“ہاں ۔۔۔ وہ عاصم بھائی ، نومی بھائی وغیرہ۔۔۔۔۔ وہ منگنی میں آرہے ہیں نا۔۔۔۔؟” فری نے پھر سے سوال کیا

“عاصم۔۔۔۔۔ !” تابش کے منہ سے نکلا

یہ نام تابش کے کانوں میں ایسے گونجا جیسے کسی نے اسےگہرے کنوئیں میں دھکا دیا ہو۔۔۔۔۔۔

“بھائی۔۔۔۔ ! میں آپ سے کچھ پوچھ رہی ہوں۔۔۔۔” فری اسکے چہرے کا بدلتا ہوا رنگ دیکھ کے پریشان ہوگئی

“ہاں۔۔۔۔ وہ۔۔۔ یاد نہیں رہا کسی کو بلانا۔۔۔۔ شادی میں بلا لیں گے۔۔۔” تابش چونک کے بولا

“اچھا۔۔۔ ٹھیک ہے۔۔۔۔” وہ یہ کہہ کے چلی گئی

نمبر بدلنے کے بعد سے اب تک تابش کی عاصم سے نا تو کوئی بات ہوئی اور نہ ہی ملاقات۔ تابش یہ سوچ کے پریشان ہوگیا کہ کہیں وہ اب بھی نور کے پیچھے نہ پڑا ہو۔ گھر میں کافی مہمان جمع ہوچکے تھے۔ وہ بھی جلدی سے تیار ہو کے باہر نکل آیا۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

منگنی کا فنکشن سیمی کے گھر پہ ہی تھا۔ یہ لوگ جب وہاں پہنچے تو لڑکی والوں کی طرف سے اتنے مہمان جمع تھے دیکھ کے ایسا لگ رہا تھا کہ رخصتی کی تقریب ہو نے والی ہے۔ تابش کو جیسے ہی صوفے پہ بٹھایا گیا، سیمی کی سہلیوں کا ایک طوفان اسکے اردر گرد جمع ہوا۔ طرح طرح کے سوالوں کا سلسلہ شروع ہوگیا۔ تابش کی حالت غیر کو دیکھ کے فیزی اور فری اسکی طرف لپکیں ۔ سیمی کی سہلیوں کو انھوں نے لتاڑنا شروع کیا، ایک ایک کر وہ ساری وہاں سے رفو چکر ہوگئیں۔

فیزی اور فری سیمی کے کمرے میں جانے لگیں تو انھیں سیمی سے ملنے نہیں دیا گیا۔ انکا مقصد یہ تھا کہ رسم شروع ہونے سے پہلے لڑکے والے اسے نہیں دیکھ سکتے۔ وہ دونوں ایکدوسرے کا منہ تکنے لگیں۔ اتنا تو آجکل شادیوں میں بھی نہیں ہوتا جتنا وہ منگنی پہ کررہی ہیں۔ لڑکی والوں کے ہزار نخروں کے بعد خدا خدا کرکے سیمی کو باہر لایا گیا۔ ناصرہ بیگم نے بھانجی کی بلائیں لیں اور تابش کے ساتھ صوفے پہ بٹھا دیا۔ سبھی نے دعا کے لیے ہاتھ اٹھائے اور دونوں کی اس نئی زندگی کی خوشحالی کے لیے دعائیں ہونے لگیں۔ اسکے بعد انگوٹھی پہنانے کی رسم ہوئی۔ مٹھائی کے ٹوکرے کھلے اور مبارکباد کا ایک لمبا سلسلہ چل پڑا۔۔۔۔

