“نور ۔۔۔۔۔ ! بیٹا۔۔۔ کوئی بسکٹ وغیرہ بھی ساتھ رکھ دیتی” مولوی صاحب نے طشتری پکڑتے ہوئے کہا

“جی بابا۔۔۔۔۔ !” مدھم سی آواز پھر سے تابش کے کانوں میں پڑی

اسکے دل و دماغ کے ہر کونے میں ایک ہی نام گونجنے لگا

“نور۔۔۔۔۔۔ !”

نور کی آواز سنتے ہی تابش اسکی صورت کا اندازہ لگانے لگا۔ اسکے دماغ نے کئی حسین نقش آنکھوں کے آگے نمودار کیے۔ نگاہ دروازے پہ ٹک سی گئی۔

“برخودار۔۔۔۔۔۔ !” مولوی صاحب نے چائے کا کپ اسکی طرف بڑھایا

“جی۔۔۔۔ !۔۔۔۔ جی۔۔۔۔!” اس نے چونک کہ انکی طرف دیکھا اور چائے کا کپ ہاتھ سے لے لیا۔

“آپ نے بتایا نہیں کہ آپ کام کیا کرتے ہیں۔۔۔۔؟” مولوی صاحب چائے کا بڑا سا سِپ لے کے بولے

“میں۔۔۔۔۔ ؟ میں کیا کرتا ہوں۔۔۔۔؟” تابش ہڑ بڑا سا گیا

مولوی صاحب اسکے چہرے کے بدلتے تیور دیکھ کے حیران ہوئے۔ تابش نے جلد ہی بات کو سنبھالا

“آپکی کالونی کے سامنے سے جو مین روڈ گزر رہا ہے اسی روڈ پہ قریباً دو کلومیڑ کے فاصلے پہ ایک بلڈنگ تعمیر ہورہی ہے۔۔۔۔۔۔۔۔۔” تابش سوچ سوچ کے جواب دینے لگا

“کہاں۔۔۔۔۔ ؟۔۔۔۔ سیدھا ہی۔۔۔۔؟” مولوی صاحب سوچ میں پڑ گئے

“جی ۔۔۔ بالکل۔۔۔۔” تابش نے فوراً سر ہلایا

“میرے علم میں نہیں ہے۔۔۔۔۔ ! خیر ۔۔۔ بیٹا۔۔۔۔ میری زندگی تو گھر سے مسجد اور مسجد سے گھر تک محیط ہوکے رہ گئی۔۔۔۔۔ بچی گھر میں اکیلی ہوتی ہے اس لیے مسجد سے سیدھا گھر پہنچتا ہوں۔۔۔۔۔ موجودہ دور کے حالات و واقعات سن کے رونگٹے کھڑے ہوتے ہیں۔۔۔۔۔ بس یہی دعا ہے اللہ پاک سب کو اپنی حفظ و امان میں رکھے۔۔۔۔۔ ۔۔۔” مولوی صاحب اپنا رخ چھت کی طرف کیا اور دعا کرنے لگے

“آمین۔۔۔۔ !” تابش کے گلے میں یہ لفظ اٹک سا گیا

“اچھا ۔۔۔۔ تو وہاں پہ کیا کام کرتے ہیں آپ؟” مولوی صاحب پھر سے اسی مدعے پہ آگئے

“جو کنسٹریکشن کمپنی اس عمارت کو تعمیر کر رہی ہے میں اس میں انسپیکشن آفیسر ہوں۔۔۔۔ میرا مطلب وہاں پہ سبھی کام کرنے والوں کی نگرانی کرنا۔ کام ٹھیک طرح سے ہورہا ہے یا نہیں۔۔۔۔۔ اس سب پہ نظر رکھنا وغیرہ وغیرہ۔۔۔۔” تابش کے جھوٹ بولنے کے رفتار کچھ زیادہ تیز ہوئی

