غضب خدا کا بس یہی دیکھنا باقی تھا۔۔۔۔ میں پہلے ہی کہتی تھی یہ لڑکا ایک نہ ایک دن گل کھلائے گا۔ ۔۔۔۔۔” ناصرہ بیگم کے کانپتے ہاتھوں میں پستول تھا اور وہ چلا چلا کے سبھی گھر والوں کا اکھٹا کررہی تھیں

“کیا ہوا۔۔۔ امی۔۔۔؟” فرّی اپنے کمرے سے نکل کے ڈرائنگ روم میں پہنچی

“یہ دیکھ۔۔۔۔ دیکھ اپنے لاڈلے بھائی کی کرتوت۔۔۔۔ یہ اسکے کمرے کی الماری سے نکلا ہے۔۔۔۔ ” انکا اشارہ پستول کیا جانب تھا

پستول کو دیکھتے ہوئے پہلے پہل تو فرّی کے بھی چھکے چھوٹے لیکن جلدی اس نے خود کو سنبھالا اور ماں کے ہاتھ سے پستول پکڑ لیا۔

“کیا ہوا۔۔۔۔۔ ؟ اتنا شور کیوں ڈالا ہوا ہے”سیڑھیاں اترتے ہوئے فیزی بھی فرّی کے پاس آکے کھڑی ہو گئی۔ پر جیسے ہی نظر پستول پہ پڑی تو اسکے بھی رونگٹے کھڑے ہوئے۔

“گَنّ ۔۔۔۔۔ اوہ مائی گاڈ۔۔۔۔۔ فرّی کسی کا قتل کرنے جارہی ہو۔۔۔۔۔ ؟۔۔۔۔۔ خدارا مجھے بخش دینا” اس نے فرّی کی طرف ڈرتے ہوئے دیکھا۔جواباً فریحہ نے ہونٹوں پہ انگلی رکھ کے اسے چپ رہنے کا اشارہ کیا۔

“ہو نہ ہو۔۔۔ یہ پستول میرے لیے ہی رکھی ہوگی۔ ادھر میں نے کوئی ایسی ویسی بات کی ادھر اس نے میرے سر کا نشانہ لینا تھا” ناصرہ بیگم کو اپنی جان کے لالے پڑنے لگے۔

“اف ہو امی۔۔۔ آپ بھی حد کرتی ہیں۔۔۔ بھائی ایسا کیوں کرے گا؟ ” فرّی جھلا کے بولی

“ارے۔۔۔۔ ! مجھے کوئی بتائے گا کہ یہ چل کیا رہا ہے۔۔۔۔؟” فیزی پھر سے بولی

“امی کو بھائی کی الماری سے یہ گن ملی ہے۔۔۔ تب سے انھوں نے شور ڈالا ہوا ہے” فرّی نے اسے بتایا

“امی۔۔۔۔ آپ بھائی کے کمرے میں کیا کررہی تھیں۔۔۔۔؟ اور کیوں انکی الماری کی تلاشی لے رہی تھیں۔۔۔۔ آپکو پتا ہے نا۔۔۔۔ انکو بالکل پسند نہیں ہے کہ کوئی انکے کمرے میں گھسے یا سامان نے کی تلاشی لے۔۔۔۔۔” فیزی نے ماں کو لتاڑنا شروع کیا۔

“اور نہیں تو کیا۔۔۔۔۔ ہر بار جھگڑے کی شروعات آپ ہی کرتی ہیں۔۔۔۔۔ ” فرّی نے بھی فیزی کا ساتھ دیا۔

“یہ لو۔۔۔۔۔ ! شروع ہوگئیں دونوں ۔۔۔۔ ماں کی تو کوئی اوقات ہی نہیں ہے۔۔۔ سوتیلے بھائی کی فکر ہے بس۔۔۔۔۔ ” ناصرہ بیگم غمزدہ ہوئیں

“اف۔۔۔ امی آپ پھر سے سگے سوتیلے کا پاٹ پڑھنے لگیں۔۔۔۔ خدارا بس کریں” فرّی بولی

“تابش بھائی آپکے لیے سوتلیے ہوں گے پر ہمارے لیے وہ سگے ہیں۔۔۔ بلکہ سگوں سے بھی بڑھ کے۔۔۔۔۔۔ ” فیزی نے بھی طرفداری شروع کر دی

“بس کرو تم دونوں ۔۔۔ بہت ہوا ۔ آنے دو تمہارے ابا کو۔۔ یہ پستول والا کارنامہ تو بتا کے ہی رہوں گی۔۔۔۔ ” ناصرہ بیگم پھر تلملا گئیں

“امی۔۔۔۔ خدا کا واسطہ ہے آپ نے ابا سے کوئی بات نہیں کرنی۔ پہلے ہم بھائی سے خود بات کریں گے اسکے کے بعد دیکھیں گے کہ کیا کرنا ہے۔۔۔۔۔” فیزی نے ماں کے سامنے ہاتھ جوڑ لیے

“ہائے۔۔۔ میرے خدایا۔۔۔ میری سگی اولاد میری نہیں رہی۔۔۔۔۔ مالک ۔۔۔! مجھے اٹھا ہی لے۔۔۔۔ ” ناصرہ بیگم نے آسمان کی طرف ہاتھ بلند کیے

فرّی اور فیزی دونوں ماں کی طرف بڑھیں اور انکے کندھے پہ ہاتھ رکھ دیے۔ ناصرہ بیگم نے دونوں کے ہاتھ جھٹکے دیے

