“تم کچھ زیادہ سوچ رہی ہو۔۔۔۔ ” تابش اسکی طرف دیکھ کے بولا

“تو تم میری سوچ غلط ثابت کردو۔۔۔۔۔۔ ” سیمی نے تابش کا ہاتھ اپنے ہاتھوں میں لیا اور اسکے کندھے پہ اپنا سر رکھ دیا

تابش کے چہرے پہ عجیب سے تاثرات امڈنے لگے۔۔۔۔۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

“نور۔۔۔ ! اب تو اتنے دن ہوگئے اسے یہاں سے گئے ہوئے۔۔۔ پھر بھی تم اسے دل و دماغ سے نکال نہیں پائی ہو۔۔۔۔۔ بس کردو۔۔۔” فاطمہ نے نور کے کندھے پہ ہاتھ رکھ دیا

” کبھی کبھی زندگی میں ایک ایسا وقت بھی آتا ہے جب انسان غلط اور صحیح کے بیچ کچھ اسطرح پھنس جاتا ہے، اسکے لیے یہ فیصلہ کرنا ہی مشکل ہوتا آیا کہ وہ صحیح ہے یا غلط۔۔۔۔۔” نور اسکی آنکھوں میں دیکھتے ہوئے بولی

“تم اس بارے میں جتنا زیادہ سوچو گی اتنا ہی اس دلدل میں دھنستی چلی جاؤ گی۔۔۔۔ بہتری اسی میں ہے تم وہ سب بھول جاؤ۔۔۔۔۔” فاطمہ نے اسے سمجھایا

“بھول جانا اپنے بس میں تھوڑی ہوتا ہے۔ جب کوئی یاد بوجھ بن کے دل دماغ پہ سوار ہو جائے تو اسکے نشان دائمی ہوتے ہیں۔۔۔ اپنی ایک غلطی کو ٹھیک کرنے کے چکر میں ایک اور بوجھ تلے دب گئی۔۔۔

پہلی بار اسکے سامنے جانے کا فیصلہ میرا اپنا تھا۔ چاہے پھر میں نے وہ فیصلہ حالات کے پیش نظر لیا یا پھر جو بھی تھا، دوسری بار بھی میں اپنی غلطی سے اسکے سامنے گئی۔۔۔۔ بابا سے جھوٹ بولنے کا فیصلہ بھی میرا اپنا تھا، اور پھر جب وہ معافی مانگنے آیا تو میں نے اسے ہی ہر چیز کا سزاوار بنا دیا۔۔۔۔ اور میں خود ہر چیز سے بری الذمہ ہوگئی۔۔۔۔

اپنے جذبات کے اظہار کا حق ہر انسان کو حاصل ہے، پھر کیوں میں نے اس پہ ہاتھ اٹھایا؟ اپنے حواس پہ قابو کیوں نہیں رکھ پائی۔۔۔؟ اس نے مجھ سے کچھ نہیں مانگا تھا۔۔۔۔ پر میں نے اسکی جھولی میں ذلت ڈال دی۔ وہ چاہتا تو میرے ہر الزام کا جواب دے سکتا تھا، صرف اتنا ہی نہیں وہ ہر لحاظ سے مجھ سے طاقتور تھا چاہتا تو کچھ بھی کر سکتا تھا۔ لیکن وہ بس سنتا رہا اور میں بولتی گئی۔۔۔۔۔ ” نور کی آنکھیں نم ہوگئیں

فاطمہ نے اسے گلے سے لگایا اور تسلی دینے لگی۔

“پتا ہے فاطمہ۔۔۔! اسکے جانے کے بعد سے لے کے اب تک میں ایک پل بھی سکون سے نہیں رہ پائی، احساس جرم مجھے جینے نہیں دے رہا۔ بس میں ایک بار اس سے معافی مانگنا چاہتی ہوں۔۔۔۔ کاش کے وہ مجھے معاف کردے۔۔۔۔” نور سسکیاں لینے لگی

