Rabba Qismat Mein Rona Kun Likha by Ayat Noor NovelR50716 Rabba Qismat Mein Rona Kun Likha by Ayat Noor Episode 23,24

وہ سونا کے کمرے سے نکل کر ٹیرس پر آ گیا تھا… فیصلہ کر تو لیا تھا… لیکن اس پر عمل کرنا آسان نہیں تھا اس کے لیے… دل میں کہیں درد سا اٹھنے لگا تھا… عجیب سی بے چینی تھی… اضطراب تھا… اسے گھٹن سی ہو رہی تھی… بے بس سا ہو کر وہ اپنا سینا مسلنے لگا… گہرے گہرے سانس لے کر اندر کے حبس اور اضطراب کو کم کرنا چاہا… سختی سے آنکھیں میچیں اور پھر کھولیں… ریلنگ پر دونوں ہاتھ ٹکاۓ وہ سر جھکاۓ کھڑا تھا… اپنی ذندگی کی تلخیوں کو سوچتا… پھر سگریٹ اور لائیٹر نکالا… سگریٹ کو منہ میں دبایا اور لائٹر کو جلا کر شعلہ سا سگریٹ کے قریب کیا… سگریٹ جل اٹھی تھی…. ہلکا سا دھواں اٹھا تھا اس میں اور پھر وہ آہستہ آہستہ راکھ بننے لگی تھی… شاہ نے سگریٹ کے چند کش لیے تھے… لیکن آج سگریٹ بھی ناکام رہی تھی اس کی بے چینی کو ختم کرنے میں… طیش میں آ کر سگریٹ کو منہ سے نکالا اور دور پھینک دیا… بہت دور… غصہ آ رہا تھا اسے… فرسٹریشن سی تھی… نہ جانے کیوں… بے بسی سے سر کو دونوں ہاتھوں میں تھاما… کنپٹی کو مسلا… لیکن حالت میں کوئ فرق نہ آیا تھا… وہ وہاں سے ہٹ گیا… ٹیرس سے وہ اپنے روم میں آیا… شاور کے نیچے جا کھڑا ہوا… ٹھنڈے پانی نے اس کے وجود کو بھگو دیا تھا… اضطراب کچھ کم ہوا تھا… کافی دیر بعد وہ شاور لے کر باہر آیا… ٹاول سے بال خشک کرتا آئینے کے سامنے آ کھڑا ہوا…گرین ٹراؤزر پر سفید بنیان پہنے خوبصورت سا نوجوان… آئینے میں دکھتے عکس پر نظر جما کر وہ برش پکڑنے لگا تھا جب اس کے ہاتھ تھم سے گۓ… کوئ سوچ ابھری تھی ذہن میں… “میں… کیسے بتاؤں گا صبح اسے… اپنے اس فیصلے کے بارے میں… ” آئینے میں دیکھتے ہوۓ اس نے خود سے ہی سوال کیا تھا… “کیا… کیا ردعمل ہو گا اس کا… کیسے ہوں گے اس کے چہرے کے تاثرات…” وہ اٹک اٹک کر بول رہا تھا… جیسے بولنے میں تکلیف کا سامنا ہو… “کیا میرا فیصلہ درست ہے… کیا میں یہ سب کر پاؤں گا.. ” ان گنت سوال تھے اس کے ذہن میں… لیکن جواب ندارد… بے بسی سے آنکھیں بند کی تھیں.. پھر جب آنکھیں کھولیں تو اسے آئینے میں اپنا آپ نظر آیا تھا… سفید لباس میں…جس کی نظروں میں تمسخر تھا… وہ حیران سا اسے دیکھے گیا… ” خود کو جھوٹی دلیلیں اور تسلیاں دے رہے ہو… تا کہ اپنا کیا گیا فیصلہ بدل سکو…” طنزیہ کہا گیا تھا… شاہ نے بے بسی سے اس عکس کی جانب دیکھا… “مم… میں… نہیں رہ سکتا اس کے