“کرو ۔۔۔۔ جو بھی کرنا ہے۔۔۔۔ میں کچھ نہیں بولوں گی۔۔۔ پر یاد رکھنا یہ لڑکا غلط رستوں پہ چل رہا ہے۔۔۔۔۔ ” یہ کہہ کے وہ اپنے کمرے کی طرف بڑھیں۔

فرّی اور فیزی ایکدوسرے کا منہ دیکھنے لگیں۔

“فیزی ۔۔۔۔ ! یہ گن جا کے بھائی کی الماری میں رکھ دے۔۔۔ پلیز۔۔۔۔ جب وہ آئیں گے تو ان سے بات کرتے ہیں” فرّی نے گن فیزی کی طرف بڑھائی

“نہ بابا۔۔۔۔۔ مجھے بڑا ڈر لگتا ہے ایسی چیزوں سے۔۔۔۔۔ خود ہی جا کے رکھ دو۔۔۔۔” وہ خوفزدہ ہو کے پیچھے ہٹی

“ڈرپوک۔۔۔۔۔۔۔ ! ” فرّی تیوری چڑھا کے تابش کے کمرے کی طرف چل پڑی

“فرّی۔۔۔۔۔!” فیزی نے آواز دی

“اب کیا ہے۔۔۔۔۔؟” وہ پیچھے مڑی

“سنبھال کے ۔۔۔۔ ہاں ۔۔۔۔۔۔ کہیں غلطی سے چل گئی تو میں اکیلی ڈاکٹر بن کے کیا کروں گی۔۔۔۔۔۔؟” فیزی نے اسے چھیڑا

“شٹ اپ۔۔۔۔۔۔ ! ” فریحہ ہنستے ہوئے اندر چلی گئی

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

عشاء کی اذان ہورہی تھی

“فرّی۔۔۔۔ ! اٹھ نماز پڑھ لیں۔۔۔ پھر آسائنمنٹ مکمل کرتے ہیں” فیزی نے کتاب بند کرتے ہوئے کہا۔

“ہاں۔۔۔۔۔ چلو تم وضو کرو میں بھی آتی ہوں۔۔۔۔۔ ” فرّی اب بھی نوٹس پہ جھکی ہوئی تھی۔

گاڑی کے ہارن کی آواز کانوں میں پڑی تو وہ دونوں چونکی

“بابا آگئے۔۔۔۔۔ !” فرّی نے کہا

“ہاں۔۔۔۔۔ چل پہلے امی سے درخواست کرتے ہیں کہ بھائی کے قصے ابھی نہ کھولیں” فیزی بولی

“چلو۔۔۔۔ چلو۔۔۔ اس سے پہلے کے امی کی نان سٹاپ گاڑی چل پڑے انھیں روکنا ہوگا” یہ کہتے ہوئے فرّی اٹھ کھڑی ہوئی

بابا آتے ہی نماز کا وضو کرنے لگے۔ اور وہ دونوں امی کے پاس کیچن میں پہنچیں

“کیا چاہیے۔۔۔۔؟” ناصرہ بیگم نے دونوں بیٹیوں کے سوالی چہروں پہ نظر دوڑائی

“امی پلیز۔۔۔۔ پلیز۔۔۔۔ بابا کو بھائی کی شکائیت مت لگائیے گا۔۔۔۔ پلیز” فیزی نے ہاتھ باندھ کے منت کی

“میرا اللہ ہی محافظ ہے۔۔۔۔ میں تو تھک گئی ہوں ان دونوں لڑکیوں سے۔ ۔۔۔” وہ گہری سانس لے کے بولیں

“امی۔۔۔۔۔ وعدہ کریں نہ ۔۔۔ پلیز” فرّی نے کہا

“اچھا۔۔۔۔ اچھا۔۔۔ نہیں لگاتی شکائیت۔۔۔۔۔ لیکن تم لوگ غلط چیز میں اسکی طرف داری کر رہے ہو۔۔۔۔” ناصرہ بیگم کے ماتھے پہ بل تھے۔

“تھینک یو ۔۔۔۔۔ امی۔۔۔۔ !” دونوں نے یک زبان ہو کے کہا

“تم لوگ جلدی سے نماز پڑھ لو۔۔۔۔ پھر کھانا لگاتی ہوں۔۔۔۔ تمہارے پیارے بھائی نے تو رات کے دو بجے ہی آنا ہے۔۔۔۔۔ اسکا انتطار کرنا فضول ہے۔۔۔۔” انھوں نے پھر سے کوسنا شروع کیا۔

وہ دونوں اپنے کمرے میں چلی گئیں

نماز سے فارغ ہوکے سبھی ڈائننگ ٹیبل پہ جمع ہوئے

“تابش نہیں آیا ابھی۔۔۔۔۔؟” ابا جی نے پوچھا

“آپکا بیٹا پہلے کبھی وقت پہ گھر لوٹا ہے؟” ناصرہ بیگم پھر سے شروع ہوئیں

دونوں بیٹیوں نے گھورا تو انھوں نے جلدی سے بات بدلی

“میرا مطلب۔۔۔۔ پڑھائی سے جب سے فارغ ہوا ہے۔۔۔۔ دوستوں کے ساتھ گھومتا پھرتا رہیتا ہے۔ دیر سے ہی آتا ہے” دل میں بھری کڑواہٹ کو با مشکل وہ مٹھاس کا رنگ دے رہی تھیں

