برقی قمقموں سے سجے خوبصورت لان میں اِس وقت رونق اور ہلچل عروج پر تھی. کچھ دیر پہلے ہی بارات پہنچی تھی. اور تھوڑی دیر میں نکاح کی رسم کی جانی تھی.
وہاں موجود تقریباً تمام لوگوں کے چہرے خوشی سے جگمگا رہے تھے. مگر اُن سب میں ایک لڑکی ایسی بھی تھی. جو شدید قسم کی اکتاہٹ اور بوریت کا شکار الگ تھلگ سی بیٹھی ہوئی تھی. اُس کے خوبصورت چہرے سے اُس کی جھنجھلاہٹ کا اندازہ بآسانی لگایا جا سکتا تھا.
” مجھے یہاں آنا ہی نہیں چاہئے تھا. ضرورت ہی کیا تھی. بھابھی کی بات مان کر یہاں آجانے کی. جہاں میں کسی کو جانتی تک نہیں ہوں. اُوپر سے یہاں کی عورتیں بھی اتنی عجیب ہیں گھور ایسے رہی ہیں جیسے آج سے پہلے لڑکی کبھی نہ دیکھی ہو. “
حُرمت جو ویسے ہی اچھی خاصی اُکتائی ہوئی تھی. وہاں موجود اقصٰی کی کچھ رشتہ دار خواتین کی مسلسل گھورتی نگاہوں نے اُسے اچھا خاصا تپا ڈالا تھا. مگر وہ اپنی نیچر کے برعکس صرف اقصٰی کا خیال کرتے لحاظ کیے خاموشی سے بیٹھی رہی تھی.
حُرمت ایک بہت ہی ملنسار سی نرم دل لڑکی تھی. مگر غصے کی انتہا کی تیز تھی. اپنے مزاج کے خلاف کم ہی کوئی بات برداشت کرتی تھی.
شاید اِس کی وجہ کچھ محرومیاں تھیں. جو بہت کوشش کے باوجود اُس کے بھائی بلال قریشی اور بھابھی اقصٰی پوری نہیں کرپائے تھے.
بلال قریشی حُرمت سے پورے دس سال بڑے تھے. حُرمت بہت چھوٹی سی تھی جب اُس کے پیرنٹس کی ڈیتھ ہوگئی تھی. تب سے بلال نے ہی اُسے بالکل اپنے بچوں کی طرح پال پوس کر بڑا کیا تھا. اُن کی جان بستی تھی اپنی اکلوتی بہن میں. حُرمت بھی بلال سے بہت زیادہ اٹیچ اور اُس کے معاملے میں کافی پوزیسیو بھی تھی. اکثر تو بلال کی اقصٰی پر زیادہ توجہ دیکھ وہ چڑ بھی جاتی تھی. اُسے اپنے ہوتے اپنے بھائی کی توجہ صرف خود پر چاہیئے ہوتی تھی. جس بات پر اقصٰی بھی اب خار کھانے لگی تھی.
اقصٰی کو اپنی معصوم اور بے پناہ حُسن کی مالک اپنی نند پیاری تو تھی. مگر کئی بار حُرمت کی اُلٹی سیدھی حرکتوں سے عاجز آکر وہ اُس سے بدگمان بھی ہوجایا کرتی تھی. مگر پھر بھی اقصٰی کی سلجھی طبیعت کی وجہ سے اُن دونوں کے درمیان روایتی نند بھاوج والے جھگڑے نہیں تھے.
” حُرمت کتنی بار پیغام بھجوا چکی ہوں تمہیں. وہاں کیوں نہیں آرہی. یہاں اکیلی کیوں بیٹھی ہو.”
اقصٰی جو کئی بار اُسے اپنے پاس آنے کا بلاوا بھیج چکی تھی. حُرمت کی ہٹ دھرمی پر آخر کار اُسے خود ہی اُٹھ کر آنا پڑا تھا.
” بھابھی میں یہاں بیٹھوں یا آپ کے ساتھ ہونا تو میں نے بور ہی ہے. اِس لیے میں نے آفاق کو کال کی ہے وہ مجھے لینے آرہا ہے. گھر چھوڑ دے گا مجھے.”
