نور نے جیسے ہی سراٹھا کے اسکی طرف دیکھا ہاتھ سے کھانے کی طشتری چھوٹ گئی۔ ۔۔۔۔۔ جسم پہ ایک کپکپی سی طاری ہوئی۔۔۔۔

کل تک تو نور کے ایک بار کہنے پہ اس نے ایسے آنکھیں بند کیں کہ پھر کبھی اس کی طرف نہیں دیکھے گا اور اب اس میں اتنی ہمت آ گئی تھی کہ وہ نور کے چہرے پہ اپنی نظریں گاڑے کھڑا تھا

گھر کی چوکھٹ پہ مولوی صاحب نے جیسے قدم رکھا۔ تابش برق رفتاری سے بیٹھک کے دروازے کی طرف لپکا اور نور کیچن کی طرف مڑی۔

“خدایا خیر۔۔۔۔ ! یہ کیسے ہوا۔۔۔۔۔۔؟” مولوی صاحب کی نظر فرش پہ پڑی جہاں کھانا گرا ہوا تھا۔

“بابا۔۔۔۔ ! پاؤں پھسلنے سے طشتری ہاتھ سے چھوٹ گئی۔۔۔۔۔ ” نور ہکلاتے ہوئے بولی۔ زندگی میں پہلی بار اس نے مولوی صاحب سے جھوٹ بولا تھا۔ زبان ساتھ نہیں دے رہی تھی۔

“بیٹا۔۔۔۔ دیکھ کے چلا کرو۔۔۔۔ عورت ذات کو پاؤں بہت سنبھال کے رکھنا پڑتا ہے” مولوی صاحب کمرے کی طرف چل دیے۔

نور صحن میں بے حس و حرکت کھڑی رہی اور تابش خیالوں میں گم بیٹھک میں بستر پہ لیٹ گیا۔

“یہ میں کیا کرنے جارہا تھا۔۔۔۔۔ ؟ کیا سوچتی ہوگی وہ۔۔۔۔۔ ؟ کیوں میں خود کو روک نہیں پایا۔۔۔۔؟” تابش اپنے آپ سے سرگوشیاں کرتا رہا

کچھ دیر بعد مولوی صاحب کھانا لے بیٹھک میں آئے۔۔۔۔ تابش بستر سےاٹھ کے کھڑا ہوگیا۔ تابش نے انکے ہاتھ سے کھانے کی طشتری پکڑ کے میز پہ رکھی۔ مولوی صاحب کرسی پہ بیٹھ گئے۔

“برخودار۔۔۔ آپ سے ایک عرض تھی۔۔۔” مولوی صاحب بولے

“جی۔۔ جی۔۔۔ حکم کریں آپ۔۔۔۔” تابش مؤدبانہ انداز میں بولا

“دراصل میرے بھتیجے کی شادی ہے تو اسی کے سلسلے میں ہمیں کچھ دنوں کے لیے شہر سے باہر جانا ہے۔۔۔۔” وہ بولے

“اچھا۔۔۔۔۔ ! کب جانا ہے؟” تابش نے سوال کیا

“کل صبح سویرے ہی نکلنا ہے۔۔۔۔۔” انھوں نے بتایا

تابش نے سر ہلایا

مولوی صاحب ایک پل کے لیے رکے اور پھر مخاطب ہوئے

“برخودار۔۔۔۔ ! میں چاہ رہا تھا جتنے دن تک ہم واپس نہیں لوٹتے آپ کو اپنا انتظام کہیں اور کرنا ہوگا۔۔۔۔” ان کی نظریں تابش کی طرف تھیں

تابش کھانے کا پہلا لقمہ منہ تک لے کے گیا ہی تھا، مولوی صاحب کی بات سن کے اسکا ہاتھ رک گا۔

“میری بات کا غلط مطلب مت لیجئے گا۔۔۔ میں بس اس لیے کہہ رہا ہوں کہ ہم لوگوں کی غیر موجودگی میں آپکو کھانے پینے کی دقت ہوگی۔ ورنہ آپکے یہاں رہنے سے کوئی اعتراض نہیں ہے۔۔۔۔” وہ سمجھاتے ہوئے بولے

