یہ کہانی لکھی گئی ہے سولہویں صدی کے پس منظر میں… جب انسان کا پہلا عشق اس کا گھوڑا اور دوسرا اس کی تلوار ہوا کرتی تھی, یہ کہانی گھومتی ہے چار عظیم الشان ریاستوں کے گرد…
پہلی ریاست… ریاست ارنگ
جو رقبے کے لحاظ سے سب سے بڑی ریاست ہے, اس کے مشہور سرحدی قصبوں میں کاموس اور ہوشان شامل ہیں
دوسری ریاست… ریاست دروج
جو دفاع کے لحاظ سے سب سے مضبوط ریاست ہے, اس کی سرحد پر اجل نام کا ایک انتہائی خطرناک جنگل یے
ریاست ارنگ اور ریاست دروج کے درمیان فروک نام کا ایک بڑا سا قصبہ نما شہر واقع ہے
فی الحال کے لئے اتنا ہی یاد کیجئے, باقی دو ریاستیں اگلی قسط میں
………………………………………………………………
ریاست ارنگ… ہوشان کے سبزہ زار
قلعے کی حدود سے باہر نکلتے ہی اس نے گھوڑے کی رفتار دھیمی کرلی تھی. سڑک کے بائیں طرف سبزہ زار شروع ہوگئے تھے. قلعے کی پشت پر بہتا دریائے سون بل کھا کر سڑک کے ساتھ ساتھ بہتا ہوا آگے تک چلا گیا تھا. کچھ دیر بڑی سڑک پر چلنے کے بعد اس نے گھوڑے کا رخ سبزہ زاروں کی طرف موڑ دیا. سردیوں کے آخری دن تھے. دھوپ کی حدت رومانوی ہو رہی تھی. قدموں تلے تا حد نگاہ تک بچھا ہوا سبز قالین اور اس پر جابجا اگے ہوئے نیلے اور جامنی پھول… درختوں کے تنوں سے لپٹی ہوئی چوڑے پتوں والی بیلیں اور ان پر لگے ہوئے گلابی پھول… دریائے سون سے کئی چھوٹی بڑی ندیاں بھی نکل کر سبزہ زار میں داخل ہو رہی تھیں. اونچے اونچے درختوں کے پتوں سے چھن کر آتی ہوئی سنہری کرنیں ندیوں کے شفاف پانی پر محو رقصاں تھیں. سرخ گلابوں سے ڈھکی جھاڑیاں اور کنوؤں سے لدے ہوئے درخت… وہ کیا کچھ دیکھتی اور کیا کچھ نظر انداز کرتی
“چلو رعد… کوئی اچھا سا شکار ڈھونڈو” اس نے گھوڑے کی باگیں ڈھیلی چھوڑ تے ہوئے اس کی گردن پر ڈال دیں. گھوڑا خرخر کرکے اپنی موج میں آ کر چلنے لگا. کچھ ہی دیر گزری تھی کہ گھوڑے کے کان ایک دم کھڑے ہوگئے. وہ بھی چوکنی ہوگئی.
“کہاں میرے دوست…؟” اس نے کندھے سے تیر کمان اتارتے ہوئے سرگوشی کی تھی, ساتھ ہی اپنی عقابی نظریں چاروں طرف دوڑائیں
“ارے واہ….” اس کے ہونٹوں پر مسکراہٹ پھیل گئی. وہ ایک چھوٹا سا ہرن تھا جو گھاس میں چھپے کیڑے مکوڑوں کے ساتھ کھیل میں لگا ہوا تھا. اس نے ترکش سے تیر نکالا اور کمان میں ڈال کر کمان سیدھی کرلی. شکار عین اس کی نظروں کے سامنے تھا. اس نے کمان کھینچی لیکن اس سے پہلے کہ وہ تیر چھوڑتی, اس کی پشت سے ایک اور تیر اڑتا ہوا آیا اور ہرن کی گردن میں پیوست ہو گیا. جھنجلاہٹ اور غصہ اس پر ایکساتھ وارد ہوئے تھے