بغیر…” آواز میں لرزش تھی… عکس نے قہقہہ لگایا تھا اس کی بات پر… “تو کیا اس کے ساتھ رہ سکتے ہو…¿¿¿” مذاق اڑاتا انداز… شاہ کو ناگوار محسوس ہوا… لیکن برداشت کر گیا… آج ضمیر کی عدالت لگی تھی.. اور اس نے خود اپنے آپ کو ہی کٹہرے میں لا کھڑا کیا تھا… کچھ کہنے کے لیے الفاظ ڈھونڈنے چاہے لیکن آج سارے لفظ روٹھ گۓ تھے… وہ بے بس سا سر جھکا گیا… “تم نے جو فیصلہ کیا وہ بالکل ٹھیک ہے… بخش دو اس لڑکی کو… آزاد کر دو اسے… وہ واپس چلی جاۓ گی… اپنی ذندگی کو پھر سے شروع کرے گی… نۓ سرے سے… نۓ انداز میں… تم کون ہوتے ہو بدلہ لینے والے… بدلہ لینے کا اختیار تو اس پاک ذات کا ہے نا… تو پھر… تم کیوں خدا بنے بیٹھے ہو اس زمین پر… کیوں تکالیف دیتے ہو اس لڑکی کو… ” سخت لہجے میں سوال کیا گیا تھا… “لل… لیکن… مجھے عادت سی ہو گئ ہے اس کی… اسے دیکھے بغیر سکون نہیں ملتا…اس کے بغیر جینے کا سوچتا ہوں تو سانس رکنے لگتی ہے…” شاہ منمنایا تھا… ایک کمزور سی دلیل دی تھی اپنے اس رشتے کو برقرار رکھنے کی… “عادت…¿¿¿ کس عادت کی بات کرتے ہو تم… تمہیں تو یہ عادت بھی ہو گئ ہے کہ ہر پل اسے تکلیف دو… اذیت دو… کیا کچھ نہیں سہا اس نے تمہاری وجہ سے… تم اسے خوش نہیں رکھ سکتے شاہزیب سکندر… کیونکہ تم خود ٹوٹے ہوۓ ہو… اور ایک ٹوٹا ہوا شخص جو خود اپنا آپ گنوا چکا ہو وہ کسی کو کیا دے سکتا ہے…” طنزیہ کرخت لہجے میں بازپرس کی جا رہی تھی… وہ لاجواب ہوا… کچھ تھا ہی نہیں کہنے کو… “تم اس کے ساتھ رہو گے تو اسے دیکھ دیکھ کر اذیت میں مبتلا رہو گے… بھول نہیں پاؤ گے ماضی کو… گزرا کل ہر پل ڈستا رہے گا تمہیں… اور پھر تم غصے میں آ کر اسے بھی تکلیف دو گے… اور خود بھی اذیت کا شکار رہو گے…. چھوڑ دو اسے… تمہیں تو جلنا ہی اس نارسائ کی آگ میں… تاعمر جلنا ہے… تو پھراسے کیوں جلا رہے ہو ساتھ… اس نے تمہارے ساتھ جو کیا اس کا فیصلہ خدا پر چھوڑ دو… اور اسے اس کی زندگی جینے دو… آزاد کر دو اسے… کہ اسی میں تمہاری اور اس کی بھلائ ہے… ” بے دردی سے کہا گیا تھا… شاہ سر جھکاۓ لب کاٹتا رہا… پھر سر اٹھا کر دیکھا… وہ عکس غائب ہو چکا تھا… شاہ نے متلاشی نظروں سے اردگرد دیکھا…. پھر آئینے میں خود کو… سرخ آنکھیں اپنے چہرے پر گاڑ دیں… چہرے سے کچھ دیر پہلے کی بے بسی ختم ہوئ تھی… سختی سی ابھری تھے اور ہونٹ بھنچ گۓ تھے… بالآخر آج آخری فیصلہ ہو گیا تھا… دل جو اس رشتے کو برقرار رکھنا چاہتا تھا وہ آج ہار گیا تھا… دماغ کے سامنے… ضمیر کے سامنے