مولوی صاحب گھر میں داخل ہوئے اور نور کو آواز دی۔

“جی بابا۔۔۔ ! آئی۔۔۔۔” نور نے جواب دیا

وہ کمرے سے نکل کے صحن میں آگئی

“بیٹا۔۔۔ میں نے اپنی پوری کوشش کرلی ہے لیکن اس بچے کا کہیں سے کچھ پتا نہیں چل پایا۔۔۔ اب ہم اور کر بھی کیا سکتے ہیں۔ اسکا جتنا بھی سامان ہے وہ سمیٹ کے تم رکھ دو۔۔۔ شائد وہ کبھی واپس آ ہی جائے۔۔۔۔ بس مجھے یہی فکر ہے کہ وہ ٹھیک ہو۔۔۔۔۔۔ ” مولوی صاحب نے بتایا

“بابا آپ نے اس سے گھر کا پتا نہیں پوچھا تھا۔۔۔؟” نور نے سوال کیا

“گھر کا مکمل پتا تو اس نے کبھی نہیں بتایا ، بس ایک بار پوچھنے پہ جو علاقہ اس نے بتایا تھا وہاں بھی چکر لگا کے آیا ہوں۔۔۔ لیکن کوئی خاطر خواہ کامیابی نہیں مل پائی۔ بس بیٹا ہم اسکے لیے دعا ہی کر سکتے ہیں۔ اس کا جو کچھ بھی ہمارے پاس موجود ہے امانت سمجھ کے رکھ لیتے ہیں۔۔۔” مولوی صاحب بولے

“ٹھیک ہے بابا۔۔۔ بیٹھک میں موجود اسکا سارا سامان میں آج ہی سمیٹ دیتی ہوں۔۔۔” نور یہ کہہ کے کمرے میں چلی گئی۔

“پتا چلا کچھ۔۔۔۔؟” فاطمہ پوچھنے لگی

“نہیں۔۔۔ بابا نے پوری کوشش کی لیکن کہیں سے کچھ پتا نہیں چل پایا” نور نے بتایا

“ویسے کمال ہے۔۔۔ تم لوگوں نے اسے اتنے دن تک اپنے گھر میں رکھا لیکن کبھی پوچھ گچھ نہیں کی کہ وہ ہے کہاں سے۔۔۔۔ کوئی اتہ پتہ۔۔۔۔ ” فاطمہ بولی

“ارےبھئی۔۔ پتا تھوڑی نا تھا کہ وہ ایسے اچانک غائب ہوجائے گا۔۔۔۔” نور نے اسے جواب دیا

“اسے اتنا ڈانٹنے سے پہلے سوچنا تھا نا۔۔۔۔۔ ” فاطمہ نے نور کی آنکھوں میں دیکھا

نور شرمندہ سی ہوگئی

“چلو اب میں نکلتی ہوں۔۔۔۔ گھر میں بہت کام ہیں۔۔۔” فاطمہ کھڑی ہو کے بولی

نور نے سر ہلایا اور وہ اسے سلام کرکے اپنے گھر کی طرف چل دی

فاطمہ کے جانے کے بعد نور بیٹھک میں داخل ہوئی۔۔

تابش کی خوشبو ہر طرف پھیلی تھی۔ بستر پہ اسکی میلی شرٹیں پڑی تھیں۔ نور نے شرٹیں اٹھائیں اور پاس ہی پڑے بیگ میں ڈال دیں۔۔۔۔

نور کے دماغ میں تابش کو پانی پلانے والا واقعہ گردش کرنے لگا۔ ہلکی سی مسکراہٹ اسکے لبوں پہ اتر آئی لیکن پھر وہ مسکراہٹ اداسی میں بدل گئی

“خدایا۔۔۔ ! وہ جہاں بھی ہوں خیر خیریت سے ہو۔۔۔۔” اسکے دل سے دعا نکلی۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

مارکیٹ میں چھٹی تھی اس لیے تابش پورا دن گھر پہ ہی رہا۔ سیمی کی روانگی تھی فیزی اور فری اسی کے آگے پیچھے گھوم رہی تھیں۔

