اسے کیسے خبر ہوئی کہ میں اسے دورسے جاتا ہوا دیکھ رہی تھی۔۔۔ ہونٹوں پہ اسکی وہی مسکراہٹ پھر سے پھیل گئی۔۔ جیسے اس نے میری چوری پکڑ لی ہو۔۔۔

میں نے پردہ کھینچا اور حسین خواب جیسا وہ منظر میری آنکھوں سے اوجھل ہوگیا۔۔۔

مجھے ڈر تھا۔۔۔ یہ دھڑکتا دل باہر ہی نہ آجائے۔۔۔ سینے پہ ہاتھ رکھ کے میں دھڑکنیں بحال کرنے لگی۔۔۔

“اے۔۔۔ ! کیا ہوا تجھے۔۔۔؟” رخسانہ بولی

“کیا۔۔۔۔ ؟ کچھ نہیں۔۔۔۔ کچھ بھی تو نہیں ہوا۔۔۔۔ !” میں بوکھلا گئی

“آں ہاں۔۔۔۔ میں سمجھ گئی۔۔۔۔ ” اسکے ہونٹوں پہ معنی خیز مسکراہٹ تھی

اس انداز پہ میں جھلا گئی۔۔۔

“تمہیں وہ پسند ہے نا۔۔۔۔؟” اس نے پوچھا

“کون۔۔۔ ؟”

“اف۔۔۔۔ اب انجان میں مت بنو۔۔۔ تم جانتی ہو میں کس کی بات کررہی ہوں۔۔”

میں نے اسکی بات نظرانداز کی اور وہاں سے جانے لگی۔۔

“اے۔۔۔ بتا نہ۔۔۔!” اس نے میرا بازو پکڑا

“تنگ نہ کر۔۔۔۔ بہت کام ہیں مجھے ۔۔۔”

“ہاں ۔۔ ہاں۔۔۔ اب تو بس ایک ہی کام رہ گیا تمہارا۔۔”

“کونسا کام۔۔۔ ؟”

“انکو یاد کرنے کا۔۔۔۔ اور شادی کے دن گننے کا۔۔۔”

“رخسانہ۔۔۔ ! بہت خراب ہو تم۔۔۔ ” میں اپنی مسکراہٹ چھپا نہیں پائی

وہ بھی ہنس پڑی۔۔

“تم نے بتایا نہیں۔۔۔۔ ؟”

“کیا۔۔۔؟”

“وہ تمہیں پسند ہے نا۔۔۔؟”

“دو پل کی ملاقات میں پسند نہ پسند کا فیصلہ بہت مشکل ہوتا ہے۔۔۔ اور ویسے بھی اس بات سے کوئی فرق نہیں پڑتا۔۔۔”

“کیوں فرق نہیں پڑتا۔۔۔ بالکل پڑتا ہے۔۔۔۔ پسند کے چکر میں تو وہ لوگ یہاں آئے تھے۔۔۔ “

“میری زندگی اور انکی زندگی میں زمین آسمان کا فرق ہے۔۔۔۔ اس بات سے تم بہت اچھی طرح سے واقف ہو۔۔۔۔”

“ایک تو تم۔۔۔ ہر وقت اپنی سنانا شروع ہوجاتی ہو۔۔۔۔ سیدھی بات کا سیدھا جواب نہیں دے سکتی؟”

“تم نہیں سمجھو گی۔۔۔۔ “

“سب سمجھتی ہوں۔۔اچھا اتنا تو بتا دو کیا باتیں ہوئیں۔۔۔۔ ؟”

“تمہیں کیا لگتا ہے۔۔۔۔؟”

“مجھے کیسے پتا ہوگا۔۔۔ ؟”

“پھر بھی کوئی اندازہ۔۔۔۔؟”

“نہیں مجھے کوئی اندازہ نہیں اس بارے میں۔۔۔۔”

“کیا تم مجھے نہیں جانتی۔۔۔؟”