“خدا کے لئے…” اس نے اپنی آنکھیں بند کرتے ہوئے سرگوشی میں کہا اور دھیرے سے پیچھے کو مڑی, وہ اس سے چند قدم کے فاصلے پر کھڑا تھا, ہولے سے مسکراتے ہوئے اس نے اپنا دایاں ہاتھ سینے سے لگاتے ہوئے اس کے سامنے ادب سے سر جھکایا تھا
“ہم آپ کی ایسی اور کتنی گستاخیاں معاف کریں وشال سنگھ سمرا ” اس کی آنکھوں سے شرارے نکل رہے تھے. وشال کو لگا اس کے سامنے جادوئی کہانیوں جیسی دو تاریک غاریں کھل گئی ہیں جن سے آگ کی لپٹیں نکل رہی ہیں. اس کا شدت سے دل چاہا کہ وہ ان لپٹوں میں جل کر بھسم ہو جائے
“آپ کی مرضی ہے شہزادی صاحبہ… چاہے تو ایک بھی نہ کریں” وشال کی آنکھیں جیسے انگلیاں بن گئیں تھیں
“ہم اتنے بے رحم ہوتے تو اب تک آپ کی یہ تنی ہوئی گردن ڈھلک چکی ہوتی” اس نے بڑے غرور سے کہا تھا
“آپ بے رحم ہی تو ہیں شہزادی صاحبہ… آپ کہاں ایک ہی بار سر تن سے جدا کرتی ہیں, آپ تو ذرہ ذرہ کر کہ ہمارے روم روم سے روح کھینچتی ہیں, پھر جب لب دم ہو جاتے ہیں تو رحم کھا کر چھوڑ دیتی ہیں, ایک بار پھر سے ہماری جان نکالنے کے لئے. یہ رحم دلی تو نہ ہوئی ارنگ کی خوبصورت ترین شہزادی… “
“آپ کی گستاخیاں دن بدن بڑھتی جا رہی ہیں وشال سمرا…” وہ لا جواب ہو گئی
“گستاخیاں کرتے کرتے شاید ایک دن جرأت بھی کر سکوں…” وشال نے بڑے حق سے کہا تھا. وہ اس کی بات کا جواب نہ دے سکی بس چپ چاپ اپنے گھوڑے کی طرف بڑھ گئی. اس سے پہلے کہ وہ رکاب میں پاؤں ڈالتی, وشال نے اپنی ہتھیلی اس کے آگے کر دی تھی. وہ بڑے حق سے اپنا پیر اس کی ہتھیلی پر دھرتے ہوئے گھوڑے پر سوار ہو گئی
“آپ کی جرأت کا انتظار رہے گا سینا پتی وشال سنگھ سمرا…” اک دل نشین مسکراہٹ ہر طرف بکھیرتے ہوئے اس نے گھوڑے کو ایڑھ لگائی تھی. گھوڑا قلعے کی طرف جانے والے راستے پر سرپٹ ہو لیا اور وشال…
وہ ایک بار پھر وہیں کھڑا رہ گیا…
تنہا…
ایک بار پھر اس نے اپنے سینے کو ٹٹولا تو دل وہاں نہیں تھا. وہ تو ارنگ کی شہزادی اپنے ساتھ لے گئی تھی…
ہمیشہ کی طرح…
ایک بار پھر اس نے مٹی ہوتے ہوئے ستارے کی خواہش کی تھی اور ستارہ بھی کوئی عام ستارہ نہیں…ارنگ کا سب سے روشن اور خوبصورت ستارہ…وہ ستارہ جس کی خوبصورتی کی داستانیں ارنگ کے ہر نوجوان کو زبانی یاد تھیں. وہ ستارہ جس کی خوب سیرتی کی کہانیاں ارنگ کی ہر دوشیزہ کو ازبر تھیں. وہ ستارہ جس کی دانشمندی کی گواہی ارنگ کا ہر دانشور اور معلم دیتا تھا. وہ ستارہ جس کی رحمدلی کے چرچے زندان پڑے ہر قیدی نے سنے تھے. وہ ستارہ جس کی بہادری کے قصے چار دانگ عالم میں پھیلے ہوئے تھے… سب سے ذہین… سب سے منفرد ستارہ… ارنگ کی شہزادی امبر مرال نوشین…
……………………………………………………………….
فروک… ریاست ارنگ کی حدود پر واقع ایک قصبہ
سرما کے سورج نے اپنی دونوں آنکھیں کھول دی تھیں.