دوپہر کے کھانے کے بعد تابش اپنے کمرے میں چلا گیا۔

تھوڑی دیر بعد سیمی اسکے کمرے میں آئی

“تابش۔۔۔۔ ! میں جارہی ہوں۔۔۔۔” اسکے چہرے پہ اداسی تھی

“اوہ۔۔۔ اچھا۔۔۔۔ فیزی اور فری آپکو بہت یاد کریں گی۔۔۔۔” تابش کھڑا ہوکے بولا

“اور تم۔۔۔۔ تم مجھے یاد نہیں کرو گے؟” وہ تابش کی آنکھوں میں دیکھتے ہوئے بولی

“میں ۔۔۔۔ ہاں۔۔۔ میں بھی یاد کروں گا۔۔۔۔” تابش ہڑبڑا گیا

“جھوٹ۔۔۔۔۔ بالکل جھوٹ۔۔۔۔ آپ سے تم پہ تو آ نہیں پائے۔۔۔۔ یاد کیا خاک کرو گے۔۔۔” سیمی پھیکی مسکراہٹ لبوں پہ سجا کے بولی

تابش نے جواباً نظریں جھکا لیں

“لیکن۔۔۔ بہت جلد میں اپنا پرانا تابش واپس لے آؤں گی۔۔۔ یہ وعدہ ہے۔۔۔” وہ پر عزم تھی

“چلیں ۔۔۔ ! آپکو دیر ہورہی ہوگی۔۔۔۔” تابش نے دروازے کی طرف اشارہ کیا

“اف۔۔۔ کتنی جلدی ہے تمہیں بھگانے کی۔۔۔۔۔۔۔” سیمی چڑ گئی

“نہیں۔۔۔ وہ۔۔۔ ” تابش کھسیانا ہوا

“اچھا۔۔۔ اچھا اب بہانے مت بناؤ۔۔۔ جا رہی ہوں۔۔۔۔ ” وہ یہ کہہ کے کمرے سے نکل گئی

وہ خیالوں میں ڈوب گیا۔

تابش عشاء کی نماز سے فارغ ہوا تو فری اسے بلانے آئی کہ بابا نے کچھ ضروری بات کرنے کے لیے بلایا ہے۔

“جی بابا۔۔۔۔ ! آپ نے بلایا ؟” تابش سر جھکائے اباجی کے سامنے کھڑا ہوگیا،

ابا جی نے ناصرہ بیگم کو اشارہ کیا تو وہ کمرے سے باہر چلی گئیں۔ انھوں نے تابش کو بیٹھنے کا کہا

“بیٹا۔۔۔۔ مجھے بہت خوشی ہے کہ تم میرے کندھے سے کندھا ملا کے کھڑے ہوئے ہو، ایک باپ کے لیے اس سے زیادہ خوشی کی بات نہیں ہوسکتی۔۔۔” وہ تابش کی طرف دیکھ کے بولے

“جی۔۔۔ بابا!” تابش نے سر ہلایا

“اب جب تم نے یہ ذمہ داری اٹھا لی ہے تو میں ایک اور ذمہ داری تمہیں سونپنا چاہتا ہوں۔۔۔۔” اباجی سیدھے ہوکے بیٹھ گئے

“کیسی ذمہ داری۔۔۔۔ ؟” تابش نے سوالیہ نظروں سے اسے دیکھا

“تمہاری شادی کی ذمہ داری۔۔۔۔ ” اباجی نے جواب دیا

تابش نے آنکھیں جھکا لیں

“بیٹا۔۔۔ یہی شادی کی صحیح عمر ہے۔۔۔ ہماری نظر میں ایک لڑکی ہے۔ تم سوچ لو اگر تمہیں وہ شریک حیات کی صورت میں پسند آتی ہے تو بتا دینا۔۔۔۔” اباجی بولے

تابش نے ان کی طرف سوالیہ نظروں سے دیکھا

“میں سیمی کی بات کررہا ہوں۔۔۔ ماں باپ کی اکلوتی بیٹی ہے۔ ماشاء اللہ خوش شکل بھی ہے اور تعلیم یافتہ بھی۔ سیمی کی ماں نے خود ناصرہ سے اس بارے میں بات کی ہے۔۔۔ اگر تم اس رشتے کے لیے راضی ہوتو ہم بات آگے چلاتے ہیں۔۔۔۔” اباجی اسکے چہرے کے تاثرات کا جائزہ لینے لگے