“جانتی ہوں۔۔۔۔ “

“تو۔۔۔۔؟”

“تو پھر بھی میں جاننا چاہتی ہوں کہ کیا ہوا۔۔۔۔ ؟”

“رخسانہ۔۔۔ بلاوجہ تنگ کررہی ہو۔۔۔۔ جاؤ کام کرو اپنا۔۔۔”

“ایسے تو نہیں جاؤں گی۔۔۔ پہلے بتا دو۔۔۔”

“چند منٹ میں سر جھکا کے بیٹھی رہی۔۔۔ وہ بات کے بہانے ڈھونڈتا رہا اور میں وہاں سے بھاگنے کے۔۔۔ بلآخر اس نے مجھے رہائی دی اور میں یہاں آگئی۔۔۔۔ “

“تم نے اسے جی بھر کے دیکھا تو ہوگا۔۔۔۔ ؟”

میں اسکی اس بات پہ ہنس پڑی۔۔

“یہ کیا بات ہوئی۔۔۔۔ تم بتاؤ نہ ۔۔۔ دیکھا اسے۔۔۔؟”

“ہاں دیکھا۔۔۔ پہلی بار جوتے۔۔۔ دوسری بار کپڑے۔۔ تیسری بار۔۔۔۔۔۔” میں چپ ہوگئی

“تیسری بار کیا۔۔۔۔؟”

“تیسری بار ہونٹ۔۔۔۔۔ جن پہ ٹھاٹھیں مارتی شرارتی سی مسکان۔۔۔۔ ” میں سوچ میں ڈوبی پتا نہیں کیا کچھ بول رہی تھی

“اوہ۔۔۔ ہو۔۔۔۔ ! تو یہ بات ہے۔۔۔ اور چوتھی بار۔۔۔۔؟”

“چوتھی بار۔۔۔۔ اسکی گہری آنکھیں۔۔۔۔ جن میں ایک عجیب سی کشش تھی۔۔۔۔ لمحہ بھر اور نظر نہ ہٹتی تو میں ڈوب ہی جاتی ان میں۔۔۔۔”

میں ان پلوں میں کھونے لگی۔۔۔۔ وہ سامنے بیٹھا مسکرا رہا تھا۔۔۔ اور میں ٹکٹی باندھے اسے دیکھ رہی تھی۔۔۔۔

“اے۔۔۔۔۔ !” رخسانہ نے چٹکی بجائی۔۔۔

میں چونکی

“بی بی۔۔۔! تْو تو گئ کام سے۔۔۔۔ ” وہ مجھے گھورتے ہوئے بولی

مجھے اچانک ہی خیال آیا کہ میں کیا کچھ بول گئی۔۔۔ اس سے پہلے کے میں اسے کوئی صفائی دیتی دادی کمرے میں آگئیں۔۔۔

“بس ۔۔۔ ! ہوگئی شروع تم دونوں ۔۔۔۔۔”دادی رخسانہ کو میرے ساتھ دیکھتیں تو ایسے ہی چڑ جاتیں تھیں۔۔۔ انھیں لگتا تھا کہ رخسانہ جیسی تیز طرار لڑکی مجھے بھی اپنے جیسے بنا دے گی۔۔۔ اس لیے ہم دادی سے چھپ کے ہی باتیں کرتے تھے۔۔۔۔

“اس لڑکی کو باتیں بھگارنے کے علاوہ کوئی کام نہیں ہے۔۔۔۔ اور تو ۔۔ تو بھی اسکی دیکھا دیکھی کام چور ہوتی جارہی ہے۔۔۔” دادی بھڑکیں

رخسانہ جان بچا کے وہاں سے نکل گئی۔۔ اور میں سر جھکائے انکی باتیں سنتی رہی

“اب یہ دلہن والا ڈرامہ بہت ہوگیا ہے۔۔۔ جلدی سے یہ کپڑے اتار اور گھر کے کاموں میں لگ جا۔۔۔” دادی کو میں ان کپڑوں میں ذرا بھی اچھی نہیں لگ رہی تھی۔۔