“بھائی آجکل جاب کی بھی ٹرائی کررہے ہیں نا۔۔۔۔ اس وجہ سے روزانہ کئی لوگوں سے ملنا پڑتا ہوگا ۔۔۔۔۔۔ اسی لیے دیر ہو جاتی ہے ۔۔۔۔۔” فیزی نے بات سنبھالی

“بھئی۔۔۔۔ اس لڑکے کی سوچ تو میری سمجھ سے باہر ہے، کئی بار کہا ہے، میرے ساتھ آکے دکان پہ بیٹھے۔۔۔ میرے بعد کس نے یہ کاروبار سنبھالنا ہے۔۔۔۔ لیکن برخودار کے خواب ہی کچھ اور ہیں۔۔۔۔۔ نوکری کرنی ہے لیکن کاروبار نہیں۔۔۔۔۔ ” ابا جی نے خفگی سے کہا

“بابا۔۔۔۔ ! ‘ایم بے اے’ کرکے بھائی ہارڈ وئیر کی دکان سنبھالیں گے؟” فرّی نے سوال کیا

“بھائی کی چمچیاں۔۔۔۔۔۔ !” ناصرہ بیگم لبوں میں بڑبڑائی اور دونوں بیٹیوں کو خونخوار نظروں سے دیکھا۔ جواباً دونوں نے سر جھکا لیے

“بیٹا۔۔۔۔ اعلیٰ تعلیم یافتہ ہونا اچھی بات ہے، لیکن اپنے کاروبار اور کسی کی نوکری کرنے میں زمین آسمان کا فرق ہے۔۔۔ کاروبار کاروبار ہے اور نوکری نوکری۔۔۔۔” ابا جی نے فرّی کی بات کا جواب دیا۔

دروازے پہ بائیک کا ہارن بجا۔

“لگتا ہے بھائی آگئے۔۔۔۔۔۔! میں دروازہ کھولتی ہوں۔۔۔۔۔” فیزی جلدی سے دروازے کی طرف بڑھی

دروازہ کھلا تو تابش نے بائیک اندر سرکائی۔۔۔۔

“بچو۔۔۔۔۔۔ ! آج تو آپکی خیر نہیں ہے۔۔۔۔۔” فیزی اسکے سامنے جا کے کھڑی ہوئی

“کیوں۔۔۔۔ کیا ہوا۔۔۔۔؟” تابش نے ماتھے پہ بکھرے بال پیچھے کیے۔

“آپکی چوری پکڑی گئی ۔۔۔۔۔ اور وہ بھی امی نے پکڑی۔۔۔۔۔ سوچیں کیا سین ہوگا؟” فیزی نے آنکھیں پھیلاتے ہوئے تابش کو ڈرانے کے کوشش کی

“کونسی چوری۔۔۔۔۔؟” وہ حیران ہوا

“وہ میں بعد میں بتاتی ہوں۔۔۔۔ فا لحال میں نے اور فرّی نے بات سنبھال لی ہے۔۔۔۔ اب آپ جلدی سے اندر چلیں ۔۔۔۔۔ بابا آپکو یاد کر رہے ہیں۔۔۔۔۔” اس نے تابش کو اندر جانے کا اشارہ کیا۔ اور خود گیٹ بند کرنے لگی

“السلام علیکم۔۔۔۔۔۔ !” تابش نے اندر داخل ہوتے ہیں سلام کیا

“و علیکم سلام۔۔۔۔۔۔ !” ابا جی نے جواب دیا ۔ ناصرہ بیگم کی خفگی انکے ماتھے سے عیاں تھی۔ فرّی نے آنکھوں ہی آنکھوں میں ناموافق حالات کی اطلاع دی

“بیٹھو ۔۔۔۔ ! کھانا کھاؤ۔۔۔۔” اباجی نے اسے بیٹھنے کا اشارہ کیا

فیزی بھی اندر آئی اور اپنی کرسی سنبھال لی

“نہیں۔۔۔۔۔۔ وہ میں دوست کی طرف کھانا کھا کے آیا ہوں۔۔۔” وہ بیٹھتے ہوئے بولا

“بیٹا۔۔۔۔ کتنی بار کہا ہے کہ کچھ بھی ہوجائے رات کا کھانا گھر میں سب کے ساتھ کھانا چاہیے۔۔۔ اس سے محبت بڑھتی ہے” ابا جی یہ تلقین پہلے بھی کئی بار کرچکے تھے۔

“محبت بڑھتی ہے۔۔۔۔۔۔۔۔ ہونہہ۔۔۔” ناصرہ بیگم پھر سے لبوں میں بڑبڑائی

تابش نے سر جھکا لیا اور کوئی جواب نہیں دیا

“کیا بنا نوکری کا۔۔۔۔۔؟” ابا جی نے سوال داغا

“نوکری۔۔۔۔؟ کس کی نوکری۔۔۔۔؟” تابش نے حیران ہو کے پوچھا

ابا جی سر اٹھا کے اسکی طرف دیکھنے لگے

” بھائی۔۔۔۔ بابا آپکی نوکری کا پوچھ رہے ہیں۔۔۔۔۔ آپ نے بتایا تھا نا کہ آپ نوکری ڈھونڈ رہے ہیں۔۔۔۔۔” فرّی نے آنکھیں پھیلا کے تابش کو اشاروں سے سمجھاتے ہوئے بتایا کہ کیسے انھوں نے اسکو بچانے کے لیے جھوٹ بولا