“بابا۔۔۔ پر۔۔۔ ” تابش انکی بات سن کے کافی حیران ہوا

“کیا بیٹا۔۔۔۔ ؟ تمہارے دل و دماغ میں جو بھی بات ہے کھل کے بتاؤ۔۔۔۔” اباجی نے اسے آزادی دی

“بابا۔۔ ہم دونوں کی سوچ میں زمین و آسمان کا فرق ہے۔ وہ اور طرح کے ماحول میں پلی بڑھی ہے، مجھے نہیں لگتا کہ وہ ہمارے گھر کے طور اطوار میں ڈھل پائے گی” تابش بولا

“بیٹا۔۔۔ وہ ناصرہ کی سگی بھانجی ہے اور فریحہ اور فائزہ کے ساتھ اسکی دوستی سے تم بہت اچھی طرح سے واقف ہو۔۔۔ وہ اس گھر سے انجان تھوڑی ہے۔۔۔ ناصرہ کی بہن کی طرف سے اگر یہ بات آئی ہے تو سوچ سمجھ کے انھوں نے یہ فیصلہ کیا ہوگا نا۔۔۔۔” اباجی اسے سمجھانے لگے

“بابا۔۔۔ یہاں بات صرف باقی گھر والوں کی نہیں ہے ، میں خود بھی مطمئن نہیں ہوں۔۔۔”تابش نے جواب دیا

“دیکھو بیٹا۔۔۔ میں ان لوگوں میں سے نہیں ہوں جو اپنی اولاد پہ بلاوجہ کے فیصلے تھونپ دیتے ہیں۔ اگر تم کسی اور کو پسند کرتے ہو تو کھل کے بتا دو۔۔۔۔ میں نہیں چاہتا تمہارے دل میں کوئی بوجھ رہے۔۔۔ ” ابا جی سنجیدہ ہو کے بولے

تابش سوچوں کے سمندر میں ڈوب گیا۔۔۔۔۔۔ پھر سے نور آنکھوں کے آگے منڈلانے لگی۔۔۔

“میں تمہاری اس شکل سے نفرت کرتی ہوں۔۔۔۔۔” نور کے وہ لفظ پھر سے کانوں میں گونجے

“نہیں۔۔۔۔ اور کوئی نہیں ہے۔۔۔۔۔” اس نے گہری سانس لی

“تو۔۔۔ پھر سیمی میں کیا مسئلہ ہے۔۔۔۔؟ دیکھو۔۔۔ کوئی جلدی نہیں ہے۔۔۔ تم اچھی طرح سے سوچ سمجھ لو پھر جواب دینا۔۔۔۔ ” ابا جی نے کہا

“ٹھیک ہے بابا۔۔۔۔۔ !” وہ کھڑا ہو کے بولا

کمرے میں آ کے وہ پھر سے سوچوں میں ڈوب گیا۔

“میری ایک غلطی نے سب جلا کے راکھ کر دیا۔ کاش اس رات میں نور سے ملنے نا گیا ہوتا۔ آج میں بابا کو نور کو بارے میں بتا دیتا۔ ہوسکتا ہے مولوی صاحب نور سے میرے رشتے کے لیے مان جاتے۔ اب پچھتا کے بھی کیا فائدہ۔۔۔ یہ زخم کبھی نہیں بھرے گا۔۔۔۔ اب میں نور تو کیا دنیا کی کسی لڑکی کے قابل نہیں ہوں”

پچھتاوے کے بوجھ تلے دبتے اس نے اپنا منہ تکیے میں چھپا لیا۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

مولوی صاحب عصر کی نماز سے فارغ ہوئے تو قرآن پاک پڑھنے والے بچے ایک ایک کرکے مسجد میں داخل ہونا شروع ہوگئے۔ مولوی صاحب خود بھی تلاوت میں مشغول تھے۔

