دو پروفیسرز کی غیر حاضری کے باعث وہ سب کیفے کے باہر سایہ دار جگہ پہ ڈیرہ جمائے بیٹھے تھے۔

صبح کے دس بج رہے تھے اور شیڈول کے مطابق آج کلاس گیارہ بجے شروع ہونی تھی۔

جوہم کوئی انگریزی ناول میں سر دیئے بیٹھی تھی، رباب اسکے دائیں ہاتھ پہ تھی۔ عون رباب کے عین سامنے اسکے ساتھ زوحان اور زین۔ عماد رباب کے برابر میں تھا جبکہ علی کسی کام سے لائبریری گیا تھا۔

“یار میں بور ہو رہا ہوں”۔ عون جو کہ ٹیبل پہ دائیاں بازو ٹکائے بیٹھا تھا، نے بے زارگی سے زین کو دیکھا۔

“تو کیا تیری بوریت دور کرنے کی غرض سے ناچنا شروع کر دوں؟؟”۔ زین نے تپ کر کہا۔

“ویسے آئیڈیا برا نہیں ہے زینب گلاب دین۔ چل شروع ہو جا ۔۔۔۔ ناچوں میں آج چھم چھم چھم”۔ زین کو دیکھتے اسنے لاف زنی کرتے اشاروں سے بات کی۔

“میرا کوئی کوٹھا نہیں ہے جہاں پارٹ ٹائم رقص دکھا کر میں رئیس اور امرا کے دل رجھاتی ہوں”۔ زین کا لہجہ قطعی تھا۔ زین کی بات پہ سب ہنس دیئے تھے۔

“کیا زین یار؟ فضول بات کرنا لازمی ہے؟؟؟ دیکھ تیرے بھائی کی شادی ہے اور تو اپنے پاپا کا غصہ عون پہ کیوں نکال رہا ہے؟؟”۔ عماد نے زین کو مخاطب کیا۔

“عون تم کوئی گانا گاو”۔ چیئر کی پشت چھوڑتے رباب سیدھی ہوئی۔ جوہم نے بھی ناول ٹیبل پہ رکھ دیا تھا۔

“کباب اورنج سیب مجھے گانے نہیں آتے پھر بھی کوشش کرتا ہوں”۔ عون نے نفی کی۔

“کوئی شادی والا گانا گانا عون”۔ زین نے اسکے بائیں شانے پہ ہاتھ رکھا تھا۔

“تو مجھ سے بات نا کر سمجھا”۔ اسکا ہاتھ جھٹکتے عون نے منہ پھیرا۔

“اچھا سوری عون معافی دے دے پلیز”۔ بولتے ہی زین نے کانوں کو ہاتھ لگایا۔

“جس دن یہ عون نا رہا نا اس دن قدر بھی کرے گا میری”۔ زین کی جانب دیکھتے اسنے افسردگی سے کہا۔

“ایسا نا بولو عون۔ یہ کیا پاگل ہے تم اس سے زیادہ پاگل ہو”۔ جوہم نے تاسف سے کہا۔

“اچھا گائز تم لوگ فکس سات بجے پہنچ جانا کوئی لیٹ نا ہو نا ہی مجھے کال کرنی پڑے”۔ زین نے سب کو باور کرایا تھا۔

@@@@@@@@@@@@

“فرخ بیٹا آپ فری ہو؟؟”۔ مصباح عجلت میں انٹرنس کی جانب آئی تھی جہاں فرخ کھڑا سر جھکائے فون پہ لگا تھا۔

“جی ماما کیوں خیریت؟؟”۔ فون سے نظر ہٹائے اسنے گردن کو جنبش دیتے مصباح کو دیکھا تھا۔

“جی بیٹا خیریت ہی ہے۔ وہ دراصل ماہین کی طرف مہندی کا سامان بھجوانا تھا مجھے اسی بات کا ڈر ہے کہ کہیں دیر نا ہو جائے۔ عفان کو ابھی سڑکوں کا پتہ نہیں ہے اس وجہ سے میں اسے کہنا نہیں چاہ رہی اور زین ابھی تک کالج سے آیا نہیں ہے اسکے آتے بہت دیر ہو جائے گی اور۔۔”۔ بغیر کسی وقفے کے مصباح نے لفظوں کو لڑی میں پرویا تھا۔ مصباح کے چہرے پہ پریشانی اور فکر کے تاثرات عیاں تھے جسکو بھانپتے فرخ اسکے قریب ہوا اور اسکے شانوں پہ ہاتھ رکھے تھے۔

