صحن میں چار پائی پہ براجمان وہ تلاوتِ قرآن پاک میں مشغول تھی۔ سر پہ دوپٹہ لپیٹے وہ کسی پری سے کم نہیں لگ رہی تھی۔ صبح کی مدہم سی روشنی اسکے چہرے سے ٹکرا کے نور میں بدل رہی تھی۔۔۔۔۔

وہ نور تھی۔۔۔۔۔

تابش پلکیں جھپکانا بھول گیا۔ اس بات سے بخبر کہ اگر ایک بار بھی اس نے نظر اٹھا کے دیکھا تو یہ شائد پھر کبھی اسکا دیدار نصیب نہ ہو۔

“نور بیٹا۔۔۔۔ !” مولوی صاحب کی آواز تابش کے کانوں میں پڑی

اپنے حواس پہ قابو پاتے اس نے جلدی سے دروازہ بند کیا اور جا کے بستر پہ لیٹ گیا۔

“جی بابا۔۔۔۔ !” نور نے جواب دیا

“بیٹا ناشتے کا انتظام جلدی کرنا، گھر میں مہمان بھی موجود ہے” مولوی صاحب نور کے پاس آکے کھڑے ہوگئے۔

“جی۔۔۔ !” اس نے سر ہلایا

“بابا۔۔۔! میں نے جائے نماز اور تسبیح بیٹھک میں رکھ دی تھی، پتا نہیں آپکے مہمان کو ملی بھی ہے یا نہیں۔ ایسا نہ ہو کہ انکی نماز قضا ہو جائے، آپ جا کے بتا دیں” نور نے انکی طرف دیکھ کے کہا

“میں ابھی جا کے دیکھتا ہوں۔۔۔” مولوی صاحب بیٹھک کی طرف بڑھے

تابش نے دروازہ کھلنے کی آوازسنی تو آنکھیں بند کرلیں۔ دل زور زور سے دھڑک رہا تھا کہیں مولوی صاحب کو پتا نہ چلا گیا ہو کہ میں انکی بیٹی کو ٹکٹی باندھ کے دیکھ رہا تھا۔ اگر ایسا ہوا تو پکی پکی چھٹی ہو جائے گی۔

“برخودار۔۔۔ ! نماز کا وقت نکل رہا ہے۔ اب اٹھ جائیں۔۔۔” مولوی صاحب تابش کے بستر کے پاس آکے کھڑے ہوگئے۔

تابش آنکھیں مسلتے ہوئے اٹھ بیٹھا

“شکر ہے آپ نے وقت رہیتے اٹھا دیا۔۔۔۔ ورنہ نماز قضا ہوجاتی۔ دراصل نئی جگہ تھی اس لی آنکھ دیر سے لگی۔۔۔۔” اس نے وضاحت دینا شروع کی

“چلیں اب جلدی سے اٹھ جائیں۔۔۔ !” مولوی صاحب نے تاکید کی

تابش جلدی سے اٹھا اور نماز کا وضو کرنے لگا۔ مولوی صاحب نے جائے نماز اور تسبیح اسے پکڑائی اور خود بیٹھک سے باہر چل دیے

“بابا ۔۔۔۔ مہمان سے پوچھیں کہ وہ ناشتے سے پہلے چائے لیں گے۔۔۔؟” نور نے کیچن سے مولوی صاحب کو آواز دی جو صحن میں بیٹھے تھے۔

تابش ناشتے سے پہلے چائے پینے کا عادی نہیں تھا، اس لیے مولوی صاحب کے پوچھنے پہ اس نے منع کرد یا۔

“آپ صبح کی نماز مسجد میں نہیں پڑھاتے۔۔۔۔۔؟”تابش نے مولوی صاحب سے پوچھا

“نہیں بیٹا۔۔۔۔ فجر کے وقت کافی اندھیرا ہوتا ہے۔ بڑھاپے کی وجہ سے ٹھیک طرح سے دیکھائی نہیں دیتا۔ اس لیے صبح کی نماز گھر پہ ہی پڑھ لیتا ہوں” مولوی صاحب بتانے لگے