••••••

صبح ناشتے کی ٹیبل پر موجود تھا وہ….نک سک سے تیار… چہرہ بے تاثر… رات والا شاہ کہیں غائب ہو چکا تھا… جو ٹوٹ کر بکھرا تھا… جو بے بس سا تھا… یہ شاہ کوئ اور تھا… سپاٹ چہرہ لیا… جسے دیکھ کر کوئ اندازہ نہیں لگا سکتا تھا کہ اس کے دل میں کیا چل رہا ہے… سونا ابھی تک نہیں آئ تھی ٹیبل پر… شاہ ملازم کو بھیجنے ہی والا تھا اسے بلانے جب وہ سیڑھیاں اترتی دکھائ دی… بلیک اور وائٹ امتزاج کے نفیس سے سوٹ میں ملبوس… ہلکے میک اپ میں, لمبے باک پشت پر بکھراۓ چمکتا چہرہ لیے وہ ڈائننگ ہال میں داخل ہوئ… خوشی اور سرشاری اس کے ہر ہر انداز سے واضح تھی… فریش سی وہ لڑکی… تازہ گلاب جیسی لگ رہی تھی… شاید شاہ کے رات کے بی ہیوئیر سے وہ خوش تھی… شاہ نے ایک بے تاثر سی نگاہ اس پر ڈالی اور پھر سر جھکا کر ناشتے کی جانب متوجہ ہوا… چہرہ ابھی بھی سرد سا تھا… “اسلام و علیکم… گڈ مارننگ…” کھنکتی آواز میں سونا نے کہا تھا اور کرسی کھینچ کر بیٹھ گئ… “مارننگ…” یک لفظی جواب دیا گیا تھا… دیکھنے سے احتراز برتا… آج سے پہلے سونا کو کبھی اتنا خوش نہیں دیکھا تھا اس نے… وہ ناشتہ کرتے ہوۓ سوچ رہا تھا… سونا بھی ناشتے کی جانب متوجہ ہوئ… ہونٹوں پر خوبصورت سی مسکان سجی تھی… آنکھیں ستاروں کی مانند چمک رہی تھیں… جیسے دنیا فتح کر لی ہو اس نے… ناشتے کے اختتام پر شاہ نے گلا کھنکارا… جیسے کچھ کہنا چاہا ہو… سونا نے نظریں اٹھا کر اس کی جانب دیکھا… “تم سے ایک بات کرنا تھی…” بے تاثر لہجے میں مخاطب کیا گیا… سونا نے سوالیہ انداز میں ابرو اچکاۓ… ساتھ ہی نوالہ منہ میں رکھا… شاہ نے ابھی بھی سامنے موجود پلیٹ کو ہی دیکھ رہا تھا… اس کی جانب دیکھنے کی ہمت نہ تھی… کہ اسے دیکھنے کے بعد دل اختیار میں ہی کب رہتا تھا .. اور وہ اپنے ارادے سے ڈگمگانہ نہیں چاہتا تھا… سونا اس کے بولنے کا انتظار کر رہی تھی….ہونٹوں پر مسکراہٹ لیے… بے فکری سے… لیکن وہ کسی سوچ میں گم لگتا تھا… پھر گہری سانس بھری… ” تم اچھی طرح سے جانتی ہو کہ ہمارے اس رشتے کی کوئ اصلیت نہیں… یہ شادی پیپر میرج کے سوا اور کوئ حیثیت نہیں رکھتی… ” شاہ نے تمہید باندھی تھی اپنی بات کہنے کے لیے… سونا کا دل دھڑکا تھا اس کی بات پر… وہ منتظر سی اسے دیکھے گئ…شاید شاہ اب اس کے اور اپنے اس رشتے کو نارمل میاں بیوی کے رشتے جیسا روپ دینا چاہتا ہے… اپنی اور اس کی زندگی کو نارمل کرنا چاہتا ہے…. اسے اس کا مقام دینا چاہتا ہے… وہ مقام,وہ عزت جو ہر بیوی کی ہوتی ہے اس کے شوہر کے لیے… وہ حسین خیالات میں کھوئ تھی… شاہ نے اس کے چہرے پر اترتے خوبصورت رنگوں سے نظریں چرائیں… اگلی بات کہنے کے لیے بہت ہمت کی ضرورت تھی… کبھی بھی آسان نہیں ہوتا خود اپنے وجود کو ٹکڑوں میں تقسیم کر دینا… خود کو ریزہ ریزہ کر دینا… اپنے ہی فیصلوں سے روح کو فنا کر دینا… خود کو ذخم دینا… “اس لیے… ” وہ اٹکا تھا… دل نے اودھم مچایا تھا… دہائیاں دی تھیں کہ وہ آگے کچھ نہ بولے… لیکن اس نے… شاہ نے دل کی ہر پکار کو نظر انداز کر دیا… اس کی آہوں, سسکیوں کا گلہ گھونٹ دیا… “اس لیے میں نے فیصلہ کیا ہے کہ میں تمہیں آزاد کر دوں… تمہیں ڈائیوورس دے دوں… تم پاکستان چلی جانا… اپنی مرضی سے اپنی ذندگی گزارنا… میں تمہیں مزید خود سے باندھ کر نہیں رکھنا چاہتا…” تیزی سے کہہ گیا تھا وہ… آنکھوں میں آئ نمی کو پیچھے دھکیلا… کہ اس کے سامنے وہ کمزور نہیں پڑنا چاہتا تھا… ضبط سے چہرہ سرخ ہو رہا تھا… جبکہ سونا…. وہ بے یقین سی بیٹھی تھی وہاں… چمچ ہاتھ سے چھوٹ گیا تھا…. اسے لگا اس نے کچھ غلط سنا ہے .. اب تو… اب تو سب ٹھیک ہونے جا رہا تھا… اس نے کتنے حسین خواب سجا لیے تھے رات سے لے کر اب تک… اور … یہ… یہ کیا کہہ گیا تھا شاہ… پھٹی پھٹی نظروں سے شاہ کو دیکھتی وہ لڑکی کوئ مجسمہ معلوم ہو رہی تھی…. شاہ میں مزید سکت نہیں تھی اس کا سامنا کرنے کی… اس لیے ہاتھ صاف کرتا اٹھ کھڑا ہوا… اس کی طرف دیکھے بغیر وہ وہاں سے نکل گیا تھا آفس کے لیے…. جاتے وقت ہاتھوں کی مٹھیاں بھینچ رکھی تھیں… قدم من من بھر کے ہو رہے تھے لیکن وہ یہاں سے جلد سے جلد نکل جانا چاہتا تھا.

