وہ سامنے جو کالے رنگ کا دروازہ نظر آرہا۔۔۔ آخری بار جب میں اس دروازے سے نکلی تھی تو میں کوئی اور تھی۔۔ پر آج کچھ اور ہی بن کے میں اس دروازے میں دوبارہ داخل ہونے آئی ہوں۔۔۔ اس وقت امیدوں کے سارے چراخ بجھا کے نکلی تھی۔۔ لیکن اس بار ساری شمعیں روشن ہیں۔۔۔

ایک منٹ رکیں میں رکشے والے کو کرایہ دے دوں۔۔۔

رکشے والا: باجی تین سو روپے ہوگئے۔۔۔

” تین سو روپے کیسے۔۔۔؟ اسپتال سے یہاں تک ڈھائی سو روپے لیتے ہیں۔۔۔”

رکشے والا: نا ۔۔ باجی پورے تین سو۔۔۔

“آپ حاجی خورشید صاحب کو جانتے ہیں۔۔۔؟

رکشے والا: کون حاجی خورشید۔۔؟

“رکشہ یونین کے چئیرمین۔۔۔!”

رکشے والا: اوہ اچھا۔۔۔ اچھا۔۔۔ آپ حاجی صاحب کی بات کررہی ہیں۔۔۔

“ہاں جی۔۔۔ ! حاجی صاحب مجھے اپنی بیٹیوں کی طرح سمجھتے ہیں۔۔۔ اگر آپ نے یہ لوٹ مار بند نہ کی تو مجھے آپکی شکائیت لگانی پڑے گی”

رکشے والا: مہربانی کریں باجی۔۔۔ ! بال بچے دار ہوں۔۔ سو پچاس تو بچتے ہیں۔۔۔ میں نے کونسا پانچ سو روپے مانگ لیے۔۔۔

“یہ لیں۔۔۔ ڈھائی سو روپے۔۔ اور چاپ رکھ لیں۔۔ میں اچھی طرح سے جانتی ہوں کہ ایک چکر پہ آپکو کتنے بچتے ہیں۔۔۔”

رکشے والا: سلاماں لیکم۔۔۔ !

دیکھا آپ نے کس طرح لوٹ مار مچائی ہوئی ہے۔۔۔ جب غریب ہی غریب کا گلے کاٹنے پہ اتر آئے تو امیروں سے کیا امید رکھنی۔۔۔

ارے ہاں۔۔۔ امیروں سے یاد آیا۔۔ میں کب تک ایسے گلی میں کھڑی رہوں گی۔۔۔ دروازے پہ دستک دیتی ہوں۔۔۔

(دروازہ کھلا۔۔۔)

سونی: بھابی آپ۔۔۔۔ (دونوں ہاتھ منہ پہ رکھ کے وہ خوشی سے اچھل ہی پڑی تھی)

“ہاں ۔۔۔ میں۔۔۔۔ “(آگے بڑھ کے گلے سے لگایا)

سونی: دیکھو کون آیا ہے۔۔۔۔ ؟ (سونی نے شور مچانا شروع کیا)

دیکھتے ہی دیکھتے کافی لوگ جمع ہوگئے۔۔۔

عارفہ خالہ آگے بڑھیں اور گلے سے لگایا۔۔۔

عارفہ خالہ: میں تین بار تیمور کو فون کر چکی ہوں کہ تمہاری بھابی اسپتال سے نکلی یا نہیں۔۔۔

“میں تو اسپتال میں رکنا چاہ رہی تھی۔۔ لیکن تیمور نے ضد ہی پکڑ لی تھی۔۔۔ “

سب باری باری ملنے لگے۔۔۔ سبھی کے چہروں پہ پھیلی مسکان اس بات کا پتہ دے رہی ہے کہ وہ لوگ کتنے خوش ہیں۔۔۔

آپکو پتا ہے۔۔۔ جب پہلی بار میں اس گھر میں داخل ہوئی تھی۔۔ تو یہی چہرے تھے۔۔ جو مجھے دیکھ کے اداس تھے۔۔ دکھ میں تھے۔۔۔ میری آمد پہ کوئی بھی خوش نہیں تھا۔۔۔ پر ۔۔۔ اب حالات بدل چکے ہیں۔۔۔ اور جب حالات سازگار ہوں تو لوگوں کے روّیے بھی سازگار ہو ہی جاتے ہیں۔۔

عارفہ خالہ: ارے۔۔۔ ! اندر بھی آنے دو بھابی کو ۔۔ کب سے بیچاری دروازے پہ کھڑی ہے۔۔۔۔