“میں سجھ گیا، آپ کیا کہنا چاہتے ہیں۔۔۔ آپ بے فکر ہو کے جائیں میں کچھ نہ کچھ انتظام کر لوں گا” تابش نے انھیں تسلی دی

“ہم سے جانے انجانے میں آپکا خیال رکھنے میں کسی طرح کی غلطی، کوتاہی ہوئی ہو تو معاف کردیجئے گا۔۔۔۔” مولوی صاحب بولے

“ارے۔۔۔ ! مولوی صاحب کیسی باتیں کرتے ہیں، آپ لوگوں نے جس طرح میرا خیال رکھا ہے یقین جانیئے کوئی اپنا بھی اتنا نہیں کرتا۔ میں شکر گزار ہوں جو آپ نے اپنے گھر میں رہنے کی جگہ دی” تابش تشکرانہ انداز میں بولا

مولوی صاحب نے اسکا کندھا تھپتھپایا اور وہاں سے چلے گئے۔

مولی صاحب کے جانے کے بعد تابش پھر سے سوچوں میں ڈوب گیا۔

“اس گھر میں رہیتے ہوئے مجھے یہ تک یاد نہیں رہا کہ میرا اپنا بھی کوئی گھر ہے۔ ایک گھناؤنے مقصد کے تحت یہاں داخل ہوا تھا لیکن مولوی صاحب کے بے لوث پیار نے غلط قدم نہیں اٹھانے دیا ۔۔۔۔۔ اور۔۔۔۔۔۔ نور۔۔۔۔۔!”

نور کا نام دل میں آتے ہی پھر سے حواس کھونے لگے۔۔۔۔

“جانے سے پہلے کاش ایک بار اس کا دیدار ہوجائے۔۔۔۔۔ اپنی غلطی کی معافی مانگ لوں۔۔۔۔۔ بس ایک بار ۔۔۔۔ اپنے دل کے جذبات اس تک پہنچا سکوں۔۔۔۔۔ “

اسکی بے چینی بڑھنے لگی

اور دوسری طرف بستر پہ کروٹیں بدلتے نور پھر سے احساس جرم میں مبتلا تھی۔

“اس شخص کی وجہ سے بابا سے جھوٹ بولنا پڑا۔۔۔۔ ابھی تو پہلے والی غلطی کا بوجھ دل پہ تھا۔۔۔۔۔ اور اب پھر سے اسی گناہ کی مرتکب ہوئی۔۔۔۔۔ “

سانس لینا دشوار ہورہا تھا۔

بستر سے اٹھ کے صحن میں آگئی اور میں ٹہلنے لگی۔۔۔۔

تابش کی بے چینی اپنی جگہ قائم تھی ایک آخری دیدار کی حسرت پوری ہوپاتی ہے یا نہیں۔۔۔۔۔ بستر سے اٹھ کے وہ بیٹھک کے دروازے تک آیا۔۔۔۔۔ دل تھا جو بےبس یہی بول رہا تھا کہ دروازہ کھول کے گھر کے اندر داخل ہوجائے۔۔۔۔۔ لیکن دماغ سارے حوصلے پست کررہا تھا۔۔۔۔

“اگر میں پھر سے اسکے پاس گیا تو کیا ہوگا۔۔۔۔۔۔ ؟ کہیں مولوی صاحب نہ اٹھ جائیں۔۔۔ کہیں وہ گھبرا نہ جائے۔۔۔۔۔۔ کیا کروں۔۔۔۔۔۔ گر کچھ غلط ہوا تو پوری زندگی ضمیر کے بوجھ تلے دب جاؤں گا۔۔۔۔” دماغ نے سر گوشی کی