•••••••

سونا کو جب یقین آیا تو وہ لب بھینچ گئ تھی… اس شخص نے قسم کھا رکھی ہے شاید کے ہر پل مجھے تکلیف دے گا… جب جب میں کچھ اچھا سوچتی ہوں… جب جب کچھ خواب بنتی ہوں تب تب یہ میرے خوابوں کو چکنا چور کر دیتا ہے… لیکن اب بس… بہت ہو گیا… میں نے بھی بہت رو لیا… بہت گڑگڑا لیا… اپنی صفائ پیش کر لی… خود کو… اپنی انا کو اس کے قدموں میں رول دیا… لیکن اب بس… مزید نہیں… مجھے اپنی عزت نفس عزیز ہے… اور اب میں اس کے سامنے نہیں روؤں گی.. کمزور نہیں پڑوں گی… ٹھیک ہے… کرے جو اس کا دل چاہے… میں بھی دیکھتی ہوں کہ مجھے اذیت دینے کی خاطر وہ کس حد تک جاتا ہے… اس کے مظالم کی انتہا کیا ہے… ” وہ بہتے آنسوؤں کو بے دردی سے رگڑتی اٹھی تھی… لب سختی سے بھینچ لیے تھے جیسے اب کبھی نہ کھولنے کا ارادہ ہو… تیزی سے سیڑھیاں چڑھتی وہ اپنے روم میں آگئ تھی… زور سے دروازہ بند کر دیا تھا… جیسے اس دنیا سے ہی اپنا تعلق ختم کر لینا چاہتی ہو….

•••••••

بہت سے دن ایسے ہی گزر گۓ… سونا خاموش ہو گئ تھی… بالکل خاموش… شاہ لاشعوری طور پر منتظر سا تھا کہ وہ اسے کوئ تو جواب دے گی… یہ کہے گی کہ وہ اسے خود سے جدا نہ کرے… یا یہی کہہ دے کہ ٹھیک ہے دے دیں ڈائیوورس…اور پاکستان بھیج دین مجھے… لیکن اس کا اندازی, اس کی امید غلط ثابت ہوئ تھی… وہ کچھ بھی تو نہ کہہ رہی تھی… کوئ گلہ شکوہ بھی نہیں… اس کے سامنے آنے سے کتراتی بھی نہ تھی… بس خاموشی سےصبح اس کے ساتھ ناشتہ کر لیا… شام کو ایک ہی ٹیبل پر اس کے ساتھ ڈنر کر لیا… اتنا سا تعلق رہ گیا تھا ان دونوں کے درمیان…. شاہ اس کے چہرے کو دیکھتا لیکن اس کا چہرہ بالکل بے تاثر ہوتا… یوں جیسےکوئ بات ہی نہ ہوئ ہو… اس کے تاثرات سے شاہ کے لیے اس کے دل کی بات جاننا مشکل ہو گیا تھا… وہ خود بھی مخاطب نہ کرتا تھا اسے… جب کہنے کو کچھ بچا ہی نہیں تو اسے مخاطب کر کے کیا کرتا… لیکن سونا کی خاموشی اسے الجھن میں ضرور ڈال گئ تھی…