“اوہ۔۔۔۔ ہاں۔۔۔۔ نوکری۔۔۔۔۔ میری نوکری۔۔۔۔۔ کوشش تو کررہا ہوں۔ پر آپکو پتا ہے نہ پاکستان میں نوکریوں کے کتنے برے حالات چل رہے ہیں۔۔۔۔ ” تابش نے فوراً بہنوں کا اشارہ پکڑا

امی نے تینوں کی آنکھوں کی زبان پڑھ لی اور دونوں بیٹیوں کو گھورنے لگیں

“جب اتنا اچھا کاروبار چل رہا ہے تو کیا ضرورت ہے نوکری ڈھونڈنے کی۔۔۔؟” ابا جی کے تیور بدلے

تابش نے بے بسی میں فیزی اور فرّی کے چہروں کو دیکھا، جیسے کہہ رہا تھا کہ بچانے اور پھنسانے میں فرق ہوتا ہے۔

“آپ ٹھیک کہہ رہے ہیں۔۔۔ لیکن قسمت آزمانے میں کیا حرج ہے؟ ہو سکتا ہے اچھی نوکری مل جائے” تابش نے سر جھکا کے کہا

“جی ۔۔۔ جی ضرور قسمت آزمائیں۔۔۔ جب تھک جائیں تو دکان سنبھالنے آجائیے گا” ابا جی یہ کہہ کے اٹھ کھڑے ہوئے

تابش نے انکی بات کا کوئی جواب نہیں دیا۔ کھانا کھانے کے بعد انکی عادت تھی کہ وہ چہل قدمی کرنے باہر نکل جاتے تھے۔

تابش اپنے کمرے میں چلا گیا۔ فرّی اور فیزی امی کے ساتھ برتن سمیٹنے لگیں۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

تابش کے روم کا ڈور ناک ہوا

“کم ان۔۔۔۔!” اس نے جواب دیا

فرّی اور فیزی اسکے روم میں آگئیں

“تم لوگوں نے مجھے صحیح پھنسایا آج۔۔۔۔۔” تابش بیڈ پہ ٹانگیں پھیلا کے بولا

“لو۔۔۔۔ بچایا یا پھنسایا۔۔۔۔۔؟” فیزی تیوری چڑھا کے بولی

“جب میں نوکری ڈھونڈ ہی نہیں رہا تم لوگوں نے بابا کو جھوٹ کیوں بولا۔۔۔” وہ تلملایا

“بچو۔۔۔۔ ! اگر ہم یہ جھوٹ نہیں بولتے تو امّی آپکے سارے پول کھولنے کو تیار تھیں۔۔” فرّی نے تابش کے بیڈ پہ چھلانگ لگائی اور اسے پاس آکے بیٹھ گئی

“کیسے پول۔۔۔۔۔۔؟ ” اس نے حیرانی سے دونوں کو دیکھا

“گنّ والا پول۔۔۔۔۔۔۔ !” فیزی بھی پاس آ کے بیٹھ گئی

“گنّ۔۔۔۔ ؟ کونسی گنّ ؟” وہ ہڑا بڑایا

“الماری سے نکال کے دیکھاؤں یا پھر صرف ہلیہ بتا دوں۔۔۔۔؟” فرّی چڑ کے بولی

“شِٹ۔۔۔۔۔۔ تم لوگوں کو کیسے پتا چلا۔۔۔۔۔۔؟” وہ اچھل کے الماری کی طرف لپکا

“بائی دا وے۔۔۔۔۔ جب میں نے تم لوگوں کا سختی سے منع کیا ہے کہ میری چیزوں کو کوئی ہاتھ نہیں لگائے گا، پھر بھی تم دونوں باز نہیں آتیں۔۔۔۔؟” غصے میں اسکی ناک پھول گئی

“ایکسکیوز می۔۔۔۔۔۔ بھائی ہم نے آپکی الماری کی تلاشی نہیں لی۔۔۔۔ امی سے پوچھیں انھیں یہ گنّ ملی تھی۔ پتا ہے ہمیشہ کی طرح انھوں نے ہنگامہ کھڑا کردیا تھا۔ کتنی مشکل سے منت سماجت کرکے انھیں چپ کرایا۔ ۔۔۔۔” فیزی نے خفگی سے اسے دیکھا

“امّی کا تو پورا پلان تھا کہ آج کے آج ہی آپکا بھانڈہ پھوڑ دیں وہ تو ہم دونوں کا احسان مانیں جو انکی بریکس کَس کے رکھیں۔۔۔۔۔۔” فرّی نے بھی فیزی کا ساتھ دیا

“اف۔۔۔۔ خدایا۔۔۔۔ یہ امّی کو میرے ساتھ دشمنی کیا ہے آخر۔۔۔۔؟ میں ابھی جا کے بات کرتا ہوں ان سے۔۔۔۔۔۔” وہ کمرے سے باہر جانے لگا۔

فرّی اور فیزی نے جلدی سے اسکا راستہ روکا

“بھائی۔۔۔ ! فار گاڈ سیک۔۔۔۔۔ آپ کو پتا ہے بات بڑھ جائے گی۔۔۔۔ بامشکل انھیں راضی کیا ہے کہ وہ بابا سے کوئی بات نہ کریں۔ آپ انھیں پھر سے موقع دے رہے ہیں” فیزی چلانے لگی