مکانوں کی چار دیواریوں پر سنہری دھوپ آہستہ آہستہ اترنے لگی تھی. جا بجا دکانیں کھلنے لگی تھیں اور بازار سجنا شروع ہوگئے تھے. ارنگ کی سرحد پر موجود یہ چھوٹا سا قصبہ برتن سازی کے لئے بہت مشہور تھا. بازاروں کی گہما گہمی اپنے عروج پر تھی جب آٹھ, دس گھڑ سوار سر پٹ گھوڑے دوڑاتے ہوئے قصبے میں داخل ہوئے,
” راجا شیکھر کا دربار کس طرف ہے…؟” ان کے سردار نے ایک دوکاندار سے بڑے رعب سے پوچھا تھا
” اس طرف…وہ سرخ میناروں والا” دوکاندار ذرا دور نظر آتے سرخ میناروں کی طرف اشارہ کرتے ہوئے بولا گھڑ سواروں کا رخ دربار کی طرف ہو گیا
“راجہ شیکھر سے کہو کہ بادشاہ عمادالدین کا ایلچی آیا ہے” گھڑ سواروں کے سردار نے اپنے گھوڑے سے اترتے ہوئے دربان سے کہا تھا, وہ انہیں دیکھتے ہوئے اندر چلا گیا اور کچھ دیر کے بعد واپس آیا.
” اندر چلے جاؤ… راجہ شیکھر تمہارا انتظار کر رہے ہیں” دربان نے کہا, ایلچی سر ہلاتے ہوئے اندر چلا گیا
” کہو عماد الدین کے ایلچی… کیا پیغام لے کر آئے ہو” فروک کا راجہ شیکھر کمار اپنے تخت پر بیٹھا ہوا تھا “بادشاہ عمادالدین نے پیغام بھیجا ہے کہ فروک نے اس مہینے کا لگان ابھی تک ادا نہیں کیا, اگر دو دن کےاندر لگان ادا نہیں کیا گیا تو نتائج کے ذمہ دار آپ خود ہوں گے” ایلچی نے پیغام پڑھ کر سنایا, شیکھر کے ماتھے پر بل نمودار ہو گئے,
” ہم بادشاہ عمادالدین کو کئی بار کھلے الفاظ میں یہ بات بتا چکے ہیں کہ ہمارا الحاق ریاست دروج کے ساتھ ہے, ریاست ارنگ کے ساتھ نہیں… اور ہم امیر نعلین عباس شاہ کو اس مہینے کا لگان بھجوا چکے ہیں” “یعنی آپ بادشاہ عمادالدین کو لگان ادا کرنے سے انکار کر رہے ہیں…؟” ایلچی نے واضح الفاظ میں پوچھا تھا “ہاں تم بالکل ٹھیک سمجھے… ہم یہی کہہ رہے ہیں, جاؤ اور جا کر بادشاہ عمادالدین سے کہہ دو کے ارنگ کا بچہ بچہ اس بات سے واقف ہے کہ فروک کا معاہدہ ریاست دروج کے ساتھ ہے سو ہر مہینے کا لگان بھی ریاست دروج کے امیر کو ہی ادا ہوگا” ایلچی واپس چلا گیا
” راجہ شیکھر میرا مشورہ اب بھی وہی ہے جو پہلے تھا, آپ کو دروج کے امیر سے اس سلسلے میں بات کرنی چاہیے, فروک آخر کب تک عمادالدین کو زبردستی لگان ادا کرتا رہے گا” شیکھر کے وزیر خزانہ نے اس کو مشورہ دیا تھا
” وزیر خزانہ بالکل درست کہہ رہے ہیں راجہ شیکھر… آپ کو نعلین عباس شاہ سے واضح الفاظ میں بات کرنی چاہیے, ہمارا ریاست دروج کے ساتھ پکا معاہدہ ہے اور ہم ہر ماہ باقاعدگی کے ساتھ لگان ادا کرتے ہیں, عماد الدین کی اس بے جا زبردستی کے خلا ف اسے ہماری مدد کرنی چاہیے” شیکھر کے تمام وزراء کی یہی رائے تھی لیکن اس کے چہرے پر پریشانی کے آثار نمودار ہو گئے تھے