میں نے سر ہلایا۔۔ اور الماری سے اپنے وہی پرانے کپڑے نکالنے لگی۔۔۔ دادی اپنے بستر پہ التی پالتی مار کے بیٹھ گئیں۔۔۔

“یہ جوڑا۔۔۔ اچھی طرح سے دھو کے سعدیہ کو واپس کردے۔۔ اپنے لیے لے آئی تھی۔۔ لیکن تجھ پہ وار دیا میری بچی نے۔۔۔ کتنا بڑا دل ہے اسکا۔۔۔۔ ” وہ بولیں۔۔۔

میں حیرانی سے انکی طرف دیکھنے لگی۔۔۔۔

“ایسے کیا دیکھ رہی ہو۔۔۔ سچ کہہ رہی ہوں میں۔۔۔۔ ” وہ غرا کے بولیں

میرے دل میں ایک بھرم تھا کہ کل رات سعدیہ باجی نے جو کچھ بابا سے کہا اسکے بات شائد انکے کے اندر میرے لیے محبت جاگی ہو۔۔۔ شائد یہ جوڑا انھوں نے ہی بھجوایا ہو۔۔۔ دادی کی بات سن کے وہ بھرم کرچیاں کرچیاں ہوگیا۔۔۔۔

میں کپڑے بدل کے صحن میں آگئی۔۔ مغرب کی اذانیں ہونے لگیں۔۔ رخسانہ تائی کے ساتھ کیچن میں تھی۔۔ آجکل تائی مجھے قطعی نظرانداز کررہی تھیں۔۔ نہ تو وہ اپنے منہ سے مجھے کوئی کام بتاتیں اور نہ ہی۔۔۔ مدد لیتی۔۔۔ گھر میں خاموشی تھی۔۔۔ سعدیہ باجی چھوٹے بھائی کے ساتھ مارکیٹ تک گئی تھیں۔۔۔ نادیہ باجی صبح سے لا پتہ تھیں۔۔۔ ویسے تو میں نے بھی پورا دن کمرے میں بیٹھ کے گزرا تھا۔۔۔ پر انکی نہ تو مجھے آواز سنائی دی تھی اور نہ ہی وہ مہمانوں کے ساتھ موجود تھیں۔۔۔ اس رشتے کے بعد نادیہ باجی کو لے کے عجیب طرح کے وہم میرے دل میں گھر کرنے لگے تھے۔۔۔

میں برآمدے میں چلتی ہوئی ٹی وی والے کمرے کی طرف بڑھ رہی تھی۔۔۔ اتنے میں میری نظر نادیہ باجی پہ پڑی وہ سیڑھیاں اتر رہی تھیں۔۔۔ اسکا مطلب پورا دن انھوں نے بابا کے گھر میں گزرا تھا۔۔۔۔

کیوں کررہی ہیں وہ ایسا۔۔۔

انکی نظر مجھ پہ پڑی تو بے رخی میں وہ میرے پاس سے گزر کے اپنے کمرے کی طرف چلی گئیں۔۔

کبھی کبھی میرا دل کرتا تھا کہ میں ان سے پوچھوں۔۔ کہ آخر وہ کیوں اتنی خفا رہیتی ہیں مجھ سے۔۔۔ وہ جانتی ہیں یہ سب میری مرضی سے نہیں ہورہا۔۔ میں تو بے بس ہوں۔۔۔۔