” گر اسے میرا پاس آنا برا لگا ہوتا تو اب تک وہ مولوی صاحب کو بتا دیتی۔۔۔ اس نے نہیں بتایا ۔۔۔۔۔ کہیں اسکے دل میں بھی میرے لیے کچھ ہے تو نہیں۔۔۔۔۔ ؟” دل جذبات کی آگ کو مسلسل بھڑکا رہا تھا۔

“پھر کبھی ایسا موقع ملے نہ ملے۔۔۔۔۔ جانے سے پہلے ایک بار اس سے ملنا ضروری ہے۔ چاہے کچھ بھی ہو۔۔۔۔۔ کم از کم پوری زندگی یہ دکھ تو نہیں رہے گا۔۔۔۔۔ کہ اس سے دل کی بات نہیں کی تھی۔۔۔۔”

اس نے بالآخر دل کی مانی اور بیٹھک کا دروازہ کھول کے صحن میں قدم رکھ دیا۔۔۔۔۔ چاند کی دودھیا روشنی ہر طرف پھیلی تھی۔ ۔۔۔۔

سوچوں کے سمندر میں ڈوبی۔۔۔ نور دیوار کے ساتھ پشت لگا کے آنکھیں بند کیے کھڑی تھی۔۔۔۔۔

تابش کی نظر اس پہ پڑی تو قدم جم سے گئے۔۔۔۔ نہ آگے جانے کے ہمت تھی اور نہ واپس مڑنے حوصلہ۔۔۔۔ اب کیا کرے کیا نہ کرے۔۔۔۔

نور نے نے آنکھیں کھول دیں۔۔۔۔۔ پھر سے تابش کو اپنے سامنے دیکھ کے وہ حواس باختہ ہوئی۔۔۔۔ اور الٹے قدموں پہ چلتے وہ کمرے کی طرف بڑھی۔

“نور۔۔۔۔۔ ! پلیز۔۔۔۔۔ میری ایک بات سن لیں۔۔۔۔” تابش جلدی سے آگے بڑھا

“خدارا۔۔۔۔ ! دور رہیے مجھ سے۔۔۔۔۔۔۔” نور چہرہ دوسری طرف کر کے بولی

“میں ۔۔۔ میں چلا جاتا ہوں۔۔۔۔ بس ایک بار میری بات سن لیں۔۔۔۔۔” وہ بولا

“مجھے آپکی کوئی بات نہیں سننی۔۔۔۔۔ اگر آپ نہیں گئے تو میں بابا کو جگا دوں گی۔۔۔” وہ آگے بڑھی

“نہیں۔۔۔۔ پلیز۔۔۔۔ ایسا مت کریں۔۔۔۔۔ بس میں آپ سے معافی مانگنا چاہتا ہوں۔۔۔” وہ گڑ گڑانے لگا

“کس بات کی معافی۔۔۔۔؟” اب بھی نور پشت تابش کی جانب تھی

” شام میں۔۔۔ اسطرح سے آپکے قریب آنا۔۔۔۔۔ میں شرمندہ ہوں۔۔۔۔خود کو روک نہیں پایا۔۔۔” تابش نے سرجھکا لیا

“کمال ہے نا۔۔۔۔۔ ؟ غلطی اور معافی کا ایک ہی طریقہ ہے آپکے پاس۔۔۔” وہ طنز کرکے بولی

“اور میں کیا کرتا۔۔۔۔۔؟ کل صبح آپکے جانے سے پہلے ہی میں یہاں سے چلا جاؤں گا۔۔۔۔ ایک آخری بار آپ سے معافی مانگنا چاہتا تھا۔۔۔۔ خدارا مجھے معاف کر دیجئے۔۔۔۔” وہ بولا

