“ہاں بابا۔۔۔! فاطمہ تو پہلے ہی آگئی تھی، خالہ بھی آتی ہوں گی۔۔۔۔” نور نے انھیں بتایا۔۔۔۔

اتنے میں دروازے پہ دستک ہوئی۔۔۔۔

“شائد مہمان آگئے۔۔۔۔۔۔” مولوی صاحب دروازے کی طرف بڑھے

نور کا دل زور زور سے دھڑکنا شروع ہوا۔۔۔۔۔۔

“نور بیٹا۔۔۔ تم کمرے میں جاؤ۔۔۔ میں دیکھتا ہوں۔۔۔۔۔” وہ دروازہ کھولتے ہوئے بولے

انھوں نے جیسے ہی دروازہ کھولا تابش سامنے کھڑا تھا۔

مولوی صاحب حیران ہوگئے

“اسلام علیکم ! مولوی صاحب۔۔۔!” تابش نے مسکراتے ہوئے سلام کیا

“وعلیکم سلام۔۔۔۔۔۔۔ اصولاً تو مجھے آپ سے بات نہیں کرنی چاہیے لیکن دروازے پہ آئے مہمان کی عزت کرنا میرا فرض ہے” وہ خفا ہو کے بولے

“مولوی صاحب۔۔۔ ! میں آپکے جذبات سمجھ سکتا ہوں۔ مجھے میری غلطی کی معافی دے دیں۔۔۔” تابش شرمندہ ہوا

مولوی صاحب نے آگے بڑھ کے اسے گلے لگایا۔۔۔۔

انکی نظر تابش کے اباجی اور باقی گھر والوں پہ پڑی۔۔۔ وہ حیران ہوئے۔۔۔ خواتین کو گھر کے اندر بھیج کے مرد حضرات کے لیے بیٹھک کھولی گئی۔

تابش نے اباجی کا تعارف کرایا۔۔۔ مولوی صاحب ان سے مل کے بہت خوش ہوئے۔۔۔

ناصرہ بیگم فری اور فیزی کے ہمراہ گھر میں داخل ہوئیں تو فاطمہ نے انکا استقبال کیا، وہ اس بات سے بے خبر تھی کہ وہ تابش کے گھر والے ہیں۔۔۔

“آپ نور ہیں۔۔۔۔؟” فیزی نے پوچھا

“نہیں ۔۔۔ میں نور کی دوست فاطمہ ہوں۔۔۔۔” فاطمہ نے مسکرا کے جواب دیا

فاطمہ نے انھیں کمرے میں بٹھایا۔۔۔۔ اتنے میں فاطمہ کی امی بھی آ گئیں۔ اس نے اپنی ماں کو انکے ساتھ بٹھایا اور خود نور کے پاس آگئی

“نور۔۔۔ !تم تو کہہ رہی تھی مولوی گھرانا ہے ، لیکن انکے طور اطوار تو کچھ اور ہی بتا رہے ہیں۔۔۔” فاطمہ نور کو بتانے لگی

“کیا مطلب۔۔۔؟ ارے ایک چچا سراج کی بیوی ہوں گی اور ایک خاتون انکی طرف سے ہوں گی بس۔۔۔۔ ” نور کو مولوی صاحب نے جو بتایا اسی حساب سے وہ بولی

“ارے نہیں۔۔۔۔ دو نوجوان لڑکیاں اور ایک خاتون ہیں۔۔۔” فاطمہ نے بتایا

نور سوچ میں پڑ گئی۔

فاطمہ کی امی انکے ساتھ بات چیت میں مصروف تھیں۔۔۔

“سنا ہے آپکا بیٹا مدرسے میں معلم ہے۔۔۔ ماشاء اللہ۔۔۔۔” وہ ناصرہ بیگم سے پوچھنے لگیں

ناصرہ بیگم حیران ہوکے بیٹیوں کی طرف دیکھنے لگیں، انھوں نے بھی آنکھ کے اشارے سے لاعلمی کا اظہار کیا

“کونسا بیٹا۔۔۔۔۔ ؟” ناصرہ بیگم نے پوچھا

“وہی جس کے رشتے کے لیے آپ آئی ہیں۔۔۔۔۔۔” وہ بولیں

“ابھی تو ہم نے کوئی بات ہی نہیں چھیڑی۔۔۔ انھیں کیسے پتا چلا گیا کہ ہم رشتے کی بات کرنے آئے ہیں۔۔۔۔؟” فری نے فیزی کے کان میں کھسر پھسر کی