“ہم چاہیں تو آج امیر نعلین عباس شاہ کے پاس چلے جائیں , ہمیں یہ بھی یقین ہے کہ وہ ہماری بات سن کر عمادالدین کے خلاف کاروائی ضرور کرے گا لیکن… ہم سب جانتے ہیں کہ عمادالدین کس قدر گھمنڈ ی اور ظالم بادشاہ ہے, ہم سوچتے ہیں کہ کہیں ہمارا یہ اٹھایا ہوا قدم فروک کو تباہ و برباد نہ کر دے” راجا شیکھر کی پیشانی کے بل کچھ زیادہ گہرے ہو گئے تھے
………………………………………………………………
راجل…ریاست دروج کی سرحد پر موجود ایک جنگل
وہ اور ایبک آج شکار کے لیے نکلے تھے, دروج کی سرحد پر ایک بہت بڑا اور گھنا جنگل تھا جس کے بارے میں مشہور تھا کہ وہاں شکار کے لیے جانے والے اکثر خود ہی شکار بن جاتے تھے, ان دونوں کا پکا ارادہ تھا کہ آج ایک آدھ شیر کا بچہ لے کر ہی لوٹیں گے, تین چار گھنٹے کی چھان بین کے بعد آخر انہوں نے شیر کی کچھار ڈھونڈ ہی لی, شیر نہ جانے کہاں تھا اور شیرنی اپنے تین عدد بچوں کے ساتھ کچھار سے کچھ دور دھوپ سینکنے میں مشغول تھی, وہ دونوں کچھار سے بیس, بائس قدم دور ایک موٹے سے درخت پر چڑھ گئے
” چلو ایبک… دیکھتے ہیں آج کس کا تیر نشانے پر بیٹھتا ہے” اس نے تیر کمان میں ڈالتے ہوئے ایبک سے کہا تھا, ایبک نے بھی سر ہلاتے ہوئے اپنی کمان سیدھی کر لی, لیکن اس سے پہلےکہ ان دونوں میں سےکسی کا بھی تیر کمان سے نکلتا, پورا جنگل شیر کی گرج دار دھاڑ سے گونج اٹھا
” یہ کیا ہوا..؟” ایبک نے سرگوشی کی تھی
” ہمارا خیال ہے کہ کسی نے شیر پر ہی نشانہ باندھ لیا ہے” وہ دھیرے سے کمان نیچے کرتے ہوئے بولا تھا, اس سے پہلے کہ وہ دونوں کچھ سمجھ پاتے, جنگل کے شمالی جانب سے ایک گھڑ سوار نمودار ہوا…سرپٹ گھوڑا دوڑاتے ہوئے اور اس کے عین پیچھے جنگل کا بادشاہ نظر آیا… با آواز بلند دہاڑتے ہوئے, شیر کی پیٹھ میں ایک تیر پیوست تھا, شیرنی بھی غراتے ہوئے اٹھ کھڑی ہوئی, اب صورتحال یہ ہوگئ کہ گھڑسوار شیروں کی جوڑی کے نرغے میں آ گیا, وہ جس طرف سے بھی جنگل چھوڑنے کی کوشش کرتا, شیروں کی جوڑی اس کا راستہ مسدود کر دیتی, وہ دونوں کافی دیر تک یہ چوہے بلی کا کھیل دیکھتے رہے
“کیا لگتا ہے آپ کو…کیا ہوا ہو گا…؟” ایبک نے پوچھا
“ہمارے خیال سے جو کچھ بھی ہوا ہے انجانے میں ہوا ہے, اگر شکار کی نیت سے تیر چلایا گیا ہوتا تو وہ شیر کی گردن میں پیوست ہوتا, پیٹھ میں نہیں…گھڑ سوار بے شک بہت بہادر ھے, مشاق بھی ہے لیکن تھوڑی دیر تک اس کا گھوڑا تھک جائے گا اور ہمارا نہیں خیال کہ ٹانگوں کے بل دوڑتے ہوئے وہ شیروں کی جوڑی سے جیت پائے گا”
“یعنی شیروں کو مار گرانا ہوگا” ایبک نے کہا
“نہیں…گھڑ سوار کو بچانا ہوگا” اس نے سرگوشی میں کہا تھا
“مجھے کیا کرنا ہوگا…” ایبک نے پوچھا, وہ دونوں درخت سے نیچے اتر آئے, ان کے گھوڑے کچھ ہی فاصلے پر بندھے ہوئے تھے
