا تھا۔۔۔۔۔تبھی تو بے خود ہوتے وہ دھیرے سے اسکے لبوں پر جھکا۔۔۔۔۔۔۔

اپنے لبوں پر اسکی سانسوں کی سلگتی تپش محسوس کرتے وہ سرعت سے ہوش میں آتی اپنا رخ بدل گئی۔۔۔۔ اور وہ اسکے یوں پیچھے ہٹنے پر بالوں میں ہاتھ پھیرتے نظریں چرا گیا۔۔۔۔۔۔

کتنے ہی معنی خیز لمحے تھے جھنوں نے انھیں اپنی گرفت میں لے لیا۔۔۔۔۔۔

” تیار ہو جائو۔۔۔ہم ابھی کراچی کے لیے نکل رہے ہیں۔۔۔۔”

اسکے کھلے بالوں پر نظریں جمائے وہ اس معنی خیز خاموشی کو توڑتا دھیرے سے بولا۔۔۔اور وہ جو اسکی قربت اور لمس سے دہکتی عجیب سے احساسات محسوس کر رہی تھی ساکت رہ گئی۔۔۔۔۔۔۔

کراچی!!!! وہی شہر جہاں سے وہ بے بس کر کے نکالی گئی تھی۔۔۔جہاں اسکی اپنی وجہ سے اسکا آشیانہ تنکوں کی مانند بکھرا تھا۔۔۔۔۔جہاں اسکی جنت دفن تھی۔۔۔۔۔۔۔۔۔اور جہاں اسکے ایسے اپنے زندہ تھے جن کے لیے وہ برسوں پہلے مر گئی تھی۔۔۔۔۔۔

آنسوئوں کا ایک نیا ریلہ تھا جو اسکے بھورے کانچ بھگوتا سامنے کا منظر دھندھلا گیا۔۔۔۔۔۔کیا آسان تھا وہاں جانا ؟؟؟۔۔۔۔۔دل گویا نئے سرے سے تڑپ اٹھا تھا۔۔۔۔۔۔

بے جان ہوتے قدموں سے وہ زمین پر بیٹھتی چلی گئی۔۔۔کیا کچھ نا یاد آیا تھا اس نام کو سن کر۔۔۔۔سسکیاں آہوں می بدلتیں اسامہ کو دار پر لٹکا گئیں۔۔۔۔۔احساس ندامت تھا کہ بڑھتا ہی چلا گیا۔۔۔۔۔لیکن کیا معافی مانگنا آسان تھا؟؟؟۔۔۔پھولی رگوں سے اسے دیکھتے اسکی سیاہ آنکھوں میں غضب کی سرخیاں اٹھیں تھیں۔۔۔معافی مانگنا کم ازکم اسکے لیے تو آسان نہیں تھا۔۔۔۔۔۔تبھی نا چاہتے ہوئے بھی وہ سختی سے لب بھینچتا مڑ کر نکلتا چلا گیا۔۔۔۔۔۔۔۔اور پیچھے کمرہ اسکی آہوں اور سسکیوں سے گونج اٹھا۔۔۔۔۔۔

” فاطمہ؟؟۔۔۔وہ ٹھیک ہے نا؟؟۔۔۔”

وہ ابھی ہال میں آیا ہی تھا جب بوا کا فکرمند لہجہ اسکی سماعتوں سے ٹکرایا۔۔۔۔۔

” ہممم۔۔۔۔۔آپ جائیں اندر اسکی پیکنگ میں ہیلپ کریں۔۔۔۔۔ہمیں ابھی نکلنا ہے۔۔۔۔۔۔”

دوٹوک لہجے میں بول کر وہ رکا نہیں تھا۔۔۔پیچھے وہ اسکی بات سمجھتیں ہول کر اندر کمرے کی طرف گئیں تھیں۔۔۔۔۔رائمہ بھی حیران پریشان سی اسکی وہیل چئیر کو ایک نظر دیکھتے انکے پیچھے ہی تھی۔۔۔۔۔۔۔

باہر چھوٹے سے باغیچے میں آکر گہرے سانس لیتے اسنے خود کو کمپوز کرنے کی کوشش کی ورنہ دل تو چاہ رہا تھا کہ سب کچھ تہس نہس کر دے۔۔۔۔۔۔

” زبردستی ہمیشہ گھٹن کا سبب بنتی ہے سر۔۔۔۔۔”

اسے یوں تڑپتے دیکھ کر بخش دھیرے سے بولا۔۔۔۔۔اسکی بات پر وہ لب بھینچے سامنے دیکھنے لگا۔۔۔جہاں دیوار پر پھولوں کی بیل چڑھی ہوئی تھی۔۔۔۔۔

