Rabba Qismat Mein Rona Kun Likha by Ayat Noor NovelR50716 Rabba Qismat Mein Rona Kun Likha by Ayat Noor Episode 17,18

وہ بے دم سی کارپٹ پر گری سسک رہی تھی.. تکلیف حد سے سوا تھی..

اس کی سسکیاں بیڈ پر دراز شاہزیب سکندر کے دماغ پر ہتھوڑوں کی طرح برس رہی تھیں..

وہ اشتعال میں اٹھا.. نفرت بھری نگاہ اس کے وجود پر ڈالی اور ملحقہ سٹڈی کی طرف بڑھ کر دروازہ مقفل کر لیا.. وہ تنہا رہ گئ.. اکیلی.. بالکل.. شادی کی اس پہلی رات..

رات گزر رہی تھی..

وہ رو رو کر تھک چکی تھی… اپنی قسمت پر… اپنے نصیب کے اس کھیل پر…زمین پر دوپٹے سے بے نیاز بیٹھی اس لڑکی کی حالت قابل رحم تھی… دوپٹا کچھ فاصلے پر نیچے گرا تھا… دوپٹا کھینچ کر اتارنے کی وجہ سے بال بکھر چکے تھے… رو رو کر آنکھیں سوجی ہوئ تھیں… سرخ ڈورے سے تیر رہے تھے آنکھوں میں… میک اپ سارا خراب ہو چکا تھا… چہرے پر آنسوؤں کے نشانات تھے… اسے دیکھ کر کون کہہ سکتا تھا کہ یہ پہلے دن کی دلہن ہے…

دل پھٹ رہا تھا… گردن کے جلے ہوۓ ذخم اذیت دے رہے تھے… وہ سر گھٹنوں میں دیئے ابھی بھی سسک رہی تھی… غم بہت بڑا تھا… برداشت کرنے کے لیے صبر چاہئے تھا… اور صبر تو آہستہ أہستہ ہی آتا ہے نا…

دور کہیں فجر کی اذان ہو رہی تھی… اللہ پاک اپنے بندوں کو بلا رہا تھا اپنی طرف… اپنے سامنے حاضری دینے کو… سونا نے سر اٹھایا. کانپتے ہاتھوں سے آنسوؤں کو صاف کیا… دیوار کا سہارا لے کر اٹھی… مسلسل ایک ہی رخ پر بیٹھے رہنے کی وجہ سے اٹھنے میں بھی تکلیف کا سامنا کرنا پڑ رہا تھا… وہ لڑکھڑائ تھی ایک دم… “بابا…” اس تکلیف دہ لمحے میں اس نے اپنے بابا کو پکارا تھا… جو ہمیشہ اس کا سہارا بنے تھے… جنہوں نے پھول سے بھی زیادہ نزاکت سے اسے رکھا تھا کسی آبگینے کی طرح… اور اپنی لاڈلی بیٹی کی حفاظت کا ذمہ اب شاہ ہو سونپا تھا… بے خبر تھے کہ جسے انہوں نے اپنی بیٹی سونپی ہے… اس نے بجاۓ اس کی حفاظت کرنے کے اس کے سر سے چادر ہی کھینچ دی تھی… اسے کڑی دھوپ میں کھڑا کر دیا تھا لا کر…. سونا کو لگا وہ اس وقت تپتے صحرا میں کھڑی ہے… جہاں گرم ریت ہے اور وہ آبلہ پا… ننگے پاؤں… دور دور تک کوئ سایہ نہیں ہے جہاں وہ پناہ لے پاۓ…