ا” ہمیں گھڑسوار کے گھوڑے کے تھکنے کا انتظار کرنا ہوگا, اگر یہ عقل مند ہوا تو گھوڑے کے گرنے کے بعد چھلانگ ضرور لگائے گا, عین اسی لمحے ہم اس کی مدد کریں گے اور تم جنگل سے نکلنے کا راستہ ڈھونڈو گے, جتنی جلدی ہم اس جنگل کو چھوڑیں گے زندہ رہنے کے لیے اتنا ہی اچھا ہوگا, ایبک سر ہلاتے ہوئے ہوئے گھوڑے پر چڑھ گیا اور اس کے اندازے کے عین مطابق آدھے پونے گھنٹے بعد گھڑ سوار نے گھوڑے سے چھلانگ لگا دی تھی, شیروں کی جوڑی بری طرح گھوڑے پر جھپٹ پڑی, اس نے سرپٹ گھوڑا دوڑاتے ہوئے لمحوں میں گھڑ سوار کو کھینچ کر اپنے پیچھے بٹھایا تھا, ایبک کے گھوڑے کے پیچھے اپنا گھوڑا دوڑاتے ہوئے چند ہی لمحوں میں وہ جنگل سے نکل آئے, دروج کہ حدود میں داخل ہوتے ہی اس نے گھوڑے کی باگیں کھینچ لیں, ایبک نے بھی اپنا گھوڑا روک لیا تھا, اس کے پیچھے بیٹھا گھڑ سوار زقند لگا کر نیچے اتر گیا, اس نےاپنا چہرہ سیاہ رنگ کے کپڑے سے چھپایا ہوا تھا
” ہم صرف اتنا جاننا چاہتے ہیں آخر ایک لڑکی اس قدر خطرناک جنگل میں تیر اندازی کی اناڑی سی مشق کیوں کر رہی تھی…؟” وہ آخر کو دروج کی فوج کا سپہ سالار تھا
“ہم اناڑی نہیں ہیں…” لڑکی نے اپنے چہرے سے نقاب کھینچا تھا, ایبک کی آنکھیں پھیل گئیں
“اچھا…تبھی تمہارا تیر شیر کی گردن کی بجائے اس کی پیٹھ میں پیوست ہو گیا” اس نے اپنے دونوں ہاتھ سینے پر باندھ لئے اور مسکرایا
” ہم نے جان بوجھ کر اس شیر پر تیر نہیں چلایا, ہم صرف ایک ساتھ تین تیر چلانے کی مشق کر رہے تھے, ان میں سے ایک تیر نہ جانے کیسے اس شیر کی پیٹھ میں جا لگا” لڑکی کا سانس پھولا ہوا تھا لیکن وہ خوف زدہ ہرگز نہیں تھی
“تمہیں ایک تیر چلانا آتا ہے جو تم ایک ساتھ تین تیر چلانے کی مشق… اس کی بات مکمل ہونے سے پہلے ہی لڑکی کا لمحوں میں چلایا ہوا تیر اس کے کان کے پاس سے گزرتا ہوا پیچھے درخت کے تنے میں جا لگا
“معاف کرنا… تمہارے بالوں میں شائد ایک چھوٹا سا پر پھنسا ہوا تھا” لڑکی اپنی کمان کندھے پر لٹکاتے ہوئے بولی تھی, وہ بس اسے دیکھ کر رہ گیا, اس قدر حسن بھی پہلے دیکھا تھا, اس قدر غرور بھی پہلے دیکھا تھا لیکن اس قدر بہادری پہلے نہیں دیکھی تھی
“کون ہو تم…؟ اس سے پوچھا
“بے شک تم نے میری جان بچائی ہے لیکن پہلے تم یہ بتاؤ گے کہ تم کون ہو ؟” لڑکی کی آنکھیں بے خوف تھیں
“یہ دروج کی فوج کے…” اس نے ایبک کی بات مکمل نہ ہونے دی
“ہم دروج کی فوج کے ایک سپاہی ہیں اور یہ ہمارا دوست ہے” اس نے ایبک کی طرف اشارہ کرتے ہوئے کہا تھا
“ہم راس ملان کی چوٹیوں پر رہتے ہیں, ہمارا کوئی بھائی نہیں ہے, اس لیے ہماری ماں اکثر ہمیں جنگل سے لکڑیاں لیکر آنے کو کہتی ہے, لیکن ہمیں لکڑیاں کاٹنے میں کوئی دلچسپی نہیں ہے, ہم اپنی تیر اندازی کی مشق کرکے واپس چلے جاتے ہیں” لڑکی نے بتایا
“تو تمہاری ماں تمہیں خالی ہاتھ واپس آنے پر کچھ نہیں کہتی ؟” اس نے پوچھا
“ماں کی جھاڑ کھانا لکڑیاں کاٹنے سے زیادہ آسان کام ہے” لڑکی نے کہا تھا, وہ دل کھول کر ہنسا
“یعنی تمہیں لگتا ہے کہ اس طرح مشق کرنے سے تم ایک ساتھ تین تیر چلانے کے قابل ہو جاؤ گی” اس نے پوچھا تھا