“آپکی ڈیوٹی کس وقت شروع ہوتی ہے۔۔۔؟” مولوی صاحب نے تابش سے پوچھا

“میری ڈیوٹی کے کوئی خاص اوقات نہیں ہیں بس دن میں دو تین چکر لگتے ہیں تاکہ کام کی صورت حال پتا چلے سکے” تابش نے جواب دیا

“اچھا۔۔۔۔ ! میں آپکو ایک تالااور چابی دیتا ہوں ۔ آپ کو جس وقت جانا ہو تو بیٹھک کو باہر سے تالا لگا دیا کریں اور واپسی پہ کھول لیا کریں۔۔۔” مولوی صاحب نے تابش کی آسانی کے لیے کہا

ناشتہ تیار ہوگیا تو نور نے بابا کو آواز دی۔ نور کی آواز کانوں میں پڑتے ہی تابش کے کان پھر سے کھڑے ہوگئے۔ مولوی صاحب گھر چلے گئے

“بابا۔۔۔ ! ایک بات کہوں۔۔۔۔” نور بابا سے مخاطب ہوئی

“جی بیٹا۔۔۔۔ بولو۔۔۔” مولوی صاحب بیٹی کا چہرہ دیکھتے ہوئے بولے

“میں مانتی ہوں مہمان اللہ کی رحمت ہوتے ہیں۔ لیکن ایسے کسی انجان آدمی کو اپنے گھر رکنے دینا جسکے بارے میں ہم بالکل نہیں جانتے ، کیا آپ کو ٹھیک لگ رہا ہے؟” نور نے اپنی پریشانی مولوی صاحب کے سامنے رکھ دی

“بیٹا۔۔۔۔ تمہاری فکر اپنی جگہ پہ جائز ہے۔ ہو سکتا ہے اللہ پاک کی یہی مرضی ہو کہ ہم اسکے مددگار بنیں۔۔۔” مولوی صاحب نے نور کو تسلی دی

“شائد آپ ٹھیک کہتے ہیں۔۔۔۔۔” نور نے سر ہلایا

گھر کے دروازے پہ دستک ہوئی۔ مولوی صاحب نے دروازہ کھولا۔ سامنے نور کے ساتھ مدرسے جانے والی چاروں لڑکیاں کھڑی تھیں۔ مولوی صاحب نے انھیں اندر بلایا

“اسلام علیکم” نور نے سب کو مسکراتے ہوئے سلام کیا

“وعلیکم سلام۔۔۔! نور ابھی تک تیار نہیں ہوئی۔۔۔؟” فاطمہ بولی

“میں تیار ہوں۔۔۔ بس ” نور بولی

“ارے عبایہ کہاں ہے تمہارا۔۔۔۔۔؟ یا پھر ایسے ہی جانے کا ارادہ ہے؟” فاطمہ مسکراتے ہوئے کہا

“بس ایک منٹ دے دو۔۔۔۔ ابھی آئی” وہ جلدی سے کمرے کی طرف جانے لگی

“جلدی کرنا۔۔۔۔۔ تمہیں پتا ہے بس کا ٹائم ہوگیا ہے” فاطمہ نے پیچھے سے آواز دی

نور نے عبایہ پہنا اور معمول کے حساب سے اپنےجسم کے ہر حصے کو ڈھانپ کے کمرے سے باہر نکل آئی۔

مولوی صاحب کی روزانہ کی عادت تھی وہ بس سٹاپ تک ان سب کےخود ہی چھوڑ جاتے تھے۔ نور نے گھر کے چاروں اطراف نظر گھمائی پھر سب کے پیچھے پیچھے گھر سے باہر نکل آئی۔