“بچی سے نہیں ملوائیں گی۔۔۔؟” ناصرہ بیگم انھیں بولیں

“ہاں۔۔۔ ہاں کیوں نہیں۔۔۔۔” وہ اٹھ کے نور کو لانے چل گئیں

“اللہ جانے تمہارے بھائی نے ان لوگوں کو کیا کہانی سنائی ہے۔۔۔۔ کب سے وہ مدرسے میں معلم ہوگیا۔؟۔۔۔ بندہ وہ جھوٹ بولے جو پکڑا نا جائے۔۔۔۔۔۔” ناصرہ بیگم تنک کے بولیں۔۔۔

“امی ۔۔۔ ! ہوسکتا ہیں انھیں کوئی غلط فہمی ہوئی ہو۔۔۔۔ اور بھائی نے تو کہا تھا کہ نور کی ماں اس دنیا میں نہیں ہیں اور نہ ہی کوئی بڑی بہن ہے۔۔۔۔ اب جانے کون ہیں یہ خاتون۔۔۔۔” فیزی انھیں سمجھانے لگی

اتنے میں نور فاطمہ کی امی کے ساتھ کمرے میں داخل ہوئی۔۔۔۔

نیلے اور سفید رنگ کے سوٹ میں سر پہ نیلے رنگ کا دوپٹہ لیے نور بہت حسین لگ رہی تھی۔ نور نےسب کو سلام کیا اور فاطمہ کی امی کے ساتھ بیٹھ گئی

فری اور فیزی کی نظریں اسکے چہرے پہ جمی تھیں

“واؤ۔۔۔۔ بھائی کی چوائس تو آؤٹ کلاس ہے۔۔۔۔” فری سرگوشی کرتے ہوئے بولی

“دیکھا۔۔۔۔ تم سب ایویں ای ان پہ ظلم کررہے تھے۔۔۔۔۔ ” فیزی ناگواری سے بولی

“کیسا ظلم۔۔۔۔۔؟” فری نے اسے گھورا

“سیمی سے شادی کرانے والا۔۔۔۔۔۔” فیزی نے بھی اسے گھور کے جواب دیا

“ایکسکیوز می۔۔۔ ہماری سیمی بھی کسی سے کم نہیں ہے۔۔۔۔۔” فری چڑ گئی

“ماشاء اللہ۔۔۔۔ بہت پیاری بچی ہے۔۔۔۔۔” نہ چاہتے ہوئے بھی ناصرہ بیگم کے منہ سے تعریف نکل ہی آئی

“ماننا پڑے گا تابش بھائی کی چوائس کو۔۔۔۔۔۔۔” فیزی اترا کے بولی

“تابش۔۔۔۔۔۔ !”

نور کی حسین آنکھیں اور زیادہ پھیل گئیں۔۔۔۔

فاطمہ کی امی تابش والے معاملے سے بے خبر تھیں وہ ابھی بھی انھیں تصدق صاحب کے گھر والے سمجھ رہی تھیں۔۔۔

مولوی صاحب نے صحن میں آکے فاطمہ کو آواز دی۔ وہ کیچن میں مہمانوں کے کھانے پینے کا انتظام کررہی تھی۔ جب وہ صحن میں پہنچی تو مولوی صاحب نے بتایا کہ تابش اور اسکے ابا جی کے لیے چائے پانی کا فوراً انتطام کرو

“تابش۔۔۔۔!”

فاطمہ کی حالت بھی نور جیسی ہونے لگی۔

اس نے جلدی سے مولوی صاحب کو چائے بسکٹ دیے وہ واپس بیٹھک میں چلے گئے

فاطمہ بھاگتی ہوئی نور کے پاس پہنچی۔۔۔ نور جو پہلے سے حواس باختہ بیٹھی تھی فاطمہ کا اڑا ہوا رنگ دیکھ کے اور زیادہ گھبرا گئی۔ فاطمہ نور کو بہانے سے واپس اسکے کمرے میں لے گئی۔

“نور پتا ہے۔۔۔۔ وہ ۔۔۔۔۔ وہ ۔۔۔۔ تابش۔۔۔۔” فاطمہ ہڑبڑانے لگی

“ہاں۔۔۔ پتا ہے۔۔۔۔ یہ تابش کی ماں اور بہنیں ہیں۔۔۔۔۔” نور جلدی سے بولی

“کیا۔۔۔۔ ؟ یہ تابش کے گھر والے ہیں۔۔۔۔۔۔ باہر تابش اور اسکے ابا جی ۔۔۔۔۔۔” فاطمہ بوکھلائی