“رانی۔۔۔ !” رخسانہ نے مجھے آواز دی

میں پیچھے مڑی

“میں گھر جارہی ہوں۔۔۔” اس کے جانے کا وقت ہوگیا تھا

میں نے اسے خدا حافظ کہا۔۔۔

“سن۔۔۔! اسے زیادہ یاد نہ کرنا۔۔۔ ” جاتے جاتے اس نے ٹونٹ کیا۔۔

میں جھلا گئی۔۔۔ وہ ہنستی ہوئی گھر کے دروازے کی طرف بڑھی

٭٭٭٭٭٭٭٭

“سعدیہ باجی۔۔۔ !” میں نے انھیں آواز دے کے روکا

وہ جاتے جاتے رکیں

“مجھے کچھ دینا ہے آپکو۔۔۔۔” میں بولی

“کیا ۔۔۔ ؟” انھوں نے پوچھا

“آپ رکیں۔۔۔ میں بس ابھی آئی۔۔۔”

میں جلدی سے دادی کے کمرے میں گئی اور وہاں سے کل والا جوڑا اسی طرح پیک کرکے لے آئی اور انکی طرف بڑھایا

“یہ کیا۔۔۔ ؟ پگلی یہ تمہارے لیے ہے۔۔۔ اب تم ہی پہنو گی اسے۔۔۔” وہ دیکھتے ہی بولیں

“نہیں۔۔۔ میں جانتی ہوں یہ آپ اپنے لیے لائی تھیں۔۔۔ میں نےاسے بہت اچھی طرح سے دھو کے استری کردیا ہے۔۔ آپکو لگے گا ہی نہیں کہ میں نے اسے پہنا تھا۔۔۔”

میرا سر جھکا ہوا تھا۔۔۔۔

“یہ سب تمہیں دادی نے کہا۔۔۔۔ ؟” انھوں نے میرے کندھے پہ ہاتھ رکھا

میں خاموش رہی

“چلو۔۔۔ ! میرے ساتھ آؤ۔۔۔ ” وہ ہمیشہ کی طرح غصے میں آگئیں

“سعدیہ باجی۔۔۔ ! مہربانی کرکے دادی سے اس بارے میں آپ بات نہ کریں۔۔۔۔ ” میں گھبرا کے بولی

“میں کہہ رہی ہوں نہ۔۔۔ چلو میرے ساتھ۔۔۔۔ ” انھوں نے مجھے گھورا

میں انکے پیچھے پیچھے دادی کے کمرے میں آگئی۔۔۔ دادی ظہر کی نماز سے فارغ ہوکے جائے نماز سمیٹ رہی تھیں۔۔۔

“اب کیا مقدمہ لے کے آئی ہو۔۔۔؟” ہم دونوں کو ساتھ دیکھ کے وہ بولیں

“یہ جوڑا واپس کرنے کا آپ نے بولا ہے اسے۔۔۔۔؟” سعدیہ باجی نے پوچھا

دادی بنا کوئی جواب دیے بستر پہ بیٹھ گئیں۔۔۔

“دادی۔۔۔ ! میں آپ سے کچھ پوچھ رہی ہوں۔۔۔ ” وہ انکے اس روّیے پہ اور زیادہ چڑ گئیں

“ہاں ۔۔ تو کیا ہوا۔۔۔۔ ؟ اس سے اتنے قیمتی کپڑے کہاں سنبھالے جائیں گے ۔۔۔ تم رکھ لو اپنے پاس۔۔۔” دادی نے بہت ٹھنڈے انداز میں جواب دیا

“اہ خدایا۔۔۔۔ ! سنگ دلی کی ساری حدیں پار کر چکے ہیں یہ لوگ۔۔۔۔” سعدیہ باجی زور زور سے چلانے لگیں

دادی بنا کوئی جواب دیے تسبیح کے دانے گرانے لگیں

تائی سعدیہ باجی کی آواز پہ یہاں آگئیں

“سعدیہ۔۔۔ اب کیا مصیبت ہے۔۔۔ چین سے رہنے دو گی ہم لوگوں کو یا نہیں۔۔۔ ؟” وہ بھی چلانے لگیں

