سیمی نے عاصم کا نمبر ڈائل کیا

“ہیلو۔۔۔۔!”

“ہائے۔۔۔۔۔ ! ہو از دئیر”

“میں سیمی۔۔۔ ہوں۔۔۔ تابش کی منگیتر۔۔۔”

“اوہ۔۔۔۔ بھابی جی ۔۔۔ بھابی جی۔۔۔۔۔ خیریت سے یاد کیا۔۔۔” وہ پوچھنے لگا

“تمہیں نور چاہیے۔۔۔۔۔۔۔؟ میں لا کے دوں گی ” سیمی سنجیدہ ہو کے بولی

سیمی کی بات سن کے عاصم کو جھٹکا لگا۔۔۔۔۔۔

“پر۔۔۔ آپ ۔۔۔ نور کو کیسے جانتی ہیں۔۔۔۔ اور میرے لیے یہ سب کیوں کرنا چاہتی ہیں۔۔۔؟” عاصم نے پوچھا

“نور کی وجہ سے تابش نے میرے ساتھ منگنی توڑ دی ہے۔۔۔۔ سیدھی سی بات ہے، مجھے تابش چاہیے اور تمہیں نور۔۔۔ اس لیے میں تمہیں یہ آفر دے رہی ہوں۔۔۔۔” سیمی نے اصل بات بتا دی

“اوہ۔۔۔۔ اوہ۔۔۔۔۔ تو یہ بات ہے۔۔۔۔۔،” عاصم پوری بات سمجھ گیا

“یس۔۔۔ اب تم بتاؤ۔۔۔۔۔ تم اس میں میرا ساتھ دے رہے ہو یا نہیں۔۔۔؟ سیمی نے پوچھا

“ہاں۔۔۔ وائے ناٹ۔۔۔۔۔ مجھے کرنا کیا ہوگا۔۔۔۔؟” عاصم سوچتے ہوئے بولا

“تم مجھے نور کے گھر تک پہنچا دو۔۔۔ باقی سب مجھ پہ چھوڑ دو۔۔۔۔” سیمی نے جواب دیا

“ڈن۔۔۔۔ میں تمہیں وہاں تک پہنچا دوں گا۔۔۔” عاصم نے حامی بھر لی

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

“نور بیٹا۔۔۔ ! صورت حال ایسی بن گئی ہے کہ میں کوئی بھی فیصلہ کرنے سے قاصر ہوں۔۔۔۔ اس لیے اس بار تمہیں سوچ سمجھ کے جواب دینا ہوگا” مولوی صاحب نور سے مخاطب تھے

“بابا۔۔۔ ! میں خود اس حالت میں نہیں کہ کوئی فیصلہ کر پاؤں۔۔۔۔ مجھے تھوڑا وقت دے دیں۔۔۔” نور نے جواب دیا

وہ کمرے میں لوٹی اور سوچوں میں ڈوب گئی، کل تک تابش صرف اسکی سوچوں میں تھا اور آج حقیقت بن کے سامنے کھڑا ہوگیا تھا۔ نور نے فاطمہ کو گھر بلایا تاکہ اس سے اس حوالے سے بات کرسکے۔۔۔

“فاطمہ۔۔۔ ! بابا نے تابش سے متعلق میری رائے مانگی ہے۔۔۔۔ میں کیا کروں۔۔۔؟” نور پریشان ہوکے بولی

“اف خدایا۔۔۔۔ ! تم نے ابھی تک اپنا جواب نہیں دیا ؟” فاطمہ حیران ہوئی

“کوئی جواب ہو تو دوں نا۔۔۔۔” نور پھر سے سوچوں میں ڈوب گئی

“نور۔۔۔۔ ! میں تمہیں سمجھدار سمجھتی تھی لیکن آج تم نے ثابت کردیا کہ کتنی بڑی بے وقوف ہو تم۔۔۔۔” فاطمہ چڑ گئی

نور نے اسے گھورا

“بابا۔۔۔۔ تم سوچ کیا رہی ہو۔۔۔ ہاں کردو ۔۔ بس۔۔۔۔ “

“ایسے کیسے ہاں کردوں۔۔۔۔؟”

