وہ تھکے قدموں سے گھر میں داخل ہوا۔مسکاء اسے دیکھ کر اس کی جانب دوڑی چلی آئی تھی۔اس کی سوالیہ نظروں کے جواب میں وہ چہرہ جھکا گیا تھا۔

“کچھ پتہ چلا بیٹا۔۔؟”

رحم دین اور ذہرہ بی بی بھی اٹھ کر اسکی جانب آئے تھے۔اس کا اترا چہرہ دیکھ کر تو وہ اسکا جواب جان گئے تھے مگر پھر بھی ایک موہوم سی امید کے سہارے انھوں نے اس سے پوچھا۔مسکاء کی آنکھوں سے جھر جھر آنسو بہنے لگے تھے۔رو رو کر اس نے آنکھیں سوج گئی تھیں۔اس کی سوجی آنکھیں ضیغم اسکی جانب دیکھنے سے گریز برت رہا تھا۔

“آپ لوگ پریشان مت ہوں۔۔جس کسی نے بھی یہ حرکت کی ہے میں اسے زندہ نہیں چھوڑوں گا۔وہ سمجھتے ہیں کہ وہ مجھے گمراہ کر دیں گے تو یہ ان کی بھول ہے۔ان کے علاوہ کون ہے ایسی حرکت کرنے والا۔۔آپ لوگ فکر نہ کریں مل جائیں گے بابا۔”

وہ ذہرہ بی بی اور رحم کی جانب دیکھتے ہوئے بولا۔اس کی کھوکھلی تسلی سے ان کے دل تو مطمئن نہیں ہونگے۔یہی تسلی وہ خود کو بھی دے رہا تھا۔

“اللہ اپنا رحم کرے گا انشاءاللہ۔”

ذہرہ بی بی نے اسکے سر پہ ہاتھ پھیرا تھا۔وہ ایک نظر مسکاء دیکھ کر کمرے کی جانب بڑھ گیا۔

“مسکاء۔۔۔۔! جاو بیٹا۔۔ایک کپ چائے بنا کر لے جاو اور کھانے کا بھی پوچھ لینا۔۔”

ذہرہ بی بی کی بات سن کر وہ کچن میں آ گئی۔چائے کا پانی رکھا اور جلدی سے چائے بنا کر پہلے رحم دین اور ذہرہ بی بی کو دی اور انھیں زمان خان کے کمرے میں آرام کرنے کا کہہ کر واپس کچن میں آ گئی۔اپنی آنکھوں کو انگلیوں سے دبایا اور پھر چائے کا کپ لئے اپنے کمرے میں آ گئی۔ضیغم اس وقت فون پہ بات کر رہا تھا۔اس نے خاموشی سے کپ ٹیبل پہ رکھا۔

“یہ جو ایڈریس میں نے دیا ہے فورا اس جانب کسی کو بھیجو اور مجھے تمام ڈیٹیلز دو۔میں انتظار کر رہا ہوں تمھارے فون کا۔”

کسی کو ایڈریس بتا کر اس نے موبائل وہیں ٹیبل پر رکھا اور کرسی گھسیٹ کر بیٹھ گیا۔

“کھانا لاوں۔۔۔۔؟”

مسکاء نے چائے کا کپ اسے پکڑاتے ہوئے پوچھا۔ضیغم نے اس کے ہاتھ سے کپ لیتے ہوئے نفی میں سر ہلایا۔

“تم نے کھانا کھایا۔”

ضیغم نے اس کے سرخ چہرے پہ نظر ٹکائی تھی۔مسکاء نے بھی نفی میں سر ہلایا تھا۔وہ یونیفارم تبدیل کر کے اس وقت سادہ سا لباس پہنے ہوئے تھا۔اس کے چہرے پہ بچھا تفکرات کا جال مسکاء کو اسے تسلی دینے پہ مجبور کر رہا تھا مگر الفاط ساتھ نہیں دے رہے تھے اور نا ہی وہ خود میں ہمت پا رہی تھی۔

“مسکاء یہاں آو۔۔۔”