سینے میں سلگتی آگ جو روح کو اپنی لپیٹ میں لے لے اور اس آگ سے اٹھتا دھواں بے چین آنکھوں سے عیاں ہو پھر بھی ہونٹوں پہ جھوٹی مسکان سجا کے جذبات پامال کرنا۔۔۔ شائد اسی کو محبت کہتے ہیں۔ تابش کبھی ایسی محفلوں کی جان ہوا کرتا تھا لیکن آج جب اسی کے نام کی محفل سجی ہے تو وہ خود اپنی ذات کے صحرا میں بس ایک چہرہ ڈھونڈ رہا تھا۔ بے ترتیب سانسوں میں چھپی سسکیاں کیوں کسی کو سنائی نہیں دیتیں۔۔۔۔

“بھائی۔۔۔۔۔ !” فیزی نے پاس آکے سرگوشی کی

تابش نے اسکی طرف دیکھا

“ہوا کیا ہے آپکو۔۔۔۔۔۔؟” اس نے پوچھا

“کچھ نہیں۔۔۔۔۔۔ کچھ بھی تو نہیں۔۔۔۔” تابش نے اسے جواب دیا

“میں کب سے آپکی جھوٹی مسکراہٹ کی نمائش دیکھ رہی ہوں۔۔۔۔ کیا چیز ہے جو آپکو اندر سے کھا رہی ہے۔۔۔۔؟” وہ پریشان ہوکے بولی

“پگلی ایسا کچھ نہیں ہے۔۔۔۔” تابش مسکرا کے بولا

“یہ آپکی آنکھیں ہیں نا۔۔۔۔ یہ صاف بتا رہی ہیں کہ آنسوؤں کا ایک طوفان انکے پیچھے چھپا ہے۔۔۔۔” وہ تابش کی آنکھوں میں دیکھ کے بولی

ناصرہ بیگم نے فیزی کو آواز دی تو وہ انکی طرف چلی گئی۔

“تابش۔۔۔۔۔ !” سیمی اسکے قریب ہوکے بولی

“ہاں۔۔۔۔!” تابش نے جواب دیا

“واپس آجاؤ۔۔۔۔۔”

“میں یہیں تو ہوں۔۔۔۔”

“نہیں ہو نا۔۔۔۔۔ بس مٹی کا ایک بت ہے جسے میرے پاس بٹھا دیا گیا ہے۔۔۔”

“اب یہ جو بھی ہے، تمہار پاس تو ہے نا۔۔۔۔”

“مجھے جیتا جاگتا انسان چاہیے۔۔۔ ایک بت نہیں۔۔۔”

“میں بھی اسے ہی ڈھونڈ رہا ہوں۔۔۔ گر ملا تو ضرور تمہارے پاس لے آؤں گا”

سیمی حیران ہوکے اسے دیکھنے لگی

اسکی سہلیوں نے پاس آکے شور مچانا شروع کردیا، وہ انکی طرف متوجہ ہوئی۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

“کن سوچوں میں کھوئی ہو۔۔۔۔؟” فری نے فیزی کو کندھے سے ہلایا

“نہیں کچھ نہیں۔۔۔۔” وہ چونکی

“اچھا۔۔۔ ! چلو اب لائیٹس آف کردو۔۔صبح کالج جانا ہے، چھٹیاں ختم۔۔۔۔۔۔” فری بیڈ پہ لیٹ گئی

فیزی نے کمرے کی لائٹس آف کردیں

“فیزی۔۔۔۔۔۔! “

“جی۔۔۔!”

“جاگ رہی ۔۔۔؟”

“ہاں۔۔۔۔۔”

“سیمی بہت پیاری لگ رہا تھی نا۔۔۔۔؟ اور خوش بھی کتنی تھی۔۔۔۔” فری سیمی کو یاد کرتے ہوئے بولی