حُرمت لاپرواہی سے کہتی اقصٰی کو اچھا خاصہ تپا گئی تھی.
” تم اتنی رات کو آفاق کے ساتھ اکیلی گھر جاؤ گی؟ہرگز نہیں. ویسے بھی کچھ دیر ہے. رخصتی ہوتے ہی ہم بھی واپس گھر چلے جائیں گے. عاصم کو بولا ہے میں نے وہ ہمیں ڈراپ کردے گا.”
اقصٰی نے فوراً نفی میں سرہلاتے حُرمت کو سختی سے منع کیا تھا.
” بھابھی کیسی باتیں کر رہی ہیں آپ. آفاق کوئی غیر تو نہیں ہے. اور کونسا آج پہلی بار میں اُس کے ساتھ جاؤں گی. پہلے بھی تو کئی بار جاچکی ہوں. “
حُرمت کو اقصٰی کی بات بہت بُری لگی تھی. اِس لیے وہ بنا کسی قسم کا لحاظ کیے تیز لہجے میں بولی.
آفاق ناصرف اُس کی پھوپھو کا بیٹا تھا. بلکہ اُس کا فیانسی بھی تھا. کچھ عرصے تک اُن کی شادی بھی متوقع تھی.
” غیر نہیں ہے تو محرم بھی نہیں ہے. رات کے اِس پہر کسی نامحرم کے ساتھ تنہا جانا چاہے وہ کتنا ہی بھروسے لائق کیوں نا ہو غلط ہی ہے. آج کل کے حالات پتا تو ہیں تمہیں. میں کسی صورت اجازت نہیں دوں گی تمہیں اُس کے ساتھ جانے کی. فوراً منع کرو اُسے. “
اقصٰی نے حُرمت سے بھی زیادہ تیز لہجے میں بات کرتے اُسے سختی سے ٹوک دیا تھا.
بلال قریشی آفس کے کسی کام کے سلسلے میں شہر سے باہر تھے. ہمیشہ اُن کے بغیر اُن کی لاڈلی اور تھوڑی سی بگڑی بہن کو سنبھالنا اقصٰی کے لیے جان کا عذاب بن جاتا تھا.
اُن کی چچا زاد کزن کی شادی تھی. وہ حُرمت کو گھر میں اکیلا چھوڑ کر آنا نہیں چاہتی تھیں. اور اُسے ساتھ لانا بھی اُن کے لیے کسی امتحان سے کم ثابت نہیں ہورہا تھا.
” اونہہ یہ اور اِن کی عجیب و غریب باتیں. “
حُرمت کو بہت غصہ آیا تھا. مگر ناچاہتے ہوئے بھی اُس نے آفاق کو منع کردیا تھا.

¤¤¤¤¤¤¤¤¤¤¤¤¤¤

” تم پھر مجھے اُسی ڈاکٹر کے پاس لے کر جارہے ہو. جو مجھے پاگل سمجھتا ہے. “
یزدان نے روڈ پر نظریں گاڑھے سرد اور سپاٹ لہجے میں اپنے ساتھ بیٹھے صدام کی جانب دیکھا تھا.
اُس کے انداز اور لہجے پر ڈرائیونگ کرتا صدام بھی ایک پل کے لیے ٹھٹھک گیا تھا.
اکثر اوقات یزدان کی باتوں اور انداز سے اُسے ایک پل کے لیے نہیں لگتا تھا کہ یہ شخص اپنا ذہنی توازن واقعی میں ہی کھو چکا ہے.
کبھی کبھی وہ بالکل نارمل لوگوں کی طرح باتیں کرنے لگتا تھا.