نور بنا کوئی جواب دیے آگے بڑھی۔

“ایک بات اور سن لیجئے۔۔۔۔۔” تابش نے اسے روکا

نور کے قدم پھر سے رکے۔۔۔

“مجھے نہیں پتا کہ یہ کیا ہے۔۔۔۔۔ میرا دل و دماغ میرے قابو میں نہیں ہے۔۔۔۔ شائد پاگل ہوگیا ہوں۔۔۔۔ ہر پل ہر وقت آپکی صورت میری آنکھوں کے کے سامنے منڈلاتی رہیتی ہے۔۔۔۔ ہر لمحہ آپکا خیال میرے ذھن کے ہر گوشے میں گردش کرتا ہے۔۔۔۔ اسے محبت کہتے ہیں تو یہ محبت ہے۔۔۔۔ گر اسے عقیدت کہتے ہیں تو یہ عقیدت ہے۔۔۔۔ جو بھی ہے۔۔۔ مجھے چین نہیں لینے دیتا۔۔۔۔۔۔ ” اسکی آنکھوں میں نمی اتر آئی

نور ایکدم سے پیچھے مڑی۔۔۔۔ دو قدم چل کے اسکے پاس آئی۔۔۔۔ اسکے ہر بڑھتے قدم پہ تابش کی آنکھیں حیرت سے پھیلتی گئیں

“تابش۔۔۔ میں بھی آپ سے بے حد محبت کرنے لگی ہوں۔ ہر پل، ہر لمحہ آپکے بارے میں ہی سوچتی رہیتی ہوں۔۔۔۔۔۔ ” نور تابش کے بالکل سامنے آکے کھڑی ہوئی، اسکی آنکھوں میں ایک عجیب سی چمک تھی۔۔۔۔

تابش کو یہ ایک خواب کے مانند لگنے لگا۔۔۔۔

اس سے پہلے وہ خواب اور حقیقت کے بیچ فرق سمجھ پاتا ۔۔۔ ایک زورد دار تھپڑ اسکے گال پہ پڑا۔۔۔۔ اسکے کھوئے ہوئے حواس واپش لوٹے

“یہی سننا چاہتے تھے نا۔۔۔۔۔؟” نور نے گرج کے کہا

“نہیں ۔۔۔۔۔ وہ۔۔۔۔۔” اپنا گال سہلاتے ہوئے وہ بولا

“کیا نہیں۔۔۔۔۔۔ ؟عشق۔۔۔ محبت۔۔۔۔ پیار۔۔۔۔ کیا ہے۔۔۔۔۔؟ اسکا مطلب بھی جانتے ہو۔۔۔۔۔؟” نور کڑک کے بولی

تابش نے نظریں جھکا لیں

“تم بس مٹی کے ایک تودے کے پجاری ہو۔۔۔۔۔ تمہیں کیا معلوم جذبات کیا ہوتے ہیں۔۔۔ عشق و محبت صرف ایک ذات سے منسوب ہے ۔ اور وہ ذات اس خالق کی ہے۔۔۔۔ جس نے اس مٹی میں روح بسائی۔۔۔۔۔۔ جسم تو بس اس روح کا ایک پردہ ہے۔۔۔۔ اور جو لوگ اپنے اس پردے کی حفاظت نہیں کر پاتے انکی روح پہ شیطان کا قبضہ ہو جاتا ہے۔۔۔۔ جیسے تمہاری روح شیطان کے قبضے میں ہیں۔۔۔۔ چہرے پہ داڑھی سجا کے۔۔۔۔ جھوٹے سجدوں سے بھی وہ شیطانیت کبھی چھپ نہیں پاتی۔۔۔۔

اور جانتے ہو۔۔۔۔۔ روح سچ ہے اور جسم جھوٹ۔۔۔۔ تم بس اس جھوٹ کے پیچھے بھاگ رہے ہو۔۔۔۔ سچ سے تمہارا کوئی لینا دینا نہیں ہے۔۔۔۔۔ ” یہ کہہ کے وہ واپس مڑی

“میرے جذبات سچے ہیں۔۔۔۔ میں اس جسم سے نہیں روح سے متاثر ہوں۔۔۔۔” تابش نے اسے جواب دیا