ضیغم نے اسکا ہاتھ تھام کر اسے اپنے سامنے کرسی پہ بٹھایا۔

“تم پریشان مت ہو۔۔۔بابا کل یہیں ہونگے ہمارے درمیان۔”

اس نے اپنے ہاتھ میں موجود مسکاء کے ہاتھ کو نرمی سے دبایا۔مسکاء نے جھکی پلکیں اٹھائیں تو اسکی آنکھوں میں پھیلتا پانی پلکوں کی باڑ توڑ کر گالوں پہ پھیلتا چلا گیا۔ضیغم نے قریب ہو کر اسکے آنسو پونچھے۔

“بس اب رونا نہیں ہے۔۔مانا کہ تم روتے ہوئے مزید پیاری لگ رہی لیکن اس کا یہ مطلب ہرگز نہیں کہ میں تمھیں رونے دوں۔”

وہ اسکا ہاتھ تھام کر بیڈ کی طرف آیا۔اسے لیٹنے کا کہہ کر وہ خود بھی موبائل ہاتھ میں لئے بیڈ کی جانب آیا۔مسکاء لیٹ چکی تھی مگر نیند اسکی آنکھوں سے کوسوں دور تھی۔وہ پلکیں جھپک جھپک کر آنسووں کو اندر دھکیلنے لگی۔ضیغم فون میں مگن ہو گیا۔دونوں کا ذہہن اپنی اپنی سوچوں کے مدار میں گھوم رہا تھا۔آدھے گھنٹے کے کٹھن انتظار کے بعد اسکے موبائل کی گھنٹی بجی۔

“ہیلو۔۔۔۔۔ہاں کیا بنا؟”

فون پک کرتے ہی پوچھا تھا۔

“سر۔۔۔! وہاں کچھ بھی نہیں ہے۔یہ علاقہ تو ایسی کاروائیوں کے لئے مشہور ہے مگر ایسی کوئی بھی غیر معمولی حرکت وہاں ہمیں دکھائی نہیں دی اور نہ ہی وہاں سے ہمیں کچھ ملا ہے۔۔”

اسکی بات سن کر ضیغم کی پریشانی بڑھ گئی۔

“تم لوگ اسی ایڈریس پہ گئے تھے نا؟”

اس نے ایک موہوم سی امید کے سہارے پوچھا۔

“جی سر یہی ایڈریس ہے۔۔۔ہم ابھی بھی یہی موجود ہیں۔”

“ٹھیک ہے۔۔”

وہ کچھ سوچتے ہوئے بولا۔

“اب ہمارے لئے کیا حکم ہے سر۔۔؟”

دوسری جانب سے آواز آئی۔

“تم لوگ وہاں نظر رکھو اور اگر کوئی بھی ایسی ویسی حرکت دیکھو تو فورا مجھے انفارم کرو۔” ضیغم نے اسے چند ضروری ہدایت دے کر فون بند کر دیا۔

“اگر بابا وہاں نہیں ہیں تو کہاں ہو سکتے ہیں۔اس کے علاوہ دوسری کون سی جگہ ہو سکتی ہے جہاں میرسربلند خان بابا کو رکھ سکتا ہے۔حویلی میں تو نہیں رکھ سکتے تو کہاں۔۔۔۔۔۔۔”

اچانک اس کے ذہہن میں جھماکا سا ہوا۔وہ موبائل وہیں چھوڑ کر کمرے سے باہر نکل گیا۔مسکاء چونکہ جاگ رہی تھی اس لئے وہ بھی اس کے پیچھے باہر آئی۔

“اس وقت کہاں جا رہے ہیں؟”

مسکاء کی آواز پہ اس نے پلٹ کر دیکھا تھا۔

“آتا ہوں ابھی۔۔۔تم آ کر دروازہ بند کر لو۔”

وہ چٹخنی اتار کر باہر نکل گیا۔اس کے جانے کے بعد مسکاء نے دروازہ بند کیا اور وہیں صحن میں ضیغم کا انتظار کرنے لگی۔