“کتنے اور جھوٹ بولنے پڑیں گے۔۔۔۔۔۔۔” اس نے دل ہی دل میں سر گوشی کی

“ماشاء اللہ۔۔۔۔ ! کافی ذمہ داری والا کام ہے۔۔۔ اللہ پاک آپکو سرخرو کرے اور ترقی عطا کرے۔۔۔۔” مولوی صاحب نے پھر سے دعا دی۔

تابش نے چائے ختم کی اور جانے کے لیے کھڑا ہوا۔

“اب مجھے اجازت دیں۔۔۔۔ انشاء اللہ دوبارہ ملاقات ہوگی” وہ بولا

“اللہ پاک آپکو اپنی حفظ و امان میں رکھے۔۔۔ ضرور ملاقات ہوگی۔۔۔” مولوی صاحب کھڑے ہوگئے

تابش بیٹھک کے دروازے سے باہر گلی میں آگیا اور مولوی صاحب دروازے پہ ہی رک گئے۔تابش بائیک پہ سوار ہوا۔

“برخوادر۔۔۔ ! آپ نے جانا کدھر ہے۔۔۔؟ میرا مطلب گھر کہاں ہے آپکا۔۔۔؟” مولوی صاحب نے پوچھا

تابش نے ایک اور جھوٹ بولا۔ شہر کی آخری حدود میں جس علاقے میں تایا جی کا گھر تھا اس نے وہیں کا پتا بتایا۔

“اوہو۔۔۔ پھر تو آپ کافی دور سے آتے ہیں آپ۔۔۔۔۔ ” مولوی صاحب پریشان ہوکے بولے

“بس جی۔۔۔ کیا کریں کام بھی تو کرنا ہے۔۔۔۔” تابش نے سر جھکا کے کہا

“بے شک۔۔۔۔۔۔ آپ خیریت سے جائیں۔۔۔۔۔ فی امان اللہ۔۔۔” مولوی صاحب نے سلام کیا

تابش نے بائیک سٹارٹ کی اور گھر کی طرف نکل گیا۔ مولوی صاحب بھی دروازہ بیٹھک کا دروازہ اندر سے بند کیا۔

*******************************************************************

“تم نے عاصم کی آفر قبول کرلی۔۔۔۔؟” عمار نے بلئیرڈ سٹک ہاتھ میں پکڑتے ہوئے کہا

“یاں یار۔۔۔۔۔ ! تجھے پتا ہے نہ پیسوں کی ضرورت ہے۔ اس لیے مجبوراً ماننا پڑا۔۔” تابش نے شرمندگی چھپاتے ہوئے کہا

“ویسے مجھے بڑی حیرانی ہوئی کہ اتنے پیسوں کے لیے تم بک گئے۔۔۔۔۔ ” نومی کولڈ ڈرنک ہاتھ میں لیے تابش کے پاس کھڑا ہوا

“بس یار۔۔۔۔ تم لوگوں کے پاس سب کچھ ہے اس لیے یہ باتیں کررہے ہو۔۔۔۔ ” تابش نے دونوں کے چہروں پہ نظر دوڑائی پھر سر جھکا لیا

“وٹ ایور یار۔۔۔۔۔۔۔ انسان کی کچھ لمٹس ہوتی ہیں۔ یہ کام کچھ زیادہ ہی گرا ہوا ہے۔۔۔۔۔ اینی وے ۔۔۔ تمہیں کوئی پرابلم نہیں ہے تو ہمیں کیا ہوسکتی ہے۔۔۔۔” عمار نے کہا

“میں مجبور ہوں۔۔۔۔ تم لوگ نہیں سمجھو گے۔۔۔۔۔۔” تابش نے خفگی سے کہا

“کون مجبور ہے ۔۔۔۔؟ کسی کی مجبوریاں ڈسکس ہورہی ہیں۔۔۔۔۔؟” عاصم ان لوگوں کی طرف آتے ہوئے بولا