“میں تم سے اور تمہارے جذبات سے اچھی طرح سے واقف ہوں۔۔۔۔ تم ایک سیاہ پتھر کے سوا کچھ بھی نہیں ہو۔۔۔۔۔ جو ایک نور پہ گرھن تو لگا سکتا ہے۔۔۔ پر خود کبھی روشن نہیں ہوسکتا۔۔۔۔۔ ” نور نے ایک گہری سانس لی اور اسکے سامنے کھڑی ہوگئی

“تمہارا یہ حسیں چہرہ جس کے پیچھے شیطانیت کی گہری تاریکی چھپی ہے۔۔۔ نفرت ہے مجھے اس سے۔۔۔۔۔ پھر کبھی اپنی شکل مت دکھانا۔۔۔۔۔ میں پوری زندگی اس کرب میں گزراوں گی کہ تمہارے سامنے مجھے بے پردہ ہونا پڑا۔۔۔۔ لیکن سکون سے تم بھی نہیں رہو گے۔۔۔۔۔ “

وہ پاؤں پٹختی ہوئی اپنے کمرے میں چلی گئی۔

ایک بے جان جسم کی مانند جس کی روح پرواز کرچکی ہو، تابش نے گھٹنے فرش پہ ٹیک دیے۔۔۔۔ اسکی بے نور ہوتی آنکھیں ۔۔۔۔ ایک ہی سمت جم گئی تھیں۔۔۔۔

چاروں طرف ایک خوفناک سناٹا چھا گیا۔۔۔۔۔

“تو یہ تھی میری حقیقت ۔۔۔۔۔۔۔ ایک سیاہ پتھر۔۔۔۔ جو کبھی روشن نہیں ہو سکتا۔۔۔۔ “

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

فجر کے وقت بہت تیز بارش ہورہی تھی۔ دروازے پہ دستک ہونے لگی

ابا جی دروازے پہ پہنچے تو تابش کو دیکھ کے انکے اوسان خطا ہوئے۔۔۔ وہ بارش میں بھیگتا ہوں سر جھکائے کھڑا تھا۔۔۔۔

“تابش۔۔۔۔!” وہ اسکی طرف بڑھے۔۔۔۔اور ہاتھ سے پکڑ کے اسے اندر لے آئے۔۔۔

“کیا ہوا بیٹا۔۔۔۔۔ ؟” اسکی عجیب سی حالت دیکھ کے وہ شدید پریشان ہوگئے۔

تابش اباجی سے لپٹ گیا اور پھوٹ پھوٹ کے رونے لگا۔۔۔۔

اسکے رونے کی آواز پہ ناصرہ بیگم دوڑتی ہوئی صحن میں پہنچی۔ فری اور فیزی بھی انکے پیچھے آگئیں۔۔۔۔

“کیا ہوا۔۔۔۔ بھائی۔۔۔!” فری پاس آکے بولی

“پہلے اسے اندر لے چلیں۔۔۔۔۔ بھیگ گیا ہے بے چارہ۔۔۔۔۔۔۔ فائزہ جلدی سے بھائی کے کپڑے نکالو۔۔۔۔۔۔” ناصرہ بیگم نے فیزی کو کہا وہ جلدی سے تابش کے کمرے میں چلی گئی

اباجی نے اسے بستر پہ لٹایا ۔۔۔۔ تابش کا جسم تپ رہا تھا۔ اسکی اس حالت سے سبھی پریشان تھے۔

“بھائی۔۔۔۔ بتائیں نا۔۔۔کیا ہوا۔۔۔۔؟” فری کی آنکھوں میں آنسو تھے

“بیٹا۔۔۔۔ ابھی یہ اس حالت میں نہیں ہے کہ کوئی جواب دے پائے۔۔۔۔۔ ” اباجی نے فری کو اشارہ کیا۔

فری اور فیزی نے تابش کا بخار چیک کیا۔ گھر میں ضرورت کی سبھی میڈیسن مجود تھیں۔ تابش کو میڈیسن دے کے وہ دونوں اسکے پاس بیٹھ گئیں۔تابش نیم بے ہوشی کی حالت میں تھا۔