(سب نے اندر آنے کا راستہ دیا)

عارفہ خالہ: بیٹا۔۔۔ ! تم اپنے کمرے میں چلو ۔۔۔ ترو تازہ ہو۔۔ میں چائے پانی بھجواتی ہوں۔۔۔

“ٹھیک ہے۔۔۔ “

سب ایک ایک کرکے وہاں سے چلے گئے۔۔۔

جسے ابھی یہ میرا کمرہ کہہ رہی ہیں۔۔ دراصل وہ میرا کمرہ کبھی تھا ہی نہیں۔۔۔ اس وقت بھی نہیں جب میں پہلی بار آئی تھی اور اب بھی نہیں۔۔۔ اس کمرے میں جانے کی ہمت ہی نہیں ہورہی۔۔۔ لیکن جانا تو پڑے گا۔۔۔

اچھا۔۔۔ ! ایسا کیوں ہوتا ہے۔۔ انسان کٹھن سے کٹھن مسافتیں طے کرلیتا ہے لیکن چند قدم کے فاصلے طے کرنا دشوار ہو جاتا ہے۔۔۔؟

خیر ۔۔! میں بھی کن باتوں میں لگ گئی۔۔۔۔۔۔ وہ سامنے جو ایک کمرہ نظر آرہا ہے۔۔۔ وہ۔۔۔ وہی کمرہ ہے۔۔۔ گھر کی پوری عمارت سے الگ تھلگ۔۔۔ ایک کونے میں۔۔۔

لو۔۔۔ آگئی دروازے تک۔۔۔۔ میرا دل زور زور سے دھڑک رہا ہے۔۔۔ دل کررہا ہے بھاگ جاؤں یہاں سے۔۔۔ لیکن۔۔ اب میں بھاگ نہیں سکتی۔۔۔ بیتے ایک لمبے عرصے میں یہی تو سیکھا ہے کہ کبھی بھاگوں گی نہیں۔۔۔ ایک دروازہ ہی تو کھولنا ہے۔۔۔۔

لو کھل گیا دروازہ۔۔۔۔ اب آنکھیں بند کرکے دایاں پاؤں اندر رکھتی ہوں۔۔۔

وہی خوشبو۔۔۔۔ اب بھی اس کمرے میں رچی بسی ہے۔۔۔ لگتا ہی نہیں بیتے وقت کا اس کمرے پہ کوئی اثر پڑا ہو۔۔۔ وہی سناٹا۔۔۔ جو روح کے اندر تک سرائیت کرتا ہے۔۔۔ پہلے پہل تو اس سناٹے میں ایک عجیب سا سکون محسوس ہوتا ہے۔۔۔ پر یہ سکون جلدی ہی سسکیوں میں بدل جاتا ہے۔۔۔ مجھے تو لگتا ہے۔۔۔ یہ سناٹا ضرور کسی کہ “آہ” ہے۔۔۔ درد سے لرزتی ایک آہ۔۔ جو جسم میں بجلی کی طرح گزرتی ہے۔۔۔

چلو۔۔۔ ایک رات کی ہی بات ہے۔۔ پھر اس کمرے کے سبھی سناٹے اور آہیں۔۔۔ ہمیشہ ہمیشہ کے لیے غائب ہو جائیں گے۔۔۔

اب آنکھیں کھول رہی ہوں۔۔۔ اف۔۔۔ ! اندھیرا۔۔۔ کتنا اندھیرا ہے اس کمرے میں۔۔۔ لائٹ آن کرتی ہوں۔۔۔۔

ہاں۔۔۔ کردی آن۔۔۔۔

سب کچھ ویسا ہے۔۔۔۔ کچھ بھی نہیں بدلا۔۔۔۔۔ اس کمرے میں ابھی بھی اس سفاک سی اجنبیت کا بسیرا ہے۔۔۔۔

اسی لیے تو میں آپ سے کہہ رہی تھی کہ یہ کمرہ میرا نہیں ہے۔۔۔۔ اور ہوگا بھی کیسے۔۔۔ اس میں میرا اپنا کچھ بھی نہیں ہے۔۔۔۔ سب بیگانہ سا ہے۔۔۔ لیکن اب اس کی یہ بیگانگی کچھ ہی پلوں کی مہمان ہے۔۔۔۔