“آپ کا چین چین اور دوسرے جائیں بھاڑ میں۔۔۔۔ مجھے بس ان سے یہ پوچھ کے بتا دیں آخر اس لڑکی کی شادی سے انھیں تکلیف کیا ہے۔۔۔۔ ؟” سعدیہ باجی کا اشارہ دادی کی طرف تھا

“بکواس بند کرو اپنی۔۔۔۔ ! دادی ہیں وہ تمہاری۔۔۔ مجھ سے بڑھ کے پیار کیا ہے انھوں نے تم لوگوں سے۔۔۔” تائی کوغصہ آگیا

“اچھا۔۔۔ ! میری دادی ہیں۔۔۔نادیہ کی دادی ہیں۔۔۔ سب کی دادی ہیں۔۔۔ سب سے پیار کرتی ہیں۔۔۔ اور یہ ۔۔ یہ جو لڑکی انکے سامنے کھڑی ہے یہ کون ہے۔۔۔۔ کیا یہ اسکی کچھ نہیں لگتیں۔۔۔۔ انکا جتنا خون میری رگوں میں گردش کررہا ہے اتنا ہی اسکی رگوں میں گردش کررہا ہے۔۔۔۔ “

“اف۔۔۔ ہو۔۔۔ اس لڑکی کی وجہ سے پھر سے ہنگامہ شروع ہوگیا۔۔۔۔ ایک پل کا سکون نہیں ہے۔۔۔۔” نادیہ باجی اندر آتے ہوئے بولیں

سعدیہ باجی نے انکی بات کو نظر انداز کیا۔۔۔۔

“امّی۔۔۔ ! بتائیں نا۔۔۔ کچھ پوچھ رہی ہوں آپ سے۔۔۔۔ ” وہ پھر سے تائی سے مخاطب ہوئیں

“سعدیہ۔۔۔۔ ! ہمدردی کیا تمہیں اس لڑکی سے۔۔۔۔ ؟ جب سے آئی ہو اسکے کے چکر میں سب کا جینا حرام کیا ہوا ہے۔۔۔۔ ” نادیہ باجی انکے سامنے آکے کھڑی ہوگئی

“جینا تو اس بے چاری کا حرام ہوا ہے۔۔۔ ہم سب کی وجہ سے۔۔۔ اور کسی کو ایک ٹکے کا احساس نہیں ہے اس بات کا۔۔۔۔ ” انھوں نے جواب دیا

“اوہ۔۔۔ کم آن سعدیہ۔۔۔ یہ چھوٹی بچی نہیں ہے جو سب اس پہ ظلم ڈھاتے ہیں۔۔۔ اسکی معصوم شکل پہ مت جاؤ۔۔۔ کسی سے کم نہیں ہے یہ۔۔۔۔ “

“نادیہ۔۔۔ ! تم تو چپ ہی رہو۔۔۔ بچپن سے تمہیں اس بے چاری سے بلاوجہ کی نفرت ہے۔۔۔۔ اللہ جانے بگاڑا کیا اس نے تمہارا۔۔۔۔ ؟”

“بتاوں کیا بگاڑا۔۔۔؟ اسکی وجہ سے میرا رشتہ نہیں ہو پایا۔۔۔اور یہ دلہن بنی پھر رہی ہے۔۔۔”

“ایکسکیوز می۔۔۔ ! تمہارا رشتہ نہ ہونے کے پیچھے اسکا کوئی ہاتھ نہیں۔۔۔ اس بارے میں دادی اور امی سے بات کرو۔۔۔”

“امْی۔۔۔ سے کیا بات کروں۔۔۔۔ انھیں تو میری پراوہ ہی نہیں ہے۔۔۔۔ ” نادیہ باجی تائی کی طرف دیکھ کے بولیں۔۔۔

“واہ۔۔۔ ! مجھے گولی مار دو۔۔۔۔ میری وجہ سے یہ سب ہوا۔۔۔۔ ارے۔۔۔ ماں ہوں۔۔۔ کیسے اس لڑکے سے تمہارا رشتہ کروا دیتی۔۔۔۔ ؟” تائی تپ کے بولیں