“ہاں بالکل… دروج کی فوج کا سپہ سالار بھی تو ایک ساتھ تین تیر چلاتا ہے” لڑکی کی بات سن کر وہ چونک اٹھا
“کون…؟” اس نے انجان بن کر پوچھا
“دارین عباس شاہ” لڑکی کے لہجے اور لفظوں دونوں سے رشک اور حسد ٹپک رہا تھا
“شاید تمہیں کسی نے غلط بتایا ہے, ہمارے سپہ سالار ایک ساتھ تین نہیں بلکہ پانچ تیر چلاتے ہیں” اس کی بات سن کر اس کے پیچھے کھڑا ایبک ہنس پڑا
“ہمیں پتا ہے… جب ایک ساتھ تین تیر چلانے آ جائیں گے تو اس کے بعد پانچ کی مشق شروع کردوں گی” لڑکی نے بھڑک کر کہا تھا
“تمہارا نام کیا ہے…؟” اس نے پوچھا
“نیرجا… “لڑکی نے کہا
“جاؤ نیرجا… تمہاری ماں تمہارا انتظار کر رہی ہو گی” وہ کہتا ہوں اپنے گھوڑے کی طرف پلٹ گیا
“سنو…! ” نیرجا نے اسے آواز دی تھی
“دروج کے جس سپاہی نے میری جان بچائی مجھے اس کا نام تو پتا ہونا چاہیے ” اس نے کہا
“کوئی ضرورت نہیں “کہتا ہوا وہ گھوڑے پر چڑھ گیا
“شکریہ… میری جان بچانے کے لئے” اس نے پکار کر کہا تھا, دارین نے مسکراتے ہوئے گھوڑے کو ایڑ لگا دی اور کچھ ہی دیر میں وہ نیرجا کی نظروں سے اوجھل ہو گئے
……………………………………………………………….
ریاست دروج
انہیں اس کمرے کے سامنے کھڑے ہوئے کافی دیر ہو چکی تھی, کمرے سے مسلسل کرب آمیز آہیں اور درد بھری چیخیں باہر سنائی دے رہی تھیں, کنیز خاص اور مشیر خاص انہیں کئی بار وہاں سے تشریف لے جانے کا کہ چکے تھے لیکن وہ وہیں موجود تھے, تھک جاتے تو دیوار سے ٹیک لگا لیتے, ان کی ضد سے مجبور ہو کر کنیز خاص نے ان کے لئے صندلی رکھوا دی تھی
“دارین اب تک نہیں پہنچا… ؟” انہوں نے ایک کنیز سے پوچھا
نہیں امیر محترم… ” وہ بولی, کمرے سے یکلخت فلک شگاف چیخ کی آواز آئی تھی , ان کا کلیجہ منہ کو آگیا, اور ساتھ ہی نومولود بچے کے رونے کی آواز سنائی دی, انہوں نے چونک کر کمرے کی جانب دیکھا تھا, کنیز خاص جلدی سے اندر چلی گئی اور چند لمحوں بعد واپس آئی
“مبارک ہو امیر محترم… آپ دادا بن گئے ہیں, اللہ نے …کو بیٹے کی نعمت سے نوازا ہے” کنیز خاص نے آکر خوشخبری سنائی تھی
” اللہ تیرا شکر ہے, یا اللہ تیرا لاکھ لاکھ شکر ہے” ان کی آنکھوں سے آنسو بے دریغ بہہ نکلے
“ہماری بچی کا کیا حال ہے؟” انہوں نے فورا پوچھا تھا “طبیبہ کہہ رہی ہیں کہ شاہ دخت بالکل ٹھیک ہیں, تھوڑی دیر تک ہوش میں آ جائیں گی”
” الحمدللہ الحمدللہ ” انہوں نے اپنی آنکھوں سے بہتے آنسو صاف کرنے کی زحمت نہیں کی تھی,
” دارین نہیں پہنچا اب تک…؟” انہوں نے پھر پوچھا تھا “نہیں… امیرمحترم ” کنیز خاص نے سر جھکا کر جواب دیا