بیگانگی سے یاد آیا۔۔۔۔ عارفہ خالہ نے مجھے ایک خاص تاکید کی تھی کہ کل میں وہی جوڑا پہنوں۔۔۔۔ مجھے یاد ہے جانے سے پہلے اپنی ایک آخری نشانی میں اس کمرے میں چھوڑ کے گئی تھی۔۔۔

جس دن میں جارہی تھی۔۔۔ دادی نے ایک ہی رٹ لگائی ہوئی تھی۔۔۔

“اپنا کچھ چھوڑ کے نا جانا۔۔۔۔ جو بھی لے آئی تھی سب باندھ لو۔۔۔ اب تم کبھی یہاں واپس نہیں آؤ گی۔۔۔ لیکن انکی نظروں سے بچتے بچاتے میں اپنی شادی کا “سرخ جوڑا” الماری میں چھوڑ گئی تھی۔۔۔ اس امید پہ نہیں کہ میں پھر لوٹ کے آؤں گی۔۔۔ بلکہ۔۔ میں اس جوڑے کا بوجھ اٹھانے سے قاصر تھی۔۔

میں پھر سے باتوں میں لگ گئی۔۔۔ الماری کھول کے تو دیکھوں۔۔ وہ جوڑا موجود ہے بھی یا کسی نے ہٹا دیا وہاں سے۔۔۔

کھل گئی الماری۔۔۔

اف خدایا۔۔۔۔ ! مرادنہ کپڑوں سے لدی یہ الماری اب بھی ویسے ہی اَن چھوئی سی ہے۔۔۔ ہینگر میں نئے مرادنہ سوٹ اسی طرح سے لٹکے ہوئے ہیں۔۔۔۔

اور میرا جوڑا۔۔۔ کہاں رکھا تھا۔۔۔۔؟ ہاں۔۔۔ یہ ان کپڑوں کے نیچے۔۔۔۔ اوہ۔۔ مل گیا۔۔۔۔ !یہ باہر نکال لیا۔۔۔

اسے چھوتے ہی میرے ہاتھ کیوں کانپ رہے ہیں۔۔۔

میری کتنی ہی یادیں وابستہ ہیں اِس سرخ جوڑے سے۔۔۔۔۔

اس میں جَڑے ہر موتی میں کتنی ہی داستانیں چھپی ہیں۔۔۔ اسکی سلوٹوں میں کتنے ہی ادھورے افسانے اونگھ رہے ہیں۔۔۔

کتنی ہی بھیانک رات تھی وہ۔۔۔ جب میں اس جوڑے میں ملبوس اس کمرے میں داخل ہوئی تھی۔۔۔۔

بالکل اسی جگہ ۔۔۔ یہاں۔۔۔ اسی فرش پہ۔۔۔ اس بیڈ کے ساتھ پشت لگائے۔۔۔ میں نے وہ رات کاٹی تھی۔۔۔ ایک لمبی سیاہ رات۔۔۔۔

میں پھر سے وہیں بیٹھ جاتی ہوں۔۔۔ دیکھتی ہوں کہ وقت کے ساتھ درد کی شدت میں کمی آئی یا نہیں۔۔۔

ان آنکھوں پہ میں نے ایک عرصے تک بند باندھ کے رکھا۔۔۔ پر اب اور نہیں۔۔۔ آج انھیں آزادی ہے۔۔۔ جتنا برسنا ہے برس لیں۔۔۔ اتنا برسیں کے اس سرخے جوڑے میں چھپے ہر درد کو دھو دیں۔۔۔ آج جب آنکھوں سے ہر پابندی ہٹا دی ہے۔۔۔ تو دل کو بھی بیتی یادوں کے جنگلوں میں بھٹکنے دیتی ہوں۔۔۔ پھر سے کھو جاتی ہوں۔۔۔۔ ان یادوں کے لیے بس ایک رات ہی تو ہے۔۔۔ کل ایک اور سورج نکلے گا۔۔ جو ہر اندھیری یاد کو روشن کردے گا۔۔۔۔

میں چار سال کی تھی۔۔۔ یا پھر پانچ سال کی۔۔۔ میری عمر مجھے ٹھیک طرح سے پتا نہیں ہے۔۔۔ میری ماں مجھے کچھ بتاتی کہاں تھی۔۔۔ ماں سے یاد آیا۔۔۔ میر ی ماں بھی بڑی عجیب عورت تھی۔۔ ہر وقت یا تو کھانستی رہیتی یا پھر میرے باپ کو برا بھلا کہتی ۔۔۔۔ مجھے کہاں چھوڑتی تھی۔۔ سب سے زیادہ تو مجھے ہی باتیں سناتی۔۔۔ میں کھانا مانگتی تو اپنے اور میرے نصیب کو روتی۔۔۔ کبھی کبھی تو بلاوجہ مارنا شروع کردیتی۔۔۔۔ لیکن تھوڑی دیر بعد مجھے گلے سے لگا کے۔۔۔ میرا سر چومتی۔۔۔ اور کہتی۔۔۔