رشتے کی بات سن کے میرے بھی کان کھڑے ہوئے۔۔۔ جو بات اب تک ان لوگوں نے دبا کے رکھی تھی ابھی اسکا کچا چٹھا نکلنے والا تھا۔۔۔ میں بے وقوفوں کی طرح کبھی اسکا منہ دیکھتی تو کبھی اسکا

“امی۔۔۔ مسئلہ کیا ہے اس میں۔۔۔۔ اتنا اچھا لڑکا ہے۔۔۔ اچھی نوکری ہے۔۔۔ ” نادیہ باجی بولیں

“ہاں ۔۔۔ اچھی نوکری۔۔۔ اچھی شکل ہے۔۔۔ بس پوری زندگی اپنی خالہ کے ٹکڑوں پہ پلتا رہا ۔۔۔ نہ آگے کا کچھ پتا نہ پیچھے کا۔۔۔۔ میں تو فاخرہ کی وجہ سے دھوکہ کھا گئی۔۔۔ وہ بولی کہ عارفہ اپنے بیٹے کا رشتہ لے کے آرہی ہے۔۔۔ یہ تو اسی دن پتا چلا کہ وہ اپنے یتیم بھانجے کے لیے آئی ہے۔۔۔ بس خدا نے بچا لیا تمہیں۔۔۔۔ وہ تو عین موقع پہ میں نے اس لڑکی کو آگے کردیا۔۔۔ اور دیکھا۔۔ بنا کوئی جانچ پڑتال کیے عارفہ نے رشتہ بھی پکا کردیا۔۔۔۔ “

تائی زور و شور سے اپنی کارستانی بتا رہی تھیں۔۔۔۔

“یقین نہیں ہوتا یہ میرا خاندان۔۔۔ میرے لوگ ہیں،۔۔۔۔۔ ” سعدیہ باجی بولیں

تائی اور نادیہ باجی نے انکی بات کو یکسر نظرانداز کیا

“امّی۔۔۔ ! بس کردیں آپ۔۔۔۔ میں تھک گئی ہوں آپکے جھوٹے دلاسوں سے۔۔۔۔ اچھا بھلا نصیب کھلنے والا تھا۔۔۔ آپ نے بیچ میں ٹانگ اڑا دی۔۔۔۔اور اس بی بی کے نصیب کھل گئے ” نادیہ باجی نے مجھے حقارت سے دیکھا

تائی پاؤں پٹختی وہاں سے چلی گئیں۔۔۔ دادی سب کی بحث و تکرار کو ان سنا کرکے تسبیح میں مشغول تھیں۔۔۔

“بہت خوش ہو نہ میرا حق مار کے۔۔۔۔؟”

نادیہ باجی ایک دم سے میری طرف پلٹیں۔۔۔۔ میں خوفزدہ ہوگئی

“نادیہ پاگل ہوگئی۔۔ اس بے چاری کا کیا قصور ہے۔۔۔۔ ؟” سعدیہ باجی نے مجھے پیچھے کیا اور خود انکے سامنے آکے کھڑی ہوگئیں

“اپنی ماں پہ گئی ہے ۔۔۔ اس نے بھی ایسے ہی چاچو کو پھنسایا ہوگا۔۔۔۔ “

“شٹ اپ نادیہ۔۔۔۔ ! ” سعدیہ باجی نے ایک زور دار تھپڑ ان کے گال پہ رسید کیا

میرے جسم پہ لرزہ طاری ہونے لگا۔۔۔ پہلی بار کسی نے اسطرح سے میری ماں کا ذکر کیا تھا

یہ سب دیکھ کے دادی نے چلانا شروع کردیا

“غضب خدا کا۔۔۔۔ اس گھر میں کیا ہورہا۔۔۔ چھوٹی اب بڑی بہن پہ ہاتھ اٹھائے گی۔۔۔۔ یہ دن دیکھنے سے پہلے میں مر کیوں نہیں گئی۔۔۔۔ “