ضیغم وہاں سے سیدھا حجرے آیا تھا۔حجرے کا گیٹ کھلا دیکھ کر اسے حیرانی ہوئی۔اندر کوئی بھی موجود ہو سکتا ہے اس لئے وہ تھوڑا محتاط ہوا۔قدموں کی آہٹ پیدا کیے بناء وہ اندرآیا۔برآمدے میں لگے زیروپاور بلب کی روشنی صحن تک پھیلی ہوئی تھی۔اس نے اردگرد نظر دوڑائی۔کسی کو بھی موجود نہ پا کر اس نے اپنے پیچھے آہستگی سے گیٹ بند کیا اور دھیرے دھیرے قدم اٹھاتا صحن کے وسط میں آ کر کھڑا ہو گیا۔دائیں طرف بنی وہ تنگ و تاریک گلی بوگن ویلیاء کی گھنی شاخوں کے جال میں چھپی کسی بھی نئے آنے والے کی نظروں سے پوشیدہ رہ سکتی تھی مگر اس کی نظروں سے نہیں۔۔ایک بار پہلے بھی وہ اپنے باپ کی تلاش میں یہاں آیا اور آج ایک بار پھر وہ اپنے باپ کو ڈھونڈنے آیا تھا۔ٹارچ کی روشنی میں اس نے احتیاط سے شاخوں کو پڑے ہٹایا اور گلی میں آ کر رک گیا۔ٹارچ کی روشنی دیوار پہ پڑی تو اسکی نظریں خون کے جمے ہوئے نشان پہ پڑی تو اسکے دل کی دھڑکن میں اضافہ ہوا ۔وہ دھیرے سے آگے بڑھا۔اس کے مضبوط قدموں تلے خشک پتوں کی آواز رات کی خاموشی کو چیر رہی تھی۔پچھلی جانب پہنچ کر اس نے آس پاس نظر دوڑائی۔کچھ ہی فاصلے پہ بنت کمرے کا دروازہ کھلا ہوا تھا۔وہ تیزی سے اس جانب آیا۔ٹارچ کی روشنی اس نے کمرے پہ ڈالی۔چارپائی پہ پڑے سفید کپڑے کی جانب اور تیزی سے ہاتھ بڑھا کر اٹھا لیا۔

یہ زمان خان کا رومال تھا جو ہمیشہ ان کے کندھے پہ رہتا تھا۔اس نے رومال کو ناک کے قریب لے جا کر ان کی خوشبو کو محسوس کیا۔

“میرسربلند خان۔۔۔تمھیں اس کی بہت بڑی قیمت چکانی پڑے گی۔”

وہ رومال ہاتھ میں لئے وہاں سے نکل آیا۔

_________________________________________

وہ فریش ہو کر باہر آیا تو رحم دین اور ذہرہ بی بی صحن میں چارپائی پہ بیٹھے تھے۔مسکاء کچھ میں تھی۔وہ انھیں سلام کرتا کرسی پہ بیٹھ گیا۔مسکاء نے باورچی خانے کی کھڑکی سے اسے دیکھ لیا تھا۔اس نے جلدی سے چائے کے کپ ٹرے میں رکھے اور ناشتہ لئے باہر آ گئی۔سردی کی شدت میں اضافہ ہوا تھا۔دھوپ کی ہلکی سی تمازت دماغ پہ اچھا اثر ڈال رہی تھی۔املتاس کا پیڑ اپنے سارے پتے گرا چکا تھا۔جسکی وجہ سے دھوپ کو پورے صحن میں اپنی بہار دکھانے کا موقع مل گیا تھا لیکن املتاس کے پیڑ کی اداسی اور خاموشی روح میں اترتی محسوس ہو رہی تھی۔شفاف نیلا آسمان سورج کی کرنوں سے روشن تھا۔

وہ بھی ان کے قریب ہی کرسی گھسیٹ کر بیٹھ گئی۔

“بابا کا رومال مجھے وہاں ملا ہے۔جس سے ایک بات تو واضح ہے کہ بابا انہی کے قبضے میں ہیں۔شکور تو لاک اپ میں ہے تو یہ کام اس بار باتور خان نے کیا ہے۔گلاب خان نے بھی کہا ہے وہ جب بابا کو چھوڑ کر باہر آئے تھے تو وہاں باتور خان آیا تھا۔”