“لو۔۔۔۔ اور سنو۔۔۔۔ دوسری شادی والے کے لیے تو جھٹ سے ہاں کردی تھی۔۔۔ اب کیا مسئلہ ہے۔۔۔؟”

“اس میں بابا کی رضا شامل تھی۔۔۔ تابش والے معاملے میں وہ خود پریشان ہیں۔۔۔”

“نور سچے دل سے ایک بات کا جواب دو،۔۔۔۔۔”

“پوچھو۔۔۔۔ !”

“تم تابش کو پسند کرتی ہو یانہیں۔۔۔؟”

“سچ پوچھو تو میں خود نہیں جانتی۔۔۔۔۔”

“اف۔۔۔ یہ کیسا جواب ہے۔۔؟”

“یہ حقیقت ہے کہ وہ میرے دل دماغ میں ضرور رہیتا ہے، میں اس کے بارے میں سوچتی بھی ہوں۔۔۔ اسکی وہ آنکھیں جو میرے چہرے پہ مرکوز تھیں۔۔۔ میں بھول نہیں پائی۔۔۔۔۔ اسکے جانے کے بعد جب بھی میں نے بیٹھک میں قدم رکھا اسکی خوشبو میرے حواس پہ طاری ہوئی ہے۔۔۔۔۔” نور بتاتے بتاتے چپ ہوگئی

“نور۔۔۔ ! یہی تو پیار ہے، تم اسے پسند کرتی ہو۔۔۔۔ اب جب وہ باقاعدہ طور پہ تمہارا رشتہ لینے آیا ہے تو کیوں تم فیصلہ نہیں کر پا رہی ہو۔۔۔۔۔؟”

“نہیں جانتی۔۔۔۔ ایک خوف سا ہے دل میں۔۔۔۔۔ ایک بے چینی سی۔۔۔۔ “

“تم جتنا زیادہ سوچو گی فیصلہ لینا اتنا ہی مشکل ہوگا، بس اللہ کا نام لو اور ہاں کردو۔۔۔۔۔” فاطمہ نے اسکا کندھا تھپتھپایا

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

تابش دکان سے واپس آیا تو اباجی ٹی وی پہ خبرنامہ دیکھنے میں مصروف تھے۔ وہ سلام کرکے انکے پاس بیٹھ گیا۔ ابا جی دکان کے حالات پوچھنے لگے۔ فیزی اور فری بھی آگئیں۔ تابش کی بے چین نظریں سب کے چہرے پڑھنے لگیں۔۔۔ جب کہیں سے کوئی خاطر خواہ آثار نظر نہیں آئے تو وہ ابا جی سے پوچھنے لگا

“بابا۔۔ وہ۔۔۔ میں نے ایک دو بار آپکے نمبر پہ فون کرنے کی کوشش کی لیکن نمبر بند تھا۔۔۔ خیریت تھی نا۔۔۔؟”

“میرا نمبر۔۔۔۔؟ میرا نمبر تو کھلا رہا ہے پورا دن۔۔۔۔۔ ” اباجی جیب سے فون نکال کے دیکھنے لگے

“بابا۔۔۔۔ ! آپ سمجھے نہیں۔۔۔۔۔ بھائی۔۔۔۔ پوچھنا چاہ رہے ہیں کہ نور کے گھر سے کال آئی یا نہیں۔۔۔۔؟” فری بولی

تابش نے اسے گھورا۔۔۔۔۔ اباجی مسکرا دیے۔۔۔

“بچو۔۔۔ ! ابھی تک کوئی جواب نہیں آیا۔۔۔۔۔۔ ” فری نے اسے چھیڑا

“نہیں آیا تو آجائے گا۔۔۔۔ کیوں میرے بھائی کو پریشان کررہی ہو۔۔۔؟” فیزی نے جواب دیا