تائی پھر سے بھاگتی ہوئی اندر آئیں۔۔۔ تایا اور بابا بھی اسی وقت گھر میں داخل ہوئے۔۔۔ شور شرابا سن کے وہ بھی آگئے۔۔۔

نادیہ باجی کا گال سرخ ہوگیا۔۔۔۔

“دیکھ۔۔۔ دیکھ اپنی بیٹی کے کرتوت۔۔۔ اس کرم جلی کی طرف داری میں بڑی بہن پہ ہاتھ اٹھا دیا ۔۔۔ آج ساری حدیں پار ہوگئیں۔۔۔” تایا کو دیکھتے ہی دادی پھر سے شروع ہوئی

“مجھ سے بہت بڑی غلطی ہوئی جو اس لڑکی کو اتنا پڑھایا لکھایا۔۔۔۔ افسوس ہورہا ہے کہ تم میری اولاد ہو۔۔۔” تایا سعدیہ باجی کو کوسنے لگے

“کیوں ری۔۔۔۔ ! تو اتنی بڑی ہوگئی ہے۔۔ بہن پہ ہاتھ اٹھایا۔۔۔ اس ۔۔ منحوس لڑکی کی وجہ سے۔۔۔۔ ” تائی نے سعدیہ باجی کے بال پکڑ لیے

“ہاں اٹھایا ہاتھ میں نے۔۔۔۔ میری جگہ کوئی بھی ہوتا ایسے ہی کرتا۔۔۔ ٹھیک کیا میں نے۔۔۔” انکی آنکھوں میں آنسو تھے

“کیوں۔۔۔ کیا ایسا کردیا اس نے۔۔۔۔ ” تائی بھڑکیں

“پوچھیں۔۔۔ اپنی لاڈلی سے۔۔۔ ابھی ابھی کیا بکواس کی ہے اس نے۔۔۔۔”

“بتاؤ۔۔۔ ہمیں بھی تو پتا چلے۔۔۔۔ ” وہ بولیں

نادیہ باجی ٹسوے بہا رہی تھیں

“رانی کو ماں کی گالی دی ہے اس نے۔۔۔۔ کہہ رہی تھی اس کی ماں نے چاچو کو پھنسایا۔۔۔۔ میں سوچ بھی نہیں سکتی تھی کہ میری سگی بہن اتنی گر سکتی ہے۔۔۔”

سب نے چپ سادھ لی۔۔۔ میرے بابا کے چہرے کا رنگ فق پڑ گیا۔۔۔

“ہائے۔۔۔۔ میرے اللہ۔۔۔۔ اس منحوس لڑکی کو کیوں بھیج دیا ہماری زندگی میں۔۔۔۔ ” دادی ہاتھ اٹھا کے مجھے بدعائیں دینے لگیں

“سارے فساد کی جڑ یہی لڑکی ہے۔۔۔۔ زندگی تباہ ہوگئی ہماری۔۔۔۔ ” تائی نے مجھے خونخوار نظروں سے دیکھا

“اس کے ایک جوڑے کی وجہ سے آج یہ حالت ہے سب کی۔۔ شادی تک تو ہم سب خود کشی کرکے مر جائیں گے۔۔۔”

نیچے شور بڑھنے لگا۔۔ میری بہینیں اور سوتیلی ماں بھی آگئے۔۔

“کیا ہوا ۔۔۔ سب ٹھیک ہے نا۔۔۔۔” بابا کی بیوی بوکھلائی ہوئی بولیں

“کیا ٹھیک ہوگا۔۔۔ تیرے میاں کی ایک غلطی نے ہم سب کی زندگیاں تباہ کردیں۔۔۔ نہ اس لڑکی کو اس گھر میں لاتا اور نہ اسکی وجہ سے میری بیٹیاں ایکدوسرے کی جان کی دشمن بنتیں۔۔۔۔۔” تائی نے سر پیٹنا شروع کردیا