“ہاں ۔۔۔۔۔۔۔۔ وہ تو خوش تھی۔۔۔۔۔ پر۔۔۔۔” فیزی نے اسکی طرف کروٹ بدل لی

“پر۔۔۔ پر کیا۔۔۔۔؟” فری بھی اسکی طرف مڑی

“میرا دل کہتا ہے بھائی خوش نہیں ہے۔۔۔۔۔۔۔۔” وہ سوچ میں پڑ گئی

“تم کیسے کہہ سکتی ہو۔۔۔۔۔ انھوں نے خود تو ہاں کی ہے” فری بولی

“ہاں تو کی ہے۔۔۔۔ لیکن تم نے دیکھا نہیں انکے چہرے پہ دور دور تک خوشی کے آثار نہیں تھے۔۔۔۔”

“اچھا۔۔۔ میں نے تو نوٹس نہیں کیا۔۔۔۔۔ لیکن انکے خوش نہ ہونے کی کیا وجہ ہوسکتی ہے۔۔۔؟”

“یہ تو میں بھی نہیں جانتی لیکن اتنا ضرور کہہ سکتی ہوں کچھ تو ہے جو وہ ہم سب سے چھپا رہے ہیں۔۔۔۔”

“وہ تو جس دن سے گھر لوٹے ہیں تب سے ہی خاموش خاموش سے ہیں۔۔۔۔۔۔ “

“ہم لوگوں نے کبھی جاننے کی کوشش ہی نہیں کی کہ آخر انکے دل میں کیا چل رہا۔۔۔۔ سیمی کے لیے ہم سب ہی انکے پیچھے پڑے تھے، اگر انکے دل میں اس کے لیے کچھ ہوتا تو وہ پہلی بار میں ہاں کردیتے نا۔۔۔۔۔”

“ہاں۔۔۔۔ یہ تو ہے۔۔۔۔ لیکن اب کیا ہوسکتا ہے، منگنی تو ہوگئی۔۔۔”

“پھر بھی یار۔۔۔۔۔ اپنی خوشی کے چکر میں کہیں ہم نے انکی خوشی کا گلہ نہ گھونٹ دیا ہو۔۔۔۔”

“پریشان مت ہو۔۔۔۔ کچھ ہوتا تو وہ اب تک بتا دیتے۔۔۔۔ انشاء اللہ شادی تک سب ٹھیک ہو جائے گا۔۔۔۔”

“ایسے کیسے ٹھیک ہو جائے گا، میرے حساب سے سیمی کو کوشش کرنی چاہیے کہ وہ بھائی کو زیادہ سے زیادہ ٹائم دے”

“ہاں۔۔۔ یہ ٹھیک ہے۔۔۔ چلو اسکو کال کرکے سمجھاتے ہیں۔۔۔۔۔”

“ہاں لیکن اسے یہ مت کہہ دینا کہ بھائی خوش نہیں لگ رہے۔۔۔۔ تمہیں پتا ہے نا وہ کتنی جذباتی ہے۔”

“آئی نو یار۔۔۔۔۔ “

فری نے اپنے موبائل سے سیمی کا نمبر ڈائل کیا

“ہیلو۔۔۔ !”

“ہماری بھابی کیسی ہے۔۔۔۔؟”

“ٹھیک ہوں۔۔۔ پر بہت تھک گئی ہوں۔۔۔۔ یار” وہ نحیف سی آواز میں بولی

“کیوں۔۔۔۔؟ پورا دن تو بیٹھی رہی ہو۔۔۔ تھیک کیسے گئی۔۔۔؟” فری بولی

“بیٹھنے سے انسان زیادہ تھک جاتا ہے، تمہیں پتا ہے میری فرینڈز ابھی یہاں سے نکلی ہیں۔۔۔ جانے کا نام ہی نہیں لے رہی تھیں۔۔۔۔”

“تو انجوائے کرو نا۔۔۔۔۔۔ منگنی روز روز تھوڑی ہوتی ہے۔۔۔” فری مسکرانے لگی

“کرلیا انجوائے ۔۔۔۔ آج کے لیے اتنا ہی کافی تھا۔۔۔۔۔۔ خیر تم بولو اس وقت خیریت سے کال کی۔۔۔؟” سیمی نے پوچھا