“ہم بس ایسے ہی اِدھر اٌدھر کی باتیں کررہے ہیں۔۔۔۔۔” تابش نے بات بدلی

“اینی پراگرس۔۔۔۔۔۔؟” عاصم نے اسکی آنکھوں میں دیکھتے ہوئے پوچھا

“یس۔۔۔۔۔ میں گیا تھا وہاں۔۔۔۔۔۔۔ مولوی صاحب سے دو تین بار ملاقات ہوئی ہے۔۔۔۔۔” تابش بتانے لگا

“اوہوو۔۔۔۔۔۔۔ مولوی صاحب۔۔۔۔۔ گریٹ۔۔۔۔ بڑی عزت افزائی ہورہی ہے مولوی صاحب کی۔۔۔۔۔ ہاہاہاہا۔۔۔۔” عاصم نے اسکا مذاق اڑایا

“یار وہ حقیقتاً بہت اچھے اور شریف لوگ ہیں۔۔۔۔۔ ” تابش نے اسکے کندھے پہ ہاتھ رکھا

“سو۔۔۔؟ میں نے کب کہا کہ وہ شریف لوگ نہیں ہیں۔۔۔۔؟ اب ملاّ شریف نہیں ہوں گے تو اور کون ہوگا۔۔۔۔۔۔ کیوں دوستو۔۔۔۔۔۔ ! ہاہاہاہا۔۔۔” اس نے عمار اور نومی کی طرف دیکھ کے زور دار قہقہہ لگایا جواباً وہ پھیکی ہنسی ہنسنے لگے

“عاصم۔۔۔۔۔ ! سیریسلی۔۔۔۔ انکے ساتھ ایسی حرکت کرنا نا مناسب ہے۔۔۔۔۔” تابش نے اسکی طرف دیکھا

“لسن یار۔۔۔۔۔ ہر دوسرے دن اچھائی کا کیا دورہ پڑتا ہے تجھے۔۔۔۔؟ نہیں کرنا مت کر پر مجھے سبق پڑھانے کی ضرورت نہیں ہے۔۔۔۔۔۔ تٌو ایسے کہہ رہا جیسے خود بہت نیک اور پرہیز گار ہو۔۔۔۔۔۔ آج تک ہاتھ آئی لڑکی جانے دی ہے؟؟ تجھے یاد بھی ہے کتنی لڑکیوں کے ساتھ راتیں رنگین کر چکا ہے۔۔۔۔۔۔۔ اب اچھائی یاد آرہی ہے” عاصم بھڑک گیا۔

“مانتا ہوں میں نیک اور پرہیز گار نہیں ہوں۔۔۔ پر آج تک جن لڑکیوں کے ساتھ بھی میرا تعلق رہا ہے وہ اسی ٹائپ کی تھیں۔۔۔۔ انھیں میرا جھوٹ سچ سب پتا تھا۔۔۔۔ لیکن یہ لڑکی اس ٹائپ کی نہیں ہے۔۔۔۔۔” تابش نے اسے سمجھانے کی کوشش کی

“ف۔۔۔۔۔ ود ہرّ ٹائپ۔۔۔۔ سمپل ہے تٌو ہاتھ کھڑے کردے میں کسی اور سے یہ کام کرالوں گا۔۔۔۔ پر پلیز مجھے لیکچر مت دے۔۔۔۔۔”عاصم کا غصہ آسمان کو چٌھو رہا تھا۔

“ریلیکس۔۔۔۔ ! تم میری بات سمجھ نہیں رہے۔۔۔۔” تابش اسکا غصہ ٹھنڈا کرنے کی کوشش کرنے لگا

