Apne Hisse Ka Diya by Asma Qadri Novel20822

Romance | Family Drama | Emotional Journey | Social Issues | Contemporary Fiction

ہاں، بس میں سوچ رہا تھا کہ ہم اتنے دنوں سے ایک دوسرے کو جانتے ہیں، لیکن ہم نے کبھی ایک دوسرے کو اپنے فیملی بیک گراؤنڈ کے بارے میں بتایا ہی نہیں۔

“تو آج بتا دیتے ہیں۔ ویسے تو میرے خیال میں اس کی اتنی خاص ضرورت نہیں ہے۔” وہ بدستور پُرسکون تھی۔

“نہیں، آج مجھے محسوس ہو رہا ہے کہ کم از کم میرا فیملی بیک گراؤنڈ تمہیں معلوم ہونا چاہیے، ورنہ ہو سکتا ہے کسی دن تم مجھ سے شکوہ کرو۔”

عمر کا لہجہ غیر معمولی حد تک سنجیدہ تھا۔

فائقہ کو کسی بڑے انکشاف کا احساس ہوا۔ وہ دھڑکتے دل کے ساتھ عمر کی بات سننے لگی۔

“میرے والدین معاشرے کے اُس طبقے سے تعلق رکھتے تھے جنہیں لوگ نہایت حقارت سے ‘بھنگی’ کہتے ہیں، جبکہ مہذب لوگ انہیں خاکروب کہتے ہیں۔ میرے والد صبح اذان سے بھی پہلے گھر سے نکل جاتے اور شہر کی سڑکوں اور گلیوں میں جھاڑو لگاتے تھے۔

میری والدہ کا تعلق بھی اسی خاندان سے تھا۔ وہ اپنے خاندان کی سب سے خوبصورت لڑکی تھیں۔ میرے والد نے کبھی یہ پسند نہیں کیا کہ ان کی خوبصورت بیوی سڑکوں پر جھاڑو لگائے، اس لیے انہوں نے انہیں یہ کام نہیں کرنے دیا۔ البتہ بہتر گزر بسر کے لیے میری والدہ لوگوں کے گھروں میں صفائی ستھرائی اور کپڑے دھونے کا کام کرنے لگیں۔

وہ جن گھروں میں کام کرتی تھیں، وہاں اپنی اصل حقیقت ظاہر نہیں کرتی تھیں، کیونکہ اگر لوگوں کو ان کی حقیقت معلوم ہو جاتی تو شاید کوئی انہیں اپنے گھر کام کرنے نہ دیتا۔ ویسے بھی میری والدہ کی شخصیت ایسی تھی کہ لوگ یہی سمجھتے تھے کہ وہ کسی غریب مگر شریف خاندان سے تعلق رکھتی ہیں۔

جن گھروں میں وہ کام کرتی تھیں، ان میں سے ایک گھر میں باقاعدگی سے دینی درس ہوتا تھا۔ وہاں ایک بزرگ خاتون، جنہیں سب ‘دادی’ کہہ کر پکارتے تھے، درس دیا کرتی تھیں۔ وہ نہایت خوش اخلاق اور نرم دل خاتون تھیں۔

میری والدہ اکثر ان کا درس سننے بیٹھ جاتیں۔ آہستہ آہستہ وہ اسلام کی تعلیمات سے بہت متاثر ہوئیں، یہاں تک کہ ایک دن انہوں نے اسلام قبول کرنے کا فیصلہ کر لیا اور اپنی خواہش دادی کے سامنے ظاہر کر دی۔