“ارے بس حال چال پوچھنے کے لیے۔۔۔۔ نندیں ہیں بھئی ۔۔۔۔ کچھ تو ذمہ داری بنتی ہے کہ نہیں۔۔۔؟” فری ہنستے ہوئے بولی

“اوہ۔۔۔۔ ہاؤ لکی آئی ایم۔۔۔۔۔۔ تھینک یو گائز۔۔۔۔۔” سیمی نے طنز کی

“ویسے کل کا کیا پلان ہے تمہارا۔۔۔۔۔؟” فری نے پوچھا

“کل کا۔۔۔۔۔۔۔؟ ایسا کچھ خاص نہیں۔۔۔۔ کیوں۔۔۔۔” سیمی نے سوچتے ہوئے جواب دیا

“اف کیسی لڑکی ہوتم۔۔۔۔؟ ہمارے بھائی کا تو تمہیں کوئی خیال ہی نہیں۔۔۔۔” فری نے اسے گھیرا

“واہ۔۔۔ کمال ہے۔۔۔۔ تمہارے بھائی کو میرا خیال ہے۔۔۔۔؟” سیمی چڑ گئی

“اتنے سارے لوگوں کو ساتھ لیے تمہارے گھر آ کے انگوٹھی پہنائی۔۔۔۔۔ تمہاری فضول سے فرینڈز کی اوٹ پٹانگ حرکتیں برداشت کیں۔۔۔۔ اور کیا چاہتی ہو بھئی۔۔۔۔؟” فری نے اسے کرارا جواب دیا

“احسان ہے آپکے بھائی کا۔۔۔۔ اگر وہ مجھے انگوٹھی نا پہناتے تو کون اپناتا مجھے۔۔۔۔” سیمی پھر سے چڑ گئی

“اچھا اب لڑنا بند کرو۔۔۔۔ اور کل بھائی کے ساتھ گھومنے کا پلان بناؤ۔۔۔۔ ایکدوسرے کو ٹائم دو بھئی۔۔۔۔” فری مدعے پہ آگئی

“ارے ۔۔۔ تابش سے بات کرتے ہوئے بھی ڈر لگتا ہے تم کہتی ہو کہ گھومنے کا پلان بناو۔۔۔۔۔۔ ” سیمی پریشان ہو کے بولی

“اف۔۔۔ بابا۔۔۔ یہ ڈر خوف تبھی ختم ہوگا نا جب تم ان کے ساتھ زیادہ سے زیادہ وقت گزارو گی۔۔۔۔” فری نے اسے سمجھایا

سیمی سوچوں میں دوب گئی

“اے۔۔۔۔ سن رہی ہو۔۔۔۔؟” فری نے کہا

“ہاں۔۔۔ ہاں سن رہی ہوں۔۔۔۔۔” اسنے جواب دیا

“پھر کیا پلان ہے۔۔۔۔۔؟” فری نے پوچھا

“چلو سوچتی ہوں کچھ۔۔۔۔۔” سیمی نے جواب دیا

“گڈ۔۔۔۔۔ ” فری نے مسکراتے ہوئے جواب دیا

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

تابش نے جسے ہی گھر میں قدم رکھا اسکا فون بجنے لگا

سیمی کا نمبر دیکھ کے وہ سوچ میں پڑ گیا، اور پھر فون اٹنڈ کیا

“اسلام علیکم۔۔۔۔!” وہ بولا

“وعلیکم سلام۔۔۔۔۔ کیسے ہو منگیتر۔۔۔۔” سیمی بولنا شروع ہوئی

“میں ٹھیک ہوں۔۔۔ آپ کیسی ہیں؟”

“آپکی آواز سن لی تو اب ٹھیک ہوگئی ہوں۔۔۔” وہ ہنستے ہوئے بولی

“خیریت سے فون کیا۔۔۔۔۔؟”