“تابش۔۔۔۔۔ ! تابش بھی آیا ہے۔۔۔۔۔؟” نور کی سانسیں تیز ہوئیں۔۔۔

وہ دونوں ایک پل کے لیے سکتے میں چلی گئیں

“پر یہ لوگ آئے کس لیے ہیں۔۔۔۔۔؟” فاطمہ نے پوچھا

“جس طرح سے وہ مجھے دیکھ رہی تھیں۔۔۔۔ لگتا ہے رشتے کے لیے آئے ہیں۔۔۔۔۔” نور نے جواب دیا

“ہیں۔۔۔۔۔۔ اچھا۔۔۔۔ تو وہ دوسرے لوگ۔۔۔۔۔۔۔۔؟” فاطمہ پھر سے بوکھلا گئی

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

تابش سے طویل شکوے شکائیتوں کے بعد مولوی صاحب نے اس پوچھا

“برخودار۔۔۔۔ ! اتنے دن بعد کیسے آنا ہوا۔۔۔۔۔؟”

تابش نے ابا جی کی طرف اشارہ کیا

“جی دراصل۔۔۔۔۔ تابش نے آپ کے گھرانے کی کافی تعریفیں کی تھیں۔۔۔۔۔ ” اباجی انکی طرف دیکھ کے بولے

مولوی صاحب پوری طرح سے ہمہ تن گوش تھے۔۔۔ اباجی نے اپنی بات جاری رکھی

“بس۔۔۔۔ ہم بچے کے لیے اچھے رشتے کی تلاش میں تھے کہ کوئی شریف گھرانہ مل جائے، پتا چلا کہ ماشاء اللہ آپکی دختر ایک نیک سیرت بچی ہے، ہم نے پھر سوچا کہ کیوں نہ آپکے آگے جھولی پھیلائی جائے۔۔۔۔ تابش سے آپ پہلے سے ہی واقف ہیں۔۔۔۔۔ ” اباجی نے مدعا بیان کیا۔۔۔

مولوی صاحب کے چہرے کے تیور بدلے، انھوں نے سر سے پاؤں تک تابش کا بغور جائزہ لیا۔

اس سے پہلے کے مولوی صاحب کوئی جواب دیتے ،مولوی سراج صاحب بیٹھک کے دروازے کے سامنے نمودار ہوئے۔ مولوی صاحب جلدی سے انکی طرف بڑھے، انکے ساتھ تصدق صاحب اور انکا بھتیجا بھی موجود تھا۔ مولوی صاحب نے انکا استقبال کیا، تابش اور اباجی بھی اٹھ کے ان سے ملے۔۔۔

انکے ساتھ موجود خواتین گھر کے دروازے سے اندر داخل ہوئیں۔۔

فاطمہ اور نور جو اب تک سوچوں میں ڈوبی تھیں دو اور اجنبی خواتین کو گھر میں داخل ہوتا دیکھ کے سمجھ گئیں کہ تصدق صاحب کے گھر والے بھی پہچ گئے ہیں۔ ان دونوں کی آنکھیں ایکدوسرے سے یہی پوچھ رہی تھیں کہ “اب کیا ہوگا۔۔۔۔؟”

دوسری طرف مولوی صاحب بھی کچھ عجیب و غریب صورت حال کا شکار تھے۔ ہلکی پھلکی باتوں کا سلسلہ شروع ہوا۔ مولوی سراج صاحب تصدق صاحب کے بھتیجے کے گٌن گانا شروع ہوئے کہ وہ کن کن کمالات پہ عبور رکھتے ہیں۔ تابش اور اباجی انکے آمد کے مقصد سے بے خبر تھے کچھ ایسی ہی صورت حال ان کے ساتھ بھی تھی، مولوی صاحب بس سب کے چہروں کود ھیان سے دیکھ رہے تھے۔ انھیں یہ سمجھ ہیں آرہا تھا کہ آخر کس کو کیا جواب دیں۔۔۔۔ ایک طرف تابش تھا جس کے گھر والے ماڈرن خیالات کے مالک لگ رہے تھے، دوسری طرف تصدق صاحب کا بھتیجا جو کہ پہلے سے شادی شدہ ہے۔۔۔۔ اب کریں تو کریں کیا۔۔۔۔

“نوازالدین صاحب ۔۔۔۔ ! آپ نے مہمانوں کا تعارف نہیں کرایا۔۔۔” مولوی سراج صاحب کا اشارہ تابش اور فاروق صاحب کی طرف تھا۔