اتنے میں اباجی کے موبائل کی بیل بجنے لگی۔ تابش کے کان کھڑے ہوئے۔ ابا جی چشمہ لگا کے نمبر دیکھنے لگے۔۔۔ تابش کا دل زور زور سے دھڑکنے لگا۔ انھوں نے فون اٹنڈکیا

“اسلام علیکم۔۔۔۔ ! میں مولوی نوازالدین بات کررہا ہوں۔۔۔۔”

“جی۔۔ جی۔۔۔ مولوی صاحب۔۔ کیا حال ہے آپکا؟”

“بس مالک کا کرم ہے، آپ سنائیں۔۔۔ گھر میں سب خیر خیریت ہے۔۔”

“بس جی آپکی دعائیں چاہیں۔۔۔۔۔”

“اللہ پاک آپکو اپنی حفظ و امان میں رکھے۔۔۔ آمین”

“آمین۔۔۔۔”

“وہ کچھ دن پہلے آپ رشتے کے لیے تشریف لائے تھے۔۔۔”

“ہاں جی۔۔۔۔ بس تب سے آپکے جواب کے ہی منتظر ہیں۔۔۔”

“بس جی بیٹی کا معاملہ ہے سوچ بچار تو کرنی پڑتی ہے۔۔۔”

“بے شک۔۔۔۔ آپکو سوچنے سمجھنے کا پورا حق حاصل ہے”

“ماشاء اللہ آپکا بیٹا، فرمانبردار اور ہونہار ہے۔۔۔ آپکا گھرانہ بھی تعلیم یافتہ ہے۔ مجھے امید ہے کہ میری بچی آپکے گھر میں خوش رہے گی۔ ہم اس رشتے کے لیے راضی ہیں۔۔۔”

“بے حد شکریہ۔۔۔۔ آپ نے اتنی عزت بخشی۔۔۔۔”

“بس ایک چھوٹی سی عرض تھی۔۔۔۔”

“جی مولوی صاحب آپ حکم کریں۔۔۔”

“میں جلد از جلد اس ذمہ داری سے سبکدوش ہونا چاہتا ہوں۔۔۔۔ اگر آپکو دقت نہ ہو تو اگلے ہفتے نکاح کی رسم کرلیتے ہیں۔۔۔ اسکے بعد پھر رخصتی کی تاریخ بھی طے کرلیں گے۔۔۔” مولوی صاحب بولے

“میں آپکی بات سمجھ گیا، بس ایک بار گھر والوں سے مشورہ کرکے میں آپکو مطلع کرتا ہوں۔۔۔” اباجی نے جواب دیا

مولوی صاحب نے سلام کرکے فون بند کردیا

“مبارک باد۔۔۔۔ رشتے کے لیے ہاں ہوگئی ہے۔۔۔۔ ” اباجی نے تابش کی طرف دیکھا

تابش کی خوشی کا ٹھکانہ نہ تھا۔۔۔۔ فری اور فیزی نے تابش سے تحفے مانگنا شروع کردیے۔ ناصرہ بیگم نے بھی ا سکو مبارک باد دی۔۔۔

اباجی نے بتایا کہ وہ اگلے ہفتے نکاح کی رسم کرنا چاہتے ہیں۔ شائد رخصتی بھی جلدی ہی کردیں۔۔۔ فیزی اور فری یہ سن کے پریشان ہو گئیں کہ اتنی جلدی تیاریاں کیسے ہوں گی۔ لیکن تابش نے تسلی دی کہ سب کچھ ہوجائے گا۔۔۔ اباجی نے مولوی صاحب کو اگلے جمعہ کی شام کا وقت دیا کہ وہ چند لوگوں کے ہمراہ نکاح کے لیے حاضر ہوں گے۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

مقررہ دن تابش کے گھر والے چند رشتہ داروں کے ہمراہ نور کے گھر نکاح کی رسم کے لیے پہنچے۔۔۔ مولوی صاحب کی جانب سے بھی چند ایک مہمان مدعو تھے۔ کیونکہ سب کچھ بہت جلدی ہوا تھا اس لیے انکے قریبی رشتہ دار شرکت نہ کرسکے۔۔۔