“اور ویسے بھی اس بار غلطی امّی کہ نہیں آپکی ہے، گھر میں وہ ایسی چیزیں دیکھیں گی تو پریشان تو ہوں گی نا۔۔۔۔” اس نے اپنی بات جاری رکھی

تابش واپس بیڈ پہ بیٹھ گیا۔

“اب تم لوگوں کو کیا چاہیے؟۔۔۔۔ دیکھو۔۔۔ اگر پیسے چاہییں تو میری جیب بالکل خالی ہے۔۔۔۔” اس نے منہ بنا کے بولا

“نہیں ۔۔۔ ہمیں پیسے نہیں چاہیے۔۔۔بلکہ۔۔۔۔۔ ” فرّی نے فیزی کی طرف دیکھتے ہوئے کہا

“بلکہ۔۔۔۔۔؟ کیا؟۔۔۔۔ کیا چاہیے جلدی بتاؤ۔۔۔۔۔” تابش بھڑک کے بولا

“آپ ہمیں سنیما مووی دیکھانے لے جائیں گے۔۔۔۔۔۔ بس” فیزی بولی

“واٹ۔۔۔۔۔۔ نو وے۔۔۔۔ بابا کو پتا چلا تو میرے ساتھ ساتھ تم دونوں کو بھی جوتیاں پڑیں گی۔۔۔۔۔” وہ جھلا کے بولا

“بابا کو بتائے گا کون؟ ہم چپ چاپ جائیں گے ، مووی دیکھ کے گھر واپس۔۔۔۔” فرّی نے آئیڈیا دیا

“ہرگز نہیں۔۔۔۔ میں تو نہیں لے جاؤں گا۔۔۔۔۔۔ ” اس نے نفی میں سر ہلایا

“ٹھیک ہے۔۔۔۔۔ مت لے جائیں۔۔۔ چل فرّی۔۔۔ امی کو کہہ دیتے ہیں کہ انھیں کھلی چھٹی ہے جتنی مرضی شکائیتں لگائیں، ہم بیچ میں نہیں بولیں گے۔۔۔” فیزی بیڈ سے نیچے اتر کےجوتا پہننے لگی

“ہاں۔۔۔ ٹھیک ہے، ہمیں خوامخواہ انکی خاطر امّی کی باتیں سننی پڑتی ہیں۔۔۔ چلو۔۔۔” وہ دونوں دروازے کی طرف بڑھیں

“رکو۔۔۔۔۔ بلیک میلر لومڑیاں۔۔۔۔!۔۔۔۔ لے جاؤں گا” تابش نے ہار مان لی

ان دونوں کے چہرے پہ مسکراہٹ پھیل گئی۔

“تھینک یو۔۔۔۔۔۔ بھائی!” وہ دونوں یک زبان ہو کے بولیں

“چلو۔۔۔۔ اب بھاگ جاؤ۔۔۔ مجھے ضروری کام ہے۔۔۔۔” تابش نےناگواری سے کہا

“جی۔۔۔ جی۔۔۔ سب پتا ہے کونسا کام ہے۔۔ ہم کمرے سے نکلیں گے اور آپ نے فون کان کے ساتھ لگا لیں گے۔۔۔۔۔۔ ” ان دونوں نے اسے چھیڑا

تابش نے انھیں گھورا تو وہ ہنستی ہوئی کمرے سے باہر نکل آئیں۔

تابش دو سال کا تھا تو والدہ انتقال کر گئیں۔ فاروق صاحب نے ناصرہ بیگم سے دوسری شادی کی تاکہ تابش کو ماں کی پرورش مل سکے۔ اگرچہ ناصرہ بیگم نے تابش پہ سوتیلی ماں والے مظالم نہ ڈھائے لیکن دونوں کے بیچ سگّے سوتیلے والی دیوار ہمیشہ قائم رہی۔ نہ تو تابش نے کبھی ناصرہ کو ماں کے روپ میں قبول کیا اور نہ ہی ناصرہ اسے بیٹا بنا پائی۔ شادی کے چند سال بعد ناصرہ بیگم کو اللہ پاک نے دو جڑواں بیٹیوں سے نوازا۔ فریحہ اور فائزہ جڑواں ضرور تھیں لیکن ایکدوسرے سے بالکل الگ ، نہ شکل و صورت ایک جیسی تھی اور نہ ہی سوچ۔ بس دو ہی چیزوں میں انکی سوچ ملتی تھی، ایک تو تابش سے دونوں بے حد محبت کرتی تھیں اور دوسرا دونوں کو ہی ڈاکٹر بننے کا جنون تھا۔ اللہ پاک نے انھیں اس جنون اور محنت کا پھل دیا، دونوں بہنوں کا ایک ہی میڈیکل کالج میں داخلہ ہوا۔ تابش نے’ایم بی اے فنانس’ کیا۔ نوکری کرنے میں اسے بالکل دلچسپی نہیں تھی اور نہ ہی وہ باپ کی ہارڈ وئیر کی دکان سنبھلالنا چاہتا تھا۔ جہاں فاروق صاحب اس بات سے پریشان تھے کہ بیٹا آخر کرنا کیا چاہتا ہے وہیں تابش کے دل میں کچھ اور ہی کھچڑی پک رہی تھی۔