” یہ گھٹن قابل برداشت ہے میرے لیے بخش۔۔۔۔۔اس سے دوری جان لیوا ہے۔۔۔۔۔مزید اس سے دور رہتا تو مر جاتا۔۔۔۔۔۔”

دھیمے مگر سلگتے لہجے میں بولتے وہ سر پیچھے ٹکا گیا۔۔۔اب نظروں کا مرکز وہ نیلا آسمان تھا جہاں ہلکے ہلکے سفید بادل تیر رہے تھے۔۔۔۔۔۔۔

” تو یہ دوری بھی تو آپ کی اپنی منتخب کردہ تھی سر۔۔۔۔۔”

مدھم لہجے میں بولتے وہ گویا کھولتا پانی اس پر انڈھیل گیا تھا جسکی تپش نے اسکا پور پور جلا دیا۔۔۔۔۔سختی سے آنکھیں میچے اسنے خود کو بہت کچھ سخت کہنے سے روکا۔۔۔۔

یہ ایک ایسا سچ تھا جو ناقابل برداشت تھا۔۔۔۔اور جسے آج تک وہ سہنے کی ہمت نہیں کر پایا تھا۔۔۔تبھی تو زری سے معافی مانگی نہیں تھی۔۔۔۔۔۔۔

” گاڑی نکالو بخش۔۔۔اندر بولو کہ جلدی کریں۔۔۔ہری اپ۔۔۔۔”

سختی سے بولتے وہ گویا گفتگو کا اختتام کر گیا تھا۔۔۔جسے سمجھتے وہ یس سر کہہ کر اندر بڑھ گیا۔۔۔۔۔اور پیچھے وہ آسمان کو دیکھتا اپنے اندر لگی آگ کو کم کرنے کی کوشش کرنے لگا۔۔۔۔۔۔مگر یہ عشق کی آگ تھی جو اتنی آسانی سے کہاں بجھنی تھی۔۔۔۔۔۔۔

” میں تمہیں جیت لوں گا نیناں۔۔۔۔ضرور جیت لوں گا۔۔۔۔”

جلتی نظریں آسمان پر جمائے وہ مضبوط لہجے میں ایک عہد کر گیا۔۔۔۔جسے پورا ہونا بھی تھا یا نہیں یہ وقت نے طے کرنا تھا۔۔۔۔۔۔۔

جوں جوں گاڑی سفر طے کر رہی تھی توں توں دل کی دھڑکنیں سست پڑ رہیں تھیں۔۔۔۔۔ان ہوائوں میں اسنے اپنے زندگی کے کتنے سال گزارے تھے۔۔۔۔۔لیکن آج یہ ہوائیں اسے سانس لینے میں دشواری پیدا کر رہیں تھیں۔۔۔۔۔

آنکھیں سمندر لٹاتیں باہر دوڑتے مناظر پر ساکت تھیں۔۔۔۔۔بدن اذیت کی شدت سے لرز رہا تھا۔۔۔۔۔۔اسکی غیر ہوتی حالت مقابل سے پوشیدہ نہیں تھی۔۔۔۔۔لیکن وہ انجان رہنا چاہتا تھا تبھی تو کھڑکی سے باہر نظریں جمائے اپنے اندر چل رہی جنگ سے نبردآزما تھا۔۔۔۔۔

وہ نہیں جانتا تھا کہ بوا نے اسے کیسے منایا۔۔۔۔اور کیا کہا جو وہ تیار ہو گئی۔۔۔۔۔باہر بیٹھے اسے ناجانے کتنی دیر ہو گئی تھی جب بخش نے آکر اسے چلنے کا کہا۔۔۔۔۔۔۔سیاہ چادر میں ڈھکا وجود پرسکوں تھا یا نہیں وہ نہیں جانتا تھا۔۔۔بائی ائیر سفر ممکن نہیں تھا۔۔۔اس لیے بائی روڈ نکلے تھے۔۔۔کتنے ہی وقت سے گاڑی میں بے نام سی خاموشی تھی جسے نا اسامہ نے توڑنے کی کوشش کی اور نا ہی زری نے۔۔۔۔۔۔

دونوں ہی اپنے اندر چھڑی جنگ سے لڑتے بے نام سے خیالوں میں گم ہم سفر تھے۔۔۔۔۔۔ایک آنے والے کل سے خوفزدہ تھا اور ایک اپنے بیتے کل سے۔۔۔۔۔۔۔۔