“مولوی صاحب۔۔۔۔۔ !” ایک آدمی انکے پاس آکے کھڑا ہوگیا

مولوی صاحب نے قرآن پاک سے ںظریں ہٹائیں اور سر اٹھا کے دیکھا

“تصدق صاحب۔۔۔۔۔ ! آئیے آئیے۔۔۔۔ بڑے دنوں بعد دیدار ہوئے آپکے۔۔۔۔ ” مولوی صاحب کے چہرے پہ خوشی کے تاثرات تھے

“بس۔۔۔۔ ! کیا کریں۔۔۔۔ مصروفیت ہی اتنی ہوگئی ہے وقت نکالنا بڑا مشکل ہے” تصدق صاحب پاس آکے بیٹھے

“بے شک۔۔۔۔۔ صحیح فرما رہے ہیں آپ۔۔۔۔” مولوی صاحب نے قرآن پاک بند کیا

“ایک ضروری سلسلے میں آپکے پاس حاضر ہوا ہوں۔۔۔۔” تصدق صاحب بولے

“جی۔۔۔ فرمائیے۔۔۔۔!” مولوی صاحب متوجہ ہوئے

بچے اونچی آواز میں قرآن پاک پڑھ رہے تھے۔

“یہاں پہ مناسب نہیں ہے، بچوں کا کافی شور ہے۔ باہر چل کے بات کرتے ہیں۔۔۔” تصدق صاحب بولے

مولوی صاحب ان کے ہمراہ مسجد کے صحن میں آگئے اور وہ دونوں صف پہ بیٹھ گئے

“جی ۔۔۔ اب بتائیے۔۔۔” مولوی صاحب نے سوال کیا

“کچھ دن پہلے۔۔۔ آپکے پرانے عزیز مولوی سراج صاحب سے ملاقات ہوئی تھی، باتوں ہی باتوں میں انھوں نے ذکر کیا کہ آپ اپنی بچی کے رشتے کے لیے پریشان ہیں۔۔۔۔” تصدق صاحب نے بات شروع کی

“ہاں۔۔ بالکل۔۔۔ ان سے اس سلسلے میں بات ہوئی تھی” مولوی صاحب نے سر ہلایا

“تو کوئی مناسب رشتہ ملا۔۔۔۔؟” انھوں نے پوچھا

“ایک دو رشتے تو آئے ہیں لیکن مجھے نا مناسب لگے ۔۔۔۔ لوگ اتنے دیندار نہیں تھے” مولوی صاحب نے جواب دیا

“مولوی صاحب۔۔۔ میری نظر میں ایک اچھا رشتہ ہے۔۔۔۔ ” تصدق صاحب نے بتایا

مولوی صاحب نے انکی طرف دیکھا

“آپ میرے بھتیجے مولوی سلیم سے تو واقف ہی ہوں گے۔۔۔ آجکل ایک مدرسے میں معلم کا فریضہ سر انجام دے رہے ہیں۔۔۔۔”

“ہاں ۔۔۔ بالکل۔۔۔۔۔ چند سال پہلے جن کی شادی پہ آپ نے مدعو کیا تھا۔۔۔۔ ” مولوی صاحب کو یاد آیا

“جی ۔۔۔ ! جی۔۔ وہی۔۔۔۔ شادی کو کو اتنے برس بیت چکے ہیں۔ ابھی تک اولاد نہیں ہو پائی۔ آپ تو بخوبی واقف ہیں کہ اسلام اس بات کی پوری اجازت دیتا ہے کہ اولاد کے حصول کے لیے مرد کو دوسری شادی کا پورا حق حاصل ہے۔۔۔۔ جب مجھے پتا چلا کہ آپ بھی اپنی بچی کا رشتہ ڈوھونڈ رہیں تو مجھے لگا کہ آپ سے اس بارے میں بات کی جائے۔۔۔۔۔ اتنے سالوں سے ہم لوگ ایکدوسرے کو جانتے ہیں۔۔۔۔” تصد ق صاحب نے اپنی بات رکھ دی

مولوی صاحب کے تیور بدلے۔۔۔ لیکن وہ خاموش رہے

“آپ نے ڈاکٹر سے رجوع نہیں کیا کہ آخر کس وجہ سے اولاد نہیں ہو پائی۔۔۔ میرا مطلب سائنس نے تو اس حوالے سے بڑی ترقی کرلی ہے۔۔۔۔” مولوی صاحب نے سوال کیا