“رانی۔۔۔ ! کاش تو پیدا نہ ہوتی۔۔۔ کاش۔۔ تو مر جائے۔۔۔۔ “

بھلا یہ کیسا پیار تھا۔۔۔ ؟ میں نے خود دیکھا ہے۔۔ وہ بھینگی۔۔۔ تنّو ہے نا۔۔۔۔ اسکی ماں اسے اتنا پیار کرتی ہیں جس کی کوئی حد نہیں۔۔۔ میں تو صحیح سلامت ہوں پھر بھی میری ماں مجھ سے وہ والا پیار نہیں کرتی تھی۔۔۔ میرے بابا۔۔۔ ہمارے ساتھ نہیں رہیتے تھے۔۔۔ کبھی کھبار آتے۔۔۔ میری ماں ان سے خوب لڑائی کرتی اور وہ کچھ پیسے دے کے پھر کئی کئی دن کے لیے غائب ہوجاتے ۔۔۔

انھوں نے مجھے کبھی گود میں نہیں اٹھایا۔۔۔۔ جیسے تنّو کے بابا اسے گود میں اٹھا کے نکڑ والی دکان پہ لے جاتے۔۔۔ اور اتنی ساری چیزیں لے کے دیتے تھے۔۔۔۔ میرے بابا جب بھی گھر میں آتے میں چھپ جاتی تھی۔۔۔ وہ اتنا اونچا اونچا بولتے تھے۔۔۔ مجھے بہت ڈر لگتا تھا ان سے۔۔۔۔ ان کے جانے کے بعد خالہ آتی۔۔۔ وہ جو نیچے رہیتی تھیں۔۔۔ میری ماں رو رو کے انھیں سارا حال سناتی۔۔۔۔ روتے روتے انھیں کھانسی کا دورہ پڑ جاتا تھا۔۔۔ خالہ انھیں پانی پلاتی۔۔۔ لیکن انکے آنسو نہیں رکتے تھے۔۔۔ میں بھی جاکے انکی چارپائی کے پاس کھڑی ہوجاتی۔۔۔ وہ باتیں کرتے کرتے چپ ہوتیں ۔۔۔ تو میں ان سے کہتی کہ مجھے کھٹی املی والی ٹوفی لینی ہے۔۔۔ تو تلملا جاتیں۔۔۔ میرے بالوں سے پکڑتیں اور کہتی ہیں۔۔ یہ سب میری وجہ سے ہورہا ہے۔۔ میں انکی تکلیف کی وجہ ہوں۔۔۔ خالہ مجھے امّی کی مار سے بچاتی۔۔ اور کہتی کہ

“بیٹا۔۔۔ ! ماں کو تنگ نہ کیا کرو۔۔۔ دیکھا نہیں۔۔۔ وہ بیمار ہیں۔۔۔ “

میں روتی ہوئی کمرے میں چلی جاتی۔۔۔ چارپائی کے نیچے جا کے لیٹ جاتی۔۔۔ جارپائی کے نیچے۔۔ خون کے نشان ہوتے تھے۔۔۔ امّی کو جب کھانسی آتی تو ان کے منہ سے خون نکلتا تھا۔۔۔ بس وہ پوری رات ایسے کھانستی اور لہو تھوکتی رہیتی۔۔۔

میں دل ہی دل میں سوچتی کہ آخرمیں اپنی ماں کی تکلیفوں کی ذمہ دار کیسے ہوں۔۔۔۔ کوئی جواب نہیں ملتا تھا۔۔۔

میں نے ایک رات ڈرتے ڈرتے اپنی ماں سے پوچھا کہ “تنّو کے بابا کی طرح میرے بابا ہمارے ساتھ کیوں نہیں رہیتے۔۔۔ تو انھوں نے مجھے بتایا کہ انکا ایک اور گھر ہے جہاں وہ اپنے بیوی بچوں کے ساتھ رہیتے ہیں۔۔۔ تو میں نے پوچھا کہ ہم انکے ساتھ کیوں نہیں رہ سکتے۔۔۔ ہمیں بھی انکے ساتھ رہنا چاہیے۔۔۔ امّی نے مجھے گلے سے لگایا اور بولیں کہ اگر ایسا ممکن ہوتا تو آج ہم لوگ اس حالت میں نہیں ہوتے ۔۔۔۔ ایسا ممکن نہیں ہے۔۔۔