“اینف۔۔۔۔۔ !” عاصم نے اسے ہاتھ کا اشارہ کیا تو وہ چپ ہوگیا۔

عمار اور نومی نے دونوں کو چپ کرایا۔ عاصم کا غصہ ٹھنڈا ہوا تو وہ پھر سے بولا

“دیکھ یار۔۔۔۔ میں اب بھی اوپنلی پوچھ رہا ہوں۔ تم یہ کام نہیں کرنا چاہتے تو میں تمہیں مجبور نہیں کروں گا” عاصم نے اس سے پوچھا

“یار عاصم۔۔۔ میں یہ کام کرنے سے منع نہیں کر رہا۔۔۔ اگر ایسا ہوتا تو کل میں اس مولوی کے گھر چائے نہ پی رہا ہوتا۔ اتنے دنوں اسی میں لگا ہوا ہوں۔۔۔۔۔” تابش بتانے لگا

“واؤ۔۔۔۔۔ چائے پی کے آیا۔۔۔۔ گڈگڈ۔۔۔۔ ایم شور اسی کے ہاتھ کی چائے ہوگی۔۔۔۔۔” عاصم نے اسے چھیڑتے ہوئے کہا

“ہاں۔۔۔۔ شائد۔۔۔۔” تابش بھی مسکرا دیا

“سو۔۔۔۔! دیدار بھی ہوئے ہا پھر خالی چائے سے گزارا کیا۔۔۔۔۔؟” عاصم اسکی آنکھوں میں دیکھنے لگا

“ارے ۔۔۔۔ دیدار کہاں یار۔۔۔۔ ابھی تو بس نام ہی۔۔۔۔۔۔ ” تابش نے بات ادھوری چھوڑ دی

“نام ہی مطلب؟۔۔۔۔۔۔ اوہ۔۔۔۔۔۔ کیا نام ہے اسکا؟ وہ نہیں تو اسکا نام لے کے ہی کروٹیں بدلتے رہیں گے۔۔۔۔” عاصم مستی کے انداز میں بولا

“میں کہہ رہا تھا نام بھی پتا نہیں چلا ابھی۔۔۔۔۔۔” تابش نے بات سنبھالی

“کیا ۔۔۔۔۔ ہیرو۔۔۔۔ ایک نام نہیں پتا کر پایا۔۔۔۔” عاصم نے بناوٹی خفگی ظاہر کی

“ویسے۔۔۔۔ نام تو تجھے بھی پتا ہونا چاہیے۔۔۔ یا پھر ایسے ہی بھوت سوار کر لیا خود پہ” تابش نے اسے گھیرا

“یار اس وقت بس اس پانے کا بھوت سوار تھا۔۔۔ نام میں کوئی دلچسپی نہیں تھی۔۔۔” عاصم نے بتایا

“تو نے اسکی شکل تو ضررو دیکھی ہوگی۔۔۔۔۔؟” تابش نے ایک اور سوال کیا

“کہاں یار۔۔۔۔۔ شکل کہاں دیکھی۔۔۔۔۔ بس کالے برقعے کے پیچھے لگا رہا کئی دن۔۔۔۔ جب شکل دیکھنے کی باری آئی تو ساری گیم پلٹ گئی۔۔۔۔” عاصم نے ایک گہری سانس لی

“واٹ۔۔۔۔ آر یو کریزی۔۔۔۔۔۔ اس لڑکی کو بنا دیکھے تو پاگل ہوا ہوا ہے۔۔۔۔؟” تابش نے کرسی سے لگ بھگ اچھل پڑا

“ایکچولی۔۔۔۔ میرا ایک بچپن کا یار ایجوکیشن ڈیپارٹمنٹ میں ہے۔ اسلامی مدارس کی سروے ٹیم کے ہمراہ اسکا چکر مدرسے میں لگا، وہیں کہیں اس کی نظر اس لڑکی پہ پڑی۔۔۔۔۔۔ وہ بھی پاگل ہوگیا تھا۔۔۔۔ یو نو اس رات وہ فارم ہاؤس پہ آیا اس لڑکی کو یاد کر کر کے تین بوتلیں غٹک گیا۔۔۔۔۔۔ میں نے بھی سوچا یار چیزہی ہوگی وہ۔۔۔۔ جس کو دیکھ کے یہ پاگل ہوا جارہا۔۔۔۔ تب میں بھی اسکے پیچھے پڑا۔۔۔۔ لیکن بد قسمتی۔۔۔۔ کچھ ہاتھ نہیں لگا۔۔۔۔” عاصم نے اپنے سارا قصہ سنا دیا۔