مولوی صاحب نے نور اور تابش کا نکاح پڑھایا۔۔۔ نکاح کے بعد مہمانوں کے کھانے کا بھی انتظام تھا۔ جب ایک ایک کر کے مہمان رخصت ہونے لگے تو تابش نے مولوی صاحب سے سرگوشی کی

“آپ سے ایک عرض تھی۔۔۔۔”

“جی بیٹا۔۔۔۔ بتائیں۔۔۔” مولوی صاحب بولے

“اگر آپکو اعتراض نہ ہوتو میں پردے میں رہیتے ہوئے اپنی منکوحہ سے بات کرنا چاہتا ہوں” وہ سر جھکا کے بولا

مولوی صاحب تھوڑی دیر کے لیے خاموش ہوئے، پھر گھر جا کے نور سے اس بارے میں بات کی اور اسکی بھی مرضی پوچھی کہ کیا وہ بھی بات کرنا چاہتی ہے۔ فاطمہ کے اشارہ کرنے پہ نور نے حامی بھر لی۔

نور کے کمرے کے دروازے کے ایک طرف تابش تھا اور دوسری طرف نور

“میں شرمندہ ہوں جو اس طرح سے آپکو تکلیف دی۔۔۔” تابش سر جھکا کے بولا

دوسری طرف سے خاموشی ہی رہی

“دراصل میرے دل پہ ایک بوجھ تھا، آپ سے بات کرکے میں وہ بوجھ اتارنا چاہتا ہوں۔۔۔۔ مجھے یقین ہے کہ اس نکاح میں آپکی مرضی شامل ہے۔ لیکن میں اس حقیقت سے بھی آشکار ہوں کہ آپ مجھے پسند نہیں کرتیں۔۔۔ میں بس اتنا کہنا چاہتا ہوں کہ میری اس غلطی کے لیے مجھے معاف کرکے آپ اپنا دل صاٖف کرلیں ۔۔۔ میں کوشش کروں گا کہ آنے والے دنوں میں میری طرف سے آپکو کسی طرح کی کوئی تکلیف نہ ہو۔۔۔۔۔” تابش نے اپنی بات مکمل کردی

نور کی طرف سے پھر بھی کوئی جواب نہیں آیا۔۔۔ تابش واپس مڑا

“سنئیے۔۔۔۔ !” نور کی آواز تابش کے کانوں میں پڑی

“میں بھی آپ سے معافی چاہتی ہوں، میری وجہ سے آپکی دل آذاری ہوئی۔ میں نے ناصرف آپ پہ بے بنیاد الزام لگایا بلکہ ہاتھ بھی اٹھایا۔۔۔۔ آپکے جانے کے بعد سے لے اب تک میں احساس جرم میں مبتلا رہی ہوں۔ ہو سکے تو مجھے معاف کر دیجئے گا” نور شرمندہ ہوئی

“آپکو معافی مانگنے کی ہرگز کوئی ضرورت نہیں ہے۔۔۔۔ کہیں نہ کہیں میری غلطی ضرور تھی۔۔۔۔ ” تابش نے جواب دیا

ایک طرف فاطمہ کی نظریں نور پہ جمی تھیں اور دوسری طرف فیزی اور فری تابش کو دیکھ رہی تھیں۔ اس صورت حال کو سمجھتے ہوئے تابش نے مزید کوئی بات کرنے سے اجتناب کیا۔ اور سلام کرکے وہاں سے چلا گیا۔

مولوی صاحب نے اباجی کے ساتھ مشورہ کرکے رخصتی کی تاریخ طے کردی۔ شادی کی تیاریوں کے لیے بس ایک مہینہ تھا۔ اباجی نے مولوی صاحب سے عرض کہ وہ کسی طرح کا جہیز قبول نہیں کریں گے اس لیے انھیں ایسے کسی تکلف میں پڑنے کی ضروت نہیں ہے۔ مولوی صاحب انکے اس فیصلہ سے خوش بھی تھے لیکن وہ اپنی اکلوتی بیٹی کو دو کپڑوں میں رخصت کرنے کے لیے بھی راضی نہیں تھے۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