دیوار کا سہارا لے کر وہ کھڑی ہوئ… سر چکرا رہا تھا… اس نے سر کو جھٹکنا چاہا… پھر لڑکھڑاتے قدموں سے واشروم کی جانب بڑھی… آئینے کے سامنے کھڑی ہو کر اپنا حلیہ دیکھا… آنکھوں سے پھر سے پانی بہنے لگا تھا… وہ جس کی نفاست کی لوگ مثالیں دیتے تھے… جو ہمیشہ نک سک سے تیار رہتی تھی… أج کیا حال کر دیا تھا تقدیر نے اس کا… وہ سنبھل ہی نہ پا رہی تھی اس جھٹکے سے… سہارے کے کیے بیسن کو تھاما تھا… نل کھول کر پانی کے چھینٹے منہ پر مارے… دوبارہ آئینے میں دیکھا… گردن پر نظر پڑی تھی… چھوٹے چھوٹے سرخی مائل نشان گوری جلد پر… سگریٹ سے جلاۓ جانے کے نشان… اس نے روتے ہوۓ آئینے سے نظر ہٹا لی… بغیر کسی قصور کے اسے سزا ملی تھی أج… اور شاید اب یہ سزا ساری ذندگی کے لیے اس کے نصیب میں لکھ دی جا چکی تھی… اس نے چہرے کو دونوں ہاتھوں سے سختی سے رگڑا… سارا میک اپ صاف کر کے بالوں سے پنز نکالیں… سیاہ ریشمی بال پشت پر بکھر گۓ تھے… دوبارہ اس نے آئینے کی طرف نہیں دیکھا… شاور لے کر کپڑے تبدیل کیے…وضو کیا… جاۓ نماز اسے ایک کیبنٹ سے مل گئ تھی… اور نماز کے لیے نیت باندھ لی… بے شک دلوں کا سکون تو اس پاک ذات کے ذکر میں ہی ہے… نماز کے دوران بھی بار بار آنکھیں بھیگ رہی تھی… أنکھوں میں جلن ہو رہی تھی… لیکن اس نے ضبط کر لیا… دھیان نماز میں لگانے کی کوشش کی… اور اس کے بے چین دل کو قرار آنے لگا… دعا کے لیے ہاتھ اٹھا اٹھاۓ تو دماغ بالکل خالی ہو گیا… سمجھ میں ہی نہیں آیا کہ کیا مانگے… کچھ رہا ہی نہیں تھا مانگنے کو… بہت دیر تک خالی نگاہوں سے مہندی لگی ہتھیلیوں کو تکتی رہی… کوئ گلہ, کوئ شکوہ کچھ بھی لبوں پر نہیں آیا تھا… اور ایسا پہلی بار ہوا تھا.. ورنہ وہ اپنے رب سے بہت سی باتیں کیا کرتی تھی… رازونیاز کرتی… لیکن آج… جب بہت دیر تک کچھ بھی نہ سوجھا تو اس نے ہاتھ چہرے پر پھیر کر دعا مکمل کی…

اور یک ٹک سامنے دیکھنے لگی..

“وہ مجھ سے اتنی نفرت کیوں کرتے ہیں اللہ.. میں نے کسی کا کیا بگاڑا.. اللہ! میں نے تو جب سے ان کو پہلی بار دیکھا بس ان سے محبت ہی کی. ان کو چاہا.. ان کے لیے پاک جذبات ہی پیدا ہوۓ.. پھر میری محبت کے جواب میں اتنی نفرت کیوں دے رہے ہیں وہ مجھے.. اللہ.. ان کو بتائیں نہ کہ سونا ان سے بہت محبت کرتی ہے.. اس دن سے جب ان کو پہلی بار دیکھا.. ان کی آنکھوں سے.. سونا نے ساری زندگی کسی کو نہیں دیکھا… وہ سونا کی زندگی میں پہلے انسان ہیں… آپ تو جانتے ہیں نا سب.. ان کو بتائیں نا سب… اگر انہوں نے مجھ سے نفرت کرنی تھی تو اللہ اس دن مہندی کی اس رات وہ میرے سامنے ہی نہ آتے.. نہ ان کو دیکھتی.. نہ سوچتی… نہ چاہتی. نہ میری محبت پامال ہوتی.. نارسائ میری قسمت ٹھہرتی.. ان سے کہیں نا مجھے نفرتیں نہ دیں… کیوں دے رہے ہیں یہ نفرتیں مجھے… “