“تٌو اتنا سنسیبل ہے۔۔۔۔۔ پھر کیسے بنا دیکھا تیرے اوپر جنون سوار ہوگیا۔۔۔؟” تابش کو حیرانی ہوئی

“یار سچ بتاؤں تو اس وقت میں اس لڑکی کو بس دیکھنا چاہتا تھا۔۔۔ اسکے علاوہ میرے دل دماغ میں کچھ بھی نہیں تھا۔ لیکن مولوی نے پاپا کو میری شکائیت لگا کے جو حرکت کی ہے۔۔۔۔ میں بس اسکا بدلا لینا چاہتا ہوں ، ایک ضد سی سوار ہوگئی ہے۔۔۔۔دیٹس آل۔۔۔۔” عاصم نے بتایا

تابش کے موبائل کی بیل بجی ۔۔۔۔ فرّی کی کال تھی۔ تبھی اسکو یاد آیا کہ بابا کی دوائی ختم ہوگئی ہے وہ لے کے گھر جانا ہے۔

“چل یار۔۔۔۔ ! میں نکلتا ہوں۔۔۔۔ بابا کی میڈیسن گھر پہنچانی ہیں” وہ سبھی کو سلام کرکے فارمیسی سے دوائی لینے چل پڑا

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

مولوی صاحب کے گھر کے دروازے کے پہ دستک ہوئی۔ انھوں نے دروازہ کھولا تو سامنے تابش کھڑا تھا۔ وہ تابش کو دیکھ کے کافی خوش ہوئے اور بیٹھک کا دروازہ کھول کےا سے اندر بٹھایا

“مولوی صاحب آپ سے چھوٹا سا کام تھا۔۔۔۔۔” تابش نے آنے کی وجہ بتائی

“جی ۔۔۔۔۔ بیٹا۔۔۔ میں کیا مدد کر سکتا ہوں۔۔۔۔؟” مولوی صاحب نے پوچھا

” آپ تو جانتے ہیں ہر روز اتنی دور آنا جانا۔۔۔۔ بہت مشکل ہے۔۔۔ اس لیے جب تک کام مکمل نہیں ہوتا میں سوچ رہا ہوں اسی کالونی میں کہیں کوئی کمرہ دیکھ لیتا ہوں۔۔۔ آنے جانے کی تکلیف بھی کم ہوگی اور آپ سے بھی فیض حاصل کرنے کا موقع ملے جائے گا۔۔۔”تابش کے پلان کو انجام دینے کے لیے اسکا یہاں رہنا ضروری تھا

“کمرہ۔۔۔۔۔ کمرہ۔۔۔ تو مشکل ہی ملے ۔۔۔ پھر بھی میں پتا کرتا ہوں” مولوی صاحب نے سوچتے ہوئے جواب دیا

” آپ پتا کر لیں۔۔۔۔ میں کل پھر سے چکر لگا لیتا ہوں۔۔۔ ” تابش نے جواب دیا

مولوی صاحب تابش کے کمرے کی تلاش میں دماغ کے گھوڑے دوڑانے لگے۔

“ٹھیک ہے برخودار میں اپنے جاننے والوں سے پوچھتا ہوں، اگر کوئی مناسب جگہ میسر ہوئی تو میں کل تک بتا دوں گا۔۔۔۔ انشاء اللہ۔۔۔ آپ اپنا فون نمبر دے دیں۔ میں فون پہ ہی اطلاع کر دوں گا، تاکہ آپکو آنے کے زحمت نہ اٹھانی پڑے” مولوی صاحب بولے۔ جوابا! تابش نے سر ہلایا اور انکے موبائل میں اپنا نمبر سیوو کر دیا۔