” نہیں ایسا بالکل بھی نہیں ہے. کسی شخص کی جرأت نہیں ہے کہ وہ میرے دوست کو پاگل کہے. گدی سے زبان کھینچ لوں گا. اگر کسی نے ایسی کوئی گستاخی کی تو. “
خود کو کافی حد تک نارمل کرنے کی کوشش کرتے صدام نے جواب دیا تھا. مگر اُس کی بات ختم ہونے سے پہلے ہی یزدان نے عجیب انداز میں قہقہ لگاتے صدام کا ابھی تھوڑی دیر پہلے والا وہم دور کردیا تھا.
” ہاہاہاہاہاہا بے وقوف پاگل انسان کو پاگل نہیں تو اور کیا کہا جاتا ہے. ہاہاہاہاہاہا بے وقوف…… “
یزدان کے انداز پر صدام نے کرب سے آنکھیں موندتے اپنا رُخ اُس کی جانب سے پھیر لیا تھا. اپنی سب سے عزیز از جان ہستی کو اِس حال میں دیکھنا اُس کے لیے زندگی کا سب سے اذیت ناک لمحہ تھا.
آج سے چار سال پہلے ایک بہت ہی خطرناک ایکسیڈنٹ میں یزدان نے ناصرف اپنے قریبی رشتے بلکہ شدید صدمے اور دماغ پر لگنے والی گہری چوٹ کی وجہ سے اپنا ذہنی توازن بھی کھو بیٹھا تھا. تب سے اُس کی یہی حالت تھی. کبھی وہ بالکل نارمل بی ہیو کرنے لگ جاتا اور کبھی وہ چار سال کا بچہ بن جاتا. اور اکثر تو وہ غصے اور جنونیت کی انتہا کو پہنچتے ایسے وحشیوں کی طرح بی ہیو کرتا کہ اُسے قابو کرنا مشکل ہوجاتا.
صدام یزدان کا بیسٹ فرینڈ ہونے کے ساتھ ساتھ اُس کا ماموں زاد بھی تھا. اِس حادثے کے بعد سے وہ کسی سائے کی طرح یزدان کے ساتھ رہتا تھا. یزدان کے علاج کے لیے اُس نے کوئی ڈاکٹر نہیں چھوڑا تھا. مگر چار سال سے وہ اِس معاملے میں ناکام ہی رہا تھا.
یزدان اپنے والدین کی طرف سے پہلے ہی بے شمار وراثت کا مالک تھا. لیکن خود بھی ایک محنتی انسان ہونے کی وجہ سے پڑھائی ختم کرنے کے بعد بہت ہی کم عرصے میں اپنی محنت اور لگن کی وجہ سے وہ بڑے پیمانے پر اپنا بزنس اسٹیبلش کر چکا تھا. اور شاید اُس کی یہی دولت و جائیداد اور بے پناہ کامیابیاں اُس کی بربادی کی وجہ بن گئی تھیں.
اُس حادثے کے بعد سے یزدان کے ساتھ ساتھ اُس کا بزنس بھی صدام ہی سنبھالنے لگا تھا. صدام نے صحیح معنوں میں ایک سچے اور ایماندار دوست کا فرض نبھارہا تھا.

¤¤¤¤¤¤¤¤¤¤¤

” یزدان یہ کیا کیا ہے تم نے. “
صدام یزدان کی جانب دیکھتا بے چارگی اور بےبسی سے بولا.
پچھلی بار کی طرح اِس بار بھی یزدان ڈاکٹر کے سوالوں جو کے ہمیشہ اُسے اُلٹے سیدھے ہی لگے تھے کہ جواب میں اُس کو بُری طرح پیٹ چکا تھا.
یہ پہلا ڈاکٹر نہیں تھا. اِس سے پہلے بھی بہت سارے ڈاکٹرز کی یزدان کے جنونی غصے اور ذہنی توازن بگڑنے پر اُس کے کسرتی بازوں سے درگت بن چکی تھی. یہی وجہ تھی کہ اُس کا علاج ہمیشہ آدھے مراحل میں رہ جاتا تھا. صدام یزدان کا عام پاگلوں کی طرح اُنہیں باندھ کر اور مختلف انجکشنز سے ٹارچر کرنے جیسا علاج کسی صورت نہیں چاہتا تھا.