“کیا وہ ہم سے پیار نہیں کرتے۔۔۔۔؟” میرے اس سوال پہ وہ خاموش ہوجاتیں۔۔۔۔ میں بھی زیادہ ضد نہیں کرتی تھی۔۔۔ ڈرتی تھی۔۔ کہیں پھر سے نہ مارنا شروع کردیں۔۔۔

ہر صبح امّی مجھ سے پہلے اٹھ جاتی تھیں۔۔۔ اور مجھ جگا کے ناشتہ دیتیں ۔۔۔۔ لیکن اس دن جب میں صبح اٹھی تو وہ ابھی تک سو رہی تھیں۔۔۔ انکا چہرہ ایک دم سرخ ہورہا تھا۔۔۔ میں نے انھیں جگانے کی کوشش کی لیکن وہ نہیں اٹھیں۔۔۔ انکے منہ سے عجیب سی آواز نکل رہی تھی۔۔۔ میں جلدی سے نیچے والی خالہ کو بلا لائی۔۔۔ وہ امّی کی حالت دیکھ کے بہت پریشان ہوگئیں۔۔۔ انکے میاں اوپر آگئے۔۔۔ ان کے بچے مجھے اپنے گھر لے گئے۔۔۔ وہاں میں نے پیٹ بھر کے ناشتہ کیا۔۔۔ اسکے بعد میں امّی کے پاس جانے کی ضد کرنے لگی۔۔۔ لیکن کوئی بھی مجھے اوپر نہیں جانے دے رہا تھا۔۔۔ میں بہت پریشان تھی۔۔۔ رو رہی تھی کہ مجھے میری ماں کے پاس جانا ہے۔۔۔ لیکن کوئی میری بات نہیں مان رہا تھا۔۔۔ میں خالہ کے دروازے میں بیٹھ کہ عورتوں کو اپنے گھر آتا جاتا دیکھتی رہی۔۔۔ تنّو نے مجھے بتایا کہ میری ماں مر گئی ہے۔۔۔ خالہ جب نیچے آئیں۔۔ تو میں نے ان سے پوچھا کہ تنّو کہتی ہے میری ماں مر گئی ہے۔۔۔ تو انھوں نے مجھے گلے سے لگایا اور کہا ۔۔۔ “ہاں ۔۔ تمہاری ماں تمہیں چھوڑ گئی ہے۔۔۔۔” پر میں نے انکی بات نہیں مانی۔۔۔ اگر وہ چھوڑ کے جاتیں تو۔۔ اسی راستے سے گزرتیں نہ۔۔۔ یہاں سے تو وہ گرزی نہیں۔۔۔ تو پھر کہاں سے گئیں۔۔۔ اور کدھر گئیں۔۔ میں بھاگتی ہوئی۔۔ سیڑھیاں چڑھنے لگی۔۔۔ اوپر پہنچی تو صحن میں میری ماں چارپائی پہ لیٹی تھی۔۔۔ اور کافی عورتیں انکے ارد گرد بیٹھی تھیں۔۔۔ میں جا کے انکے پاس لیٹ گئی اور گلے سے لگا لیا۔۔۔ وہ شائد سو رہی تھیں۔۔۔ لیکن اگلے ہی لمحے عورتوں نے مجھے وہاں سے اٹھایا۔۔۔ اور زور زبردستی نیچے بھیج دیا۔۔۔۔ مجھے تسلی تھی کہ میری ماں مجھے چھوڑ کے نہیں گئی۔۔۔ میں خالہ کے بچوں کے ساتھ پورا دن کھیلتی رہی۔۔۔۔ شام ہوئی تو وہ مجھے اوپر لے گئیں۔۔۔ میری ماں نے سفید رنگ کی چادر اوڑھی ہوئی تھی۔۔۔ انھوں نے چادر انکے چہرے سے ہٹائی۔۔۔ اور مجھے دیکھ کے بولیں کہ “اپنی ماں کا آخری دیدار کرلو۔۔۔۔”