جہاں ایک طرف تابش اپنے گھر والوں کے ساتھ زور و شور سے شادی کی تیاریوں میں مصروف تھا وہیں دوسری طرف

نور کے اچانک نکاح کے باعث مولوی صاحب دور درواز کے رشتہ داروں کو مدعو نہیں کرپائے اس لیے انھوں نے فیصلہ کیا کہ خود جاکے سب کی شکائیت دور کریں اور شادی کا دعوت نامے بھی اپنے ہاتھ سے بانٹ کے آئیں۔ فاطمہ اور اسکی امی نور کے ساتھ رک گئیں اور مولوی صاحب دو دن کے لیے رشتہ داروں کی طرف چل پڑے۔

عصر کی اذان ہوئی تو نور نے نماز کا وضو کیا، اتنے میں دروازے پہ دستک ہوئی۔ فاطمہ اور اسکی امی نور کی شادی کے کپڑوں کی خریداری سے واپس لوٹیں۔۔۔

“جلدی سے دیکھ کے بتاؤ۔۔۔ اگر تبدیل کرانے ہیں تو امی اور میں دوبارہ بازار جاتے ہیں” فاطمہ نے دو شاپنگ بیگ نور کو تھمائے۔

“عصر کا وقت نکل رہا ہے، میں نماز پڑھ لوں پھر دیکھتی ہوں۔۔۔” نور بولی

“اچھا بابا۔۔۔ ! نماز پڑھ لو۔۔۔۔” فاطمہ بولی

نور نماز پڑھنے لگی، فاطمہ کی امی چائے بنانے کے لیے کیچن میں چلی گئیں اور فاطمہ شاپنگ بیگ لیے کمرے میں چلی گئی۔

دروازے پہ دستک ہونے لگی۔ فاطمہ جلدی سے دروازے پہ پہنچی

“کون۔۔۔؟”

“جی مجھے نور سے ملنا ہے، پلیز جلدی دروازہ کھولیں۔۔۔۔” نسوانی آواز فاطمہ کے کانوں میں پڑی

فاطمہ نے دروازہ کھولا

سیمی ہڑبڑا کے گھر میں داخل ہوئی۔

“آپ ۔۔۔۔ آپ نور ہیں۔۔۔۔؟” وہ بوکھلا کے بولی

“نہیں۔۔۔۔ پر۔۔۔۔ آپ کون ہیں؟” فاطمہ گھبرا گئی۔

“میں تابش کی خالہ زاد ہوں۔۔۔۔ مجھے نور سے ملنا ہے۔۔۔۔ نور کہاں ہے۔۔۔۔؟” سیمی ادھر ادھر دیکھنے لگی۔

فاطمہ کی امی بھی کیچن سے باہر آ گئیں۔۔۔

“پلیز جلدی بتائیں۔۔۔۔۔۔” سیمی نے فاطمہ کے کندھے سے ہلایا

“بیٹی ہوا کیا ہے۔۔۔۔۔ تم اتنی پریشان کیوں ہو۔۔۔؟” فاطمہ کی امی آگے بڑھ کے پوچھنے لگی

“آنٹی۔۔۔ تابش کا ایکسیڈنٹ ہوا ہے، اسکی حالت بہت نازک ہے۔۔۔ بار بار نور کا نام لے رہا ہے۔ میں نور کو لینے آئی ہوں” سیمی کی سانس پھولنے لگی

نور نماز پڑھ کے صحن میں پہنچی تو سیمی کی بات اسکے کان میں پڑی۔ فاطمہ اور اسکی ماں کے رونگٹے کھڑے ہوئے۔۔۔۔

سیمی کی نظر نور پہ پڑی تو وہ دوڑتی ہوئی اسکے پاس پہنچی

“آپ نور ہیں۔۔۔ ؟ پلیز میرے ساتھ چلیں تابش زندگی اور موت کی کشمکش میں ہے” اس نے نو ر کندھے سے پکڑ کے ہلایا