••••••

یہ کچھ دن بعد کا ذکر ہے… شاہ اس دن آفس نہیں گیا تھا… طبیعت کچھ ٹھیک نہیں تھی اس لیے آج وہ گھر میں ہی تھا… باہر زور و شور سے بارش برس رہی تھی… دوپہر کا وقت تھا لیکن گہرے بادلوں کی وجہ سے شام کا سا سماں تھا… ایسے میں وہ دونوں ہی ایک دوسرے سے بے خبر اپنے اپنے روم کی کھڑکی میں کھڑے تھے… بے مقصد باہر دیکھتے… ذہنی کشمکش میں مبتلا… دونوں اس وقت ایک سے حالات سے گزر رہے تھے… پریشان, دکھی… لیکن ایک دوسرے پر ظاہر نہیں کر رہے تھے… شاہ کا موبائیل بجنے لگا… اس نے کال ریسیو کی تھی… دوسری جانب سے کچھ کہا گیا تھا…. “اوکے” سرد سی آواز میں کہہ کر شاہ نے فون بند کر دیا… رگیں تن گئ تھیں… ایک دم دل بے چین ہو گیا تھا…. غصہ آنے لگا تھا… خود پر…. ساری دنیا پر… ہر چیز کو آگ لگا دینے کو دل چاہ رہا تھا… بے بسی سے اس نے فون دیوار میں دے مارا… موبائیل دیوار سے ٹکرا کر بکھر گیا تھا… شاہ نے اذیت سے بالوں کو جکڑا… کچھ دیر پہلے وکیل کا فون تھا… ڈائیوورس پیپرز تیار ہو چکے تھے… یہی بتانے کے لیے کال کی تھی اس نے… نہ جانے یہ سن کر وہ اپ سیٹ کیوں ہوا تھا… جبکہ یہ فیصلہ بھی اس کا اپنا ہی تو تھا… پھر اتنا درد کیوں ہو رہا تھا آج…. جب سوچ ہی لیا ہے کہ خود کو اس سے دور کر لینا ہے تو پھر اب یہ سب کیوں… یہ اذیت, یہ دکھ کیوں… وہ بے بسی سے چلایا تھا… موبائیل توڑ کر بھی غصہ ٹھنڈا نہیں ہوا تو کمرے کی چیزیں اٹھا اٹھا کر فرش پر مارنے لگا… دیواروں پر لگی پینٹنگز… گلدان… شیشے کا میز… سب ٹوٹ گیا… کانچ ادھر سے ادھر پورے کمرے میں بکھرچکا تھا… اتنا سب توڑنے کے بعد بھی سکون نصیب نہیں ہوا… تبھی اس کی نگاہ سامنے ٹیبل پر پڑی… وہاں کچھ رکھا تھا… وہ کانچ کو اپنے قدموں تلے مزید توڑتا ہوا اس ٹیبل تک آیا… اور وہ چیز اٹھائ… وہ کوئ ڈسک تھی… ان کی شادی کی مووی… جب اس کی اور سونا کی شادی ہوئ تھی پاکستان میں تب یہ مووی بنائ گئ تھی… شاہ نے سرخ آنکھوں سے اس ڈسک کے ڈبے پر موجود تصویروں کو دیکھا… اس کی اور سونا کی ایک ساتھ لی گئ تین سے چار تصویریں تھیں جو اس کے اوپر کے کور پہ پرنٹ کی گئ تھیں…”جب تم ہی نہیں رہو گی میری زندگی میں تو اس مووی کو میں کیا کروں گا…”تلخی سے کہا تھا…اس کی گرفت مضبوط ہوئ تھی اس ڈسک پر… تیز قدموں سے چلتا ہوا وہ کھڑکی تک آیا تھا… اور اپنی پوری قوت لگا کر اس ڈسک کو پھینکا تھا باہر… جتنی دور وہ پھینک سکتا تھا اتنی دور… سونا جو شور کی آواز سن کر ننگے پیر ہی اس کے کمرے کی طرف آئ تھی… کمرے کے دروازے پر ہی رک گئ… وہ شاہ کے ہاتھ میں مووی کی ڈسک دیکھ چکی تھی اور نفرت سے اسکا وہ ڈسک پھینکنا بھی… “تو… کیا اتنی نفرت کرتا ہے وہ اس سے… کہ اس کی اور اپنی شادی کی مووی کی ڈسک بھی اپنے روم میں برداشت نہیں کر سکتا…” اس نے اپنی سانس رکتی محسوس کی تھی… سینے جلتا ہوا محسوس ہوا تھا… کوئ ابال سا اٹھا تھا ایک دم… وہ خونخوار انداز میں اس کی جانب بڑھی تھی… پیروں میں کانچ کے ٹکڑے گھسے تھے… اس کے سفید پیروں سے خون نکل کر فرش کو رنگین کر رہا تھا لیکن وہاں پرواہ کسے تھی… یہ تکلیف تو بہت چھوٹی تھی اس تکلیف کے سامنے جو ابھی شاہ کی اس حرکت نے اسے پہنچائ تھی…. اس کے نزدیک جا کر غصے سے اسکا بازو تھام کر اسے کھینچا اور اس کا رخ اپنی جانب کیا تھا… شاہ جو اس کی موجودگی سے بے خبر تھا ایک دم لڑکھڑایا… سونا اس کا گریبان تھام چکی تھی… سلگتی, ضبط سے گلابی ہوتی آنکھیں اس کے چہرے پر گاڑ دی تھیں…