فاروق صاحب نے تابش کی پڑھائی میں کوئی کسر نہیں چھوڑی، ہمیشہ سے اچھے سکولوں میں پڑھایا اور اسی وجہ سے تابش کا اٹھنا بیٹھنا اپنے سے زیادہ امیر کبیر لوگوں میں رہا۔ اسکے جتنےبھی دوست تھے سبھی ہائی کلاس سے تعلق رکھتے تھے۔ اور یہی وجہ تھی کہ اسکے دل و دماغ پہ بھی ہائی کلاس سوچ سوار تھی۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

ناشتے کے وقت ہی فیزی اور فرّی نے اباجی سے دوست کی سالگرہ پارٹی میں جانے کی اجازت لے لی اور ابا جی نے تابش کو حکم صادر کیا کہ وہ ان دونوں کو پارٹی میں لے جائے اور پارٹی ختم ہونے کے بعد واپس بھی لے آئے۔

شام ہوئی تو تینوں خوشی خوشی گھر سے نکل گئے۔ سالگرہ پارٹی تو بہانہ تھا دراصل آج سینما جانے کا پلان تھا۔ فلم دیکھنے کے بعد آئس کریم کھائی اور رات کے گیارہ بجے گھر واپس لوٹے

گھر پہنچتے ہی اباجی نے انکا استقبال کیا۔

“بیٹا۔۔۔ ! اگر اس عمر میں کورٹ کچہریوں کے چکر لگوانے ہیں تو پہلے بتا دو، تاکہ میں دماغی طور پہ خود کو تیار کرلوں” ابا جی کا موڈ بہت خراب تھا

“کیوں۔۔۔ ! کیا ہوا؟” تابش نے پوچھا

فیزی اور فرّی کی نظریں ماں پہ جمی تھیں

“جوان بیٹا جب جیب میں پستول لے کے گھومے تو باپ کے برے دن شروع ہو جاتے ہیں” ابا جی غصے سے لال پیلے ہورہے تھے

تابش نے سر جھکا لیا۔

ناصرہ بیگم نے دونوں بیٹیوں کو کمرے میں جانے کا اشارہ کیا

“بیٹا ۔۔۔۔ ! آج بتا ہی دو کہ چاہتے کیا ہو؟ ڈگری مکمل کیے چھ مہینے گزر چکے ہیں نا تو نوکری کی کوئی خبر ہے اور نہ تم دکان پہ بیٹھنا چاہتے ہو۔۔۔” ابا جی نے اپنی بات جاری رکھی۔

“بیٹا جوان ہو تو باپ کا بوجھ ہلکا ہو جاتا ہے پریہاں تو معاملہ ہی الٹ ہے” ناصرہ بیگم نے جلتی میں تیل ڈالا

فاروق صاحب نے انھیں چپ رہنے کا اشارہ کیا

“آپ اب بھی مجھے ہی چپ کرا رہےہیں۔ اسکے کرتوت نہیں دیکھے، اسکی وجہ سے میری بیٹیاں بگڑ رہی ہیں” ناصرہ بیگم بڑبڑاتے ہوئے وہاں سے چلی گئیں۔

“تابش۔۔۔۔۔ ! میں تم سے کچھ پوچھ رہا ہوں۔ کیا سوچا ہے تم نے اپنی زندگی کا؟” ناصرہ بیگم کے جانے کے بعد فاروق صاحب پھر سے بولے۔

“بابا۔۔۔ ! میں باہر جانا چاہتا ہوں۔۔۔۔؟” سر جھکائے ہی وہ بولا

“باہر ۔۔۔۔ باہر کہاں۔۔۔۔؟” انھوں نے پوچھا

“کینیڈا۔۔۔۔۔ ! میرے کافی دوست وہاں ہیں۔۔۔۔ میں بھی جانا چاہتا ہوں” اس نے وضاحت کی

“دیکھو تابش۔۔۔۔ میں نے تمہیں کئی بار پہلے یہ بات سمجھائی ہے کہ تمہارے دوست جس طبقے سے تعلق رکھتے ہیں ہم انکی برابری نہیں کر سکتے۔۔۔۔ تمہارے اوپر بہت ذمہ داریاں ہیں۔۔۔۔ دو بہنوں کا بوجھ ہے۔۔۔۔ ” فاروق صاحب کرسی پہ بیٹھ گئے

“بابا۔۔۔۔ وہی ذمہ داری تو اٹھانا چاہتا ہوں، یہاں دو ٹکے کی نوکری کرکے یا پھر دکان چلا کے نہیں۔۔۔ میں اس سے آگے بڑھنا چاہتا ہوں۔۔۔ ترقی کرنا چاہتا ہوں” اس نے نظریں اٹھا کے باپ کے چہرے کی طرف دیکھا

“ذمہ داری اٹھانے کے لیے ذمہ دار ہونا ضروری ہے جو تم نہیں ہو۔۔۔۔ اور رہی بات باہر جانے کی تو میرے پاس اتنی آمدن نہیں ہے کہ اس گھر کو چلاؤں اور تمہیں بھی باہر بھیجوں۔۔۔۔ ” فاروق صاحب نے ہاتھ کھڑے کر دیے

“ٹھیک ہے پھر، میری بات بھی بالکل صاف ہے، میں یہاں پہ رہ کے نوکری کروں گا اور نہ ہی دکان پہ بیٹھوں گا۔۔۔۔” یہ کہہ کہ اس نے بائیک نکالی اور باہر چلا گیا۔