“جی ۔۔۔ جی ! نوجوان کا نام تابش ہے ، کچھ عرصہ پہلے ہی ان سے ملاقات ہوئی تھی، بہت فرمانبردار اور نیک ہیں۔ اور یہ انکے والد صاحب ہیں۔۔۔ ” مولوی صاحب نے دونوں کا تعارف کرایا۔ مولوی سراج صاحب بڑے خوش ہوئے انھیں مل کے۔۔۔۔۔۔۔۔

باتوں باتوں میں کھانا لگ گیا۔۔۔۔

اندر کے حالات بھی باہر جیسے تھے۔ نور اپنے کمرے میں دبک کے بیٹھی تھی۔ فاطمہ بھاگ دوڑ میں لگی تھی اور فاطمہ کی امی دونوں کی حقیقت جاننے کے بعد کبھی انکے چہرے کی طرف دیکھتی تو کبھی اٌن کے ۔۔۔۔۔۔۔۔۔

کھانے کے بعد مولوی صاحب برتن سمیٹنے لگے تو تابش انکی مدد کے لیے کھڑا ہوگیا۔ وہ برتن اٹھا کے گھر میں داخل ہوئے۔

“خیریت سے مولوی صاحب کے ہاں آنا ہوا آپکا۔۔۔۔۔؟” مولوی سراج نے آہستگی سے فاروق صاحب سے پوچھا

“بس جی۔۔۔۔ بیٹے کے رشتے کے لیے جھولی پھیلا ئے مولوی صاحب کے پاس پہنچے ہیں۔۔۔۔۔” فاروق صاحب نے جواب دیا

مولوی سراج کے چہرے کا رنگ فق ہو گیا۔۔۔ اتنے میں مولوی صاحب بھی اندر داخل ہوئے۔

“مولوی نوازالدین صاحب ۔۔۔۔۔۔ ! آپ نے ہمیں بے عزت کرنے کے لیے بلایا ہے۔۔۔؟” مولوی سراج صاحب آگ بگولہ ہوگئے

“کیا ہوا۔۔۔۔۔۔ خیریت تو ہے نہ؟” وہ پریشان ہو کے پوچھنے لگے

“خیریت خاک ہوگی۔۔۔ ایک طرف آپ نے ہمیں مدعو کیا۔۔۔۔ اور دوسری طرف انھیں بھی بلا لیا۔۔۔ ” انھوں نے تابش کی طرف دیکھ کے گھورا

مولوی صاحب سمجھ گئے کہ دونوں ایکدوسرے کے بارے میں جان چکے ہیں

“آپ تسلی رکھیں۔۔۔۔ جیسا آپ سمجھ رہے ہیں۔۔۔۔۔ ویسا کچھ نہیں ہے۔۔۔۔” انھوں نے سمجھانے کی کوشش کی

مولوی سراج کے بدلتے تیور دیکھ کہ تصدق صاحب نے آنکھ کے اشارے سے پوچھا کہ آخر معاملہ کیا ہے۔

“مولوی نوازالدین نے ہمیں ذلیل کرنا تھا اس لیے بلا لیا۔۔۔۔۔۔ یہ دو صاحب جو تشریف فرما ہیں یہ بھی مولوی صاحب کی بیٹی کے رشتے کے سلسلے میں آئے ہیں۔۔۔۔۔” انھوں نے سارا بھانڈہ پھوڑ دیا

بس پھر کیا تھا۔۔۔۔ مولوی تصدق نے بھی توپوں کا رخ انکی جانب کیا۔۔۔۔ مولوی صاحب حیران اور پریشان سے سب کو سمجھانے کی کوشش کرنے لگے لیکن وہ انکی کسی بات کو سننے کو تیار نہ تھے۔

تابش اور اباجی ان سب کا تماشہ دیکھتے رہے۔ جب بات حد سے بڑھنے لگی تو تابش کھڑا ہوگیا

“دیکھیے۔۔۔۔ ! مولوی صاحب اس بارے میں بالکل لا علم تھے کہ ہم لوگ انکی طرف آنے والے ہیں۔۔۔ یہ جو بھی کچھ ہوا اچانک ہوا۔۔۔۔”

“برخودار آپ اس معاملے سے دور ہی رہیں۔۔۔۔ ہماری بات مولوی نوازالدین سے ہے۔۔۔ انھیٰں ہی جواب دینے دیں۔۔۔۔” مولوی سراج تنک کے بولے