“استغفراللہ ۔۔۔۔۔ مولوی صاحب با علم ہوکے آپ کس طرح کی بات کررہے ہیں۔۔۔۔ یہ انگریزی ڈاکٹر اللہ کی رضا کے سامنے کیا ہیں۔۔۔۔؟ حرام کی کمائی کے چکر میں وہ بندے میں سو بیماریاں نکال لیتے ہیں۔۔۔۔ ” تصدق صاحب چڑ گئے

“علاج سے اسلام نے کبھی منع نہیں کیا۔۔ آج کے دور میں انسان طرح طرح کی بیماریوں کا شکار ہے، اور یہ تو بڑی عام سی بیماری ہے، جسکا اب علاج بھی ممکن ہے۔ مرد اور عورت دونوں کی تشخیص کرائیں جس میں مسئلہ ہوا وہ بھی پتا چلا جائے گا، پھر اسی حساب سے علاج بھی میسر ہے۔۔۔” مولوی صاحب نے سمجھایا

“مجھے تو کانوں پہ یقین نہیں آرہا کہ آپ یہ مشورہ دے رہے ہیں۔۔۔۔ ” تصدق صاحب آنکھیں پھاڑے پھاڑے مولوی صاحب کی طرف دیکھنے لگے

“آپ میری بات کا غلط مطلب بالکل نہ لیں، بانجھ پن ایک ایسی بیماری ہے جو مرد اور عورت دونوں میں پائی جاتی ہے۔” وہ گویا ہوئے

“مولوی صاحب ۔۔۔ میں نے اپنے بھتیجے سے اس بارے میں استسفار کیا ہے۔ وہ ازدواجی فرائض بخوبی نبھا رہا ہے۔ مسئلہ اسکی زوجہ میں ہے۔۔۔۔ ” تصدق صاحب نے مزید تفصیل بتائی

“بانجھ پن ایسی بیماری ہے جو ازددواجی فرائض کی ادائیگی میں بالکل رکاوٹ پیدا نہیں کرتی بلکہ وہ صرف اور صرف بچے کی تولید پہ اثرانداز ہوتی ہے۔۔۔۔ بنا تشخیص کے آپ اپنی بہو کے بارے میں کیسے کہہ سکتے ہیں کے وہ بانجھ ہے۔۔۔۔؟” مولوی صاحب بولے

“ہو سکتا ہے کہ آپ کا اس بارے میں علم زیادہ ہو لیکن ایسے کسی چکر میں پڑنے کے لیے ہمارا ضمیر تیار نہیں ہے۔ آپ اس بات کو چھوڑیں اور اصل بات کی طرف آتے ہیں۔۔۔ آپ کی اس رشتے کے بارے میں کیا رائے ہے؟” تصدق صاحب نے دو ٹوک سوال کیا

مولوی صاحب سوچوں میں ڈوب گئے

“دیکھیے مولوی صاحب۔۔۔۔ ہم دونوں مولوی گھرانے سے ہیں اور اس بات سے اچھی طرح سے واقف ہیں کہ ہماری بچیوں کا مستقبل مولوی گھروں میں ہی ہے۔ ورنہ ڈھونڈنے کو نکلیں تو ہزاروں جاہل رشتے دستیاب ہیں۔۔۔ میرے حساب سے اس رشتے میں آُپکو کسی طرح کی پریشانی نہیں ہونی چاہیے۔ رہی بات دوسری شادی کی تو وہ شرعی اور قانونی اعتبار سے جائز ہے۔ آپ سوچ لیں، میں دوبارہ حاضر ہوں گا” یہ کہہ کے تصدق صاحب کھڑے ہوگئے

مولوی صاحب نے انھیں رخصت کیا اور پھر سے مسجد کے اندر آگئے۔ تلاوت کی غرض سے قرآن پاک کھولا لیکن ہزاروں سوچوں نے گھیرلیا۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