“ماما ریلیکس کچھ نہیں ہوتا۔ میں ہوں نا آپ فکر کیوں کر رہی ہیں ہر بات میں آپکا ٹینشن لینا ضروری ہے؟؟ آپ جا کر سامان لے آئیں میں خود دے آتا ہوں۔ ہم”۔ تمسکن آمیز انداز اپناتے اسنے مصباح کو پرسکون کیا تھا۔

“ٹھیک ہے بیٹا میں تمھیں سامان لا دیتی ہوں اور ہاں یہ کام کرنے کے بعد ہی تم کوئی اور کام کرنا”۔ جاتے جاتے اسنے تنبیہ کی جس کے جواب میں فرخ نے اثبات میں سر ہلا دیا تھا۔

@@@@@@@@@@@@

“جھلک دکھلا جا، جھلک دکھلا جا

ایک بار آ جا آ جا آ جا آ جا آ آ جا”۔

بولتے ہی عون نے سامنے رکھا ٹیبل پیٹنا شروع کیا تھا۔

“یہ کیا بکواس گا رہے ہو عون؟؟ کوئی اچھا سا گانا گاو”۔ اپنے سامنے پڑا انگریزی ناول رباب نے آگے ہوتے اسکے ہاتھوں پہ دے مارا تھا۔

“او ایم جی، کباب اورنج سیب کتنی لڑاکا ہو تم۔ ایف سولہ کی چھوٹی بہن۔ ایک تو تمھارے کہنے پہ گا رہا ہوں اور تم ہی مجھے مار رہی ہو دوسرا میرے گانے میں نقص نکال رہی ہو”۔ عون نے ہاتھ مسلتے کہا۔

“اسے گانا کہتے ہیں؟؟”۔ رباب ہلکا سا اسکی اور جھکی۔

“ہاں تو؟ اور کیا کہتے ہیں؟”۔ عون بھی ہلکا سا آگے کو ہوا تھا۔

“گانے کی مدر سسٹر کرنا کہتے ہیں جو تو اس وقت کر رہا ہے۔ ہیمیش رشامیہ کے گانے کی”۔ بولتے ہی عماد نے زوحان کے ہاتھ پہ ہاتھ مارا تھا۔

“جلنے والوں جلتے رہو۔ میں تو گاوں گا ہونہہ”۔ عون نے سر جھٹکا تھا۔

“مت کر اتنا غرور صورت پہ اے سکینہ

مت کر اتنا غرور صورت پہ اے سکینہ

تیری صورت پہ نہیں ہم تو تیری سادگی پہ مرتے ہیں”۔

عون نے دوبارہ سے ٹیبل بجانا شروع کیا تھا جس پہ سب کا قہقہ گونجا تھا۔ پاس سے گزرنے والا ہر سٹوڈنٹ اسکا مذاق بنا رہا تھا مگر وہ سب سے بے نیاز تھا۔

“صبح سے لے کر دن تک

دن سے پھر شام تک

شام سے پھر رات تک

رات سے پھر سحری تک

سحری سے پھر صبح تک

صبح سے پھر دن تک

دن سے پھر شام تک”۔

اپنی دھن میں آنکھیں مینچے وہ گانوں کی ستیاناسی کرنے میں لگا تھا اسکو یوں گاتا دیکھ رباب نے ہنستے ہوئے، زین کی جانب دیکھا تھا جو عون کے پاس بیٹھا کانوں میں انگلیاں دئیے ہوئے تھا۔

“طبلہ نواز آگے بھی تو بول”۔ عماد نے چڑ کر اسکی جانب بوتل اچھالی تھی۔

“سبق یاد کرو، سبق یاد کرو

اوووووووو

سبق یاد کرو، سبق یاد کرو”۔

بوتل کے ساتھ عماد کی آواز کانوں سے ٹکڑاتے اسنے مزید کہا۔

سب کا ہنس ہنس کر برا حال ہو گیا تھا۔ یہاں تک کہ جوہم نے پیٹ پکڑ لیا تھا اور عون کو چپ رہنے کا اشارہ بھی کیا تھا مگر وہ بھی کہاں سننے والا تھا۔