بابا کی بیوی نے ایک نظرمجھ پہ ڈالی اور پھر بولیں

“بتاؤ تو سہی۔۔۔ ہوا کیا ہے۔۔۔۔۔ ؟”

“اس سے کیا پوچھتی ہو۔۔۔ میں بتاتی ہوں۔۔۔۔” دادی بولیں

سب انکی طرف دیکھنے لگے

“سعدیہ نے اسے پہننے کے لیے کل اپنا نیا سوٹ نکال کے دیا تاکہ لڑکے والوں کے سامنے ناک رہ جائے۔۔۔ اس بدبخت نے بنا کسی کو پوچھے بتائے وہ سوٹ سعدیہ کو واپس کیا۔۔۔ اور سارا الزام میرے سر ڈال دیا کہ میں نے اسے ایسا کرنے کا کہا ہے۔۔۔۔ ” دادی ہاتھ میں تسبیح پکڑے صفائی سے جھوٹ بولی رہی تھیں۔۔۔

“دادی۔۔۔ پلیز۔۔۔۔ اینف۔۔۔۔۔ ” سعدیہ باجی کے براداشت جواب دے گئی

“اچھا۔۔۔ ! تجھے اس لڑکی کی بات پہ یقین ہے مجھ پہ نہیں۔۔۔” دادی جھوٹ موٹ کا رونے لگیں

“میں نے آپ سے جھوٹ بولا تھا کہ اپنا نیا سوٹ رانی کو دیا ہے۔۔۔۔ اور یہ جھوٹ صرف آپ سے بولا گیا تھا۔۔۔۔ رانی کو اس بات کیسے پتا چلا۔۔؟” سعدیہ باجی نے ایک نئی کہانی شروع کردی۔۔۔۔

“ہو ہائے۔۔۔۔ ! جھوٹ ۔۔۔ جھوٹ کیوں بولا۔۔۔۔” دادی کے ماتھے کے شکن اور گہرے ہوگئے

“اس بارے میں کچھ نہیں کہوں گی۔۔۔۔ اپنے بیٹے سے پوچھیں۔۔۔۔ ” سعدیہ باجی کا اشارہ بابا کی طرف تھا

سب انکی طرف دیکھنے لگے۔۔۔۔

“چاچو۔۔۔ ! اب اصل بات آپ بتاتے ہیں یا میں بتا دوں سب کو۔۔۔۔ ؟” وہ انکے سامنے کھڑی ہوگئیں

بابا نے اپنا سر جھکا لیا

سعدیہ آپی کو اس بات کا احساس ہوا کہ وہ کچھ نہیں بولیں گے تو وہ پھٹ پڑیں

“چاچو نے یہ سوٹ رانی کے لیے لیا تھا۔۔۔۔ لیکن وہ ڈر رہے تھے کہ اگر انکی بیوی اور بچوں کو اس بات کی خبر ہوئی تو زندگی اجیرن ہوجائے گی۔۔۔۔ اسی لیے مجھے جھوٹ بولنا پڑا کہیں دیکھا ہے ایسا باپ۔۔۔۔۔ ؟”

بابا کی بیوی کے طوطے اڑ گئے۔۔۔۔ ان کے چہرے پہ غم و غصے کے آثار نمایاں تھے۔۔۔۔

مجھے میرے کانوں پہ یقین ہیں آرہا تھا۔۔۔۔

کسی کے لیے چاہے یہ بات کتنی تکلیف دہ کیوں نہ ہو پر میرے دل میں خوشی کی ایک لہر دوڑی تھی۔۔۔

چاہے ڈرتے ہوئے ہی سہی پر انکے دل میں اتنی سی جگہ تو ہے۔۔۔۔ میرے لیے یہی کافی ہے