تابش ٹی وی کے سامنے بیٹھ کے حالات حاضرہ پہ مبنی پروگرام دیکھنے میں مصروف تھا۔

“بھائی۔۔۔۔!” فری پاس آکے بولی

“جی۔۔۔!” تابش اسکی طرف مڑا

“آپ سے ایک بات کرنی ہے۔۔۔”

“ہاں۔۔۔ بولو۔۔۔۔”

“یہاں نہیں آپ اپنے کمرے میں چلیں میں آپکے لیے چائے لے آتی ہوں۔۔۔”

تابش ٹی وی آف کرکے اپنے کمرے میں چلا گیا

تھوڑی دیر میں فری اور فیزی چائے لے کے آئے۔ تابش نے فری کے ہاتھ سے چائے پکڑتے ہوئے پوچھا

“کیا بات ہے۔۔۔۔۔؟ کچھ چاہیے۔۔۔۔؟”

“نہین کچھ نہیں چاہیے۔۔۔۔ ہم سیمی کے بارے میں آپ سے بات کرنے آئے ہیں۔۔۔۔” فری نے جواب دیا

تابش کے تیور بدلے

“سیمی کے بارے میں کیا بات کرنی ہے۔۔۔۔؟”

“بھائی۔۔۔ ! وہ آپ سے بہت پیار کرتی ہے۔۔۔۔”

“تو۔۔۔۔۔!؟”

” آپ شادی کے لیے ہاں کیوں نہیں کررہے۔۔۔؟”

“بھئی۔۔۔۔ مجھے ابھی شادی نہیں کرنی۔۔۔؟”

“کیوں نہیں کرنی۔۔۔۔۔؟”

“بس۔۔۔ نہیں کرنی۔۔۔۔”

“کوئی وجہ تو ہوگی۔۔۔۔۔ کیا آپ کسی اور کو پسند کرتے ہیں؟”

“یار۔۔۔ ایسی کوئی بات نہیں۔۔۔۔”

“پھر کیا مسئلہ ہے۔۔۔۔۔ وہ خوبصورت ہے، پڑھی لکھی ہے۔۔۔۔ “

“خوبصورت۔۔۔۔۔۔۔۔” تابش سوچ میں پڑ گیا

“کیوں۔۔۔۔ وہ خوبصورت نہیں ہے کیا۔۔۔۔۔؟ یا پھر آپ آسمان کی کسی حور کی تلاش میں ہیں جس کے چہرے سے نور ٹپک رہا ہو۔۔۔۔۔۔” فیزی بولی

“نور۔۔۔۔۔ ” تابش کے دل کی دھڑکنیں پھر سے بے قابو ہوئیں۔۔۔۔۔۔

“ہاں ۔۔۔ نور۔۔۔۔ لیکن ایسی لڑکی اس دنیا میں تو آپکو ملنے سے رہی۔۔۔۔” فیزی نے طنز کی

“اس دنیا میں ایسی لڑکیاں موجود ہیں۔۔۔۔۔” تابش نے جواب دیا

“کہاں۔۔۔۔؟ ہمیں بھی دیکھائیں۔۔۔۔” فری بولی

“چھوڑو۔۔۔۔ میں نے کہہ دیا ہے کہ ابھی مجھے شادی نہیں کرنی، نا سیمی سے اور نا ہی کسی اور سے۔۔۔”

“وائے۔۔۔۔۔۔؟ وہ آپ سے بہت پیار کرتی ہے، جتنے دن بھی ہمارے گھر رہی ہے اسکی زبان پہ صرف اور صرف آپکا نام تھا۔۔۔۔۔ اگر آپ کسی اور کو پسند نہیں کرتے تو پلیز اسے مت کھوئیں۔۔۔۔ ” فیزی نے اسے زور دیا

تابش خاموش بیٹھا ریا

“چل فیزی۔۔۔۔ ان پہ کوئی اثر نہیں ہونے والا۔۔۔۔۔۔ سیمی کی شادی کہیں اور ہوگئی تو پوری زندگی پچھتاتے رہیں گے۔۔۔۔ “فری نے فیزی سے کہا