فاروق صاحب حیرت کے عالم میں اسے باہر جاتا دیکھتے رہے۔ ایسا پہلی بار ہوا تھا وہ اس انداز میں ان سے بات کرکے گیا تھا۔

گھر سے نکل کے وہ سنوکر کلب پہنچا جہاں اسکے دوستوں کی محفل جمتی تھی۔ آج اس نے کسی کے ساتھ گیم نہیں لگائی اور ایک طرف جا کے سگریٹ سلگا لی۔

“کیا بات ہے ہیرو۔۔۔۔۔ ! اپ سٹ لگ رہا ہے” عمار اسکے پاس آکے بیٹھ گیا

“کچھ نہیں بڈّی ۔۔۔۔۔ بس ایسے ہی۔۔۔۔” وہ بولا

“کیا چل رہا ہے۔۔۔۔۔ آج کوئی گیم نہیں ہورہی ۔۔۔ ہر طرف اداسی پھیلی ہے” نومی بھی ان دونوں کے پاس آکے بولا

“اپنے ہیرو کا موڈ آف ہے۔۔۔۔۔ بتا بھی نہیں رہا۔۔۔۔” عمار نے اسے جواب دیا

“کیا ہوا یار۔۔۔۔۔؟ بچی وچی کا چکر ہے یا کچھ اور۔۔۔۔؟” وہ ہنستے ہوئے بولا

تابش ان دونوں کی باتیں سنتا رہا لیکن کوئی جواب نہیں دیا

“ارے یار۔۔۔۔۔ تو بھی نا۔۔۔۔ اپنے ہیرو کو بچیوں کی کمی ہے۔۔۔۔۔ ایک سے بڑھ کے ایک مال جیب میں لے کے گھومتا ہے۔۔۔۔ کچھ اور ہی وجہ لگتی ہے۔۔۔۔۔” عمار نے اسے جواب دیا

“تو۔۔۔۔؟ ہوا کیا ہے۔۔۔۔۔ دوست؟” نومی نے تابش کے کندھے پہ ہاتھ رکھا

“کچھ نہیں یار۔۔۔۔۔ گھر والوں کی وجہ سے پریشان ہوں۔۔۔۔۔” اس نے سگریٹ کا لمبا کش لیا

“واٹ ہیپنڈ ۔۔۔۔۔؟” عمار نے سنجیدگی سے پوچھا

“یار ۔۔۔! بابا کو باہر جانے کا بولا تو الٹا انھوں نے ڈانٹ دیا۔ انھیں لگتا ہے میں غیر ذمہ دار ہوں۔۔۔۔۔ وہ چاہتے ہیں میں انکی دکان سنبھال لوں لیکن میں آگے بڑھنا چاہتا ہوں۔۔۔ انھیں میری بات سمجھ نہیں آتی” وہ بتانے لگا

“یار برا مت منانا۔۔۔۔ مڈل کلاس کا یہ بہت بڑا المیہ ہے تم لوگ بس ایک ہی بِل میں گھسے رہنا چاہتے ہو۔۔۔۔۔ آئی ڈونٹ نو۔۔۔۔ تم لوگ ترقی پسند کیوں نہیں ہوتے” نومی نے سگریٹ کی ڈبیا سے سگریٹ نکالتے ہوئے کہا

“وہی تو یار۔۔۔۔۔۔ اب جب میں ترقی کرنا چاہتا ہوں تو کوئی بھی ساتھ دینے کو تیار نہیں ہے۔۔۔۔” اس نے کرسی گھما کے اپنا رخ اسکی طرف کیا

“برو ۔۔۔ ! سمپل سی بات ہے۔ تجھے خود ڈسیین لینا پڑے گا، یہیں پہ رہنا یا آگے نکلنا ہے” عمار بولا

“یار سمجھ نہیں آتا کیا کروں۔۔۔۔ بابا کہتے ہیں انکے پاس اتنی آمدن نہیں ہے کہ مجھے باہر بھیج سکیں” وہ اداس ہو کے بولا

انکی ابھی باتیں چل ہی رہی تھیں۔ عاصم بھی آگیا تینوں کو ہیلو بول کے ایک کرسی پکڑی لی۔ تابش کے سبھی دوستوں میں سے عاصم امیر کبیر باپ کا بیٹا تھا۔

“وٹس ہیپننگ ۔۔۔۔؟” اس نے تینوں کے چہروں پہ نظر دوڑائی۔

“نتھنگ۔۔۔۔۔ آج ہمارا ہیرو اداس ہے۔۔۔۔۔ اسی کے مسئلے سن رہے ہیں۔۔۔۔ بائی دا وے۔۔۔۔ تمہارا چہرہ کیوں سرخ ہورہا ہے” عمار نے جواب دیا

“یار ڈیڈ سے لڑائی کر کے آرہا ہوں۔ ۔۔۔۔ ” عاصم نے جواب دیا

اسکے اس جواب پہ نومی اور عمار ہنس پڑے، تابش کے چہرے پہ بھی مسکراہٹ پھیل گئی۔

“اب کس بات پہ لڑائی ہو گئی۔۔۔۔۔۔۔؟” عمار نے پوچھا

“یار وہ ڈی بلاک والی مسجد کے پیش امام شکائیت لے کے پہنچ گئے۔۔۔۔۔” اس نے جھلا کے کہا