مولوی صاحب کچھ فاصلے پہ آگے چلنے لگے نور باقی لڑکیوں کے ساتھ انکے پیچھے چل پڑی

سگریٹ کے کش لگاتے ہوئے دروازے کی ٹیک لگائے تابش یہ سارا منظر دیکھتا رہا۔

“نور۔۔۔۔ !” فاطمہ نے نور سے کندھا ٹکرا کے سرگوشی کی

“کیا ہے۔۔۔۔؟” نور چڑ کے بولی

“یہ خوبرو نوجوان کون تھا۔۔۔۔؟” فاطمہ کا اشارہ تابش کی جانب تھا

“کون۔۔۔۔؟” نور نے پوچھا

“ارے۔۔۔۔ وہی جو بیٹھک کے دروازے میں کھڑا تھا۔۔۔” فاطمہ نے بتایا

“بابا کا مہمان ہے۔۔۔۔۔” نور بولی

“بابا کا مہمان ہے یا پھر تمہارا ہونے والا۔۔۔۔۔۔۔۔” فاطمہ نے اسے چھیڑا

“تم کتنی بے شرم ہو ۔۔۔۔۔۔ بناسوچے سمجھے کچھ بھی بول دیتی ہو۔۔۔۔ ایسا ویسا کچھ نہیں ہے۔۔۔۔” نور تلملا گئی

“اچھا۔۔۔۔۔ تو پھر کون ہے۔۔۔ تمہارے سارے رشتہ داروں کو میں جانتی ہوں۔ اسے کبھی نہیں دیکھا۔۔۔۔” فاطمہ نے پوچھا

“اف ہو۔۔۔۔ بتایا نا۔۔۔۔ بابا کا مہمان ہے۔ پاس ہی کہیں کام کرتا ہے۔ اسے آنے جانے میں دقت ہوتی تھی اس لیے بابا نے بیٹھک میں رہنے کی اجازت دے ہی۔ جیسے ہی اسکا کام مکمل ہوا تو چلا جائے گا۔۔۔۔” نور نے ساری کہانی بتا دی

“اوہ ۔۔۔۔ اچھا۔۔۔ مطلب تم لوگوں نے بیٹھک کرائے پہ چڑھا دی ہے؟” فاطمہ نے مزید استفسار کیا

“نہیں بھئی۔۔۔۔۔ ! بابا نے ویسے ہی رہنے کی اجازت دی ہے۔۔۔۔۔ اب چپ رہو۔۔۔۔ بابا نے تمہاری سرگوشیاں سنیں تو خیر نہیں ہوگی۔۔۔۔” نور تپ کر بولی

بس سٹاپ پہ پہنچتے ہی تین نمبر بس انکے سامنے آکے رکی۔ نور باقی لڑکیوں کے ساتھ بس میں سوار ہوئی

فاطمہ حسب معمول نور کے ساتھ والی سیٹ پہ بیٹھ گئی

“نور۔۔۔۔ !” فاطمہ نے اسے اپنی طرف مخاطب کیا

نور نے کوئی جواب نہیں دیا۔

“نور ۔۔۔۔ !” اب کی بار وہ کندھا ہلا کے بولی

نور نے ہاتھ میں پکڑی ہوئی تسبیح کی طرف اشارہ کیا اور اپنی بڑی بڑی آنکھوں سے اسے گھورنے لگی

نور کی ہمیشہ سے یہی عادت تھی وہ بس میں سوار ہوتے ہی ایک سو ایک مرتبہ استغفار کرتی تھی۔ فاطمہ کو یاد آیا تو شرمندہ سی ہوگئی۔