نور اپنے حواس کھو چکی تھی وہ بس دیدے پھاڑے سیمی کو دیکھتی رہی

“آنٹی۔۔۔ آپ انھیں کہیں نا۔۔۔۔۔۔ وقت بہت کم ہے۔۔۔۔۔” سیمی فاطمہ کی امی کے پاس آکے بولی

نور کی حالت دیکھ کے فاطمہ اسکے پاس آئی

“نور۔۔۔۔۔ نور۔۔۔۔۔” وہ اسکے بازو سے پکڑ کے ہلانے لگی

نور نے کوئی جواب نہ دیا

“نور بیٹا۔۔۔۔۔۔ کچھ تو بولو۔۔۔۔۔۔” فاطمہ کی امی بھی پاس آئیں

فاطمہ نے نور کو گلے لگا لیا۔۔۔۔ آنسو کا ایک طوفان نور کی آنکھوں سے رواں ہوا

“نور۔۔۔ یہ رونے کا وقت نہیں ہے۔۔۔ میرے ساتھ چلو۔۔۔۔” سیمی چلاتے ہوئے بولی

“میں بھی ساتھ چلتی ہوں۔۔۔” فاطمہ نے اسے جواب دیا

“نہیں۔۔۔۔۔ آپ یہیں رکیں۔۔۔ اسپتال میں تابش کی پوری فیملی موجود ہے۔۔۔۔ اور ویسے بھی یہاں بھی کسی کا رہنا ضروری ہے۔۔۔۔ بس آپ لوگ دعا کریں۔۔۔۔” سیمی نے اسے روکا

“ٹھیک ہے بیٹا۔۔۔۔۔۔۔ تم اسے لے جاؤ۔۔۔۔ جلدی سے خیر کی خبر سنانا ۔۔۔۔۔ ہم لوگ دعا کررہے ہیں۔۔۔۔” فاطمہ کی امی بولیں

سیمی نور کو اپنی گاڑی میں بٹھا وہاں سے لے گئی۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

“بھائی۔۔۔۔۔ بھائی۔۔۔۔۔” فیزی بھاگتی ہوئی تابش کے پاس پہنچی

“کیا ہوا۔۔۔۔۔ ؟” وہ اباجی کے کمرے میں بیٹھا حساب کتاب میں مصروف تھا

فیزی نے ایک پیکٹ اور کاغذ کی پرچی اسے تھمائی

تابش نے پیکٹ کھول کے دیکھا تو اس میں پیسے تھے۔ وہ پرچی کھول کے پڑھنے لگا

“میں سمجھتا رہا کہ یہ کام بس محبت میں ممکن ہے۔ پر سیمی نے ثابت کردیا کہ نفرت محبت سے زیادہ طاقتور ہے۔ تمہاری محبت نور کو بچانے میں ناکام رہی لیکن سیمی کی نور سے نفرت کامیاب ہو گئی۔ تم تو اپنا وعدہ پورا نہیں کرپائے پر میں اپنا وعدہ پورا کررہا ہوں۔۔۔۔۔ یہ وہ رقم جو میں نے تمہیں نور کے بدلے میں دینے کا وعدہ کیا تھا۔۔۔ میں اپنا وعدہ پورا کررہا ہوں۔۔۔۔۔۔۔ عاصم۔۔۔”

تابش کے رونگٹے کھڑے ہوئے۔ وہ پاگلوں کی طرح اپنے کمرے کی طرف دوڑا اپنا پستول الماری سے نکالا اور گھر سے باہر نکل گیا۔۔۔۔

فیزی ، فری اور ابا جی اسے آوازیں دیتے رہے کہ ہوا کیا ہے؟، لیکن وہ بنا کچھ بولے چلا گیا۔

تابش بہت اچھی طرح سے واقف تھا کہ عاصم نور کو اپنے فارم ہاؤس پہ لے گیا ہوگا۔۔۔

اندھا دھند بائیک دوڑاتے ہوئے وہ عاصم کے فارم ہاؤس کی طرف جا رہا تھا، اسکا دماغ بالکل کام کرنا چھوڑ گیا۔ نور کا معصوم چہرہ بار بار آنکھوں کے سامنے آرہا تھا۔ عاصم کے سفاک ارادوں سے وہ اچھی طرح سے واقف تھا۔