“کم آن تابش۔۔۔۔ اب ہم منگیتر ہیں۔۔۔ میں جب بھی چاہوں تم سے بات کرسکتی ہوں۔۔۔”

“جی بالکل۔۔۔ آپ کر سکتی ہیں۔۔۔۔ میں تو بس ویسے ہی پوچھ رہا تھا۔۔۔۔”

“اینی وے۔۔۔ کیا کر رہے ہو۔۔۔۔؟”

“بس ابھی گھر پہنچا ہوں۔۔۔۔۔۔ “

“جلدی سے فریش ہوجاؤ۔۔۔ میں دس منٹ میں تمہیں پک کرتی ہوں۔۔۔۔ بڑی مشکل سے پاپا کی گاڑی ملی ہے”

“کہاں جانا ہے۔۔۔۔؟”

“ڈرو مت تمہیں اغوا نہیں کروں گی۔۔۔۔۔ اور ویسے بھی اب تو تم میرے ہو۔۔۔۔ جہاں مرضی لے جاؤں”

“پر۔۔۔ میں ذرا”

“پر۔۔۔ ور کچھ نہیں بس چپ چاپ تیار ہو جاؤ میں لینے آرہی ہوں تمہیں۔۔۔۔۔۔ تم نے اگر کوئی بہانا کیا تو میں انکل کو کال کروں گی۔۔۔ پھر دیکھتی ہوں کیسے نہیں مانتے۔۔۔۔”

“او کے۔۔۔۔ میں فریش ہوتا ہوں۔۔۔”

“جلدی۔۔۔۔ میں گھر سے نکل چکی ہوں۔۔۔۔”

“اوکے ۔۔۔۔۔۔”

کچھ ہی دیر میں سیمی کی گاڑی گیٹ پہنچی۔ تابش اسکے ساتھ چلا گیا

“ہم جا کہاں رہے ہیں۔۔۔۔؟” تابش نے پوچھا

“کسی اچھی جگہ کھانا کھاتے ہیں۔۔۔۔۔ میں اپنی طرف سے تمہیں منگنی کی پارٹی دینا چاہتی ہوں۔۔۔” سیمی مسکراتے ہوئے بولی

تابش خاموش ہوگیا۔۔۔۔

سیمی اسے شہر کے ایک اچھے ریسٹورنٹ میں لے گئی۔ دونوں نے اپنی اپنی پسند کا کھانا آرڈر کیا۔ تابش پھر سے انھی خاموشیوں میں ڈوبا رہا۔

“سنو۔۔۔۔!” سیمی نے اسے اپنی طرف متوجہ کیا

“جی۔۔۔۔!” تابش نے جواب دیا

“شادی کا کیا پلان ہے۔۔۔۔ آئی مین کب کرنی ہے۔۔۔؟” سیمی نے پوچھا

“شادی۔۔۔۔۔۔؟” تابش سوچتے ہوئے بولا

“ہاں بھئی شادی۔۔۔۔ ہماری شادی۔۔۔۔۔ یا پھر پوری زندگی منگنی کے سہارے ہی رکھنا ہے” سیمی نے ٹونٹ کیا

” ابھی نہیں سوچا۔۔۔۔۔ جیسے بابا کہیں گے۔۔۔۔” تابش اسکی طرف دیکھ کے بولا

“میرے والدین کو بہت جلدی ہے ۔۔۔۔۔ شائد وہ زیادہ ویٹ نا کریں۔۔۔۔” سیمی نے اسے اگاہ کیا