وہ رحم دین کو بتا رہا تھا۔مسکاء نے ٹرے ان کے درمیان میں پڑی چھوٹی سی ٹیبل پہ رکھی اور کپ

اٹھا کر ضیغم کی طرف بڑھایا۔

“تو تمھیں ان کے خلاف کوئی کاروائی کرنی چاہئیے۔زمان خان کا زیادہ دیر ان کے قبضے میں رہنا ٹھیک نہیں ہے۔وہ اسے نقصان پہنچا سکتے ہیں۔”

رحم دین بولے تو پریشانی ان کے لہجے سے ظاہر تھی۔ذہرہ بی بی بھی اسکی ساری بات سن کر پریشان ہو گئی تھیں۔

“اسی سلسلے میں تھانے جا رہا ہوں اور ہو سکتا ہے وہاں سے شہر چلا جاوں۔اس لئے آپ لوگ یہیں مسکاء کے پاس رہیں۔میں فون کے ذریعے رابطے میں رہوں گا۔”

وہ چائے کا خالی کپ ٹیبل پہ رکھتے ہوئے اٹھ کھڑا ہوا۔رحم دین نے اس کی بات پہ اثبات میں سر ہلایا۔

“تم فکر نہ کرو بیٹا۔۔۔ہم یہیں ہیں۔”

ذہرہ بی بی نے ضیغم کو مطمئن کیا۔

“مسکاء کوئی بھی پریشانی والی بات ہو تو مجھے فون کر دینا۔عبداللہ یہیں ہو گا۔”

ضیغم نے اسکی جانب بغور دیکھا اور وہاں سے نکل آیا۔وہاں سے وہ سیدھا تھانے آیا۔تھانے میں کافی ہلچل محسوس ہو رہی تھی۔وہ جیپ ایک جانب پارک کر کے اندر آیا۔

“کیا بات ہے آپ سب اتنے پریشان کیوں لگ رہے ہیں۔”

انسپیکٹر عمر خان کو سر پکڑے بیٹھے دیکھ کر وہ اس کے پاس آیا۔

“سر وہ۔۔۔۔۔۔”

انسپیکٹر عمر خان اٹھ کھڑا ہوا۔ایس۔ایچ۔او طارق خان اور باقی عملہ بھی وہیں موجود تھا۔

“کیا وہ۔۔۔۔۔ کیا ہوا ہے؟ کیا بابا کے بارے میں کوئی انفارمیشن ملی ہے؟”

ضیغم نے انسپیکٹر عمر خان کی جھکے سر کو دیکھ کر پوچھا۔وہ کسی طرح کی خبر کے لئے بھی خود کو تیار کر رہا تھا۔

“نہیں سر۔۔۔۔مگر وہ۔۔۔قادر خان۔۔۔”

انسپیکٹر عمر خان نے جھکے سر کو اٹھایا۔ضیغم نے ایک گہری سانس خارج کی۔

“کیا ہوا قادر خان کو۔۔۔۔اسےڈاکٹر کو دکھانا تھا اگر طبیعت ٹھیک نہیں اسکی۔۔تم جانتے ہو نا کہ وہ کتنا اہم گواہ ہے۔”

اس کی بات سن کر انسپیکٹر عمر خان نے ایس۔ایچ۔او طارق خان کی طرف دیکھا۔اس کے چہرے پر بھی ہوائیاں اڑی ہوئی تھیں۔

“کوئی مجھے حقیقت بتائے گا بھی یا یونہی ایک دوسرے کو دیکھتے رہو گے۔”

اس نے ایس۔ایچ۔او کی جانب دیکھا۔

“سر قادر خان از نو مور۔۔”

انسپیکٹر عمر خان نے ضیغم کو قادر خان کے متعلق بتایا۔جسے سن کر وہ حیرانی سے اسے دیکھنے لگا۔

“کل تک تو ٹھیک تھا۔”

وہ پریشانی سے لاک اپ کی جانب آیا۔جہاں قادر خان لاک اپ کے باہر اسٹریچر پہ موجود تھا۔اس کے منہ سے جھاگ نکل رہی تھی۔