“کیا سمجھتے ہیں آپ خود کو.. ہاں… کیا سمجھتے ہیں… کوئ خدا ہیں آپ… جب چاہا دوسروں کو اپنی زندگی میں شامل کر لیا… جب چاہا زندگی سے نکال پھینکا… جب چاہا محبت کی بھیک دے دی.. جب چاہا نفرت کرنے لگ گۓ… جب دل کیا اپنا لیا جب دل کیا ٹھکرا دیا… دوسروں کو بپا وجہ سزائیں دیں… پھر ان سے معافی مانگ لی… کیا ہیں آپ… ذرا خوف نہیں أتا أپ کا… اس رب سے… آپ کو کیا لگتا ہے میں انسان نہیں ہوں… میرے سینے میں دل نہیں ہے… کوئ موم کی گڑیا ہوں جسے آپ نے جب چاہا اپنی مرضی کے مطابق ڈھال لیا…. اپنی مرضی کا رخ دے لیا… کیا سمجھتے ہیں آپ کہ آپ کوئ بھی حکم چلائیں گے مجھ پر… کوئ بھی ظلم کریں گے اور میں چپ چاپ برداشت کر لوں گی… نہیں شاہزیب سکندر… اب نہیں… میں آپ کی زندگی سے کہیں نہیں جاؤں گی… یہیں رہوں گی… اس گھر میں… اور آپ کی زندگی میں…. میں بھی دیکھتی ہوں کہ کیسے نکالتے ہیں آپ مجھے اپنے زندگی سے…” وہ مضبوط لہجے میں بول رہی تھی…پچھلے سب دنوں کی فرسٹریشن آج نکال لی تھی اس نے… جبکہ شاہ… وہ تو حیران سا کھڑا اس کا یہ روپ دیکھ رہا تھا… وہ جو اتنا کچھ ہونے پر بھی کبھی نہ چلائ تھی آج ایک معمولی سی ڈسک پھینک دینے پر اتنے غصے میں کیوں آئ آخر… اتنی دیوانگی تھی اس کے لہجے میں…وہ سوچ رہا تھا… نہیں جانتا تھا کہ ہر وہ چیز جو شاہ سے جڑی تھی وہ اس نازک لڑکی کے لیے بہت اہمیت رکھتی تھی… جان سے زیادہ عزیز تھی اسے… اگر اس سے جڑی چیزوں کو وہ اتنی اہمیت دیتی تھی تو شاہ کا کیا مقام ہو گا اس کے دل میں… اس بات سے بے خبر تھا وہ..حیرت سے بھری نظریں اس جگہ جمی تھیں جہاں سے کچھ دیر قبل وہ آندھی طوفان کی طرح گئ تھی… فرش اس کے پیروں سے نکلنے والے خون سے جگہ جگہ سے سرخ ہو رہا تھا… شاہ نے گردن موڑ کر کھڑکی کے پار دیکھا… وہ ویسے ہی ننگے اور زخمی پاؤں لیے لان میں آگے بڑھ رہی تھی… بارش تیز ہونے کی وجہ سے وہ مکمل طور پر بھیگ چکی تھی لیکن اسے پرواہ ہی نہیں تھی… کافی آگے جا کر اسے وہ ڈسک مل گئ تھی… بھیگی آنکھوں سے ڈسک پر موجود اپنی اور شاہ کی تصویر کو دیکھا جس پر پانی کے قطرے تھے… پھر اسے اپنے دوپٹے کے نیچے کرتی وہ واپس ہوئی۔

Episode 24