“جیسے بڑوں کی مرضی۔۔۔۔۔ ” تابش نے سر جھکا لیا

“شادی ہماری ہے۔۔۔ بڑوں کی نہیں۔۔۔۔ جو ہم چاہیں گے وہی ہوگا۔۔۔۔” سیمی کہنے لگی

“تو آپ کیا چاہتی ہیں۔۔۔۔ کب شادی ہو۔۔۔۔؟” تابش نے اسے سوالیہ نظروں سے دیکھا

“میں تو چاہتی ہوں آج ہی ہوجائے۔۔۔۔ ہاہاہاہا۔۔۔۔” سیمی نے زور دار قہقہہ لگایا

باتوں ہی باتوں میں کھانا سروو ہوگیا۔ سیمی ادھر ادھر کی باتیں کرتی رہی تابش بس ہوں ہاں میں جواب دیتا رہا۔ کھانا کھا کے وہ ریسٹورنٹ سے باہر نکلے۔ پارکنگ میں پہنچے تو سیمی نے گاڑی کی چابی تابش کو تھمائی کہ گاڑی تم ڈرائیو کرو۔

تابش آگے بڑھا اور سیمی کے لیے گاڑی کا دروازہ کھولنے لگا۔ اتنے میں اسکے کندھے پہ کسی نے ہاتھ رکھا۔ تابش نے مڑ کے دیکھا۔۔۔۔۔ عاصم اسکی طرف دیکھ کے مسکرا رہا تھا

“گائیز۔۔۔۔ فائنلی ہیرو پکڑا گیا۔۔۔۔۔۔” اس نے آواز لگائی

نومی اور عمار بھی پاس آگئے

تابش اپنی پریشانی چھپاتے ہوئے ان سے گلے ملا۔

“کہاں ہے یار تو۔۔۔۔۔ اتنے مہینے گزر گئے ۔۔۔۔ تیرا کچھ اتا پتا ہی نہیں ہے۔۔۔” عاصم بولا

“کہیں نہیں یار ۔۔۔۔ بس ایسے کافی مصروف تھا۔۔۔۔” تابش نے ہڑبڑا کے جواب دیا

“لو ہیرو بھی مصروف رہنے لگا۔۔۔۔۔ ہاہاہاہاہا۔۔۔۔۔” عاصم نومی اورعمار کی طرف دیکھ کے ہنسنے لگا

“اس نے کہاں مصروف ہونا ہے۔۔۔۔ بس ایک ہی مصروفیت ہوگی۔۔۔۔” نومی نے معنی خیز نظروں سے اسے دیکھا

وہ تینوں پھر سے ہنس پڑے

“بڈی ۔۔۔۔اس نے تیر ے کام کا کیا کیا۔۔۔۔؟” عمار نے عاصم سے پوچھا

“ہیرو بیچ رستے ہی بھاگ گیا۔۔۔۔۔۔ میں سمجھا تھا بڑی ہمت ہے اس میں لیکن یہ تو خالی ڈبہ نکلا۔۔۔” عاصم نے تابش پہ طنزیہ نظر دوڑائی۔۔۔۔

“مولوی کی بیٹی۔۔۔۔۔” نومی کچھ کہتے کہتے رکا۔۔۔۔ ان تینوں کی نظر سیمی پہ پڑی جو پاس کھڑی انکی باتیں سن رہی تھی۔عاصم نے تابش سے آنکھ کے اشارے سے سیمی کے بارے میں پوچھا۔ تابش جلدی اپنے حواس میں لوٹا

“میری منگیتر سے ملیں۔۔۔۔۔ ” تابش نے سیمی کے طرف اشارہ کیا

“منگیتر۔۔۔۔۔ !” وہ تینوں چونکے،

“بھابی جی۔۔۔۔۔ بھابی جی۔۔۔ کیسی ہیں آپ۔۔۔۔۔” وہ یک زبان ہوکے بولے

سیمی نے ایک مسکراہٹ سے ان سب کا خیر مقدم کیا۔ تابش نے سیمی سے تینوں کا تعارف کرایا

“تابش۔۔۔ ! یار تم تو چھپے رستم نکلے ۔۔۔۔ چپ چاپ منگنی کرلی اور بتایا بھی نہیں ” نومی نے شکائیت کی