تابش اس انتظار میں تھا کہ آج پھر سے نور کے ہاتھ کی چائے پینے کو ملے گی لیکن مولوی صاحب نے خبر دی کہ گھر پہ کوئی نہیں ہے اس لیے وہ چائے پانی کاانتظام نہیں کر پائیں گے۔ مایوس ہوکے تابش نے واپسی کا راستہ ناپا۔۔۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

اگلے دن رات کے کھانے کے بعد اباجی باہر ٹہلنے نکل گئے۔ فیزی اور فرّی امی کے ساتھ کیچن میں برتن دھونے میں مصروف ہوگئیں۔ تابش نے ٹی وی آن کر لیا

اسکے فون کی بیل بجنے لگی۔ مولوی صاحب کے نمبر سے کال آرہی تھی۔ تابش نے جلدی سے فون اٹھایا

“اسلام علیکم۔۔۔۔۔” کال اٹنڈ کرتے ہی وہ بڑے ادب سے بولا

“وعلیکم سلام ! برخودار میں مولوی نواز الدین بات کررہا ہوں۔۔۔” مولوی صاحب نے اپنا تعارف کرایا

“جی ۔۔۔ جی مولوی صاحب میں نے پہچان لیا ہے۔۔۔۔” تابش نے جواب دیا

“بیٹا آپ نے مجھے ایک ذمہ داری سونپی تھی۔۔۔ میں نے کوشش تو بہت کی لیکن کسی مناسب جگہ کا انتظام نہیں ہو پایا۔۔۔” مولوی صاحب نے تابش کو بتایا

“اوہ۔۔۔۔ اب کیا کریں۔۔۔۔؟ میں تو بڑی پریشانی میں آپکے پاس حاضر ہوا تھا” تابش نے بناوٹی اداسی ظاہر کی

“برخودار میں آپکی پریشانی سمجھتا ہوں۔ اس لیے میں نے سوچا ہے کہ آپ نے جتنے دن بھی قیام کرنا ہے میری بیٹھک حاضر ہے۔۔۔ ” مولوی صاحب شائستگی سے بولے

تابش خوشی کے مارے اچھل پڑا۔ اسکا تیر بالکل نشانے پہ جا لگا تھا

“ارے نہیں مولوی صاحب۔۔۔ آپکو خوامخواہ تکلیف ہوگی” تابش نے پھر سے ڈارمہ چالو کردیا

“بیٹا اس میں تکلیف کیسی۔۔۔۔ دن بھر آپ کام پہ ہوں گے رات میں تھک ہار کے سو جائیں گے۔۔۔ ” وہ بولے

“چلیں اگر آپ کہتے ہیں تو ٹھیک ہے۔۔۔۔ لیکن میرے ساتھ کرایہ پہلے طے کرلیں۔۔۔:” تابش نےکہا

“ارے بیٹا۔۔۔۔ کیوں شرمندہ کر رہے ہیں، بس آپ یہ بتائیں کے آنا کب سے ہے، تاکہ میں اچھی طرح صفائی کروا دوں” وہ مسکراتے ہوئے بولے