مگر اکثر یزدان کی یہ حرکتیں اُسے نالاں کر دیتی تھیں.
یزدان کو شروع سے باڈی بنانے کا بہت شوق تھا. اب بھی کبھی کبھار جب وہ نارمل ہوتا تو اپنے گھر میں ہی بنے جم خانے میں جاکر وہ اپنی زندگی کا سب سے پسندیدہ کام ضرور سر انجام دیتا تھا. لیکن وہاں پر بھی اکثر اوقات دماغی توازن بگڑنے پر جم کا جو حال اُن سب کو دیکھنے کو ملتا تھا. وہ کسی کباڑ خانے سے کم نہیں ہوتا تھا.
ڈاکٹرز کا کہنا تھا کہ یزدان کو زیادہ سے زیادہ خوش رکھا جائے. یہی اُس کی دماغی حالت کے لیے سب سے زیادہ مفید ہے. مگر صدام بہت کوششوں کے باوجود ایسا کرنے میں ناکام تھا. کیونکہ یزدان کو دیکھ کر لگتا تھا کہ جیسے اب دنیا میں اُس کے لئے ایسی کوئی وجہ یا ہستی ہی نہیں بچی جس کی وجہ سے وہ خوش رہے اور واپس زندگی کی جانب لوٹ سکے.
” یزدان تم یہاں بیٹھو میں بس پانچ منٹ میں آیا.”
صدام کو اُس ڈاکٹر کی ٹینشن ہورہی تھی. جسے اُس کا عزیز دوست کچھ ہی لمحوں میں بستر پر پہنچا آیا تھا. وہ ایک بار اُس سے معذرت کرنے اور یزدان کا پھیلایا رائتہ سمیٹنے اُسے گاڑی میں بیٹھا کر ساتھ آئے ملازم کو اُس کا دھیان رکھنے کی ہدایت کرتا اندر کی جانب بڑھ گیا تھا.
ڈاکٹر کو بُری طرح پیٹنے کے باوجود یزدان کا غصہ کم ہونے کا نام ہی نہیں لے رہا تھا. اُس کا ابھی اور بھی بہت کچھ تہس نہس کرنے کا ارادہ تھا. جب اچانک کانوں میں پڑنے والی کسی نسوانی ہنسی کی کھلکھلاہٹوں پر اُس کا چہرا خود بخود ہی آواز کی سمت مُڑ گیا تھا.
جہاں تھوڑے سے فاصلے پر ہی ایک بلو کپڑوں میں ملبوس گرے آنکھوں والی لڑکی اپنے سامنے کیچڑ میں گری لڑکی کو دیکھ کر ہنس ہنس کر پاگل ہورہی تھی.
نہ جانے کس کشش کے تحت یزدان کے قدم خود بخود ہی اُس لڑکی کی جانب بڑھے تھے. اُس کی گرے آنکھیں اُس دنیا جہاں سے بیگانہ و بے پرواہ پاگل شخص کو جیسے اپنی الوہی کشش کے حصار میں جکڑ گئی تھی.
” سر کیا ہوا. آپ کہاں جارہے ہیں. “
اُسے گاڑی سے نکلتا دیکھ سعود(ملازم) جلدی سے اُس کے قریب آیا تھا.
جسے یزدان آنکھوں میں ناگواری لیے ایک ہی جھٹکے میں اپنے آگے سے ہٹاتا اُس لڑکی کے قریب کچھ فاصلے پر جا کھڑا ہوا تھا.
جیسے جیسے اُس لڑکی کی کھلکھلاہٹوں میں اضافہ ہورہا تھا. ویسے ہی یزدان کے ہونٹوں پر مسکراہٹ پھیلتی جارہی تھی.
صدام اگر یہ مسکراہٹ دیکھ لیتا تو خوشی سے پاگل ہو اُٹھتا جسے دیکھنے کے لیے وہ چار سال سے نجانے کیا کیا جتن کرچکا تھا.
کیونکہ پچھلے چار سالوں میں شاید آج پہلی دفعہ ہی کب سے کھوئی مسکراہٹ نے یزدان کے سختی سے پیوست انابی لبوں کا احاطہ کیا تھا.