“یہ اتنی دیر سے آپکو سمجھانے کی کوشش کررہے ہیں پھر بھی آپ انھیں مسلسل لتاڑ رہے ہیں۔۔۔۔۔” تابش بھی تلملا گیا

تابش بہت اچھی طرح سے واقف تھا کہ یہ لوگ عاصم کا بنا جال ڈالنے آئے ہیں۔۔۔۔ صورت حال ایسی نہیں تھی کہ وہ مولوی صاحب کو انکی حقیقت بتا پاتا۔۔۔۔ کیونکہ اگر عاصم کی بات کھلی تو اسکی اپنی سچائی بھی کھل جائے گی۔

“مولوی ہوکے آپ نے اتنی گری ہوئی حرکت کی ہے۔ آپ سے یہ امید نہیں تھی۔۔۔۔۔” تصدق صاحب بولے

مولوی صاحب بدستور سب سے معافی مانگتے رہے۔

“مولوی صاحب معافی مانگنا بند کرکے بس اتنا بتا دیں کہ آپ اپنی بیٹی کا رشتہ انھیں دے رہے ہیں یا ہمیں۔۔۔۔” تصدق صاحب کھڑے ہوکے بولے

انکی یہ بات سن کے مولوی صاحب کے چہرے کا رنگ بدلا

“تصدق صاحب۔۔۔ کسی شریف سے بیٹی کا رشتہ مانگنے کا یہ کونسا طریقہ ہے۔۔۔؟”

“شرافت کی بات اب آپ مت کریں۔۔۔۔۔ جس ذلت کا ہم سامنا کررہے ہیں اسکے ذمہ دار آپ ہیں۔۔۔۔۔۔ پتا نہیں کیسے کیسے لوگوں کو ہمارے برابر کھڑا کردیا۔۔۔۔” تصدق صاحب نے منہ سے آگ نکالنا شروع کی

تابش نے انھیں جواب دینے کے لیے منہ کھولا لیکن اباجی نے اسے روک دیا

“خدا کا خوف کریں۔۔۔۔ کس طرح کی باتیں کررہے ہیں آپ۔۔۔۔۔۔ ” مولوی صاحب غصے میں آگئے

“خدا کا خوف تو آپکو کرنا چاہیے۔۔۔۔۔۔ ” تصدق صاحب گرج کے بولے

“جب آپ لوگ میری کسی بات کو سننے کے لیے تیار نہیں ہیں تو میں کیا کر سکتا ہوں۔۔۔”

“آپکی کیا بات سنیں ہم۔۔۔۔ ؟ “

“آپ میرے دروازے پہ آئے ہیں تو میرے اوپر فرض ہے کہ میں کچھ ایسا نہ بولوں جس سے آپکی دل آذاری ہو۔۔۔”

“دل آذاری تو آپ نے کی ہے، ان جیسے لوگوں کو ہمارے ساتھ بٹھا کے”

“ان جیسے سے آپ کی کیا مراد ہے، جس طرح آپ میرے لیے قابل عزت ہیں اسی طرح یہ بھی میرے محترم ہیں”

“تو پھر آپ انھی سے ہی رشتہ داری جوڑ لیں۔۔۔ لیکن یاد رکھیے گا کہ آپ بہت پچھتائیں گے۔۔۔۔ آپ کی بیٹی صرف ایک مولوی کے گھر میں ہی خوش رہ سکتی ہے۔۔۔”

“ایسے مولوی کے گھر جو پہلے سے شادی شدہ ہے۔۔۔۔ صرف اولاد کے لیے اسے دوسری شادی کرنی ہے” مولوی صاحب بھڑک گئے

“واہ مولوی صاحب۔۔۔۔ اب آپکو دوسری شادی یاد آرہی ہے۔۔۔ جب مدعو کیا تھا تب یاد نہیں تھی۔۔۔۔؟” تصدق صاحب نے جواب دیا

“آپکے غلط برتاؤ کی وجہ سے مجھے یہ بات کرنی پڑ رہی ہے” مولوی صاحب بولے

“اور آپکا برتاؤ ٹھیک ہے۔۔۔۔؟”

“تصدق صاحب آپ مسلسل میری اور میرے مہمانوں کی تذلیل کررہے ہیں، جبکہ یہ لوگ خاموشی سے آپ کو برداشت کررہے ہیں۔۔۔” مولوی صاحب نے تابش اور فاروق صاحب کی طرفداری کی