“اب بولو۔۔۔ ! کیا مسئلہ ہے۔۔۔” نور تسبیح ہینڈ بیگ میں ڈالتے ہوئے بولی

“کچھ نہیں۔۔۔۔۔” فاطمہ خفا ہو کے بولی

“ٹھیک ہے مت بتاؤ۔۔۔۔۔۔ ” نور بھی چڑ گئی

دو پل کی خاموشی کے بعد فاطمہ پھر سے بولی

“وہ لڑکا کافی خوبرو ہے۔۔۔۔۔۔ ہیں نا۔۔۔؟” وہ سوچتے ہوئے بولی

“کون۔۔۔۔؟” نور نے پوچھا

“ارے۔۔۔ تمہارا مہمان۔۔۔۔۔ اور کون۔۔۔؟” وہ اسکی طرف دیکھتے ہوئے بولی

“اف۔۔۔۔ تمہارے دماغ پہ ابھی تک وہی سوار ہے۔۔۔۔۔” نور نے اسے گھورا

“ایسا نہیں ہے۔۔۔۔۔ میں تو بس یونہی بول رہی ہوں۔۔۔۔ ماشاء اللہ اچھی شکل صورت کا مالک ہے۔۔۔۔” وہ بولی

“میں نے اسکی شکل نہیں دیکھی۔۔۔۔۔” نور بولی

“کیا۔۔۔۔ ! جھوٹ بول رہی ہو۔۔۔۔ وہ تمہارے گھر رکا ہوا ہے اور تم نے شکل نہیں دیکھی۔۔۔۔ ناممکن۔۔۔۔۔” فاطمہ حیران ہو کے بولی

“مت یقین کرو۔۔۔۔۔ ” نور نے جواب دیا

بس مدرسے کے گیٹ پہ رکی۔ سبھی لڑکیاں اور خواتین ایک ایک کرکے نیچے اترنے لگیں

“سنو۔۔۔۔ ! مجھے تمہاری بات پہ بالکل یقین نہیں ہے۔۔۔۔” فاطمہ بس سے نیچے اترتے ہوئی بولی

“نہیں ہے تو کیا کر سکتی ہوں۔۔۔۔ چلو جلدی اترو۔۔۔۔۔۔” نور نے خونخوار نظروں سے اسے دیکھا

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

مولوی صاحب کو یقین دلانے کے لیے دو چار گھنٹے تو باہر گزارنے ہی پڑیں گے یہ سوچ کے تابش کام کا بہانہ کرکے وہاں سے نکل آیا۔

اِدھر ادھر بائیک گھوماتے بار بار نور کی شکل اسکی آنکھوں کے سامنے نمودار ہورہی تھی۔

“کیا تھا اس لڑکی میں۔۔۔۔۔۔۔۔ میں نے کتنی حسین لڑکیاں دیکھی ہیں۔۔۔۔ ان سب میں وہ بات نہیں تھی جو نور میں ہے۔۔۔۔۔۔۔” اپنے آپ سے سرگوشیاں کرتے وہ یہاں وہاں بھٹکتا کررہا۔

کچھ وقت گزارنے کے لیے تابش اپنے ایک دوست کی موبائل شاپ پہ چلا گیا۔ وہاں بیٹھ کے اس نے اپنے فیس بک اکاؤنٹ پہ موجود سبھی نئی اور پرانی دوست لڑکیوں کی تصویریں چھاننا شروع کیں۔

کسی کی آنکھیں بہت خوبصورت تھیں لیکن نور جیسی نہیں تھیں۔ کسی کے ہونٹ کسی کی ناک کسی کا چہرہ۔۔۔۔۔۔ ہر ایک لڑکی کو بغور جانچنے کے بعد وہ اس نتیجے پہ پہنچا کہ ان میں سے کوئی ایک بھی ایسی نہیں جو نور کا مقابلہ کر سکے۔

سہہ پہر ایک بجے تابش کو خیال آیا کہ نور کو چھٹی ہوچکی ہوگی۔ وہ جا کے تین نمبر بس کے سٹاپ کے پاس موجود ڈرنک کارنر پہ کھڑا ہوگیا۔ اتنے میں بس آکے رکی نور باقی لڑکیوں کے ساتھ بس سے نیچے اتری۔