“بس یار۔۔۔۔ سب بہت جلدی میں ہوا۔۔۔۔” تابش صفائی دینے لگا

“جی ۔۔۔ یہ بالکل ٹھیک کہہ رہے ہیں۔۔ سب بہت جلدی میں ہوا ۔۔۔ لیکن انھوں نے ماننے میں تھوڑی دیر ضرور لگائی۔۔۔” سیمی پھیکی ہنستی ہنستے ہوئے بولی۔۔۔۔

وہ تینوں تابش کی طرف دیکھنے لگے۔۔۔۔۔

“عاصم۔۔۔۔۔ اس نے تمہاری آفر بھی اس لیے ٹھکرائی ہے شائد۔۔۔۔۔” عمار نے عاصم کو اشارہ کیا

“کیسی آفر بھئی۔۔۔۔۔! مجھے بھی تو پتہ چلے۔۔۔۔۔” سیمی سب کے چہرے پڑھنے لگی

“کچھ نہیں ۔۔۔۔ تم گاڑی میں بیٹھو۔۔۔۔ دیر ہورہی ہے۔۔۔۔” تابش نے اسکی طرف دیکھا

“ارے یار ایسے کیسے۔۔۔۔ پہلی بار بھابی سے ملاقات ہوئی ہے۔۔۔ کچھ کھائے پیے بنا ہی تم جا رہے ہو۔۔۔۔۔” عاصم بولا

“یار ایکچولی ہم لوگ ابھی کھانا کھا کے نکلے ہیں ۔۔۔ پھر کبھی سہی۔۔۔۔” تابش بس وہاں سے بھاگ جانا چاہتا تھا

اس نے پھر سے سیمی کو گاڑی میں بیٹھنے کا اشارہ کیا، وہ گاڑی میں بیٹھ گئی۔ تابش نے گاڑی کا دروازہ بند کیا

“یار عاصم۔۔۔۔۔ ! تم سے ایک بات کرنی ہے۔۔۔۔” تابش بولا

“ہاں بول یار۔۔۔۔۔” عاصم نے جواب دیا

“یار۔۔۔۔ تٌو اس لڑکی کا پیچھا چھوڑ دے پلیز۔۔۔۔ میں ان لوگوں کو اچھی طرح سے سمجھ چکا ہوں، بہت شریف لوگ ہیں۔۔۔” تابش التجا کرنے لگا۔

“بہت دیر کردی مہربان آتے آتے۔۔۔۔۔۔ “عاصم نے قہقہہ لگایا

نومی اور عمار بھی ہنس پڑے

“کیا مطلب۔۔۔۔۔؟” تابش نے حیرانی سے پوچھا

“ہیرو۔۔۔ تیرے والی آسائنمنٹ میں نے کسی اور کو دے دی ہے۔۔۔۔۔۔ اور اس بار تو سب لیگل طریقے سے ہوگا۔۔۔۔” عاصم اسکے کندھے پہ ہاتھ رکھ کے بولا

“میں سمجھا نہیں۔۔۔۔۔۔” تابش کی سانسیں اکھڑنے لگیں

“یار اس نے مولوی کی برادری کا بندہ ڈھونڈا ہے، وہ بھی کوئی مولوی ہی ہے، اسے پیسوں کی ضرورت تھی عاصم نے خرید لیا۔۔۔” نومی بولا

“تمہارا مطلب کوئی مولوی اسے پیار کے جال میں پھنسائے گا۔۔۔۔۔” تابش کی آنکھیں پھیل گئیں

“نہیں۔۔۔۔۔۔ مولوی نے اپنے لیے رشتہ بھجوایا ہے۔ اس بار عاصم نے ایسا جال بنا ہے۔۔۔۔ مچھلی پھنسی سمجھو۔۔۔۔” وہ تینوں پھر سے ہنسنے لگے