“تو پھر آپ ان سے ہی رشتہ داری بنا لیں۔۔۔ ہم چلتے ہیں۔۔۔۔ ” وہ تینوں کھڑے ہوگئے

مولوی صاحب خاموش کھڑے دیکھتے رہے۔

“مولوی نوازالدین میری بات یاد رکھنا ۔ ان لوگوں سے رشتہ داری تمہیں مہنگی پڑے گی۔۔۔ کہیں کے نہیں رہو گے۔۔۔” مولوی سراج باہر نکلتے ہوئے بولے

“میرے اللہ نے چاہا تو سب اچھا ہوگا۔۔۔۔ مجھے اسکی ذات پہ بھروسہ ہے۔۔۔۔۔” مولوی صاحب نے انھیں جواب دیا

پھر کرسی پہ بیٹھ کے سر پکڑ لیا۔۔۔

بیٹھک سے مردوں کی اونچی اونچی آوازیں آنے پہ ساری خواتین بھی صحن میں آگئیں۔۔۔۔

مولوی تصدق کے گھر والوں نے بھی برقعے سر پہ جمائے اور نور کو گھورتی ہوئیں باہر جانے لگیں

“خالہ۔۔۔۔ ! چائے تو پیتی جائیں۔۔۔۔”فاطمہ معصومیت سے بولی

“انھیں پلاؤ۔۔۔۔ ہمیں کچھ نہیں کھانا پینا۔۔۔۔۔۔” تصدق صاحب کی بیوی کا اشارہ ناصرہ بیگم کی طرف تھا

تابش نے مولوی صاحب کے کندھے پہ ہاتھ رکھا۔

“آپکو ہماری وجہ سے اتنی پریشانی اٹھانی پڑی۔۔۔ میں معافی چاہتا ہوں۔۔۔۔”

“نہیں برخودار۔۔۔۔ اس میں آپ کی کوئی غلطی نہیں ہے، ہر کام میں اللہ پاک کی کوئی نہ کوئی مصلحت ہوتی ہے۔۔۔ چلو اسی بہانے انکے اصلی تیور تو سامنے آئے۔۔۔” وہ افسردہ ہوکے بولے

“ہمیں اندازہ ہوتا کہ آپ کے گھر میں پہلے سے ہی رشتے کی بات کرنے کوئی آنے والا ہے تو ہم کبھی بھی نہ آتے۔۔۔۔” اباجی بولے

“جس گھر میں بیٹیاں ہوتی ہیں وہاں رشتے کی غرض سے لوگ آتے ہی ہیں۔۔۔ یہی دنیا کی ریت ہے۔۔۔” مولوی صاحب نے جواب دیا۔

کافی دیر خاموشی رہی۔۔۔ اسکے بعد اباجی پھر سے بولے

“اس وقت اس طرح کا سوال کرنا قطعی نامناسب ہے، پھر بھی میں آپ سے پوچھنا چاہتا ہوں کہ ہمارے لیے کیا حکم ہے۔۔۔۔؟”

“مجھے سوچنے کا تھوڑا سا وقت چاہیے ۔۔۔۔ اسکے بعد ہی آپکو کوئی جواب دے سکتا ہوں۔۔۔” مولوی صاحب انکی طرف دیکھ کے بولے۔۔۔

تھوڑی دیر بعد تابش نے اجازت چاہی۔ مولوی صاحب نے اباجی کا موبائل نمبر لیا اور انھیں رخصت کیا۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

بہت دنوں بعد تابش کے چہرے پہ مسکراہٹ پھر سے لوٹی۔۔۔۔۔ اپنے بستر پہ لیٹے وہ نور کے بارے میں سوچتا رہا

“بھائی۔۔۔۔ نور بہت پیاری ہے۔۔۔۔ سچی۔۔۔۔ میری تو آنکھیں کھل گئیں اسے دیکھ کے۔۔۔۔” فیزی پاس آکے بولی

تابش مسکرایا

“ہماری سیمی بھی کسی سے کم نہیں ہے۔۔۔۔” فری کمرے میں داخل ہوتے ہوئے بولی

“ہاں۔۔۔ صحیح کہہ رہی ہو سیمی کسی سے کم نہیں ہے۔۔۔۔ لیکن نور بھابی کا مقابلہ نہیں کر سکتی۔۔۔۔” فیزی نے اسے جواب دیا

“نور بھابی۔۔۔۔۔ ارے پہلے ہاں تو ہونے دو۔۔۔۔۔ ” فری بولی

“مجھے پورا یقین ہے۔۔۔ انکی طرف سے جلدی جواب آئے گا وہ بھی ہاں میں ہی ہوگا۔۔۔۔۔” فیزی بولی

“لیٹس سی۔۔۔۔۔!”