“سنو۔۔۔۔ !” فاطمہ نے نور کو کندھا مارا

“کیا بدتمیزی ہےفاطمہ۔۔۔۔ لوگ دیکھیں گے تو کیا کہیں گے۔۔۔۔” نور تپ گئی

“اچھا۔۔۔۔ اچھا معاف کردو۔۔۔۔ ” فاطمہ شرمندہ ہونے لگی

“بے شرم لڑکی۔۔۔۔۔۔!” نور شدید غصے میں تھی

“اچھا۔۔۔ سنو نا۔۔۔۔” وہ پھر سے بولی

“اب کیا ہے۔۔۔۔۔؟” وہ بولی

“وہ سامنے دیکھو۔۔۔۔۔!” فاطمہ نے ڈرنک کارنر کی طرف اشارہ کیا

“کیا ہے وہاں پہ۔۔۔۔۔۔۔۔۔۔؟” نور نے اسکی طرف دیکھے بنا ہی پوچھا

“ارے وہی۔۔۔۔ تمہارا مہمان۔۔۔۔ وہ سامنے کھڑا ہے۔۔۔۔ اگر تم نے سچ میں اسے نہیں دیکھا تو ابھی دیکھ لو۔۔۔۔۔” فاطمہ بولی

“خدا کا خوف کرو۔۔۔۔۔۔ ذرا سی شرم باقی ہے تم میں یا نہیں۔۔۔۔۔؟” نور بھڑک کے بولی

فاطمہ ڈر کے چپ ہوگئی

“اچھا بابا۔۔۔۔ میں تو بس ایسے ہی بول رہی تھی۔۔۔۔۔” تھوڑی دیر بعد فاطمہ پھر سے بولی

“بات مت کرو مجھ سے۔۔۔۔۔ آج تم نے حد ہی کر دی ہے۔۔۔۔” نور غصے سے تلملاتی اس سے آگے بڑھ گئی۔

گھر کے دروازے پہ پہنچی تو مولوی صاحب گلی میں ہی کھڑے تھے۔ نور باقی لڑکیوں سمیت گھر کے اندر داخل ہوئی۔

“نور۔۔۔۔ معاف کردو اب۔۔۔۔۔ دوبارہ ایسا نہیں ہوگا۔۔۔۔” فاطمہ نے معافی مانگی

” تم بہت اچھی طرح سے جانتی ہو ، کسی نامحرم کو اس طرح دیکھنا اور اسکے بارے میں بات چیت کرنا غلط ہے۔۔۔۔۔ کوئی جاہل اگر ایسا کچھ کرے تو سمجھ میں آتا ہے لیکن تم ۔۔۔۔ تم یہ کیسے کر سکتی ہو۔۔۔” نور کا غصہ ٹھنداہوا تو وہ اسے سمجھاتے ہوئے بولی

فاطمہ کو اپنی غلطی کا احساس ہوا۔ نورنے اسےمعاف کیا تو وہ باقی لڑکیوں کے ساتھ اپنے گھر چلی گئی ۔

نور ہمیشہ کی طرح آتے ہی کیچن میں گھس گئی۔ مولوی صاحب نے اندر آتے ہی اطلاع دی کہ تابش کے لیے بھی کھانا بنانا ہے، وہ بھی آگیا ہے۔

“بابا۔۔۔۔ یہ آپکے مہمان ایسا کیا کام کرتے ہیں جو انھیں اتنی جلدی چھٹی بھی مل جاتی ہے۔۔۔۔؟” نور نے سوالیہ نظروں سے مولوی صاحب کی طرف دیکھا

“بیٹا۔۔۔۔ انکا کام ہی ایسا ہے کہ ہر وقت وہاں موجود ہونے کی ضروت نہیں ہوتی۔ بس دو چار گھنٹے وہاں گزراے کام کا جائزہ لیا اور پھر واپس۔۔۔۔” مولوی صاحب تابش کی بتائی ہوئی کہانی نور کو سنانے لگے