“کل سے۔۔۔۔ کل سے ہی آجاتا ہوں۔۔۔۔۔” تابش زیادہ انتظار نہیں کر سکتا تھا۔

“جیسے آپکی مرضی۔۔۔ انشاء اللہ کل ملاقات ہوتی ہے۔۔۔” مولوی صاحب بولے

“انشاء اللہ۔۔۔۔ بس کل آکے کرائے کے بات بھی طے کر لیتے ہیں۔۔۔” وہ بولا

اسکے بعد دونوں نے خدا حافظ بول کے کال کاٹ دی۔

تابش کی خوشی کی انتہا نہ تھی۔

بابا جیسے گھر واپس لوٹے وہ انکے کمرے میں گیا

“بابا۔۔۔۔ ! آپ سے اجازت چاہیے تھی۔۔۔” وہ سر جھکا کے بولا

“کیسی اجازت۔۔۔۔؟” بابا نے حیران ہوکے پوچھا

“کچھ دنوں کے لیے شہر سے باہر جانا ہے” وہ بولا

“خیریت۔۔۔۔! کہاں جانا ہے۔۔۔” وہ پوچھنے لگے

“میرا دوست عاصم ہے نا۔۔۔؟ اسکا ایک کام ہے۔۔۔ بس اسی سلسلے میں جانا ہے” اس نے بتایا

“لیکن کام کیا ہے۔۔۔؟” انھوں نے پھر سوال کیا

“کچھ پراپرٹی کے حوالے سے ہے۔۔۔ بس اسی کے ساتھ جانا ہے” اس نے جھوٹ بولا

“اچھا۔۔۔ ! کتنے دن لگیں گے۔۔۔؟” انکی سوال ختم ہی نہیں ہورہے تھے۔

“ہفتہ دس دن شائد۔۔۔۔۔ اس سے زیادہ بھی لگ سکتے ہیں” وہ سوچتے ہوئے بولا

“ٹھیک ہے۔۔۔ لیکن کام ختم ہوتے ہی گھر لوٹنا۔۔۔ ” انھوں نے حکم صادر کیا

“جی بابا۔۔۔۔ !” وہ سر جھکا کے واپس مڑا۔۔۔

اگلے دن وہ عشاء کے بعد بیگ میں کچھ کپڑے ڈال کے مولوی صاحب کے گھر کی طرف نکل پڑا۔ ابا جی نے خرچ اخراجات کے لیے کچھ پیسے بھی دے دیے۔

راستے میں تیز بارش شروع ہوگئی۔ وہ بھیگتے بھیگتے مولوی صاحب کے گھر پہنچا۔

انھوں نے انتہائی خوش دلی سے اسکا استقبال کیا۔

مولوی صاحب نے کھانا پیش کیا۔ کھانا کھا کے وہ کافی دیر بات چیت کرتے رہے۔ وقفے وقفے سے بارش اور تیز ہوا کا سلسلہ جاری رہا۔ اسلام اور حالات حاضرہ پہ باتوں کا لمبا سلسلہ چل نکلا ۔ مولوی صاحب کو جب نیند آنے لگی تو وہ سونے چلے گئے۔

یہ سوچتے سوچتے کہ وہ اپنی منزل کے کتنا قریب پہنچ چکا ہے اسکی بھی آنکھ لگ گئی۔۔۔

باہر ہلکی ہلکی ہوا چل رہی تھی، بیٹھک کا دروازہ شائد ٹھیک طرح سے بند نہیں ہوا تھا۔ دروازے کا ہلکا سا شور کانوں میں پڑنے سے آنکھ کھلی بے چینی میں وہ چارپائی سے اٹھ کے دروازے کی طرف بڑھا۔ جیسے ہی وہ دروازہ کھول کے بند کرنے لگا تو صبح کی شفق پھوٹ رہی تھی۔ اِدھر اٌدھر نظر دوڑائی اور ایک جگہ جا اسکی نگاہیں منجمد ہوگئیں

صحن میں چار پائی پہ براجمان وہ تلاوتِ قرآن پاک میں مشغول تھی۔ سر پہ دوپٹہ لپیٹے وہ کسی پری سے کم نہیں لگ رہی تھی۔ صبح کی مدہم سے روشنی اسکے چہرے سے ٹکرا کے نور میں بدل رہی تھی۔۔۔۔۔

وہ نور تھی۔۔۔۔۔

جاری ہے