“بھائی۔۔۔ میں ایک بات سوچ رہی تھی۔۔۔۔؟” فیزی تابش سے مخاطب ہوئی

“کیا ؟” تابش نے جواب دیا

“آپ ایک بار سیمی کو سوری بول دیں۔۔۔۔۔ اسکا بھی دل ٹوٹا ہے۔۔۔۔۔ ” فیزی نے دراخواست کی

تابش سوچ میں پڑ گیا

“ہاں بھائی۔۔۔ پلیز۔۔۔۔ وہ دل کی اچھی ہے آپکو ضرور معاف کردے گی۔۔۔۔” فری نے بھی ساتھ دیا

“ٹھیک ہے۔۔۔ میں اسے فون کرتا ہوں۔۔۔ تم لوگ جاؤ۔۔۔۔” تابش اٹھ بیٹھا

“نہیں۔۔۔ نہیں ۔۔۔ ہم بھی سنیں گے۔۔۔۔ پلیز۔۔۔” فری نے ضد لگا لی

فیزی نے اسکے گھورا تو وہ اسکے پیچھے پیچھے باہر چلی گئی

تابش نے اسکا نمبر ڈائل کیا

“ہیلو۔۔۔۔۔ ! سیمی۔۔۔۔!” تابش بولا

“یہ پوچھنے کے لیے فون کیا کہ زندہ ہوں یا مر گئی۔۔۔؟” سیمی نے جواب دیا

“مجھے معاف کردو۔۔۔۔ پلیز۔۔۔۔ “

“اچھا طریقہ ہے ذلیل کرنے کا۔۔۔۔”

“تمہیں میری صورت حال کا اندازہ نہیں ہے یار۔۔۔۔ میں کس مشکل میں ہوں۔۔۔”

“یہ مشکل تب یاد کیوں نہیں آئی ۔۔۔ جب میں بار بار پوچھتی تھی؟”

“حالات ایکدم سے بدل گئے ۔۔۔۔ میں بے بس ہوگیا۔۔۔۔”

“ایسی بھی کیا بے بسی تابش۔۔۔۔ ؟ اچانک ہی تمہیں وہ لڑکی یاد آگئی۔۔۔”

“ہاں اچانک ہی تھا۔۔۔۔۔ اس دن عاصم سے مل کے۔۔۔۔۔۔” تابش نے بات ادھوری چھوڑ دی

“کیا۔۔۔۔۔؟ عاصم نے کیا کیا۔۔۔۔۔” سیمی نے حیرانی سے پوچھا

“چھوڑو۔۔۔۔۔ بس ہوسکے تو مجھے معاف کردینا۔۔۔۔۔”

“جب تک مجھے اصل بات نہیں بتاؤ گے تب تک معاف نہیں کرسکتی۔۔۔”

“یار عاصم ایک عرصے سے اس لڑکی کے پیچھے پڑا ہے۔۔۔۔ اس نے مجھے بھی اسکے پیچھے لگایا۔۔۔ لیکن اس سے ملنے کے بعد مجھے اندازہ ہوا کہ وہ کتنی پارسا ہے۔۔۔۔۔ عاصم اسکی زندگی خراب کرنا چاہتا ہے۔۔۔۔۔”

“میں سمجھی نہیں ۔۔۔۔ مجھے تفصیل سے بتاؤ” سیمی اس پوچھنے لگی

تابش نے سیمی کو پہلے دن سے آخری دن تک کی ساری داستان سنا دی۔۔۔۔

“یہ سب تم نے مجھے پہلے کیوں نہیں بتایا۔۔۔۔ ” سیمی نے سب سننے کے بعد جواب دیا

“اس سے پہلے ایسا موقع ہی نہیں آیا کبھی۔۔۔۔۔”

“تو تم اس لڑکی کے عشق میں مبتلا ہو۔۔۔۔؟’

“عشق و محبت سے میں بالکل نا واقف ہوں پر اتنا ضرور جانتا ہوں کہ اسکے بنا سب کچھ ادھورا ادھورا سا ہے۔۔۔”

“اور مجھ سے جو وعدہ کیا تھا ۔۔۔۔ ساتھ نبھانے کا۔۔۔ اسکا کیا۔۔۔۔؟”

“میں شرمندہ ہوں۔۔۔۔۔۔”