تابش کے پاؤں کے نیچے سے زمین سرکی۔۔۔۔

وہ ہنستے ہوئے ریسٹورنٹ کی طرف چل پڑے ۔

“تابش۔۔۔۔ !” سیمی کی آواز پہ وہ چونکا

اسکے اندر آندھیاں چلنے لگیں۔۔۔۔۔۔ وہ سوچتا رہا تھا کہ عاصم کے دل سے نور کا جنون نکل چکا ہوگا لیکن ۔۔۔۔۔۔ اوہ خدایا۔۔۔۔ اب کیا ہوگا۔

وہ جلدی سے ڈرائیونگ سیٹ پہ بیٹھا اور اندھا دھند گاڑی ڈارئیو کرنے لگا۔ تابش کے اڑے ہوئے رنگ دیکھ کے سیمی گھبرا سی گئی

“تابش۔۔۔۔ ! کیا ہوا ہے۔۔۔۔۔۔”

وہ خاموش رہا

“تابش میں تم سے کچھ پوچھ رہی ہوں۔۔۔۔ سب ٹھیک ہے نا۔۔۔۔؟” وہ بولی

“کچھ بھی ٹھیک نہیں ہے۔۔۔۔۔ “وہ لبوں میں بڑبڑایا

“ہوا کیا ہے۔۔۔۔۔ کچھ بتاؤ گے۔۔۔۔” سیمی چلائی

“خدا کے لیے ابھی مجھ سے کچھ مت پوچھو۔۔۔۔۔۔۔” تابش نے تپ کے جواب دیا

وہ پھٹی آنکھوں سے اسکا چہرہ دیکھنے لگے

“تابش ایکسیڈنٹ ہوجائے گا۔۔۔۔ گاڑی کی سپیڈ کم کرو۔۔۔۔۔۔” سیمی گھبرا گئی

وہ بدستور گاڑی چلاتا رہا۔۔۔۔۔

اپنے گھر کے دروازے پہ اس نے گاڑی روکی۔۔۔

“تم اپنے گھر جا سکتی ہو۔۔۔۔۔” یہ کہہ کے وہ برق رفتاری سے گھر میں داخل ہوا

فری اور فیزی ٹی وی دیکھ رہی تھیں

“بابا۔۔۔۔ بابا۔۔۔۔ کہاں ہیں۔۔۔۔” وہ ہڑ بڑا کے پوچھنے لگا

“گیارہ بج چکے ہیں۔۔۔۔۔ بابا تو سو رہے ہوں گے۔۔۔۔۔۔”

وہ دونوں اسکی حالت دیکھ کے پریشان ہو گئیں

تابش بھاگتا ہوا اباجی کے کمرے میں آگیا۔۔۔۔ وہ آنکھیں بند کرکے لیٹے تھے۔ ناصرہ بیگم کیچن سے گرم دودھ کا گلاس لے کے کمرے میں پہنچی

“بابا۔۔۔۔۔ !” تابش انکے بیڈ کے پاس بیٹھ گیا اور انکا ہاتھ اپنے دونوں ہاتھوں میں لیا

وہ کچی نیند میں تھے تابش کی آواز پہ بوکھلا کے اٹھ بیٹھے۔۔۔۔

فیزی اور فری بھی کمرے میں آگئیں

“کیا۔۔۔۔۔ ہوا۔۔۔۔” انکی سانسیں تیز تیز چلنے لگیں

“بابا۔۔۔۔۔۔ ! مجھے نور چاہیے۔۔۔۔۔ پلیز۔۔۔۔۔۔ مجھے نور چاہیے۔۔۔۔۔” تابش بچوں کی طرح رونے لگا

“کون نور۔۔۔۔۔۔ !” بابا ادھر ادھر دیکھنے لگے۔۔۔۔۔

“مولوی صاحب کی بیٹی۔۔۔۔۔ “

اسکے دل میں اتنے دن سے جو لاوا پک رہا تھا، آنسوؤں کی صورت میں باہر امڈنے لگا۔۔۔۔۔