“واٹ۔۔۔۔۔۔ کم آن ۔۔۔۔۔ تم نے انکے ساتھ کیا کیا؟” نومی نے پوچھا

“یار مجھے کسی نے بتایاکہ اس کی بیٹی بڑی ٹاپ کلاس چیز ہے۔۔۔۔۔ کسی اسلامی مدرسے میں پڑھاتی ہے۔۔۔۔ میں نے ایک دو دن پیچھا کیا پر بچی ہاتھ نہیں آئی لیکن مولوی صاحب کو پتا چل گیا۔۔۔۔ بس وہی شکائیت پاپا کے پاس پہنچ گئی۔۔۔۔ ہاتھ بھی کچھ نہیں آیا اور انسلٹ بھی ہوگئی” وہ سر جھکا کے بولا

“او ایم جی۔۔۔۔۔۔۔۔ ! تم نے مولوی کی بیٹی کو بھی نہیں چھوڑا۔۔۔۔۔۔ کم آن مین۔۔۔۔۔ ہاہاہاہا۔۔۔۔۔” عمار نے زور دار قہقہقہ لگایا، اسکے ساتھ ساتھ تابش اور نومی بھی ہنس پڑے

“یار یقین مانو میں نے اسکے حسن کی اتنی تعریف سنی ہے کہ رہا نہیں گیا۔ ادر وائس یو بیٹر نو کہ میری چوائس کیسی ہے۔۔۔۔” اس نے وضاحت دی

“پھر بھی یار۔۔۔۔۔ اتنا بھی کیا پاگل پن۔۔۔۔ خوامخوا انسلٹ کرا لی” تابش پہلی بار بولا

“اس انسلٹ کا بدلہ تو میں اس مولوی سے لے کے رہوں گا۔۔۔۔۔۔ ” اسکی آنکھیں پھر سے لال ہوگئیں

“لیوو اٹ بروو۔۔۔۔۔۔۔ دفعہ کرو اسکو۔۔۔” عمار بولا

“آئی کانٹ۔۔۔۔۔۔ اب جب تک اسکی بیٹی میرے ہاتھ نہیں لگتی میں چھوڑوں گا نہیں۔۔۔۔۔” وہ شدید غصے میں بولا

“کیا کرو گے۔۔۔۔۔؟ اب اگر تم سامنے جاؤ گے تو وہ پھر سے تمہارے ڈیڈ کے پاس پہنچ جائے گا۔۔۔۔” نومی نے اسے سمجھایا

“آئی ڈونٹ نو۔۔۔۔ میں بس یہی سوچ رہا ہوں کیسے اسے سبق سکھاؤں” اس نے سر جھکا لیا۔

“اینی وے۔۔۔۔ ہیرو کا کیا مسئلہ ہے؟” اس نے تابش کی طرف دیکھ کے کہا

“یہ باہر جانا چاہتا ہے، ابا جی خرچہ افورڈ نہیں کر سکتے۔۔۔۔۔ ٹیپیکل مڈل کلاس سٹوری” نومی نے بیزار ہوکے بتایا

“باہر جانا کونسا مسئلہ ہے۔۔۔۔۔۔ تمہاری فیملی اتنا بھی افورڈ نہیں کر سکتی” عاصم نے پوچھا

“یار تم لوگوں کے لیے یہ بہت ایزی ہوگا۔۔۔۔۔۔ لیکن میرے لیے نہیں۔۔۔۔ بابا برسوں سے ہارڈ وئیر کی ایک دکان چلاتے ہیں، اسی سے ہمارا گھر چلتا ہے۔ میرے خرچے، بہنوں کے پڑھائی سب کچھ اسی کے سہارے ہے۔ اب جب میں کچھ کرنا چاہتا ہوں تو بابا نے ہاتھ کھڑے کردیے۔۔۔۔” تابش نے سارا مسئلہ بتا دیا

“لسن۔۔۔۔۔ آئی کین ہلیپ یو۔۔۔۔۔۔۔۔ اف یو وانٹ” عاصم نے اسکی آنکھوں میں دیکھتے ہوئے کہا۔

نومی اور عمار اپنے اپنے موبائل فونز میں مصروف تھے، عاصم کی بات سن کے دونوں چونکے۔۔۔۔۔

“کیسے۔۔۔۔ ؟” تابش نے حیران ہوکے پوچھا

“دیکھ بھائی۔۔۔۔۔ تیرے باہر جانے کے جتنے بھی اخراجات ہوں گے، اسکا ففٹی پرسنٹ تو مجھ سے لے لے۔۔۔۔۔ پر اسکے بدلے تجھے میرا ایک کام کرنا پڑے گا” وہ کافی سنجیدہ تھا۔

“کیسا کام۔۔۔۔۔۔؟” تابش نے پوچھا

“کام بس اتنا ہے کہ مولوی کی بیٹی کو کسی بھی طرح پھنسا کے میرے پاس لانا ہے۔۔۔۔ اب یہ تٌو کیسے کرے گا۔۔۔ یہ میں نہیں جانتا۔۔۔۔ جس دن یہ کام ہوگیا تجھے تیرے پیسے مل جائیں گے۔۔۔۔۔ یہ دونوں گواہ ہیں۔۔۔۔۔” اس نے اپنی بات مکمل کر دی

تابش ، عمار اور نومی کی حیرت زدہ نظریں اسکے چہرے پہ جم گئیں۔۔۔۔۔۔۔۔۔