بہت دیر تک وہیں بیٹھی رہی… جاۓ نماز پر… دیوار سے ٹیک لگاۓ… خالی آنکھوں, خالی دماغ سے… اب تو أنسو بھی نہیں أ رہے تھے… آنکھیں تھک چکی تھیں رو رو کر… مزید ہمت ہی نہ تھی رونے کی… اس نے دوبارہ ہاتھوں کو دیکھا… دائیں ہتھیلی پر ڈیزائین کے اندر چھپا کر مہندی سے شاہزیب کا نام لکھا تھا… کہ پہلی رات دلہا دلہن ہے ہاتھوں پر اپنا نام ڈھونڈتا تھا… اور اس حوالے سے بھی چاروں دوستوں نے اسے خوب چھیڑا تھا… سونا نے کرب سے آنکھیں بند کیں… سر دیوار کے ساتھ ٹکا دیا… ایک آنسو چپکے سے پھسلتا ہوا گال پہ بہہ گیا… کیا کرے وہ… صبح سب لوگ اس سے سوال کریں گے… کیا جواب دے گی انہیں… کیسے اپنے آنسوؤں کو روک پاۓ گی ان کے سامنے… بابا… کیا وہ انہیں بتا دے سب… جو اس پر بیتی… نہیں نہیں.. اگر انہیں پتا چلا کہ ان کی گڑیا نے یہ رات کس اذیت میں کاٹی ہے وہ تو جیتے جی مر جائیں گے… سب رشتے ختم کر لیں گے اس حویلی کے مکینوں سے… وہ انہیں نہیں بتا سکتی… کبھی نہیں… تو کیا کرے… کس کو اپنے دل کا حال سناۓ… کس سے اپنا سکھ شئیر کرے… وہ ٹوٹ کر بکھری تھی… اور ایسا کوئ بھی تو نہ تھا جو اسے سمیٹ سکتا… ریزہ ریزہ چن سکتا… نہیں… اسے اب کسی سے بھی کوئ امید نہیں رکھنی… کسی سے کچھ نہیں کہنا… کچھ نہیں بتانا… بس ہر بات,ہر درد اپنے دل میں دفن کر دی گی وہ…اگر اس کے نصیب میں یہی لکھا ہے تو اسے وہ قبول کر لے گی… ساری ذندگی بھی گزارنی پڑی اس تکلیف میں تو گزار لے گی… لیکن اپنے بابا کے لیے کسی تکلیف کا باعث نہیں بنے گی… انہیں پریشان نہیں کرے گی وہ…

سونا نے آنسو پونچھے… “تو طے ہوا أج… کہ میری ذندگی میں رشتوں کی کمی ہی رہے گی… نارسائ ہی میرا مقدر ٹھہری… سونا.. تیار ہر جاؤ… منافقت بھری زندگی گزارنے کے لیے… دل میں ڈھیروں درد لیے ہونٹوں پر مسکان سجانے کے لیے… بے گناہ ہو کر بھی سزا بھگتنے کے لیے…” وہ اٹھ کھڑی ہوئ تھی… ایک فیصلہ کیا تھا اس نے.. اور اسے ہر قیمت پر اس فیصلے کو نبھانا تھا… جاۓ نماز تہہ کر کے رکھ کر اس نے حجاب کھول کر دوپٹے کو شانوں پر پھیلایا… پھر اسٹڈی روم کی طرف بڑھی… دروازہ کھولا… تو نظر سامنے شاہ پر پڑی… وہ بھی نیچے بیٹھا تھا… بے حال سا… ایک طرف پڑے صوفہ سے ٹیک لگاۓ… نظریں جھکاۓ… سگریٹ پھونک رہا تھا… پاس پی ایش ٹرے پڑی تھی جس میں موجود راکھ کو دیکھ کر اندازہ لگایا جا سکتا تھا کہ وہ ساری رات سگریٹ پی کر ہی اپنا دل جلاتا رہا ہے… سونا کو تککیف دے کر… وہ خود بھی پرسکون نہیں رہا تھا… خود بھی اذیت سے گزرا تھا وہ… دروازہ کھلنے کی آواز پر اس نے نظریں اٹھا کر سامنے دیکھا… سونا دنگ سی اس کی حالت دیکھ رہی تھی… کچھ کہنے کو اس کے لب پھڑپھڑاۓ تھے لیکن پھر وہ خاموش ہو گئ تھی… بے شک اس شخص نے رات اس کے سبھی خوابوں کو چکنا چور کر دیا تھا پھر بھی اسے تکلیف ہوئ تھی شاہ کو اس حال میں دیکھ کر… وہ کبھی اسے ایسا ٹوٹا ہوا نہیں دیکھنا چاہتی تھی… شاہ نے اسے سرخ ہوتی أنکھوں سے گھورا… پھر چہرہ موڑ لیا تھا… سونا بے بس سی ہو کر پھر دروازہ بند کر گئ… وہ شخص اس کی شکل ہی نہیں دیکھنا چاہتا تھا تو وہ کیسے جاتی اس کے سامنے… وہ مڑ گئ اور کھڑکی میں جا کھڑی ہوئ… باہر نیم اندھیرا تھا… صبح کی روشنی آہستہ آہستہ اندھیرے کو نگل رہی تھی.. وہ بے مقصد باہر دیکھے گئ… خالی أنکھوں سے…