“یہ۔۔۔۔۔۔۔۔؟؟”

وہ فورا مڑا۔

“ناشتے میں ذہر تھا سر۔۔۔جسے کھاتے ہی اچانک اس کی حالت بگڑ گئی۔ہم نے ڈاکٹر کو بلایا مگر ڈاکٹر کے آنے سے پہلے ہی یہ دم توڑ گیا۔”

اس نے تفصیل بتائی۔

“ناشتہ کون لے کر آیا تھا۔”

وہ گرجا۔

“سر حوالدار فاروق ہی لے کر آیا تھا۔اسے بھی معلوم نہیں چلا کہ یہ سب کب اور کیسے ہوا۔”

اس کی بات سن کر وہ مٹھیاں بھینچے وہاں سے باہر آیا اور حوالدار فاروق کو آواز دی۔وہ اندر آیا تو اس کے چہرے کا رنگ بھی اڑا ہوا تھا۔

“بتاو کس کے کہنے پہ تم نے ناشتے میں ذہر ملایا تھا۔اپنے پیشے اور ملک سے غداری کرتے ہوئے تمھیں شرم نہیں آئی۔بتاو کس کے کہنے پہ کیا۔”

اس نے حوالدار فاروق سے پوچھا۔

“سر مجھے نہیں پتہ کہ یہ سب کیسے ہوا۔میرا اس میں کوئی ہاتھ نہیں سر۔۔آپ میرا یقین کریں۔”

حوالدار فاروق نے اسے یقین دلانے کی کوشش کی۔

“سر حوالدار فاروق ایک محب الوطن اور ایک فرض شناس سپاہی ہے اور مجھے یقین ہے یہ حرکت اسکی نہیں ہو سکتی۔اس کے پیچھے کوئی اور شامل ہو سکتا ہے۔”

انسپیکٹر عمر خان ضیغم کے قریب آیا۔

“اس معاملے کی چھان بین کرو۔۔مجھے وہ بندہ شام تک چاہئیے۔”

ضیغم نے ایس۔ایچ۔او طارق خان کو دیکھا۔جو اسے اپنی طرف دیکھتے پا کر نظریں پھیر گیا۔

“جو کوئی بھی اس میں ملوث ہے ڈھونڈ نکالو اسے۔”

انسپیکٹر عمر خان نے اس کی نظروں کے تعاقب میں دیکھا اور پھر ضیغم کو دیکھا۔

“میں جا رہا ہوں۔۔۔تم یہاں سنبھال لینا۔اگر یہ لوگ سمجھتے ہیں کہ قادر خان کو ختم کر کے انھوں نے جیت اپنے نام کر لی ہے تو یہ ان کی خوش فہمی ہے۔مکمل چھان بین کرو اور ہر ایک کو تفتیش میں گھسیٹو۔”

وہ عمر خان کی طرف دیکھتا باہر نکل گیا۔اس کے جاتے ہی ایس۔ایچ۔او طارق خان نے اپنے ماتھے کا نادیدہ پسینہ پونچھتے ہو دروازے کی جانب دیکھا جہاں سے ابھی وہ باہر نکلا تھا۔

_________________________________________

“کیا بنا۔۔۔۔۔؟؟”

انھوں نے مونچھوں کو تاو دیتے ہوئے فون کان سے لگایا۔

“کام ہو گیا ہے خان جی۔۔۔۔اب چت بھی ہماری اور پٹ بھی ہماری۔۔ایسی جگہ زخم لگایا ہے کہ بلبلا اٹھے گا۔”

باتور خان کی بات سن کر انھوں نے گہرا سانس لیا۔

“ہاہاہا۔۔۔شاباش!! اور زمان خان کا کیا حال ہے؟”

انھوں نے ہنستے ہوئے پوچھا۔

“بہت آرام سے۔۔۔۔۔آپ اسکی فکر نہ کریں ایسی قبر میں چھپایا ہے کہ ضیغم تو کیا اسکا باپ بھی وہاں نہیں پہنچ سکتا۔ڈھونڈ ڈھونڈ کر پاگل ہو جائے گا مگر اب قیامت کے دن ہی ملے گا اپنے منہ بولے باپ سے۔”