“اللہ ہی جانے ایسی کونسی نوکری ہوتی ہے۔۔۔۔۔۔۔۔” نور چولہا جلاتے ہوئے بولی

“بچے۔۔۔۔ ! ہمیں ان کے کام سے کیا لینا دینا۔۔۔۔ ہمارے لیے وہ مہمان ہیں بس ۔۔۔۔۔” مولوی صاحب نے جواب دیا

“اچھا بابا۔۔۔۔ !” نور ناگواری سے بولی

وہ کھانا بنانے میں لگ گئی

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

عصر کا وقت قریب تھا۔ مولوی صاحب بیٹھک میں داخل ہوئے۔ تابش کرسی پہ بیٹھا موبائل پہ گیم کھیلنے میں مصروف تھا

“برخودار ! آپ مسجد چلیں گے یا پھر یہیں نماز پڑھیں گے۔۔۔؟” مولوی صاحب پوچھنے لگے۔

“میں آپکے ساتھ مسجد چلتا ہوں” وہ اٹھ کھڑا ہوا

مولوی صاحب کو اپنی بائیک پہ سوار کیے وہ مسجد پہنچا

عصر کے بعد پتا چلا کہ مولوی صاحب مغرب تک بچوں کو قرآن پاک پڑھاتے ہیں۔ تابش کام کے بہانے وہاں سے نکل آیا۔ گھر پہنچا تو کالونی کے بچے بچیاں نور سے قرآن پاک پڑھنے کے لیے آ جا رہے تھے۔ چار و نچار وہ بائیک پہ ادھر ادھر گومتا رہا

مغرب کے وقت دوبارہ مسجد پہنچا۔۔۔۔ مولوی صاحب مغرب کی نماز کے بعد ایک ختم پہ مدعو تھے۔ تابش واپس گھر آگیا

موسم کافی خراب تھا۔ بادل زور زور سے گرج رہے تھے۔ اور دیکھتے ہی دیکھتے موسلہ دھار بارش شروع ہوگئی۔

تابش کے موبائل کی بیل بجی۔۔۔۔ فیزی کی کال تھی

“ہیلو۔۔۔ !”

“بھائی آپ کہاں ہیں۔۔۔۔؟” وہ پوچھنے لگی

“بتایا تو تھا عاصم کے کام سے شہر سے باہر آیا ہوا ہوں۔۔۔۔” تابش نے جھوٹ بولا

“جھوٹ۔۔۔ بالکل جھوٹ۔۔۔” وہ ہنستے ہوئے بولی

تابش ہڑ بڑا گیا

“بچو۔۔۔ ! ہم نے آپکی لوکیشن ٹریس کرلی ہے۔۔۔” فرّی نے فیزی سے فون پکڑا

“ارے ۔۔۔۔ یار۔۔۔۔ کیا چاہتے ہو تم لوگ؟” تابش چڑ کے بولا

“آپ نے جھوٹ کیوں بولا؟ پہلے یہ بتائیں۔۔۔۔؟” فری بولی

“یار ٹرسٹ می۔۔۔۔ عاصم کا ہی کام کررہا ہوں۔۔۔۔ پلیز بابا کو کچھ مت بتانا” تابش درخواست کرنے لگا

“ٹھیک ہے۔۔۔۔ بابا کو پتا نہیں چلے گا لیکن اس کے بدلے میں ہمیں کیا ملے گا؟” فری نے پوچھا

“جو بھی کہو گے۔۔۔۔ ” تابش مجبور ہو کے بولا

“ڈن۔۔۔۔ جب آپ واپس آئیں گے تب آپکو بتا دیں گے۔۔۔۔” یہ کہہ کے اس نے فون کٹ کرد یا

ایکدم سے بجلی چلی گئی

تابش نے بیٹھک کا دروازہ کھول کے دیکھا تو سب کے ہاں روشنی تھی صرف مولوی صاحب کا گھر ہی اندھیرے سے ڈوبا تھا۔