مگر شاید اِس مسکراہٹ کا دورانیہ بہت کم تھا. یزدان کی مسکراہٹ اُس وقت سمٹی جب کیچڑ میں گری لڑکی نے اپنے سامنے کھڑی ہنستی مذاق اُڑاتی لڑکی کا ہاتھ پکڑ کر اپنے ساتھ کیچڑ میں گراتے اُس کی کھلکھلاہٹوں پر بند باندھا تھا.
اپنی پسندیدہ لڑکی کو یوں کیچڑ میں گرتے دیکھ یزدان کی مُٹھیاں ایک بار پھر غصے سے بھینچ گئی تھیں. وہ غصے سے پاگل ہوتا اُس دوسری لڑکی سے اِس بات کا بدلہ لینے آگے بڑھا تھا.
” یزدان کیا ہوا کہاں جارہے ہو. “
اِس سے پہلے کہ یزدان پھر کوئی حرکت کرتا. سعود کی اطلاع پر صدام بھاگتا یزدان تک پہنچا تھا.
یزدان کے چہرے پر وہی چٹانوں جیسی سختی اور غصہ دیکھ صدام نے سعود کو گھورا. جو ابھی اُسے یزدان کے بارے میں کچھ اور ہی بتا کر اچھا خاصہ خوش گمان کر چکا تھا.
” چھوڑو مجھے….وہ ایسا کیسے کرسکتی ہے… میں چھوڑوں گا نہیں اُسے… “
یزدان صدام کو پیچھے دھکیلتا واپس پیچھے کی جانب مڑا تھا. مگر اب وہ دونوں لڑکیاں وہاں موجود نہیں تھیں. یزدان نے مزید اشتعال میں آتے اردگرد نظریں دوڑائیں مگر وہ دونوں اُسے کہیں بھی نظر نہیں آئی تھیں.
صدام کافی دیر کی کوششوں کے بعد بہت مشکلوں سے اُسے گاڑی میں بیٹھانے میں کامیاب ہوا تھا.
” فون پر کیا بول رہے تھے تم یزدان مسکرا رہا ہے. جبکہ اُس کی حالت تو مزید خراب ہوچکی ہے. لگتا ہے تم اپنی ڈیوٹی کرنے کے بجائے کھڑے کھڑے سوگئے تھے. “
صدام اپنی سائیڈ کا دروازہ کھولتے سعود پر طنز کرنا نہیں بھولا تھا.
” سر میں بالکل سچ کہہ رہا ہوں. یزدان سر واقعی مسکرائے تھے. ایسا بی ہیو کرتے میں نے اُنہیں پہلے کبھی نہیں دیکھا. اور یہ سب اُس لڑکی کی وجہ سے ہوا. جو کچھ دیر پہلے یہاں کھڑی تھی. “
سعود نے جلدی سے اپنی صفائی پیش کی تھی. جبکہ اُس کی بات پر گاڑی میں بیٹھتا صدام خوشگوار حیرت کے زیرِ اثر یقین و بے یقینی کی کیفیت میں اُسے دیکھے گیا تھا.
اگر یہ سب سچ تھا تو صدام کے لیے اِس سے بڑی خوشی کی بات کوئی ہو ہی نہیں سکتی تھی. کہ اِس دنیا میں ابھی بھی کوئی ایسی ہستی ایسی وجہ موجود تھی. جو اُس کے دوست کو واپس زندگی کی جانب موڑ سکتی تھی.
سعود سے بعد میں تفصیل سے بات کرنے کا ارادہ کرتے صدام یزدان کے برابر ڈرائیونگ سیٹ پر آبیٹھا تھا. کچھ دیر پہلے کی نا اُمیدی اور مایوسی اب اُس کے دماغ سے ہٹ گئی تھی.