ناصرہ بیگم بار بار فیزی اور فری کو بلا رہی تھیں کہ تابش کو آرام کرنے دو۔۔۔ لیکن وہ ایک منٹ بھی اسے اکیلا چھوڑ کے کے لیے تیار نہیں تھیں۔

صبح سے رات ہوگئی لیکن تابش کی طبیعت نہیں سنبھلی ۔۔۔ ابا جی فری اور فیزی سے بولے کہ وہ کسی ڈاکٹر سے رجوع کرتے ہیں لیکن انھوں نے تسلی دی کہ جلدی ہی وہ ٹھیک ہو جائے گا۔

دیر رات اسکا بخار کم ہوا۔۔۔۔ سبھی گھر والے اسکے گرد جمع تھے۔

“بیٹا۔۔۔۔ ! یہ کیا حال بنا لیا ہے ۔۔۔؟” اباجی اسکی بڑھی ہوئی داڑھی اور حالت سے پریشان تھے

“کچھ نہیں بابا۔۔۔۔ بس” اس نے نقاہت سے جواب دیا

“بھائی۔۔۔ ! آپکی حالت دیکھ کے تو ہم گھبرا ہی گئے تھے۔۔۔۔ ” فری بولی

تابش نے مسکرا کے اسکی طرف دیکھا

“اور نہیں تو کیا۔۔۔۔ اور اتنے دن سے نا فون کیا۔۔۔ نہ خبر دی۔۔۔۔ ایسا کرتا ہے کوئی۔۔۔؟” فیزی بولی

“اب تم دونوں کی جرح شروع ہوگئی۔۔۔۔ اسے آرام کرنے دو۔۔۔۔” ناصرہ بیگم نے دونوں بیٹیوں کو گھورا

وہ دونوں تلملا کے باہر چلی گئیں۔ ابا جی بھی اسے دعائیں دیتے ہوئے اپنے کمرے کی طرف چل پڑے۔

سب کے جانے بعد ناصرہ بیگم تابش کے سرہانے کی طرف آئیں۔ جھک کے اسکے ماتھے پہ ہاتھ رکھا

“میں تمہاری ماں نہیں ہوں۔۔۔۔ لیکن تمہیں پالا ضرور ہے۔ اس حالت میں تمہیں دیکھ کے کیلجہ پھٹ رہا ہے۔۔۔۔ بس ایک پل کے لیے مجھے اپنی ماں سمجھ کے بتا دو۔۔۔۔ کیا ہوا ہے۔۔۔۔؟” انکی آنکھوں سے آنسوں کی لڑی جاری ہوئی۔

تابش نے انکا ہاتھ اپنے ہاتھ میں لیا اور ایک بوسہ دیا

“ماں میں ٹھیک ہوں۔۔۔۔۔ مجھے کچھ نہیں ہوا۔۔۔۔۔ آپ پریشان مت ہوں۔۔۔۔” اس نے مسکرر کے تسلی دی

“ٹھیک ہو ۔۔۔۔تو بار بار آنکھیں نم کیوں ہوجاتی ہیں تمہاری۔۔۔۔۔؟” ناصرہ بیگم نے اسکے گال سے آنسو پونچھے۔۔۔۔۔

تابش کا ظبط پھر سے ٹوٹا۔۔۔ سینے میں دبی سسکیوں کو ہونٹوں کا رستہ مل گیا۔۔۔

“نہیں بتانا چاہتے تو مت بتاؤ۔۔۔۔۔ پر ایسے رو۔۔۔ مت۔۔۔۔” ناصرہ بیگم نے اسکے بالوں میں اپنی انگلیاں پیوست کرکے سہلانا شروع کیا۔

تابش نے آنکھیں بند کرلیں

“چلو۔۔۔۔ اب تم آرام کرو۔۔۔ اس پہلے کے تمہاری بہنیں پھر سے سوار ہوجائیں۔۔۔” وہ مسکراتے ہوئے بولیں