تابش جانتا تھا کہ نور گھر میں اکیلی ہے۔ وہ سوچ میں ڈوب گیا کہ اب کیا کرے

نور نے دروزاے پہ دستک دی

تابش دروازے کا پاس پہنچا

“سنئیے۔۔۔۔۔ !” نور کی آواز آئی

“جی۔۔۔۔۔!” تابش نے جواب دیا

“بارش کی وجہ سے تاروں میں چنگاریاں اٹھی ہیں شائد اسکی وجہ سے بجلی چلی گئی ہے۔ آپ ٹھیک کر سکتے ہیں” نور کی آواز میں ایک خوف تھا

“جی۔۔۔ میں کر لوں گا لیکن مجھے کچھ سامان چاہیے ہوگا۔۔۔” تابش نے بجلی ٹھیک کرنے کا ضروری سامان پوچھا

“سب موجود ہے۔ میں باہر چار پائی پہ سارا کچھ رکھ رہی ہوں۔ آپ اندر آکے دیکھ لیں”

کچھ ہی پلوں میں تابش گھر میں داخل ہوا۔۔۔۔ نور کمرے میں چلی گئی۔ کافی اندھیرا تھا اس لیے اس نے اپنے موبائل ٹارچ آن کی چارپائی سے سامان اٹھایا

“سنئے۔۔۔۔ تاروں کے جوڑ کس طرف ہیں۔۔۔؟” تابش نے آواز دی

“وہ وہاں۔۔۔۔ سامنے والی دیوار کے اوپر جو تاریں ہیں ان میں مسئلہ ہے۔۔۔۔” نور نے کمرے سے جواب دیا

دیوار زیادہ اونچی نہیں تھی، تابش چھلانگ لگا کے دیوار پہ چڑھ گیا۔ تاریں کافی الجھی ہوئی تھیں۔ بارش کی وجہ سے گیلی بھی تھیں۔۔۔۔ اس نے بہت احتیاط کے ساتھ ایک ایک کرکے تاریں الگ کیں۔۔۔۔۔ ایک تار کا جوڑ جلا ہوا تھا۔ تابش اسے ٹھیک کرنے لگا۔ دس پندرہ منٹ کی جدو جہد کے بعد تار ٹھیک ہوئی اور گھر میں میں روشنی پھیل گئی۔ نور کمرے کے اندر سے سب کچھ دیکھ رہی تھی اور بجلی ٹھیک ہوئی تو اسکے چہرے پہ خوشیکے آثار نمودار ہوئے

تابش نے خدا کا شکر ادا کیا کہ عزت بچ گئی بجلی ٹھیک نہ ہوتی تو شرمندگی اٹھانی پڑتی ۔ وہ دیوار سے نیچے اترنے کے لیے جیسے ہی چھلانگ لگانے لگا تار کے ایک اور جوڑ پہ اسکا ہاتھ لگا اور بجلی کے ایک زور دار جھٹکے سے وہ نیچے آگرا۔۔۔۔ ماتھا فرش سے ٹکرایا ۔ ماتھے سے خون بہنے لگا

نور نے گرنے کی آواز سنی تو بد حواس ہوکے اسکی طرف لپکی اس وقت نہ تو اسے پردے کا ہوش تھا اور نہ زمانے کی فکر

زانوں کے بل فرش پہ بیٹھ کے اس نے تابش کے ماتھے کے بال ہٹائے اور رستے ہوئے خون پہ اپنا دوپٹہ رکھ دیا۔۔۔۔۔

تابش کی آنکھیں اسکے چہرے پہ جم گئیں۔۔۔۔ درد اور تکلیف سے بے خبر وہ اسے دیکھتا رہا۔۔۔۔۔۔۔۔

جاری ہے