تابش عاصم کے فارم ہاؤس کے گیٹ پہ پینچا تو گیٹ کیپر نے اسے اندر جانےسے روک دیا۔۔۔ وہ اسے دھکا دیتے ہوئے اندر داخل ہوا۔

عاصم کے نام کی آوازیں لگاتے ہوئے وہ جب اندر پہنچا تو وہ شراب کا گلاس ہاتھ میں پکڑے صوفے پہ بیٹھا تھا۔ تابش نے پاس آ کے اسکے گریبان سے پکڑا

“نور کہاں ہے۔۔۔۔ بتاؤ نور کہاں۔۔۔۔۔” تابش کی آنکھوں سے آگ برسنے لگی

“نور۔۔۔۔۔۔ !۔۔۔۔” عاصم اپنے ہوش میں نہیں تھا

“ہاں نور۔۔۔۔۔۔۔ ! کہاں ہے وہ۔۔۔۔۔؟” تابش چلایا

عاصم خاموش کھڑا رہا۔ تابش نے اسکی گردن پہ ایک زور دار مکا رسید کیا تو وہ فرش پہ جاگرا

اس نے عاصم کے گریبان میں پھر سے ہاتھ ڈالا اور کھڑا کیا

“بتا۔۔۔۔۔ عاصم۔۔۔ نور کہاں ہے۔۔۔۔؟” تابش چلایا

“نور۔۔۔۔۔ وہ کانچ کی گڑیا۔۔۔۔۔۔؟ وہ ۔۔۔۔ وہ تو ٹوٹ گئی۔۔۔۔” عاصم مدہوشی میں بولا

تابش پاگلوں کی طرح اسے پیٹتا رہا۔۔۔۔۔ اور اسکےمنہ سے خون جاری ہوا وہ پھر بھی وہ ایک ہی بات کرتا رہا

“کانچ کی گڑیا تو ٹوٹ گئی۔۔۔۔۔ مجھے مت مارو۔۔۔۔ وہ ٹوٹ گئی۔۔۔۔” عاصم رونے لگا

“عاصم ہوش میں آؤ۔۔۔۔ اور مجھے بتاؤ۔۔۔۔ نور کہاں ہے۔۔۔۔۔۔؟” تابش نے اسکے بالوں سے پکڑ لیا

“آو۔۔۔۔ ! میں تمہیں دیکھاتا ہوں۔۔۔۔ وہ ٹوٹ گئی ہے۔۔۔۔۔” عاصم اپنا جسم سنبھال نہیں پا رہا تھا۔ تابش نے اسے سہارا دیا وہ ایک ایک قدم اٹھاتے ہوئے اسے کمرے میں لے گیا۔

تابش جب کمرے میں پہنچا تو اسکے پاؤں کے نیچے سے زمین نکل گئی۔

نور اپنے برقعے میں ملبوس کمرے کے فرش پہ پڑی تھی۔ تابش عاصم کو چھوڑ کے نور کی طرف لپکا۔۔۔۔

اسکی آنکھیں ایک ہی جگہ جمی تھیں اور جسم بے حس وحرکت تھا۔۔۔۔ ناک سے لہو بہتے بہتے رک گیا تھا۔

“نور۔۔۔۔ ! نور۔۔۔۔ اٹھو۔۔۔۔۔ ” تابش اسکے پاس زانوں کے بل بیٹھ کے اسے ہلانے لگا

“ٹوٹ گئی ہے۔۔۔۔۔ میں نے کہا نہ۔۔۔۔ ٹوٹ گئی ہے۔۔۔۔” عاصم کی آواز پھر سے اسکے کان میں پڑی