•••••••

ڈاکٹرز کی مسلسل کوشش سے بالآخر سکندر کی جان بچ گئ تھی… وہ دونوں باپ بیٹا جو فرشتوں کی مانند وہاں آۓ تھے اور سکندر کی جان بچانے کی وجہ بنے تھے وہ جا چکے تھے… پھر سے روزی کی تلاش میں… سکندر کے ذخم دیکھ کر اسکی حالت دیکھ کر ڈاکٹرز نے اسے پولیس کیس قرار دے دیا تھا…ایک ہفتے تک اس کی حالت کچھ سنبھلی تو پولیس آئ تھی اس سے بیان لینے… کہ کیسے ہوا یہ سب.. لیکن سکندر نے فقط اتنا کہا کہ اس کا ایکسیڈنٹ ہوا اور وہ اس حال کو پہنچا.. اس کے بعد زبان پر قفل لگا لیے تھے…

دوسری جانب جب ایک ہفتہ گزر گیا اور سکندر گھر نہیں آیا تو ملازمین نے اس کی ڈائری سے ریحان کا نمبر لیا اور اس سے پوچھا کہ کیا اسے خبر ہے کہ سکندر کہاں ہے… ریحان نے جب یہ سنا کہ سکندر ایک ہفتہ سے گھر نہیں آیا نہ ہی وہ أفس کے کام سے کہیں گیا ہے تو وہ بھی پریشان ہوا… اگلے ہی دن وہ اس کے گھر پہنچا تھا… ملازمین نے اسے سب بتا دیا کہ وہ چند دن پہلے کیسے پریشان تھا.. پھر پریشے کے متعلق فون آنا… پولیس کا گھر أنا… سکندر کا بے بسی سے چینخنا چلانا… پولیس کو واپس بھیجنا اور پھر ایک دن سکندر کا بریف کیس گاڑی میں رکھوا کر گھر سے چلے جانا… ریحان سن کر مزید پریشان ہوا… آخر ایسا کیا ہوا جو سکندر اتنا پریشان تھا… کوئ پرابلم تھی تو اسے کیوں نہ کال کی… پریشے سے متعلق کیا بات ہو سکتی ہے جس پر وہ اتنا اپ سیٹ رہا… ریحان نے اپنے طور پر سکندر کا پتہ لگانے کی کوشش کی تھی… لیکن پھر اسے کال آئ تھی… پولیس کی کال… سکندر نے ریحان کا نمبر دیا تھا انہیں اور اسے ہی بلانے کو کہا تھا… ریحان کو ہاسپٹل کا نام بتایا گیا.. وہ جلدی میں گھر سے نکلا… دل چاہ رہا تھا اڑ کر پہنچ جاۓ سکندر کے پاس… وہاں پہنچ کر سکندر کی حالت دیکھی تو دنگ رہ گیا… اسے تو پہچاننا مشکل ہو رہا تھا… یہ کیا حال بنا لیا تھا اس نے اپنا… ریحان نے اس سے پوچھا کہ یہ سب کیسے ہوا… لیکن سکندر نے ایک لفظ نہیں کہا اس سے… گھر جانے کی ضد تھی اس کی… ابھی اس کے زخم بھرے نہیں تھے… ڈاکٹرز اس حالت میں اجازت نہیں دے رہے تھے جانے کی… لیکن اس کی ایک ہی ضد پر ریحان اسے لے آیا تھا گھر… دوبارہ اس سے نہیں پوچھا کچھ بھی… وہ اسے پریشرائز نہیں کرنا چاہتا تھا… ریحان چاہتا تھا کہ وہ اسے خود سب بتاۓ اپنی مرضی سے… جیسے پہلے ہر بات اس سے شئیر کرتا تھا… ریحان نے اپنے سب کام چھوڑ دئیے… اس کے ساتھ رہتا ہر وقت… بہت مدد کی تھی اس نے سکندر کو سنبھلنے میں….وہ سنبھلنے بھی لگا تھا آہستہ آہستہ… جسمانی ذخم مندمل ہونے لگے تھے.. لیکن روح کے ذخم گزرتے وقت کے ساتھ ناسور بنتے جا رہے تھے… وہ خاموش ہو گیا تھا… بالکل خاموش… وہ پہلے والا ہنس مکھ… خوش اخلاق سکندر تو نہ جانے کہاں رہ گیا تھا… ایک نۓ سکندر نے جنم لیا تھا جو سنجیدہ تھا… جو بلا ضرورت بولتا نہیں تھا… جو ہنسی مزاق پسند نہیں کرتا تھا… ریحان کو بھی اس نے صرف یہ بتایا کہ اس کا ایکسیڈنٹ ہوا تھا اور بس… پریشے کے بارے میں ریحان نے پوچھا تھا لیکن سکندر نے یہ کہہ کر اسے خاموش کروا دیا کہ وہ اس ٹاپک پر کوئ بات نہیں کرنا چاہتا… پریشے کو وہ اپنی ذندگی سے نکال چکا ہے… اس نے خود پر الزام لیا تھا اس لڑکی کا… کیونکہ وہ اس کے خلاف آج بھی نہ کچھ بول سکتا تھا نہ ہی سن سکتا تھا… البتہ ریحان یہ ضرور سمجھ گیا تھا کہ سکندر نے نہیں نکالا پریشے کو اپنی ذندگی سے… پریشے خود گئ ہے اس کی ذندگی سے… اگر سکندر کی بات سچ ہوتی تو پھر وہ خود اتنا کیوں بدلتا…