ناصرہ بیگم کے جانے کے بعد تابش نے منہ تکیے میں چھپا لیا اور آنسوں کا سمندر تکیے کی سفید چادر میں سمانے لگا۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

ناصرہ بیگم ناشتے کی ٹیبل سجانے میں مصروف تھیں۔ ابا جی نے ہاتھ میں صبح کا اخبار تھام رکھا تھا۔ فیزی اور فری کو کالج جانے میں دیر ہورہی تھی، امی کو جلدی کی آوازیں لگاتی وہ کھانے کی ٹیبل پہ آ بیٹھیں۔

تابش آہستہ آہستہ قدم اٹھاتے ہوئے ان سب کے ساتھ آکے بیٹھ گیا۔

سب کے چہروں پہ ایک مسکراہٹ سی پھیل گئی، اتنے دنوں بعد تابش اپنے کمرے سے نکل کے انکے ساتھ آ بیٹھا تھا۔ ناصرہ بیگم نے جلدی سے پلیٹ اسکی طرف بڑھائی۔

ناشتہ ختم کرکے وہ کھڑا ہوا

“بابا۔۔۔۔ ! دکان کی چابی مجھے دیں۔۔۔ میں دکان کھولتا ہوں ۔۔۔ آپ آرام سے آجائیے گا”

سب کی حیرت زدہ نظریں اسکے چہرے پہ جم گئیں۔۔۔

“دکان کی چابی۔۔۔۔۔؟” ابا جی نےسوالیہ نظروں سے اسکی طرف دیکھا

ناصرہ بیگم نے اباجی کو اشارہ کیا تو انھوں نے جیب سے چابی نکال کے تابش کو تھما دی

شام ہوئی تو تابش اباجی کے ساتھ گھر واپس پہنچا۔

فیزی اور فری نے انکا ڈرامائی انداز میں استقبال کیا۔۔۔۔۔۔۔

“آئیے آئیے ۔۔۔ جہاں پناہ ۔۔۔۔ ہم آپکا ہی انتطار کررہے تھے۔۔۔۔ ” دونوں سر جھکا کے تابش کے سامنے کھڑی ہوگئیں

“آپ لوگ منہ ہاتھ دھو لیں۔۔۔ میں کھانا لگاتی ہوں۔۔۔۔ ” ناصرہ بیگم آکے بولیں

تابش کھانے کی ٹیبل پہ پہنچا تو پورا ٹیبل طرح طرح کے کھانوں سے سجا تھا۔ تابش خاموشی سے کرسی پہ بیٹھ گیا۔

“جہاں پناہ۔۔۔۔ ! یہ سب انتظام آپ کے لیے ہے۔۔۔” فیزی بولی

“میرے لیے۔۔۔۔؟” تابش نے اسکی طرف دیکھا

“جی ہاں آپکے لیے۔۔۔۔۔۔ بھئی آج ہمارے بھائی کا دکان پہ پہلا دن تھا۔۔۔۔ پارٹی تو بنتی ہے۔۔۔۔۔” فری بولی

“تم لوگ اپنے ڈرامے ختم کرو اور کھانا کھانے دو آرام سے۔۔۔۔” ناصرہ بیگم نے دونوں کو گھورا۔۔۔۔

وہ دونوں چپ ہوگئیں۔ کھانا ختم ہونے کے بعد تابش اپنے کمرے میں جانے لگا

“بیٹا۔۔۔۔ تھوڑی دیر۔۔۔ ہمارے ساتھ بیٹھا کرو۔۔۔۔۔ کیا ہر وقت کمرے میں گھسے رہیتے ہو۔۔۔۔۔” ابا جی بولے

“جی بابا۔۔۔۔۔ !” وہ واپس اپنی کرسی پہ بیٹھ گیا

تابش کے برتاؤ میں ایک واضح تبدیلی تھی۔ ہر وقت خاموش اور سوچوں میں ڈوبے رہنا ایک عادت سی بن گئی تھی۔ اس میں یہ تبدیلی دیکھ کے سب پریشان تھے۔