¤¤¤¤¤¤¤¤¤¤¤

” کیا ہوا حُرمت اتنی خاموش کیوں بیٹھی ہو. “
وہ سب کینٹین میں بیٹھی اپنی ہی خوش گپیوں میں مصروف تھیں. جب منیبہ کی نظر خلاف معمول کچھ گم صم سی بیٹھی حُرمت پر پڑی تھی.
” مجھے بھلا کیا ہونا. میرا پاس اتنا فضول دماغ نہیں کہ تم لوگوں کی طرح ہر وقت فضول کی ہانکتی رہوں. “
حُرمت جو آج کل ویسے ہی چڑچڑی سی ہوئی پڑی تھی. اُن سب کے ایک دم متوجہ ہونے پر چڑ کر بولی.
” وہی تو کہہ رہی ہوں کچھ تو ہوا ہے. جو تم فضول کی ہانکنے میں ہمارا ساتھ نہیں دے رہی. کوئی پرابلم ہے تو شیئر کرو نا. کیا آفاق کی طرف سے کوئی مسئلہ ہے.”
منیبہ حُرمت کے بہت کلوز تھی. اُس کی رگ رگ سے واقف تھی. اِس لیے اُس کے بنا کہے ہی بہت کچھ سمجھ جاتی تھی.
” ہمم کچھ ایسا ہی ہے. “
حُرمت کے اثبات میں سر ہلانے پر باقی سب بھی سنجیدگی سے اُس کی جانب متوجہ ہوئی تھیں.
” کیا مطلب ہوا کیا ہے. “
کشمالہ کو بھی حُرمت کا سنجیدہ انداز فکر میں مبتلا کر گیا تھا. وہ سب جانتی تھیں کہ آفاق اور حُرمت ایک دوسرے کو بہت لائق کرتے ہیں. جس کو دیکھتے ہوئے ہی بلال نے اُن کا رشتہ طے کیا تھا.
” میں خود بھی نہیں جانتی اصل معاملہ کیا ہے. بھابھی سے بھی پوچھا وہ بھی کچھ نہیں بتا رہیں. مگر مجھے لگ رہا ہے کہ بھائی اور پھوپھو کے درمیان کوئی پرابلم چل رہی ہے. آفاق بھی کچھ دنوں سے ٹھیک سے بات نہیں کررہا. پتہ نہیں اصل معاملہ کیا ہے. کوئی بتانے کو تیار ہی نہیں ہے. “
حُرمت بڑوں کے درمیان کچھ دنوں سے پکنے والی کھچڑی سے اچھی خاصی اُکتائی ہوئی تھی.
” اوہ ہو. اِس سب پر اتنا پریشان ہونے کی کیا ضرورت ہے. کوئی ہونگے اُن کے اپنے معاملات. جب تم جانتی ہو تمہارے بھائی اور پھوپھو تم سے بہت پیار کرتے ہیں. کسی بھی وجہ سے تمہارے ساتھ کچھ غلط نہیں ہونے دیں گے. “
منیبہ حُرمت کا ہاتھ تھامتی تسلی دیتے بولی.
” ہاں بالکل ٹھیک کہا منیبہ نے. اور پلیز حُرمت اپنے خوبصورت سے چہرے سے یہ سوگواریت دور کرو. اِس طرح منہ لٹکائے بالکل مس فضیلہ کی جڑوا بہن لگتی ہو. “
صفہ حُرمت کو چھیڑتی اپنی یونی کی سب سے کھڑوس اور غصیلی ٹیچر سے ملاتے اُسے چھیڑتے ہوئے بولی.
جبکہ مس فضیلہ کا انگارے چبھاتا روپ یاد کرتے حُرمت نے جھرجھری سی لیتے صفہ کو گھورا. جبکہ باقی سب حُرمت کے چہرے کے مزید بگڑے زاویے دیکھ اپنی ہنسی نہیں روک پائی تھیں.
حُرمت خود غصے کی بہت تیز تھی. مگر اپنے سامنے کسی اور کا غصہ کرنا اُسے سخت ناگوار گزرتا تھا. یہی وجہ تھی کہ مس فضیلہ سے اُس کی بالکل بھی نہیں بنتی تھی.

جاری ہے.