سکندر آہستہ آہستہ سنبھل ہی گیا تھا… ذخم بھی ٹھیک ہو گۓ تھے… بس گردن پر نشان رہ گیا تھا اور کبھی کبھار دماغ پر زیادہ زور دینے,ٹینشن لینے اور ماضی کو سوچنے کی وجہ سے سر کے پچھلے حصے سے ٹیسیں اٹھنے لگتیں اور تب درد ناقابل برداشت ہو جاتا… اس نے ریحان کو بھی نہیں بتایا تھا اس درد کا… نہ ہی کسی ڈاکٹر سے رابطہ کیا تھا… یہ تکلیف اس کے لیے کوئ معنی نہیں رکھتی تھی اس تکلیف کے سامنے جو وہ سہہ چکا تھا… وہ آفس جانے لگا تھا اب… ریحان بھی اپنے ہاسپٹل کی جانب متوجہ ہو گیا… ہاں ہر ویک اینڈ پر وہ لوگ ملتے ضرور تھے… لیکن سکندر پہلے کی طرح چہکتا نہیں تھا اب… زیادہ تر ریحان ہی بولتا تھا… اور وہ ہلکی مسکراہٹ سے اسے سنتا رہتا… ریحان اس کی نیلی أنکھوں میں ہلکورے لیتے دکھ کو دیکھ کر افسوس سے اس کی جانب تکتا… ایسے میں سکندر نظر چرا جاتا…

اس واقعہ کو تقریبا تین سال اور سات ماہ گزرے تھے جب سکندر نے پاکستان آنے کا فیصلہ کیا… وہ کچھ وقت اپنوں کے ساتھ گزارنا چاہتا تھا… بزنس اپنے ایک پارٹنر کے حوالے کیا کہ کچھ عرصہ وہ سنبھالے… ریحان کو بتایا تو وہ خوش ہوا تھا اس کے فیصلے پر… وہاں اپنوں میں رہے گا تو وہ سنبھل جاۓ گا… ویسے بھی ریحان بھی چند کورسز کے سلسلے میں جا رہا تھا بیرون ملک… یوں سکندر کچھ عرصہ کے لیے اس ملک,اس شہر سے ناطہ توڑ کر پاکستان آ گیا تھا کہ وہاں ہر جگہ پری کی یادیں بکھری پڑی تھیں… اور اسے ان یادوں سے پیچھا چھڑانا تھا… ذندگی میں آگے بڑھنا تھا…