“آپ بھی حد کرتے ہیں۔۔۔ پورا دن کام سے تھکا ہارا آیا ہے اسے آرام کرنے دیں۔۔۔۔” ناصرہ بیگم نے تابش کے خاموش چہرے کو پڑھ لیا تھا

“اچھا بیٹا جاو۔۔۔ آرام کرو۔۔۔”اباجی بولے

وہ اٹھ کے اپنے کمرے میں چلا گیا

تھوڑی دیر بعد فیزی اور فری اسکے کمرے میں آگئیں

“بھائی۔۔۔۔۔!”فری بولی

“جی۔۔۔۔۔ !”اس نے جواب دیا

“ہمارا بھائی ایسا تو کبھی نہیں تھا۔۔۔۔” فری نے خفگی سے کہا

“کیسا۔۔۔۔” تابش پوچھنے لگا

“جیسے آپ اب ہو۔۔۔۔ نہ ہنستے ہو، نا بات کرتے ہو۔۔۔۔ بس ہر وقت اداسی اداسی۔۔۔ ایسا کیا ہوا ہے۔۔۔۔۔۔؟” وہ بولی

“کچھ نہیں بابا۔۔۔۔ سچی۔۔۔۔۔ میں ٹھیک ہوں۔۔۔” وہ مسکراتے ہوئے بولا

“کچھ بھی ٹھیک نہیں ہے۔۔۔۔۔۔ نہیں بتانا تو مت بتائیں۔۔۔۔۔ ” فیزی خفا ہو کے بولی

“فیزی مجھے پتا ہے۔۔۔۔۔ یہ ایسے کیوں بنے ہوئے ہیں۔۔۔۔” فری فیزی کی طرف دیکھ کے بولی

“کیوں بنے ہوئے ہیں ۔۔۔۔۔۔؟” فیزی نے پوچھا

“ارے۔۔۔ یاد نہیں ہے۔ جب ہم نے بھائی کی لوکیشن ٹریس کی تھی ۔ انھوں نے وعدہ کیا تھا کہ اگر ہم ابا جی کو اس بارے میں نا بتائیں تو یہ ہماری ایک بات مانیں گے۔۔۔۔۔۔ “فری نے اسے یاد دلایا

“ہاں۔۔۔۔ یاد ہے ، یاد ہے۔۔۔۔ اسکا مطلب اسی ڈر سے یہ اداسی کا ڈرامہ کررہے ہیں” فیزی بولی

“اور نہیں تو کیا۔۔۔۔۔ پر ہم بھی ایسے چھوڑنے والے نہیں ہیں۔۔۔۔ اس بار پہلے انھیں ایک سرپرائز ملے گا۔۔۔۔ اسکے بعد یہ ہماری بات مانیں گے۔۔۔۔۔” فری تابش کا چہرہ دیکھتے ہوئے بولی

اتنے میں عشاء کی اذان ہوئی

“چلو۔۔۔ اب تم لوگ جاؤ۔۔۔ میں نماز پڑھتا ہوں۔۔۔۔” تابش بستر سے اٹھ کھڑا ہوا

وہ دونوں مسکراتے ہوئے چلی گئیں

تابش نے نماز کے بعد دعا کے لیے ہاتھ بلند کیے۔۔۔۔۔ پھر دونوں ہاتھ اپنے چہرے پہ رکھ کے پھسر پھسر کے رونے لگا

“مالک۔۔۔۔۔ ! جو کرب میں نے اپنی جھولی میں بھرا ہے۔ اس کی سزا میں تا حیات جھلینے کو تیار ہوں۔۔۔۔۔ پر اسے اس کرب کی قید سے آزاد کردے جسکا نام نہ لینے کی قسم کھائی ہے۔۔۔۔۔۔۔۔۔۔بس یہی ایک دعا سن لے۔۔۔۔ اس کے بعد کوئی خواہش باقی نہیں ہے”

جاری ہے