“مشیر خاص وزیر خزانہ سے کہو کہ آج کے دن خزانوں کے منہ کھول دیں, پورے دروج میں اس خوشی کی خبر کا اعلان کیا جائے, غریبوں مسکینوں اور محتاجوں کے لیے پرتکلف لنگر کا بندوبست کیا جائے, دروج کے ہر ہر بچے کا منہ میٹھا کروایا جائے, ہر ہر بستی اور ہر ہر قصبے میں شیرینی بانٹی جائے, پورے شہر میں منادی کرا دی جائے کہ آج ظہر کی نماز کے بعد ہم جامعہ مسجد میں شکرانے کے نوافل ادا کریں گے, جو شہری ہماری خوشیوں میں شامل ہونا چاہے ہو سکتا ہے, دروج کی تمام سرحدی بستیوں تک کھانا پہنچایا جائے, آج کی رات دروج کی حدود میں کوئی شخص بھوکا نہیں سونا چاہیے” ان کی آواز خوشی سے کانپ رہی تھی, مشیر خاص سر جھکا کر واپس چلا گیا
“امیر محترم… آپ اندر تشریف لا سکتے ہیں” کچھ لمحوں کے بعد کنیز خاص نے آکر کہا تھا, وہ فورا کمرے میں داخل ہوگئے, بہت محبت سے انہوں نے ایک نظر پارسا پر نور کے نڈھال سے وجود پہ ڈالی تھی
” انہیں کب تک ہوش آ جائے گا؟” انہوں نے اپنا ہاتھ اس کے ماتھے پر رکھا, وہ برف کی طرح ٹھنڈی ہو رہی تھی,
“بہت جلد امیر محترم…شاہ سخت کی طبیعت اب خطرے سے باہر ہے” طبیبہ نے جلدی سے کہا
” اللہ میری بچی کو صحت دے” وہ اس کی پیشانی چومتے ہوئے طبیبہ کی طرف بڑھے, اس نے سفید کپڑے میں لپٹا ایک ننھا سا وجود ان کے بازؤں میں ڈال دیا تھا
” مبارک ہو امیر محترم…” طبیبہ نے مسکرا کر کہا
” یامیرے خدا اس بچے کو ہمیشہ اپنے حفظ و امان میں رکھنا, اس بچے کو اپنے ماں باپ کا فرمانبردار بنانا, اسے عادل اور رحم کرنے والا بنانا…”وہ اسے دعائیں دیتے چلے گئے
” امیر محترم بچے کے کان میں اذان کون دے گا؟” طبیبہ نے پوچھا تھا
دارین نہیں آیا ؟” انہوں نے پھر سے اس کے بارے میں پوچھا تھا
“نہیں امیر محترم…” کنیز خاص کا جواب ایک بار پھر انکار میں تھا, انہیں دکھ ہوا…بہت زیادہ دکھ… اپنی آنکھوں کے گوشے صاف کرتے ہوئے انہوں نے بچے کے کان میں اذان دی تھی
” خدا ہمیشہ تمہاری حفاظت کرے” بچے کی پیشانی چومتے ہوئے انہوں نے اسے دوبارہ طبیبہ کے سپرد کردیا
“کنیز خاص پارسا اور اس کے بچے کا خوب خیال رکھا جائے, ان دونوں کو کسی بھی قسم کی کوئی تکلیف نہیں ہونی چاہیے, پارسا کو جیسے ہی ہوش آئے ہمیں فوراً کی اطلاع دی جائے” کنیز خاص نے ان کی بات سن کر سر ہلایا تھا, وہ کمرے سے باہر نکل آئے, ابھی انہوں نے چند قدم ہی اٹھائے تھے کہ خادم بھاگتا ہوا آیا
” سپہ سالار تشریف لے آئے امیرمحترم…” انہوں نے بڑے تاسف سے سامنے سے بھاگ کر آتے ہوئے دارین کو دیکھا تھا
” بابا میں…” اس کی بات سننے سے پہلے ہی ان کا ہاتھ چٹاخ کی آواز کے ساتھ اس کا گال رنگ گیا تھا, وہاں موجود ہر زی روح نے سر جھکا لیا, دارین ان سے نظریں نہ ملا سکا
“بابا ہم شرمندہ ہیں ” وہ مدھم سی آواز میں بولا تھا “تم شرمندہ ہو کر بھی زندہ کیسے ہو دارین ؟ تم شرم سے ڈوب کر مر کیوں نہیں گئے” ان کی آواز اونچی ہو گئی