“شرمندگی سے کام نہیں چلے گا۔۔۔۔ مجھے میرا پہلے والا دوست چاہیے۔۔۔ جو ہنستا کھیلتا تھا۔۔۔ مجھ سے ہر بات شئیر کرتا تھا”

“میں پوری کوشش کروں گا۔۔۔۔۔” تابش نے مسکرا کے جواب دیا

“کوشش نہیں۔۔۔۔ تمہیں یہ کرنا ہی ہوگا۔۔۔ میں تمہیں کھو نہیں سکتی۔۔۔” سیمی نے جواب دیا

“اچھا بابا۔۔۔۔ اب کی بار پکا وعدہ۔۔۔ میں ہمیشہ تمہارا دوست بن کے رہوں گا۔۔۔۔” تابش نے جواب دیا

سیمی سے بات کرنے کے بعد تابش کے دل کا بوجھ ہلکا ہوا۔۔۔۔۔ اور اس نے آنکھیں بند کیں

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

تابش سے بات کرنے کے بعد سیمی نے فری کا نمبر ڈائل کیا

وہ اسکی کی کال دیکھ کے خوش ہوگئی

“ہیلو۔۔” وہ بولی

“فری مجھے تم سے ایک کام ہے۔۔۔۔” سیمی فورا! بولی

“ہاں ہاں ۔۔۔ بولو کیا کرنا ہے؟”

“مجھے تابش کے دوست عاصم کا نمبر چاہیے۔۔۔۔”

“کیوں۔۔۔۔ عاصم بھائی کا نمبر کیوں۔۔۔۔”

“فیزی تمہارے آس پاس تو نہیں ہے۔۔۔؟”

“نہیں ۔۔۔ وہ کیچن میں چائے بنا رہی ہے۔۔۔۔”

“گڈ۔۔۔۔ فری پلیز مجھے نمبر چاہیے۔۔۔۔ جس دن تابش اور میں باہر کھانا کھانے گئے تھے۔ وہاں عاصم سے ملاقات ہوئی تھی، وہ تابش سے مولوی صاحب کی بیٹی کے حوالے سے کچھ بات کررہا تھا، مجھے دیکھ کے چپ ہوگیا۔۔۔ اس کے بعد سے ہی تابش نے اتنا بڑا فیصلہ کیا۔۔۔ مجھے بس وہ وجہ جاننی ہے۔۔۔ پلیز کچھ کرو۔۔۔” سیمی درخواست کرتے ہوئے بولی

“میرے پاس تو نہیں ہے بھائی سے ہی لینا پڑے گا۔۔۔۔ ” فری بولی

“نو ۔۔۔ نو۔۔۔ پلیز اس بارے میں کسی اور کو پتا نہ چلے۔۔۔ بس چپ چاپ یہ کام کردو۔۔۔۔” سیمی نے اسے تنبہیہ کی

“اچھا میں کوشش کرتی ہوں۔۔۔۔ تم بتاؤ بھائی نے کال کی ؟”

“ہاں کی تھی۔۔۔۔”

“کیا بات ہوئی۔۔۔؟”

“فری۔۔۔ ! پلیز پہلے میرا کام کردو اسکے بعد تفصیل سے بتاتی ہوں۔۔۔”

“اچھا بابا۔۔۔۔ ” فری نے یہ کہہ کے فون بند کردیا اور تابش کے کمرے کی طرف چل پڑی

“بھائی۔۔۔۔ مجھے آپکا فون چاہیے۔۔۔۔” وہ تابش کے پاس کھڑی ہوگئی

“کیوں۔۔۔۔؟”

“بس۔۔۔ مجھے ایک ضروری فون کرنا ہے۔۔۔” اس نے بہانہ کیا

تابش نے اپنا فون اسے دیدیا فری نے جلدی سے عاصم کا نمبر نکالا اور سیمی کو فارورڈ کردیا۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

سیمی نے عاصم کا نمبر ڈائل کیا

“ہیلو۔۔۔۔!”

“ہائے۔۔۔۔۔ ! ہو از دئیر”

“میں سیمی۔۔۔ ہوں۔۔۔ تابش کی منگیتر۔۔۔”

“اوہ۔۔۔۔ بھابی جی ۔۔۔ بھابی جی۔۔۔۔۔ خیریت سے یاد کیا۔۔۔” وہ پوچھنے لگا

“تمہیں نور چاہیے۔۔۔۔۔۔۔؟ میں لا کے دوں گی ” سیمی سنجیدہ ہو کے بولی

سیمی کی بات سن کے عاصم کو جھٹکا لگا۔۔۔۔۔۔