••••••••

پاکستان آ کر بھی اس کے مزاج میں… اس کے رویے میں کچھ خاص فرق نہیں آیا تھا… یہاں آ کر وہ اپنے کچھ پرانے دوستوں سے ملا تھا اور ان میں سے ہی ایک معیز تھا… سارہ کا بھائ… پھر کچھ عرصہ مزید گزرا… معیز کی شادی تھی… شاہ کا کوئ موڈ نہیں تھا جانے کا لیکن معیز کے بے حد اصرار پر وہ چلا گیا تھا شادی میں شرکت کے لیے… اس دن مہندی کا فنکشن تھا وہ مہندی کی رسم کر رہا تھا جب معیز نے اسے اپنے کمرے میں بھیجا تھا موبائیل لینے… وہ بادل نخواستہ گھر کے اندرونی حصہ کی جانب بڑھا تھا… اور معیز کے روم میں ہی اسے وہ نظر آئ تھی… پریشے… وہ بے یقین ہوا تھا… ایسا کیسے ہو سکتا ہے… وہ جس کی یادوں سے پیچھا چھڑانے کو یہاں آیا تھا وہی ظالم لڑکی اسے یہاں مل گئ تھی… یہ کیسے ممکن تھا… وہ یہاں پاکستان میں کیا کر رہی تھی… اسے دیکھ کر شاہ کی حالت یوں ہو گئ جیسے کاٹو تو بدن میں لہو نہیں… وہ چند لمحے بے خود سا اسے دیکھے گیا… چار سال بعد اس چہرے کو دیکھ رہا تھا… اس کی آنکھوں سے جذبات جھلکنے لگے تھے… پھر اسے پری کا دیا گیا دھوکہ یاد آیا… پل میں اس کے پورے وجود میں وحشت بھری تھی… غصہ سےمٹھیاں بھنچ گئ تھیں… وہ بھی تو جیسے فریز ہو گئ تھی اپنی جگہ پر… حیرت سے اسے تک رہی تھی… شاید اس کے زندہ ہونے کا یقین نہیں کر پا رہی ہو گی… اپنی دانست میں تو وہ اسے ختم کر چکی تھی… مار چکی تھی… شاہ وہاں سے لڑکھڑاتے قدموں سے نکلا تھا… اسے ابھی تک یقین نہیں آ رہا تھا کہ اس کے سامنے کچھ دیر پہلے پری کھڑی تھی… چکراتے سر کے ساتھ وہ کسی کو بتاۓ بغیر وہاں سے نکلتا چلا گیا…