“پچھتانا کیا ہوتا ہے ، یہ مجھے سے بڑھ کے کون جانتا ہوگا” تابش لبوں میں بڑبڑایا

“کیا ۔۔۔۔ ! کیا بول رہے ہیں۔۔۔۔” فری تابش کے ہلتے ہونٹ دیکھ کے بولی

تابش بدستور خاموش رہا۔

“فیزی مجھے لگتا ہے تائی کی بات سچ تھی۔۔۔۔” فری فیزی کی طرف دیکھ کے بولی

“کونسی بات۔۔۔۔۔۔؟” فیزی سوالیہ نظروں سے اسے دیکھنے لگی

“ارے ۔۔۔۔ بھائی کے اس بدلے رویے کو دیکھ کے انھوں نے بتایا تھا کہ ان پہ کسی بھوت کا سایہ ہے۔۔۔۔” وہ آنکھیں پھاڑ پھاڑ کے بتانے لگی

“پاگل۔۔۔۔ بھوت کا سایہ عورتوں پہ ہوتا ہے، مردوں پہ پری کا سایہ ہوتا ہے۔ بھائی پہ بھی کسی پری کا سایہ ہوگا۔۔۔۔۔” وہ سرگوشی کرکے بولی

“پری۔۔۔۔! کون پری۔۔۔۔” تابش سوچوں کی ریل کو بریک لگا پوچھنے لگا

“کوئی نہیں۔۔۔۔۔ کوئی بھی تو نہیں۔۔۔۔۔ ” فری بولی

وہ دونوں بوکھلائی ہوئی وہاں سے نکل گئیں

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

دو دن سے اباجی کی طبیعت کافی خراب تھی۔ کوئی دوائی اثر نہیں کررہی تھی۔ سبھی گھر والے پریشان تھے۔ تابش آجکل اکیلا ہی دکان سنبھال رہا تھا۔

تابش گھر لوٹا، فری اور فیزی کو آواز دی

“وہ دونوں گھر پہ نہیں ہیں۔۔۔۔ فارمیسی سے دوائی لینے گئی ہیں۔۔۔” ناصرہ بیگم نے کیچن سے آواز دی

تابش بھی کیچن کی طرف بڑھا

“بابا کی طبیعت کیسی ہے۔۔۔۔۔؟” اس نے ناصرہ بیگم سے پوچھا

“آج تو کافی بہتر ہے ۔۔۔۔۔۔ بخار بھی کم ہے۔۔۔۔” ناصرہ بیگم سالن کو تڑکا لگاتے ہوئے بولیں

“جاگ رہے ہیں۔۔۔۔؟” تابش نے پوچھا

“ہاں۔۔۔ میں ابھی چائے دے کے آئی ہوں۔۔۔۔” وہ بولیں

تابش انکے کمرے میں چلا گیا

“بابا۔۔۔۔! اب طبیعت کیسی ہے۔۔۔۔؟”

“میں ٹھیک ہوں بیٹا۔۔۔۔ تم بتاؤ۔۔۔ دکان پہ کوئی پریشان تو نہیں ہوئی؟”

“نہیں بابا۔۔۔ سب بالکل ٹھیک ہے۔۔۔۔”

“طبیعت کچھ بہتر ہوتی ہے تو میں بھی تمہاری مدد کے لیے آؤں گا۔۔۔۔”

“نہیں۔۔۔۔ اب آپ صرف آرام کریں گے۔۔۔۔ بہت کام کرلیا۔۔۔۔”

“دکان پہ میرے لیے تم نے کام چھوڑا ہی کیا ہے، بس کرسی پہ بیٹھا رہیتا ہوں۔۔۔”

“بابا۔۔۔ آپ سے ایک بات کرنی تھی”تابش انکی آنکھوں میں دیکھ کے بولا

“جی بیٹا۔۔۔۔ بتاؤ۔۔۔”

“میں نے سیمی کے حوالے سے کافی سوچ و بچار کی ہے۔۔۔۔ اور اب میں نے فیصلہ کرلیا ہے” وہ بولا

ابا جی کی سوالیہ نظریں اسکے جواب کی منتظر تھیں۔۔۔۔۔۔۔۔۔۔

جاری ہے