“بابا وہ صبح بالکل ٹھیک تھیں, ہم ان کی اجازت لے کر شکار پر گئے تھے” اس نے اپنی صفائی دینی چاہی “تمہیں کس نے کہہ دیا دارین کے وہ بالکل ٹھیک تھی, کوئی بھی عورت اپنے حمل کے آخری دنوں میں بالکل ٹھیک نہیں ہوتی, ہم نے ان دنوں تم پر سے ہر ذمہ داری ختم کر دی تھی, فوج کے معاملات ایبک کے سپرد کردیئے, تمہیں دربار میں طلب کرنا بند کر دیا, سرحدی گشتوں کے لیے تمہارا نام بھیجنا بند کر دیا, صرف اس لیے کہ تم پارسا کے پاس رہو, اپنا زیادہ سے زیادہ وقت اس کے ساتھ گزارو, اس کی خوشی کے لئے صرف تمہیں دیکھ لینا ہی کافی ہوتا ہے, لیکن تم نے کیا کیا دارین… تم اسے تنہا چھوڑ کر شکار پر چلے گئے” ان کی آواز بلند ہوتی چلی گئی
” تمہیں یہاں موجود ہونا چاہیے تھا دارین, اس دروازے سے باہر… اس دیوار سے ٹیک لگائے ہوئے… اس کی ہر ہر چیخ کو سنتے ہوئے, اس کے آنسو اپنے دل پر گرتے محسوس کرتے ہوئے, اس کی ہر ہر چیخ کے ساتھ اس کے دکھ کو محسوس کرتے ہوئے, اس کی تکلیف میں اس کے ساتھ روتے ہوئے, تاکہ تمہارا سر ہمیشہ اس کے سامنے جھکا رہتا, تاکہ تمہیں ہمیشہ یاد رہتا کہ تمہارے بیٹے کو اس دنیا میں لاتے ہوئے وہ کس کرب سے گزری تھی, تاکہ تمہیں پتا ہوتا کہ وہ تم سے زیادہ بہادر ہے کیونکہ اس نے ایک بچے کو جنم دیا ہے” غصے سے ان کی آواز لرزنے لگی تھی
” ہمیں معاف کر دیں بابا… ہم پرنور سے بھی معافی مانگ لیں گے” اسں نے بے بس ہو کر اپنے دونوں ہاتھ ان کے سامنے جوڑ دیے تھے, وہاں موجود ہر ذی روح کا دل پگھل گیا تھا سوائے نعلین عباس شاہ کے
“میں تمہیں معاف کر دوں گا دارین اگر اللہ نے تمہیں معاف کر دیا ” وہ بولے
“بابا خدا کے لئے…” وہ بے بس ہو گیا
“دروج کی جنوبی سرحدوں پر آج سے گشت کی ذمہ داری تمہاری ہے, پورے ہفتے یہ ذمہ داری تم نبھاؤ گے, ابھی روانہ ہو جاؤ اور وہاں موجود کمان دار کو واپس بھیج دینا” وہ اسے معاف کرنے کے لئے تیار نہیں تھے
” بابا خدا کے لیے ایسا مت کریں, اسے ہماری پہلی اور آخری غلطی سمجھ کر معاف کر دیں ” وہ گڑگڑا رہا تھا
“اگر آج ہم نے تمہیں معاف کر دیا تو دروج کا ہر شخص اپنی بیوی کو کڑے وقت میں چھوڑ کر شکار پر چلا جایا کرے گا, جاؤ… واپس آکر اپنی بیوی اور بچے سے مل لینا” وہ کہتے ہوئے آگے بڑھے اور چند قدم چل کہ دوبارہ رکے
” ہم چاہتے ہیں کہ تم ظہر کی نماز سے پہلےروانہ ہو جاؤ کیونکہ ہم تمہیں اس ذات باری تعالیٰ کے سامنے شکرانہ ادا کرنے کے قابل بھی نہیں سمجھتے” انتہائی سخت الفاظ میں کہتے ہوئے وہ وہاں سے چلے گئے تھے, اس نے بے بسی سے آنکھیں بند کی تھیں اور چند لمحوں بعد ایک نظر بند دروازے کو دیکھتا ہوا واپس مڑ گیا تھا
اور پھر زمین و آسمان نے ایسا منظر دیکھا جو پہلے کبھی نہ دیکھا تھا, سارا دروج سید دارین عباس شاہ کے بیٹے کے شکرانے کے نوافل ادا کر رہا تھا اور وہ خود اپنے گھوڑے پر سوار شہر سے نکال دیا گیا تھا, اس کا جرم صرف اتنا تھا کہ وہ اپنے بچے کی پیدائش کے وقت اپنی بیوی کے پاس موجود نہیں تھا…یہ تھا دروج کے امیر کا انصاف جو اپنے بیٹے کے لئے بھی نہیں بدلا تھا
جاری ہے