وہ مکروہ ہنسی ہنستے ہوئے بولا۔

“واہ۔۔۔۔لیکن ہم بہت ظلم نہیں کر رہے ہیں۔پہلے اسکے اصلی باپ کو۔۔۔۔اور اب نقلی باپ کی تیار میں ہیں۔باتور خان۔۔۔۔بڑے ظالم ہیں ہم تو۔۔۔ہمیں تو ہم سے بھی چھپ کر رہنا چاہئیے۔”

انھوں نے بھی باتور خان کا ساتھ دیا۔

“راستے میں آیا ہے تو اب بھگتے۔۔۔۔۔لیکن خان جی۔۔میں یہاں صبر نہیں کروں گا۔۔مجھے مسکاء چاہئیے۔۔اسے حاصل کیے بناء میں آرام سے نہیں بیٹھوں گا۔”

باتور خان کی لہجے میں غرور بول رہا تھا۔

“چھوڑ اسے۔۔۔۔اسکا کا کرنا ہے۔اب وہ ضیغم کی بیوی ہے۔گاوں میں لڑکیوں کا کال پڑ گیا ہے کیا۔۔؟”

انھوں نے کمرے میں داخل ہوتی ماہ گل کو دیکھا۔ماہ گل ان کے لئے ناشتہ لے کر آئی تھی۔

“ماہ گل گلاب خان سے کہو کہ گاڑی تیار کرے۔ہم شہر جائیں گے بچوں سے ملنے۔”

انھوں نے ماہ گل کو ناشتے کی ٹرے ٹیبل پہ رکھتے ہوئے دیکھ کر کہا۔وہ سر ہلاتے ہوئے واپس چلی گئیں۔وہ بیڈ سے اٹھ کر صوفے پہ آ بیٹھے اور ٹرے اپنی جانب کھینچ کر ناشتہ کرنے لگے۔فون ابھی بھی ان کے کان سے لگا ہوا تھا۔

“ہاں بول باتور خان۔۔”

انھوں چائے کا کپ لبوں سے لگایا۔

“خان جی۔۔۔۔جب تک مسکاء کو اپنے ہاتھوں سے ختم نہ کر لوں۔۔میری غیرت کو سکون نہیں آئے گا۔اپنے ہاتھوں سے اسکا گلا دباوں گا تو ہی مجھے قرار آئے گا۔بس آپ کی اجازت درکار ہے۔ضیغم بھی گاوں میں موجود نہیں ہے اچھا موقع ہے۔وہ دونوں بوڑھے میرا مقابلہ تو کرنے سے رہے۔”

باتور خان نے ان سے اجازت چاہی۔

“نہیں باتور خان۔۔۔۔ابھی نہیں۔۔۔اتنی جلدی ضیغم کو دوسرا دھچکا نہیں دینا۔ضیغم کو پتہ ہے کہ اسکا باپ گاوں میں نہیں ہے اس لئے وہ اتنی جلدی واپس نہیں آئے گا۔اس لئے لوہے کو تھوڑا اور گرم ہونے دو۔گرم لوہے کو چوٹ دینے کا مزا زیادہ آئے گا۔اس لئے تھوڑا صبر کر جاو۔میں آج شہر جا رہا ہوں اور تم بھی کچھ دن آرام کر لو۔میں واپس آ جاوں تو اگلا قدم ہم مل کر اٹھائیں گے۔”

میرسربلند خان نے لہجہ آہستہ رکھا۔

“ٹھیک ہے خان جی۔۔۔جیسے آپ کا حکم۔۔لیکن میں زیادہ انتظار نہیں کروں گا۔”

باتور خان بےصبری سے بولا۔

“او ٹھیک ہے۔۔۔ٹھیک ہے۔۔کر لینا جو کرنا ہو۔۔اللہ حافظ۔۔!”

انھوں نے یہ کہہ کر فون بند کر دیا اور ناشتہ کرنے لگے۔

جاری ہے۔۔۔