دیکھتے ہی دیکھتے چند آدمی آئے اور میری ماں کو اسی چارپائی پہ اٹھا کے نیچے لے گئے۔۔۔ میں روتی رہی بلکتی رہی۔۔۔ سبھی عورتیں مجھے گلے لگاتیں۔۔۔ اور روتیں۔۔۔ پر مجھے میری ماں چاہیے تھی۔۔۔ میں انکے بغیر کیسے رہوں گی۔۔۔ کہاں جاؤ گی۔۔۔ بابا بھی پتا نہیں کہاں رہ گئے۔۔۔۔

خالہ مجھے اپنے گھر لے آئیں۔۔۔میں رات بھر اپنی ماں کو یاد کرتی رہی۔۔۔۔ کوئی مجھے انکے پاس لے کے نہیں گیا۔۔۔ میری ماں کے جانے کے بعدہمارے گھر کو بند کردیا گیا۔۔۔ میں ٹکٹی لگا کے اپنے گھر کی سیڑھیوں کو دیکتھی رہیتی کہ ابھی میری ماں یہاں سے اترے گی۔۔۔ لیکن ایسا نہیں ہوا۔۔۔ دو دن گزر گئے۔۔۔ میں نے بھی رونا بند کردیا۔۔۔ پھر ایک دن میرے بابا وہاں آئے۔۔۔ خالہ نے مجھے تیار کیا اور کہا کہ اب تم اپنے بابا کے ساتھ جاؤ گی۔۔۔ میں خوش ہوگئی۔۔۔

مجھے یقین تھا میری ماں ضررو وہیں ہوگی۔۔۔ میں اس دن پہلی بار بابا کے ساتھ انکی موٹر سائیکل پہ بیٹھی تھی۔۔۔ موٹر سائیکل پہ بیٹھتے ہی میں نے ان سے پہلا سوال یہی کیا۔۔۔ کہ “آپ مجھے امّی کے پاس لے جارہے ہیں نا۔۔۔؟” انھوں نے مجھے کوئی جواب نہیں دیا۔۔۔ لیکن میرے دل کو تسلی تھی۔

کافی دیر تک وہ یونہی اپنی موٹر سائیکل کو گھماتے رہے۔۔۔ اور میں بار بار ان سے پوچھتی۔۔ ابھی اور کتنا دور ہے۔۔۔ لیکن انھوں نے تو جیسے قسم کھائی تھی کہ میری کسی بات کا جواب نہیں دیں گے۔۔۔ میں بھی ڈر کے مارے چپ ہوجاتی کہیں امّی کی طرح وہ بھی مجھے مارنا نہ شروع کردیں۔۔۔

بالآخر ایک گھر کے آگے انھوں نے موٹر سائیکل روک دی۔۔۔ اور مجھے نیچے اتارا۔۔۔ خود بھی نیچے اتر کے گھر کا دروازہ کھولا اور موٹر سائیکل اندر کی۔۔ میں بھی انکے پیچھے پیچھے چل پڑی۔۔۔ بڑا سا صحن تھا۔۔۔ جس میں چارپائیوں پہ کچھ لوگ بیٹھے تھے۔۔۔۔ ہمیں اندر آتا دیکھا کے سب کی نظریں ہم پہ جم گئیں۔۔۔ میں وہاں موجود سبھی عورتوں میں اپنی ماں کو ڈھونڈنے لگی۔۔۔ لیکن وہ مجھے کہیں نظر نہیں آرہی تھیں۔۔۔ بابا موٹر سائیکل برآمدے میں کھڑی کرکے آہستہ آہستہ انھی لوگوں کی طرف بڑھنے لگے۔۔۔ اس اجنبی سے گھر میں مجھے ایک عجیب سا خوف محسوس ہونے لگا۔۔۔ میں نے جلدی سے بابا کا ہاتھ پکڑ لیا۔۔۔ وہ رک کے میری طرف دیکھنے لگے۔۔۔ میں نے ڈر کے ہاتھ چھوڑ دیا۔۔۔ چند قدم اور میں انکے ساتھ چلی ۔۔۔ وہاں موجود سبھی لوگ ہمارے گرد جمع ہوگئے۔۔۔ میری نگاہیں اب بھی میری ماں کو تلاش کررہی تھیں۔۔۔

ابھی کچھ پل ہی گزرے تھے۔۔۔ بابا نے سب کو بتایا کہ میں انکی بیٹی ہوں۔۔۔ ایک شور شرابا شروع ہوگیا۔۔۔ سب ان سے بحث کرنے لگے۔۔۔ ایک عورت میرے پاس آئی اور میرے بازو سے پکڑ کے کمرے میں لے گئی۔۔۔۔ میں نے اس سے پوچھا

“میری ماں کہاں ہے۔۔۔۔۔؟”