••••••••

آج ان کے ولیمہ کا فنکشن تھا… فنکشن رات کا تھا… صبح دس بجے عائشہ اور شائستہ آئیں تھیں ان کے روم میں.. دستک دی… سونا جو اس وقت بھی کھڑکی میں کھڑی باہر نہ جانے کیا تلاش کر رہی تھی نے مڑ کر ایک نظر دروازے کی طرف دیکھا… دھیرے سے گالوں پر بہنے والے آنسوؤں کو صاف کیا… چہرے پر مسکراہٹ لا کر خود کو فریش ظاہر کرنا چاہا… شاہ اس وقت باتھروم میں شاور لے رہا تھا… سونا نے اندر آنے کی اجازت دی… دونوں اندر داخل ہوئیں… چمکتی ہوئ محبت بھری نگاہوں سے اسے دیکھا…سونا بھی بمشکل مسکرائ ان کی محبت پر… “اسلام و علیکم…” سونا نے ہی سلام میں پہل کی تھی… دونوں نے سلام کا جواب دیا… عائشہ اس کے قریب آئ… “کیسی ہو گڑیا…¿¿” وہ بھی راشد بھائ کی طرح اسے گڑیا کہہ کر ہی مخاطب کرتی تھیں… “ٹھیک ہوں…” سونا نے نظریں چرائیں… دوپٹا حجاب کی صورت لے لیا تھا کہ کہیں گردن کے ذخم ان کی نگاہوں کی زد میں نہ آ جائیں.. “سونا بھابھی… بھائ فریش ہو جائیں تو آپ دونوں نیچے آ جائیے گا… ہم سب آپ کا ویٹ کر رہے ہیں ناشتے پر…” شائستہ نے مسکراتے ہوۓ کہا تبھی شاہ بھی باتھروم سے نکلا تھا… “لیں بھائ بھی أ گۓ… بھائ ماں جی کہہ رہی ہیں کہ دونوں فریش ہو کر نیچے آ جائیے… نیچے أپ دونوں کا ویٹ کیا جا رہا ہے… ناشتہ کے لیے…” شائستہ نے اپنی بات دہرائ تھی… شاہ اس کی جانب دیکھ کر مسکرایا… “آ گئیں صبح صبح کباب میں ہڈی بن کر ہم میاں بیوی کو ڈسٹرب کرنے…” لہجے میں شرارت جھلکی تھی اور وہ مسکرایا تھا… “اوہو… ایک ہی رات میں بیوی کے دیوانے ہو گۓ.. اب بہن کو طعنے بھی دینا شروع ہو گۓ أپ…” شائستہ ٹھنکی…سونا کی نظریں اس کے چہرے پر گہرے ہوتے ڈمپل پر جم گئیں… یہ شخص مسکراتا ہوا کتنا خوبصورت لگتا ہے… اس نے دل ہی دل میں سوچا… عائشہ نے اس کی یہ حرکت نوٹ کر لی تھی.. تبھی شرارتی ہوئ… “صرف شاہزیب ہی نہیں لگتا ہے سونا بھی دیوانی ہو چکی ہے اپنے میاں کی… دیکھو تو نظریں ہی نہیں ہٹ رہیں اس سے…” دونوں کھلکھلائ تھیں….اس کی بات پر شاہ نے سونا کی طرف دیکھا.. ایک پل کو نظریں ملی تھیں… پھر سونا نظریں جھکا گئ… “ہم لوگ أ رہے ہیں دس منٹ تک…” شاہ نے جواب دیا اور آئینے کے سامنے جا کھڑا ہوا… دونوں چلی گئ تھیں… سونا وہیں کھڑی ہتھیلیاں مسلنے لگی… سمجھ میں ہی نہیں آیا کہ کیا کرے… کمرے میں خاموشی چھا گئ تھی… گہری خاموشی… شاہ نے آئینے میں نظر أتے اس کے سراپے پہ گہری نظر ڈالی… کچھ دیر پہلے کی مسکراہٹ اب ختم ہو چکی تھی… چہرہ سنجیدہ تھا جیسے وہ کبھی مسکرایا ہی نہیں… وہ آئینے کے سامنے سے ہٹ گیا… “لپ اسٹک لگاؤ… نیچے مہمان بھی ہوں گے…اور پہلے دن کی دلہن یوں سادہ حلیے میں مہمانوں کے سامنے نہیں جاتی…” حکمیہ لہجے میں کہہ کر وہ اسٹڈی روم کی جانب بڑھ گیا… سونا اس کی پشت کو دیکھتی رہی…چند لمحے بے بس سی وہاں کھڑی رہی… پھر أگے بڑھ کر ڈریسنگ ٹیبل سے پنک لپ اسٹک اٹھا کر ہونٹوں پر لگائ… کچھ دیر بعد شاہ روم میں آیا… ایک نظر اس کی طرف دیکھا… “چلو…” اور أگے بڑھ گیا… سونا کچھ فاصلے پر اس سے پیچھے چل رہی تھی… سیڑھیوں پر پہنچ کر شاہ رکا اور اس کی جانب مڑا… سونا بھی رک گئ تھی… سوالیہ نگاہیں اس کی جانب اٹھیں… شاہ اس کی جانب مڑا… اس تک پہنچ کر اس کا ہاتھ تھاما اور پھر سیڑھیاں اترنے لگا… وہ حیران سی اس کے ہاتھ کی گرفت میں مقید اپنے ہاتھ کو دیکھتی کھنچی چلی آئ… نیچے پہنچے تو شاہ نے اسے اپنے برابر کھڑا کیا تھا.. تائ جی نے ان دونوں کی نظر اتاری… اس وقت وہاں گھر کی چاروں خواتین اور چند مہمان تھے… دونوں نے مشترکہ سلام کیا سب کو… ڈائننگ ٹیبل کے گرد موجود ہر فرد کی نظریں ان پر ہی جمی تھیں… اشتیاق سے بھرپور نظریں… شاہ سونا کو لیے آگے بڑھا…ایک چئیر اس کے لیے گھسیٹی اور اسے کندھوں سے تھام کر بہت احتیاط سے بٹھایا… سونا کی نظریں جھک گئیں…” تو یہ بھی مجبور ہے سب کے سامنے… جھوٹی اداکاری کرنے پر…” سونا نے سوچتے ہوۓ لب کچلے… شاہ اس کے برابر بیٹھ چکا تھا… “شروع کریں ناشتہ” کہتے ہوۓ شاہ نے پہلے سونا کی پلیٹ میں ناشتہ رکھا پھر اپنی پلیٹ میں… سب کے چہروں پر مسکراہٹ پھیلی تھی… اس کے اس انداز پر… کتنی محبت کرتا تھا وہ اپنی شریک حیات سے… اس کے ہر ہر انداز سے کئیر شو ہو رہی تھی سونا کے لیے… لیکن کوئ کچھ بولا نہیں تھا… شاہ کے مزاج سے سب واقف تھے… وہ یہ سب مذاق کرنا کروانا پسند نہیں کرتا تھا… سونا نے آنسو حلق میں اتارے.. “کاش آپ حقیقت میں بھی اتنے ہی کئیرنگ ہوتے جیسے اب بن رہے ہیں..” دل نے تمنا کی تھی…