نور کی سانسیں نہیں چل رہی تھیں۔۔۔۔۔ تابش نے اسکا سر اپنی گود میں رکھ لیا۔۔۔۔ اور ایک درد ناک چیخ اسکے گلے میں اٹک گئی۔۔۔۔

عاصم اسی طرح بڑبڑاتا رہا ۔۔۔۔۔” کانچ کی گڑیا ٹوٹ گئی۔۔۔۔۔”

تابش پھر سے عاصم کی طرف لپکا،

“کیا کیا تم نے اسکے ساتھ۔۔۔۔۔ بتاؤ مجھے۔۔۔۔۔ ورنہ میں تمہیں مار ڈالوں گا۔۔۔۔۔۔ بتاؤ۔۔۔۔” اس نے پھر سے عاصم کے بالوں سے پکڑا

“میں نے کچھ نہیں کیا۔۔۔۔۔۔ ” عاصم اسی مدہوشی میں بولا

“تم نے کچھ نہیں کیا تو یہ کیسے مر گئی۔۔۔۔۔ کیوں مارا ۔۔۔۔ کیوں مارا نور کو۔۔۔۔ میں تمہیں زندہ نہیں چھوڑوں گا۔۔۔” تابش دھاڑنے لگا اور پھر سے اسکے چہرے پہ مکوں کی بارش شروع کردی

“تم نے مارا ہے اسے۔۔۔۔۔ تم نے۔۔۔۔۔” عاصم بولا

“عاصم ۔۔۔ کیا کیا تم نے نور کے ساتھ۔۔۔۔۔ بتاؤ۔۔۔۔” تابش نے اسکی بند ہوتی آنکھوں میں آنکھیں ڈالیں

“میں نے بس یہی بتایا کہ تم میرے کہنے پہ اسکے گھر گئے۔۔۔ اس سے محبت کی۔۔۔۔ اس کے لیے رشتہ بھیجا۔۔۔ اور نکاح کیا۔۔۔۔۔۔۔ وہ چپ چاپ کھڑی رہی۔۔۔۔۔ سنتی رہی۔۔۔۔ کچھ نہیں بولی۔۔۔۔۔ بس اسکے ناک سے خون بہنے لگا۔۔۔۔پھر وہ کھڑے کھڑے گر گئی۔۔۔۔۔ میں اسکے لیے پانی لایا۔۔۔ لیکن ۔۔۔۔ وہ۔۔۔۔۔ وہ تو کانچ کی گڑیا نکلی۔۔۔۔ اتنی سی ٹھوکر برداشت نہیں کر پائی۔۔۔۔ دیکھو نہ ٹوٹ گئی۔۔۔۔” عاصم فرش پہ گر گیا

تابش کے گرد آندھیاں چلنے لگیں۔۔۔ اسکے وہم و گمان میں بھی نہیں تھا کہ کبھی نور اس حقیقت سے آشکار ہوگی۔۔

“ہم دونوں ایک ہی گناہ کے مرتکب ہیں۔۔۔۔ لیکن دونوں کی سزا میں فرق ہے۔۔۔ تم جان دے کے سزا پوری کرو گے اور میری ہر سانس اس جرم کا قرض چکائے گی۔۔۔۔۔”

تابش نے عاصم کے سینے میں پستول کی ساری گولیاں اتار دیں۔۔

اور نور کی لاش اپنے ہاتھوں پہ اٹھائے وہ بوجھل قدموں سے چلنے لگا۔۔۔۔۔ اسکے کانوں میں نور کی آواز گونجتی رہی

“تم وہ سیاہ پتھر ہو جو ایک نور پہ گرھن تو لگا سکتا ہے لیکن خود کبھی روشن نہیں ہوسکتا۔۔۔۔۔”

اسکی آنکھوں کے سامنے پھر سے وہ منظر نموادر ہوا۔۔۔۔

وہ قرآن پاک کی تلاوت میں مشغول تھی، صبح کی کرنیں اسکے حسین چہرے سے ٹکرا کے نور میں بدل رہی تھیں۔۔۔

تابش کی آنکھوں کے آگے اندھیرا چھا گیا۔۔۔۔۔۔

ختم شد