ولیمہ کا فمکشن تھا… سبھی اپنی اپنی تیاریوں میں لگے تھے… بیوٹیشن اس وقت سونا کے کمرے میں بیٹھی اسے تیار کر رہی تھی… کچھ ریر پہلے شائستہ اور نادیہ بھی اس کے روم میں تھیں.. اب وہ لوگ اپنی تیاری کرنے جا چکی تھیں…اس لیے سونا اور بیوٹیشن اس وقت روم میں اکیلی تھیں… ولیمہ کا ڈریس ,جیولری اور تمام ضرورت کی چیزیں وہ لوگ رکھ گئیں تھیں…شائستہ بتا رہی تھی کہ ولیمہ کا ڈریس خود شاہ بھیا نے پسند کیا تھا اس کے لیے… سونا نے آہ بھری تھی…لیکن کہا کچھ نہیں…وہ لباس بدل کر آئ… آئینے کے سامنے آکر بیٹھی تو بیوٹیشن بھی میک اپ کا سامان ڈریسنگ ٹیبل پر رکھ کر اس کی طرف متوجہ ہوئ… سونا کا چہرہ اس وقت بے تاثر تھا… بیوٹیشن نے اپنا کام شروع کیا… چونکہ سونا اس وقت دوپٹے کے بغیر بیٹھی تھی… تبھی بیوٹیشن کی نگاہ اس کی گردن کے ذخموں پر پڑی… وہ چونک کر سونا کے چہرے کی طرف دیکھنے لگی… وہ تو پہلے ہی حیران ہو کر سوچ رہی تھی کہ دلہن ایسی ہوتی ہے کیا… دوسرے دن کی دلہن کے تو چہرے سے ہی خوشی ظاہر ہو رہی ہوتی ہے اور اس دلہن کا چہرہ بالکل ویران سا تھا… اب گردن کے ذخموں نے اسے مزید حیران کیا تھا… ” یہ گردن پہ…¿¿¿” اس کے منہ سے بے ساختہ پھسلا تھا… سونا اس کی ادھوری بات کا مطلب سمجھ گئ تھی.. تبھی کرب سے آنکھیں میچیں… بیوٹیشن حیران پریشان سی اس کے ضبط سے سرخ ہوتے چہرے کو دیکھتی رہ گئ… تبھی دروازہ کھلا تھا ایک دم… دونوں کی نظریں دروازے کی جانب اٹھیں.. شاہ اندر داخل ہوا… کٹیلی نظروں سے پہلے سونا کے آئینے میں نظر آتے چہرے پر ڈالی جہاں آنسو بہہ نکلے تھے… پھر انہی نظروں سے بیوٹیشن کی جانب دیکھا… جیسے کہہ رہا ہو کہ اپنے کام سے کام رکھیں تو بہتر ہے… بیوٹیشن گڑبڑا کر سونا کی جانب متوجہ ہوئ جس ھے ہاتھوں سے رگڑ کر أنسو صاف کیے تھے… شاہ سر جھٹک کر آگے بڑھا… سائیڈ ٹیبل سے اپنا موبائیل اٹھایا اور لمبے لمبے ڈگ بھرتا کمرے سے نکل گیا… اس کے بعد بیوٹیشن نے کوئ سوال نہیں کیا… البتہ اس کی ترحم بھری نگاہیں سونا کے چہرے پر ہی جمی تھیں… جس نے لب بھینچ رکھے تھے… بیوٹیشن نے دوپٹا اس طرح سے سیٹ کیا کہ ذخم دوپٹے کی اوٹ میں چھپ گۓ…